కల్పానోకహపుష్పజాలవిలసన్నీలాలకాం మాతృకాం
కాన్తాం కఞ్జదళేక్షణాం కలిమలప్రధ్వంసినీం కాళికామ్ ।
కాఞ్చీనూపురహారదామసుభగాం కాఞ్చీపురీనాయికాం
కామాక్షీం కరికుమ్భసన్నిభకుచాం వన్దే మహేశప్రియామ్ ॥ 1 ॥
కాశాభాం శుకభాసురాం ప్రవిలసత్కోశాతకీ సన్నిభాం
చన్ద్రార్కానలలోచనాం సురుచిరాలఙ్కారభూషోజ్జ్వలామ్ ।
బ్రహ్మశ్రీపతివాసవాదిమునిభిః సంసేవితాఙ్ఘ్రిద్వయాం
కామాక్షీం గజరాజమన్దగమనాం వన్దే మహేశప్రియామ్ ॥ 2 ॥
ఐం క్లీం సౌరితి యాం వదన్తి మునయస్తత్త్వార్థరూపాం పరాం
వాచామాదిమకారణం హృది సదా ధ్యాయన్తి యాం యోగినః ।
బాలాం ఫాలవిలోచనాం నవజపావర్ణాం సుషుమ్నాశ్రితాం
కామాక్షీం కలితావతంససుభగాం వన్దే మహేశప్రియామ్ ॥ 3 ॥
యత్పాదామ్బుజరేణులేశమనిశం లబ్ధ్వా విధత్తే విధి-
-ర్విశ్వం తత్పరిపాతి విష్ణురఖిలం యస్యాః ప్రసాదాచ్చిరమ్ ।
రుద్రః సంహరతి క్షణాత్తదఖిలం యన్మాయయా మోహితః
కామాక్షీమతిచిత్రచారుచరితాం వన్దే మహేశప్రియామ్ ॥ 4 ॥
సూక్ష్మాత్సూక్ష్మతరాం సులక్షితతనుం క్షాన్తాక్షరైర్లక్షితాం
వీక్షాశిక్షితరాక్షసాం త్రిభువనక్షేమఙ్కరీమక్షయామ్ ।
సాక్షాల్లక్షణలక్షితాక్షరమయీం దాక్షాయణీం సాక్షిణీం
కామాక్షీం శుభలక్షణైః సులలితాం వన్దే మహేశప్రియామ్ ॥ 5 ॥
ఓఙ్కారాఙ్గణదీపికాముపనిషత్ప్రాసాదపారావతీం
ఆమ్నాయామ్బుధిచన్ద్రికామఘతమఃప్రధ్వంసహంసప్రభామ్ ।
కాఞ్చీపట్టణపఞ్జరాన్తరశుకీం కారుణ్యకల్లోలినీం
కామాక్షీం శివకామరాజమహిషీం వన్దే మహేశప్రియామ్ ॥ 6 ॥
హ్రీఙ్కారాత్మకవర్ణమాత్రపఠనాదైన్ద్రీం శ్రియం తన్వతీం
చిన్మాత్రాం భువనేశ్వరీమనుదినం భిక్షాప్రదానక్షమామ్ ।
విశ్వాఘౌఘనివారిణీం విమలినీం విశ్వమ్భరాం మాతృకాం
కామాక్షీం పరిపూర్ణచన్ద్రవదనాం వన్దే మహేశప్రియామ్ ॥ 7 ॥
వాగ్దేవీతి చ యాం వదన్తి మునయః క్షీరాబ్ధికన్యేతి చ
క్షోణీభృత్తనయేతి చ శ్రుతిగిరో యాం ఆమనన్తి స్ఫుటమ్ ।
ఏకానేకఫలప్రదాం బహువిధాఽఽకారాస్తనూస్తన్వతీం
కామాక్షీం సకలార్తిభఞ్జనపరాం వన్దే మహేశప్రియామ్ ॥ 8 ॥
మాయామాదిమకారణం త్రిజగతామారాధితాఙ్ఘ్రిద్వయాం
ఆనన్దామృతవారిరాశినిలయాం విద్యాం విపశ్చిద్ధియామ్ ।
మాయామానుషరూపిణీం మణిలసన్మధ్యాం మహామాతృకాం
కామాక్షీం కరిరాజమన్దగమనాం వన్దే మహేశప్రియామ్ ॥ 9 ॥
కాన్తా కామదుఘా కరీన్ద్రగమనా కామారివామాఙ్కగా
కల్యాణీ కలితావతారసుభగా కస్తూరికాచర్చితా
కమ్పాతీరరసాలమూలనిలయా కారుణ్యకల్లోలినీ
కల్యాణాని కరోతు మే భగవతీ కాఞ్చీపురీదేవతా ॥ 10 ॥
ఇతి శ్రీ కామాక్షీ స్తోత్రమ్ ।
