వన్దే గజేన్ద్రవదనం
వామాఙ్కారూఢవల్లభాశ్లిష్టమ్ ।
కుఙ్కుమపరాగశోణం
కువలయినీజారకోరకాపీడమ్ ॥ 1 ॥
స జయతి సువర్ణశైలః
సకలజగచ్చక్రసఙ్ఘటితమూర్తిః ।
కాఞ్చననికుఞ్జవాటీ-
-కన్దలదమరీప్రపఞ్చసఙ్గీతః ॥ 2 ॥
హరిహయనైరృతమారుత-
-హరితామన్తేష్వవస్థితం తస్య ।
వినుమః సానుత్రితయం
విధిహరిగౌరీశవిష్టపాధారమ్ ॥ 3 ॥
మధ్యే పునర్మనోహర-
-రత్నరుచిస్తబకరఞ్జితదిగన్తమ్ ।
ఉపరి చతుఃశతయోజన-
-ముత్తుఙ్గం శృఙ్గపుఙ్గవముపాసే ॥ 4 ॥
తత్ర చతుఃశతయోజన-
-పరిణాహం దేవశిల్పినా రచితమ్ ।
నానాసాలమనోజ్ఞం
నమామ్యహం నగరమాదివిద్యాయాః ॥ 5 ॥
ప్రథమం సహస్రపూర్వక-
-షట్శతసఙ్ఖ్యాకయోజనం పరితః ।
వలయీకృతస్వగాత్రం
వరణం శరణం వ్రజామ్యయోరూపమ్ ॥ 6 ॥
తస్యోత్తరే సమీరణ-
-యోజనదూరే తరఙ్గితచ్ఛాయః ।
ఘటయతు ముదం ద్వితీయో
ఘణ్టాస్తనసారనిర్మితః సాలః ॥ 7 ॥
ఉభయోరన్తరసీమ-
-న్యుద్దామభ్రమరరఞ్జితోదారమ్ ।
ఉపవనముపాస్మహే వయ-
-మూరీకృతమన్దమారుతస్యన్దమ్ ॥ 8 ॥
ఆలిఙ్గ్య భద్రకాలీ-
-మాసీనస్తత్ర హరిశిలాశ్యామామ్ ।
మనసి మహాకాలో మే
విహరతు మధుపానవిభ్రమన్నేత్రః ॥ 9 ॥
తార్తీయీకో వరణ-
-స్తస్యోత్తరసీమ్ని వాతయోజనతః ।
తామ్రేణ రచితమూర్తి-
-స్తనుతామాచన్ద్రతారకం భద్రమ్ ॥ 10 ॥
మధ్యే తయోశ్చ మణిమయ-
-పల్లవశాఖాప్రసూనపక్ష్మలితామ్ ।
కల్పానోకహవాటీం
కలయే మకరన్దపఙ్కిలావాలామ్ ॥ 11 ॥
తత్ర మధుమాధవశ్రీ-
-తరుణీభ్యాం తరలదృక్చకోరాభ్యామ్ ।
ఆలిఙ్గితోఽవతాన్మా-
-మనిశం ప్రథమర్తురాత్తపుష్పాస్త్రః ॥ 12 ॥
నమత తదుత్తరభాగే
నాకిపథోల్లఙ్ఘిశృఙ్గసఙ్ఘాతమ్ ।
సీసాకృతిం తురీయం
సితకిరణాలోకనిర్మలం సాలమ్ ॥ 13 ॥
సాలద్వయాన్తరాలే
సరలాలికపోతచాటుసుభగాయామ్ ।
సన్తానవాటికాయాం
సక్తం చేతోఽస్తు సతతమస్మాకమ్ ॥ 14 ॥
తత్ర తపనాతిరూక్షః
సామ్రాజ్ఞీచరణసాన్ద్రితస్వాన్తః ।
శుక్రశుచిశ్రీసహితో
గ్రీష్మర్తుర్దిశతు కీర్తిమాకల్పమ్ ॥ 15 ॥
ఉత్తరసీమని తస్యో-
-న్నతశిఖరోత్కమ్పిహాటకపతాకః ।
ప్రకటయతు పఞ్చమో నః
ప్రాకారః కుశలమారకూటమయః ॥ 16 ॥
ప్రాకారయోశ్చ మధ్యే
పల్లవితాన్యభృతపఞ్చమోన్మేషా ।
హరిచన్దనద్రువాటీ-
-హరతాదామూలమస్మదనుతాపమ్ ॥ 17 ॥
తత్ర నభః శ్రీముఖ్యై-
-స్తరుణీవర్గైః సమన్వితః పరితః ।
వజ్రాట్టహాసముఖరో
వాఞ్ఛాపూర్తిం తనోతు వర్షర్తుః ॥ 18 ॥
మారుతయోజనదూరే
మహనీయస్తస్య చోత్తరే భాగే ।
భద్రం కృషీష్ట షష్ఠః
ప్రాకారః పఞ్చలోహధాతుమయః ॥ 19 ॥
అనయోర్మధ్యే సన్తత-
-మఙ్కూరద్దివ్యకుసుమగన్ధాయామ్ ।
మన్దారవాటికాయాం
మానసమఙ్గీకరోతు మే విహృతిమ్ ॥ 20 ॥
తస్యామిషోర్జలక్ష్మీ-
-తరుణీభ్యాం శరదృతుః సదా సహితః ।
అభ్యర్చయన్ స జీయా-
-దమ్బామామోదమేదురైః కుసుమైః ॥ 21 ॥
తస్యర్షిసఙ్ఖ్యయోజన-
-దూరే దేదీప్యమానశృఙ్గౌఘః ।
కలధౌతకలితమూర్తిః
కల్యాణం దిశతు సప్తమః సాలః ॥ 22 ॥
మధ్యే తయోర్మరుత్పథ
లఙ్ఘితవిటపాగ్రవిరుతకలకణ్ఠా ।
శ్రీపారిజాతవాటీ
శ్రియమనిశం దిశతు శీతలోద్దేశా ॥ 23 ॥
తస్యామతిప్రియాభ్యాం
సహ ఖేలన్ సహసహస్యలక్ష్మీభ్యామ్ ।
సామన్తో ఝషకేతో-
-ర్హేమన్తో భవతు హేమవృద్ధ్యై నః ॥ 24 ॥
ఉత్తరతస్తస్య మహా-
-నుద్భటహుతభుక్శిఖారుణమయూఖః ।
తపనీయఖణ్డరచిత-
-స్తనుతాదాయుష్యమష్టమో వరణః ॥ 25 ॥
కాదమ్బవిపినవాటీ-
-మనయోర్మధ్యభువి కల్పితావాసామ్ ।
కలయామి సూనకోరక-
-కన్దలితామోదతున్దిలసమీరామ్ ॥ 26 ॥
తస్యామతిశిశిరాకృతి-
-రాసీనస్తపతపస్యలక్ష్మీభ్యామ్ ।
శివమనిశం కురుతాన్మే
శిశిరర్తుః సతతశీతలదిగన్తః ॥ 27 ॥
తస్యాం కదమ్బవాట్యాం
తత్ప్రసవామోదమిలితమధుగన్ధమ్ ।
సప్తావరణమనోజ్ఞం
శరణం సముపైమి మన్త్రిణీశరణమ్ ॥ 28 ॥
తత్రాలయే విశాలే
తపనీయారచితతరలసోపానే ।
మాణిక్యమణ్డపాన్త-
-ర్మహితే సింహాసనే సుమణిఖచితే ॥ 29 ॥
బిన్దుత్రిపఞ్చకోణ-
-ద్విపనృపవసువేదదలకురేఖాఢ్యే ।
చక్రే సదా నివిష్టాం
షష్ఠ్యష్టత్రింశదక్షరేశానీమ్ ॥ 30 ॥
తాపిఞ్ఛమేచకాభాం
తాలీదలఘటితకర్ణతాటఙ్కామ్ ।
తామ్బూలపూరితముఖీం
తామ్రాధరబిమ్బదృష్టదరహాసామ్ ॥ 31 ॥
కుఙ్కుమపఙ్కిలదేహాం
కువలయజీవాతుశావకవతంసామ్ ।
కోకనదశోణచరణాం
కోకిలనిక్వాణకోమలాలాపామ్ ॥ 32 ॥
వామాఙ్గగలితచూలీం
వనమాల్యకదమ్బమాలికాభరణామ్ ।
ముక్తాలలన్తికాఞ్చిత
ముగ్ధాలికమిలితచిత్రకోదారామ్ ॥ 33 ॥
కరవిధృతకీరశావక-
-కలనినదవ్యక్తనిఖిలనిగమార్థామ్ ।
వామకుచసఙ్గివీణావాదన-
-సౌఖ్యార్ధమీలితాక్షియుగామ్ ॥ 34 ॥
ఆపాటలాంశుకధరా-
-మాదిరసోన్మేషవాసితకటాక్షామ్ ।
ఆమ్నాయసారగులికా-
-మాద్యాం సఙ్గీతమాతృకాం వన్దే ॥ 35 ॥
తస్య చ సువర్ణసాల-
-స్యోత్తరతస్తరుణకుఙ్కుమచ్ఛాయః ।
శమయతు మమ సన్తాపం
సాలో నవమః స పుష్పరాగమయః ॥ 36 ॥
అనయోరన్తరవసుధాః
ప్రణుమః ప్రత్యగ్రపుష్పరాగమయీః ।
సింహాసనేశ్వరీమను-
-చిన్తననిస్తన్ద్రసిద్ధనీరన్ధ్రాః ॥ 37 ॥
తత్సాలోత్తరదేశే
తరుణజపాకిరణధోరణీశోణః ।
ప్రశమయతు పద్మరాగ-
-ప్రాకారో మమ పరాభవం దశమః ॥ 38 ॥
అన్తరభూకృతవాసా-
-ననయోరపనీతచిత్తవైమత్యాన్ ।
చక్రేశీపదభక్తాం-
-శ్చారణవర్గానహర్నిశం కలయే ॥ 39 ॥
సారఙ్గవాహయోజనదూరే-
-ఽసఙ్ఘటితకేతనస్తస్య ।
గోమేదకేన రచితో
గోపాయతు మాం సమున్నతః సాలః ॥ 40 ॥
వప్రద్వయాన్తరోర్వ్యాం
వటుకైర్వివిధైశ్చ యోగినీబృన్దైః ।
సతతం సమర్చితాయాః
సఙ్కర్షణ్యాః ప్రణౌమి చరణాబ్జమ్ ॥ 41 ॥
తాపసయోజనదూరే
తస్య సముత్తుఙ్గ గోపురోపేతః ।
వాఞ్ఛాపూర్త్యై భవతా-
-ద్వజ్రమణీనికరనిర్మితో వప్రః ॥ 42 ॥
వరణద్వితయాన్తరతో
వాసజుషో విహితమధురసాస్వాదాః ।
రమ్భాదివిబుధవేశ్యా
రచయన్తు మహాన్తమస్మదానన్దమ్ ॥ 43 ॥
తత్ర సదా ప్రవహన్తీ
తటినీ వజ్రాభిధా చిరం జీయాత్ ।
చటులోర్మిజాలనృత్య-
-త్కలహంసీకులకలక్వణితపుష్టా ॥ 44 ॥
రోధసి తస్యా రుచిరే
వజ్రేశీ జయతి వజ్రభూషాఢ్యా ।
వజ్రప్రదానతోషిత-
-వజ్రిముఖత్రిదశవినుతచారిత్రా ॥ 45 ॥
తస్యోదీచ్యాం హరితి
స్తవకితసుషమావలీఢవియదన్తః ।
వైడూర్యరత్నరచితో
వైమల్యం దిశతు చేతసో వరణః ॥ 46 ॥
అధిమధ్యమేతయోః పున-
-రమ్బాచరణావలమ్బితస్వాన్తాన్ ।
కార్కోటకాదినాగాన్
కలయామః కిం చ బలిముఖాన్ దనుజాన్ ॥ 47 ॥
గన్ధవహసఙ్ఖ్యయోజన-
-దూరే గగనోర్ధ్వజాఙ్ఘికస్తస్య ।
వాసవమణిప్రణీతో
వరణో బహలయతు వైదుషీం విశదామ్ ॥ 48 ॥
మధ్యక్షోణ్యామనయో-
-ర్మహేన్ద్రనీలాత్మకాని చ సరాంసి ।
శాతోదరీసహాయా-
-న్భూపాలానపి పునః పునః ప్రణుమః ॥ 49 ॥
ఆశుగయోజనదూరే
తస్యోర్ధ్వం కాన్తిధవలితదిగన్తః ।
ముక్తావిరచితగాత్రో
ముహురస్మాకం ముదే భవతు సాలః ॥ 50 ॥
ఆవృత్త్యోరధిమధ్యం
పూర్వస్యాం దిశి పురన్దరః శ్రీమాన్ ।
అభ్రమువిటాధిరూఢో
విభ్రమమస్మాకమనిశమాతనుతాత్ ॥ 51 ॥
తత్కోణే వ్యజనస్రు-
-క్తోమరపాత్రస్రువాన్నశక్తిధరః ।
స్వాహాస్వధాసమేతః
సుఖయతు మాం హవ్యవాహనః సుచిరమ్ ॥ 52 ॥
దక్షిణదిగన్తరాలే
దణ్డధరో నీలనీరదచ్ఛాయః ।
త్రిపురాపదాబ్జభక్తస్తిరయతు
మమ నిఖిలమంహసాం నికరమ్ ॥ 53 ॥
తస్యైవ పశ్చిమాయాం
దిశి దలితేన్దీవరప్రభాశ్యామః ।
ఖేటాసియష్టిధారీ
ఖేదానపనయతు యాతుధానో మే ॥ 54 ॥
తస్యా ఉత్తరదేశే
ధవలాఙ్గో విపులఝషవరారూఢః ।
పాశాయుధాత్తపాణిః
పాశీ విదలయతు పాశజాలాని ॥ 55 ॥
వన్దే తదుత్తరహరి-
-త్కోణే వాయుం చమూరువరవాహమ్ ।
కోరకితతత్త్వబోధా-
-న్గోరక్షప్రముఖయోగినోఽపి ముహుః ॥ 56 ॥
తరుణీరిడాప్రధానా-
-స్తిస్రో వాతస్య తస్య కృతవాసాః ।
ప్రత్యగ్రకాపిశాయన-
-పానపరిభ్రాన్తలోచనాః కలయే ॥ 57 ॥
తల్లోకపూర్వభాగే
ధనదం ధ్యాయామి శేవధికులేశమ్ ।
అపి మాణిభద్రముఖ్యా-
-నమ్బాచరణావలమ్బినో యక్షాన్ ॥ 58 ॥
తస్యైవ పూర్వసీమని
తపనీయారచితగోపురే నగరే ।
కాత్యాయనీసహాయం
కలయే శీతాంశుఖణ్డచూడాలమ్ ॥ 59 ॥
తత్పురషోడశవరణ-
-స్థలభాజస్తరుణచన్ద్రచూడాలాన్ ।
రుద్రాధ్యాయే పఠితా-
-న్రుద్రాణీసహచరాన్భజే రుద్రాన్ ॥ 60 ॥
పవమానసఙ్ఖ్యయోజన-
-దూరే బాలతృణ్మేచకస్తస్య ।
సాలో మరకతరచితః
సమ్పదమచలాం శ్రియం చ పుష్ణాతు ॥ 61 ॥
ఆవృతియుగ్మాన్తరతో
హరితమణీనివహమేచకే దేశే ।
హాటకతాలీవిపినం
హాలాఘటఘటితవిటపమాకలయే ॥ 62 ॥
తత్రైవ మన్త్రిణీగృహ-
-పరిణాహం తరలకేతనం సదనమ్ ।
మరకతసౌధమనోజ్ఞం
దద్యాదాయూంషి దణ్డనాథాయాః ॥ 63 ॥
సదనే తత్ర హరిన్మణి-
-సఙ్ఘటితే మణ్డపే శతస్తమ్భే ।
కార్తస్వరమయపీఠే
కనకమయామ్బురుహకర్ణికామధ్యే ॥ 64 ॥
బిన్దుత్రికోణవర్తుల-
-షడస్రవృత్తద్వయాన్వితే చక్రే ।
సఞ్చారిణీ దశోత్తర-
శతార్ణమనురాజకమలకలహంసీ ॥ 65 ॥
కోలవదనా కుశేశయ-
-నయనా కోకారిమణ్డితశిఖణ్డా ।
సన్తప్తకాఞ్చనాభా
సన్ధ్యారుణచేలసంవృతనితమ్బా ॥ 66 ॥
హలముసలశఙ్ఖచక్రా-
-ఽఙ్కుశపాశాభయవరస్ఫురితహస్తా ।
కూలఙ్కషానుకమ్పా
కుఙ్కుమజమ్బాలితస్తనాభోగా ॥ 67 ॥
ధూర్తానామతిదూరా-
-వార్తాశేషావలగ్నకమనీయా ।
ఆర్తాలీశుభదాత్రీ
వార్తాలీ భవతు వాఞ్ఛితార్థాయ ॥ 68 ॥
తస్యాః పరితో దేవీః
స్వప్నేశ్యున్మత్తభైరవీముఖ్యాః ।
ప్రణమత జమ్భిన్యాద్యాః
భైరవవర్గాంశ్చ హేతుకప్రముఖాన్ ॥ 69 ॥
పూర్వోక్తసఙ్ఖ్యయోజన-
-దూరే పూయాంశుపాటలస్తస్య ।
విద్రావయతు మదార్తిం
విద్రుమసాలో విశఙ్కటద్వారః ॥ 70 ॥
ఆవరణయోరహర్నిశ-
-మన్తరభూమౌప్రకాశశాలిన్యామ్ ।
ఆసీనమమ్బుజాసన-
-మభినవసిన్దూరగౌరమహమీడే ॥ 71 ॥
వరణస్య తస్య మారుత-
-యోజనతో విపులగోపురద్వారః ।
సాలో నానారత్నైః
సఙ్ఘటితాఙ్గః కృషీష్ట మదభీష్టమ్ ॥ 72 ॥
అన్తరకక్ష్యామనయో-
-రవిరలశోభాపిచణ్డిలోద్దేశామ్ ।
మాణిక్యమణ్డపాఖ్యాం
మహతీమధిహృదయమనిశమాకలయే ॥ 73 ॥
తత్ర స్థితం ప్రసన్నం
తరుణతమాలప్రవాలకిరణాభమ్ ।
కర్ణావలమ్బికుణ్డల-
-కన్దలితాభీశుకవచితకపోలమ్ ॥ 74 ॥
శోణాధరం శుచిస్మిత-
-మేణాఙ్కవదనమేధమానకృపమ్ ।
ముగ్ధైణమదవిశేషక-
-ముద్రితనిటిలేన్దురేఖికారుచిరమ్ ॥ 75 ॥
నాలీకదలసహోదర-
-నయనాఞ్చలఘటితమనసిజాకూతమ్ ।
కమలాకఠినపయోధర-
-కస్తూరీఘుసృణపఙ్కిలోరస్కమ్ ॥ 76 ॥
చామ్పేయగన్ధికైశ్యం
శమ్పాసబ్రహ్మచారికౌశేయమ్ ।
శ్రీవత్సకౌస్తుభధరం
శ్రితజనరక్షాధురీణచరణాబ్జమ్ ॥ 77 ॥
కమ్బుసుదర్శనవిలస-
-త్కరపద్మం కణ్ఠలోలవనమాలమ్ ।
ముచుకున్దమోక్షఫలదం
ముకున్దమానన్దకన్దమవలమ్బే ॥ 78 ॥
తద్వరణోత్తరభాగే
తారాపతిబిమ్బచుమ్బినిజశృఙ్గః ।
వివిధమణీగణఘటితో
వితరతు సాలో వినిర్మలాం ధిషణామ్ ॥ 79 ॥
ప్రాకారద్వితయాన్తర-
-కక్ష్యాం పృథురత్ననికరసఙ్కీర్ణామ్ ।
నమత సహస్రస్తమ్భక-
-మణ్డపనామ్నాతివిశ్రుతాం భువనే ॥ 80 ॥
ప్రణుమస్తత్ర భవానీ-
-సహచరమీశానమిన్దుఖణ్డధరమ్ ।
శృఙ్గారనాయికామను-
-శీలనభాజోఽపి భృఙ్గినన్దిముఖాన్ ॥ 81 ॥
తస్యైణవాహయోజన-
-దూరే వన్దే మనోమయం వప్రమ్ ।
అఙ్కూరన్మణికిరణా-
-మన్తరకక్ష్యాం చ నిర్మలామనయోః ॥ 82 ॥
తత్రైవామృతవాపీం
తరలతరఙ్గావలీఢతటయుగ్మామ్ ।
ముక్తామయకలహంసీ-
-ముద్రితకనకారవిన్దసన్దోహామ్ ॥ 83 ॥
శక్రోపలమయభృఙ్గీ-
-సఙ్గీతోన్మేషఘోషితదిగన్తామ్ ।
కాఞ్చనమయాఙ్గవిలస-
-త్కారణ్డవషణ్డతాణ్డవమనోజ్ఞామ్ ॥ 84 ॥
కురువిన్దాత్మకహల్లక-
-కోరకసుషమాసమూహపాటలితామ్ ।
కలయే సుధాస్వరూపాం
కన్దలితామన్దకైరవామోదామ్ ॥ 85 ॥
తద్వాపికాన్తరాలే తరలే
మణిపోతసీమ్ని విహరన్తీమ్ ।
సిన్దూరపాటలాఙ్గీం
సితకిరణాఙ్కూరకల్పితవతంసామ్ ॥ 86 ॥
పర్వేన్దుబిమ్బవదనాం
పల్లవశోణాధరస్ఫురితహాసామ్ ।
కుటిలకబరీం కురఙ్గీ-
-శిశునయనాం కుణ్డలస్ఫురితగణ్డామ్ ॥ 87 ॥
నికటస్థపోతనిలయాః
శక్తీః శయవిధృతహేమశృఙ్గజలైః ।
పరిషిఞ్చన్తీం పరిత-
-స్తారాం తారుణ్యగర్వితాం వన్దే ॥ 88 ॥
ప్రాగుక్తసఙ్ఖ్యయోజనదూరే
ప్రణమామి బుద్ధిమయసాలమ్ ।
అనయోరన్తరకక్ష్యా-
-మష్టాపదపుష్టమేదినీం రుచిరామ్ ॥ 89 ॥
కాదమ్బరీనిధానాం
కలయామ్యానన్దవాపికాం తస్యామ్ ।
శోణాశ్మనివహనిర్మిత-
-సోపానశ్రేణిశోభమానతటీమ్ ॥ 90 ॥
మాణిక్యతరణినిలయాం
మధ్యే తస్యా మదారుణకపోలామ్ ।
అమృతేశీత్యభిధానా-
-మన్తః కలయామి వారుణీం దేవీమ్ ॥ 91 ॥
సౌవర్ణకేనిపాతన-
-హస్తాః సౌన్దర్యగర్వితా దేవ్యః ।
తత్పురతః స్థితిభాజో
వితరన్త్వస్మాకమాయుషో వృద్ధిమ్ ॥ 92 ॥
తస్య పృషదశ్వయోజన-
-దూరేఽహఙ్కారసాలమతితుఙ్గమ్ ।
వన్దే తయోశ్చ మధ్యే
కక్ష్యాం వలమానమలయపవమానామ్ ॥ 93 ॥
వినుమో విమర్శవాపీం
సౌషుమ్నసుధాస్వరూపిణీం తత్ర ।
వేలాతిలఙ్ఘ్యవీచీ-
-కోలాహలభరితకూలవనవాటీమ్ ॥ 94 ॥
తత్రైవ సలిలమధ్యే
తాపిఞ్ఛదలప్రపఞ్చసుషమాభామ్ ।
శ్యామలకఞ్చుకలసితాం
శ్యామావిటబిమ్బడమ్బరహరాస్యామ్ ॥ 95 ॥
ఆభుగ్నమసృణచిల్లీ-
-హసితాయుగ్మశరకార్ముకవిలాసామ్ ।
మన్దస్మితాఞ్చితముఖీం
మణిమయతాటఙ్కమణ్డితకపోలామ్ ॥ 96 ॥
కురువిన్దతరణినిలయాం
కులాచలస్పర్ధికుచనమన్మధ్యామ్ ।
కుఙ్కుమవిలిప్తగాత్రీం
కురుకుల్లాం మనసి కుర్మహే సతతమ్ ॥ 97 ॥
తత్సాలోత్తరభాగే
భానుమయం వప్రమాశ్రయే దీప్తమ్ ।
మధ్యం చ విపులమనయో-
-ర్మన్యే విశ్రాన్తమాతపోద్గారమ్ ॥ 98 ॥
తత్ర కురువిన్దపీఠే
తామరసే కనకకర్ణికాఘటితే ।
ఆసీనమరుణవాసస-
-మమ్లానప్రసవమాలికాభరణమ్ ॥ 99 ॥
చక్షుష్మతీప్రకాశన-
-శక్తిచ్ఛాయాసమారచితకేలిమ్ ।
మాణిక్యముకుటరమ్యం
మన్యే మార్తాణ్డభైరవం హృదయే ॥ 100 ॥
ఇన్దుమయసాలమీడే
తస్యోత్తరతస్తుషారగిరిగౌరమ్ ।
అత్యన్తశిశిరమారుత-
-మనయోర్మధ్యం చ చన్ద్రికోద్గారమ్ ॥ 101 ॥
తత్ర ప్రకాశమానం
తారానికరైః పరిష్కృతోద్దేశమ్ ।
అమృతమయకాన్తికన్దల-
-మన్తః కలయామి కున్దసితమిన్దుమ్ ॥ 102 ॥
శృఙ్గారసాలమీడే
శృఙ్గోల్లసితం తదుత్తరే భాగే ।
మధ్యస్థలే తయోరపి
మహితాం శృఙ్గారపూర్వికాం పరిఖామ్ ॥ 103 ॥
తత్ర మణినౌస్థితాభి-
-స్తపనీయావిరచితాగ్రహస్తాభిః ।
శృఙ్గారదేవతాభిః
సహితం పరిఖాధిపం భజే మదనమ్ ॥ 104 ॥
శృఙ్గారవరణవర్యస్యోత్తరతః
సకలవిబుధసంసేవ్యమ్ ।
చిన్తామణిగణరచితం
చిన్తాం దూరీకరోతు మే సదనమ్ ॥ 105 ॥
మణిసదనసాలయోరధి-
-మధ్యం దశతాలభూమిరుహదీర్ఘైః ।
పర్ణైః సువర్ణవర్ణై-
-ర్యుక్తాం కాణ్డైశ్చ యోజనోత్తుఙ్గైః ॥ 106 ॥
మృదులైస్తాలీపఞ్చక-
-మానైర్మిలితాం చ కేసరకదమ్బైః ।
సన్తతగలితమరన్ద-
-స్రోతోనిర్యన్మిలిన్దసన్దోహామ్ ॥ 107 ॥
పాటీరపవనబాలక-
-ధాటీనిర్యత్పరాగపిఞ్జరితామ్ ।
కలహంసీకులకలకల-
-కూలఙ్కషనినదనిచయకమనీయామ్ ॥ 108 ॥
పద్మాటవీం భజామః
పరిమలకల్లోలపక్ష్మలోపాన్తామ్ ।
[ దేవ్యర్ఘ్యపాత్రధారీ
తస్యాః పూర్వదిశి దశకలాయుక్తః । ]
వలయితమూర్తిర్భగవా-
-న్వహ్నిః క్రోశోన్నతశ్చిరం పాయాత్ ॥ 109 ॥
తత్రాధారే దేవ్యాః
పాత్రీరూపః ప్రభాకరః శ్రీమాన్ ।
ద్వాదశకలాసమేతో
ధ్వాన్తం మమ బహులమాన్తరం భిన్ద్యాత్ ॥ 110 ॥
తస్మిన్ దినేశపాత్రే
తరఙ్గితామోదమమృతమయమర్ఘ్యమ్ ।
చన్ద్రకలాత్మకమమృతం
సాన్ద్రీకుర్యాదమన్దమానన్దమ్ ॥ 111 ॥
అమృతే తస్మిన్నభితో
విహరన్త్యో వివిధమణితరణిభాజః ।
షోడశ కలాః సుధాంశోః
శోకాదుత్తారయన్తు మామనిశమ్ ॥ 112 ॥
తత్రైవ విహృతిభాజో
ధాతృముఖానాం చ కారణేశానామ్ ।
సృష్ట్యాదిరూపికాస్తాః
శమయన్త్వఖిలాః కలాశ్చ సన్తాపమ్ ॥ 113 ॥
కీనాశవరుణకిన్నర-
-రాజదిగన్తేషు రత్నగేహస్య ।
కలయామి తాన్యజస్రం
కలయన్త్వాయుష్యమర్ఘ్యపాత్రాణి ॥ 114 ॥
పాత్రస్థలస్య పురతః
పద్మారమణవిధిపార్వతీశానామ్ ।
భవనాని శర్మణే నో
భవన్తు భాసా ప్రదీపితజగన్తి ॥ 115 ॥
సదనస్యానలకోణే
సతతం ప్రణమామి కుణ్డమాగ్నేయమ్ ।
తత్ర స్థితం చ వహ్నిం
తరలశిఖాజటిలమమ్బికాజనకమ్ ॥ 116 ॥
తస్యాసురదిశి తాదృశ-
-రత్నపరిస్ఫురితపర్వనవకాఢ్యమ్ ।
చక్రాత్మకం శతాఙ్గం
శతయోజనమున్నతం భజే దివ్యమ్ ॥ 117 ॥
తత్రైవ దిశి నిషణ్ణం
తపనీయధ్వజపరమ్పరాశ్లిష్టమ్ ।
రథమపరం చ భవాన్యా
రచయామో మనసి రత్నమయచూడమ్ ॥ 118 ॥
భవనస్య వాయుభాగే
పరిష్కృతో వివిధవైజయన్తీభిః ।
రచయతు ముదం రథేన్ద్రః
సచివేశాన్యాః సమస్తవన్ద్యాయాః ॥ 119 ॥
కుర్మోఽధిహృదయమనిశం
క్రోడాస్యాయాః శతాఙ్గమూర్ధన్యమ్ ।
రుద్రదిశి రత్నధామ్నో
రుచిరశలాకాప్రపఞ్చకఞ్చుకితమ్ ॥ 120 ॥
పరితో దేవీధామ్నః
ప్రణీతవాసా మనుస్వరూపిణ్యః ।
కుర్వన్తు రశ్మిమాలా-
-కృతయః కుశలాని దేవతా నిఖిలాః ॥ 121 ॥
ప్రాగ్ద్వారస్య భవానీ-
-ధామ్నః పార్శ్వద్వయారచితవాసే ।
మాతఙ్గీకిటిముఖ్యౌ
మణిసదనే మనసి భావయామి చిరమ్ ॥ 122 ॥
యోజనయుగలాభోగా
తత్క్రోశపరిణాహయైవ భిత్త్యా చ ।
చిన్తామణిగృహభూమి-
-ర్జీయాదామ్నాయమయచతుర్ద్వారా ॥ 123 ॥
ద్వారే ద్వారే ధామ్నః
పిణ్డీభూతా నవీనబిమ్బాభాః ।
విదధతు విపులాం కీర్తిం
దివ్యా లౌహిత్యసిద్ధ్యో దేవ్యః ॥ 124 ॥
మణిసదనస్యాన్తరతో
మహనీయే రత్నవేదికామధ్యే ।
బిన్దుమయచక్రమీడే
పీఠానాముపరి విరచితావాసమ్ ॥ 125 ॥
చక్రాణాం సకలానాం
ప్రథమమధః సీమఫలకవాస్తవ్యాః ।
అణిమాదిసిద్ధయో మా-
-మవన్తు దేవీ ప్రభాస్వరూపిణ్యః ॥ 126 ॥
అణిమాదిసిద్ధిఫలక-
-స్యోపరిహరిణాఙ్కఖణ్డకృతచూడాః ।
భద్రం పక్ష్మలయన్తు
బ్రాహ్మీప్రముఖాశ్చ మాతరోఽస్మాకమ్ ॥ 127 ॥
తస్యోపరి మణిఫలకే
తారుణ్యోత్తుఙ్గపీనకుచభారాః ।
సఙ్క్షోభిణీప్రధానాః
భ్రాన్తి విద్రావయన్తు దశ ముద్రాః ॥ 128 ॥
ఫలకత్రయస్వరూపే
పృథులే త్రైలోక్యమోహనే చక్రే ।
దీవ్యన్తు ప్రకటాఖ్యా-
-స్తాసాం కర్త్రీం చ భగవతీ త్రిపురా ॥ 129 ॥
తదుపరి విపులే ధిష్ణ్యే
తరలదృశస్తరుణకోకనదభాసః ।
కామాకర్షిణ్యాద్యాః
కలయే దేవీః కలాధరశిఖణ్డాః ॥ 130 ॥
సర్వాశాపరిపూరకచక్రే-
-ఽస్మిన్ గుప్తయోగినీసేవ్యాః ।
త్రిపురేశీ మమ దురితం
తుద్యాత్ కణ్ఠావలమ్బిమణిహారా ॥ 131 ॥
తస్యోపరి మణిపీఠే
తామ్రామ్భోరుహదలప్రభాశోణాః ।
ధ్యాయామ్యనఙ్గకుసుమా-
-ప్రముఖా దేవీశ్చ విధృతకూర్పాసాః ॥ 132 ॥
సఙ్క్షోభకారకేఽస్మిం-
-శ్చక్రే శ్రీత్రిపురసున్దరీ సాక్షాత్ ।
గోప్త్రీ గుప్తతరాఖ్యాః
గోపాయతు మాం కృపార్ద్రయా దృష్ట్యా ॥ 133 ॥
సఙ్క్షోభిణీప్రధానాః
శక్తీస్తస్యోర్ధ్వవలయకృతవాసాః ।
ఆలోలనీలవేణీ-
-రన్తః కలయామి యౌవనోన్మత్తాః ॥ 134 ॥
సౌభాగ్యదాయకేఽస్మిం-
-శ్చక్రేశీ త్రిపురవాసినీ జీయాత్ ।
శక్తీశ్చ సమ్ప్రదాయాభిధాః
సమస్తాః ప్రమోదయన్త్వనిశమ్ ॥ 135 ॥
మణిపీఠోపరి తాసాం
మహతి చతుర్హస్తవిస్తృతే వలయే ।
సన్తతవిరచితవాసాః
శక్తీః కలయామి సర్వసిద్ధిముఖాః ॥ 136 ॥
సర్వార్థసాధకాఖ్యే
చక్రేఽముష్మిన్ సమస్తఫలదాత్రీ ।
త్రిపురా శ్రీర్మమ కుశలం
దిశతాదుత్తీర్ణయోగినీసేవ్యా ॥ 137 ॥
తాసాం నిలయస్యోపరి
ధిష్ణ్యే కౌసుమ్భకఞ్చుకమనోజ్ఞాః ।
సర్వాజ్ఞాద్యాః దేవ్యః
సకలాః సమ్పాదయన్తు మమ కీర్తిమ్ ॥ 138 ॥
చక్రే సమస్తరక్షా-
-కరనామ్న్యస్మిన్ సమస్తజనసేవ్యామ్ ।
మనసి నిగర్భాసహితాం
మన్యే శ్రీత్రిపురమాలినీం దేవీమ్ ॥ 139 ॥
సర్వజ్ఞాసదనస్యోపరి
చక్రే విపులే సమాకలితగేహాః ।
వన్దే వశినీముఖ్యాః
శక్తీః సిన్దూరరేణురుచః ॥ 140 ॥
శ్రీసర్వరోగహరాఖ్య-
-చక్రేఽస్మింస్త్రిపురపూర్వికాం సిద్ధామ్ ।
వన్దే రహస్యనామ్నా
వేద్యాభిః శక్తిభిః సదా సేవ్యామ్ ॥ 141 ॥
వశినీగృహోపరిష్టా-
-ద్వింశతిహస్తోన్నతే మహాపీఠే ।
శమయన్తు శత్రుబృన్దం
శస్త్రాణ్యస్త్రాణి చాదిదమ్పత్యోః ॥ 142 ॥
శస్త్రసదనోపరిష్టా-
-ద్వలయే వలవైరిరత్నసఙ్ఘటితే ।
కామేశ్వరీప్రధానాః
కలయే దేవీః సమస్తజనవన్ద్యాః ॥ 143 ॥
చక్రేఽత్ర సర్వసిద్ధిప్రద-
-నామని సర్వఫలదాత్రీ ।
త్రిపురామ్బావతు సతతం
పరాపరరహస్యయోగినీసేవ్యా ॥ 144 ॥
కామేశ్వరీగృహోపరివలయే
వివిధమనుసమ్ప్రదాయజ్ఞాః ।
చత్వారో యుగనాథా
జయన్తు మిత్రేశపూర్వకాః గురవః ॥ 145 ॥
నాథభవనోపరిష్టా-
-న్నానారత్నచయమేదురే పీఠే ।
కామేశ్యాద్యా నిత్యాః
కలయన్తు ముదం తిథిస్వరూపిణ్యః ॥ 146 ॥
నిత్యాసదనస్యోపరి
నిర్మలమణినివహవిరచితే ధిష్ణ్యే ।
కుశలం షడఙ్గదేవ్యః
కలయన్త్వస్మాకముత్తరలనేత్రాః ॥ 147 ॥
సదనస్యోపరి తాసాం
సర్వానన్దమయనామకే బిన్దౌ ।
పఞ్చబ్రహ్మాకారాం
మఞ్చం ప్రణమామి మణిగణాకీర్ణమ్ ॥ 148 ॥
పరితో మణిమఞ్చస్య
ప్రలమ్బమానా నియన్త్రితా పాశైః ।
మాయామయీ జవనికా
మమ దురితం హరతు మేచకచ్ఛాయా ॥ 149 ॥
మఞ్చస్యోపరి లమ్బ-
-న్మదనీపున్నాగమాలికాభరితమ్ ।
హరిగోపమయవితానం
హరతాదాలస్యమనిశమస్మాకమ్ ॥ 150 ॥
పర్యఙ్కస్య భజామః
పాదాన్బిమ్బామ్బుదేన్దుహేమరుచః ।
అజహరిరుద్రేశమయా-
-ననలాసురమారుతేశకోణస్థాన్ ॥ 151 ॥
ఫలకం సదాశివమయం
ప్రణౌమి సిన్దూరరేణుకిరణాభమ్ ।
ఆరభ్యాఙ్గేశీనాం
సదనాత్కలితం చ రత్నసోపానమ్ ॥ 152 ॥
పట్టోపధానగణ్డక-
-చతుష్టయస్ఫురితపాటలాస్తరణమ్ ।
పర్యఙ్కోపరి ఘటితం
పాతు చిరం హంసతూలశయనం నః ॥ 153 ॥
తస్యోపరి నివసన్తం
తారుణ్యశ్రీనిషేవితం సతతమ్ ।
ఆవృన్తపుల్లహల్లక-
-మరీచికాపుఞ్జమఞ్జులచ్ఛాయమ్ ॥ 154 ॥
సిన్దూరశోణవసనం
శీతాంశుస్తబకచుమ్బితకిరీటమ్ ।
కుఙ్కుమతిలకమనోహర-
-కుటిలాలికహసితకుముదబన్ధుశిశుమ్ ॥ 155 ॥
పూర్ణేన్దుబిమ్బవదనం
ఫుల్లసరోజాతలోచనత్రితయమ్ ।
తరలాపాఙ్గతరఙ్గిత-
-శఫరాఙ్కనశాస్త్రసమ్ప్రదాయార్థమ్ ॥ 156 ॥
మణిమయకుణ్డలపుష్య-
-న్మరీచికల్లోలమాంసలకపోలమ్ ।
విద్రుమసహోదరాధర-
-విసృమరసుస్మితకిశోరసఞ్చారమ్ ॥ 157 ॥
ఆమోదికుసుమశేఖర-
-మానీలభ్రూలతాయుగమనోజ్ఞమ్ ।
వీటీసౌరభవీచీ-
-ద్విగుణితవక్త్రారవిన్దసౌరభ్యమ్ ॥ 158 ॥
పాశాఙ్కుశేక్షుచాప-
-ప్రసవశరస్ఫురితకోమలకరాబ్జమ్ ।
కాశ్మీరపఙ్కిలాఙ్గం
కామేశం మనసి కుర్మహే సతతమ్ ॥ 159 ॥
తస్యాఙ్కభువి నిషణ్ణాం
తరుణకదమ్బప్రసూనకిరణాభామ్ ।
శీతాంశుఖణ్డచూడాం
సీమన్తన్యస్తసాన్ద్రసిన్దూరామ్ ॥ 160 ॥
కుఙ్కుమలలామభాస్వ-
-న్నిటిలాం కుటిలతరచిల్లికాయుగలామ్ ।
నాలీకతుల్యనయనాం
నాసాఞ్చలనటితమౌక్తికాభరణామ్ ॥ 161 ॥
అఙ్కురితమన్దహాస-
-మరుణాధరకాన్తివిజితబిమ్బాభామ్ ।
కస్తూరీమకరీయుత-
-కపోలసఙ్క్రాన్తకనకతాటఙ్కామ్ ॥ 162 ॥
కర్పూరసాన్ద్రవీటీ-
-కబలితవదనారవిన్దకమనీయామ్ ।
కమ్బుసహోదరకణ్ఠ-
-ప్రలమ్బమానాచ్ఛమౌక్తికకలాపామ్ ॥ 163 ॥
కహ్లారదామకోమల-
-భుజయుగలస్ఫురితరత్నకేయూరామ్ ।
కరపద్మమూలవిలస-
-త్కాఞ్చనమయకటకవలయసన్దోహామ్ ॥ 164 ॥
పాణిచతుష్టయవిలస-
-త్పాశాఙ్కుశపుణ్డ్రచాపపుష్పాస్త్రామ్ ।
కూలఙ్కషకుచశిఖరాం
కుఙ్కుమకర్దమితరత్నకూర్పాసామ్ ॥ 165 ॥
అణుదాయాదవలగ్నా-
-మమ్బుదశోభాసనాభిరోమలతామ్ ।
మాణిక్యఖచితకాఞ్చీ-
-మరీచికాక్రాన్తమాంసలనితమ్బామ్ ॥ 166 ॥
కరభోరుకాణ్డయుగలాం
జఙ్ఘాజితకామజైత్రతూణీరామ్ ।
ప్రపదపరిభూతకూర్మాం
పల్లవసచ్ఛాయపదయుగమనోజ్ఞామ్ ॥ 167 ॥
కమలభవకఞ్జలోచన-
-కిరీటరత్నాంశురఞ్జితపదాబ్జామ్ ।
ఉన్మస్తకానుకమ్పా-
-ముత్తరలాపాఙ్గపోషితానఙ్గామ్ ॥ 168 ॥
ఆదిమరసావలమ్బా-
-మనిదం ప్రథమోక్తివల్లరీకలికామ్ ।
ఆబ్రహ్మకీటజననీ-
-మన్తః కలయామి సున్దరీమనిశమ్ ॥ 169 ॥
కస్తు క్షితౌ పటీయా-
-న్వస్తు స్తోతుం శివాఙ్కవాస్తవ్యమ్ ।
అస్తు చిరన్తనసుకృతైః
ప్రస్తుతకామ్యాయ తన్మమ పురస్తాత్ ॥ 170 ॥
ప్రభుసమ్మితోక్తిగమ్యం
పరమశివోత్సఙ్గతుఙ్గపర్యఙ్కమ్ ।
తేజః కిఞ్చన దివ్యం
పురతో మే భవతు పుణ్డ్రకోదణ్డమ్ ॥ 171 ॥
మధురిమభరితశరాసం
మకరన్దస్యన్దిమార్గణోదారమ్ ।
కైరవిణీవిటచూడం
కైవల్యాయాస్తు కిఞ్చన మహో నః ॥ 172 ॥
అక్షుద్రమిక్షుచాపం
పరోక్షమవలగ్నసీమ్ని త్ర్యక్షమ్ ।
క్షపయతు మే క్షేమేతర-
-ముక్షరథప్రేమపక్ష్మలం తేజః ॥ 173 ॥
భృఙ్గరుచిసఙ్గరకరాపాఙ్గం
శృఙ్గారతుఙ్గమరుణాఙ్గమ్ ।
మఙ్గలమభఙ్గురం మే
ఘటయతు గఙ్గాధరాఙ్గసఙ్గి మహః ॥ 174 ॥
ప్రపదాజితకూర్మమూర్జిత-
-కరుణం భర్మరుచినిర్మథనదేహమ్ ।
శ్రితవర్మ మర్మ శమ్భోః
కిఞ్చన మమ నర్మ శర్మ నిర్మాతు ॥ 175 ॥
కాలకురలాలికాలిమ-
-కన్దలవిజితాలి విధృతమణివాలి ।
మిలతు హృది పులినజఘనం
బహులితగలగరలకేలి కిమపి మహః ॥ 176 ॥
కుఙ్కుమతిలకితఫాలా
కురువిన్దచ్ఛాయపాటలదుకూలా ।
కరుణాపయోధివేలా
కాచన చిత్తే చకాస్తు మే లీలా ॥ 177 ॥
పుష్పన్ధయరుచివేణ్యః
పులినాభోగత్రపాకరశ్రేణ్యః ।
జీయాసురిక్షుపాణ్యః
కాశ్చన కామారికేలిసాక్షిణ్యః ॥ 178 ॥
తపనీయాంశుకభాంసి
ద్రాక్షామాధుర్యనాస్తికవచాంసి ।
కతిచన శుచం మహాంసి
క్షపయతు కపాలితోషితమనాంసి ॥ 179 ॥
అసితకచమాయతాక్షం
కుసుమశరం కూలముద్వహకృపార్ద్రమ్ ।
ఆదిమరసాధిదైవత-
-మన్తః కలయే హరాఙ్కవాసి మహః ॥ 180 ॥
కర్ణోపాన్తతరఙ్గిత-
-కటాక్షవిస్పన్దికణ్ఠదఘ్నకృపామ్ ।
కామేశ్వరాఙ్కనిలయాం
కామపి విద్యాం పురాతనీం కలయే ॥ 181 ॥
అరవిన్దకాన్త్యరున్తుద-
-విలోచనద్వన్ద్వసున్దరముఖేన్దు ।
ఛన్దః కన్దలమన్దిర-
-మన్తఃపురమైన్దుశేఖరం వన్దే ॥ 182 ॥
బిమ్బినికురమ్బడమ్బర-
-విడమ్బకచ్ఛాయమమ్బరవలగ్నమ్ ।
కమ్బుగలమమ్బుదకుచం
బిమ్బోకం కమపి చుమ్బతు మనో మే ॥ 183 ॥
కమపి కమనీయరూపం
కలయామ్యన్తః కదమ్బకుసుమాఢ్యమ్ ।
చమ్పకరుచిరసువేషైః
సమ్పాదితకాన్త్యలఙ్కృతదిగన్తమ్ ॥ 184 ॥
శమ్పారుచిభర-
-గర్హాసమ్పాదకకాన్తికవచితదిగన్తమ్ ।
సిద్ధాన్తం నిగమానాం
శుద్ధాన్తం కిమపి శూలినః కలయే ॥ 185 ॥
ఉద్యద్దినకరశోణా-
-నుత్పలబన్ధుస్తనన్ధయాపీడాన్ ।
కరకలితపుణ్డ్రచాపా-
-న్కలయే కానపి కపర్దినః ప్రాణాన్ ॥ 186 ॥
రశనాలసజ్జఘనయా
రసనాజీవాతుచాపభాసురయా ।
ఘ్రాణాయుష్కరశరయా
ఘ్రాతం చిత్తం కయాపి వాసనయా ॥ 187 ॥
సరసిజసహయుధ్వదృశా
శమ్పాలతికాసనాభివిగ్రహయా ।
భాసా కయాపి చేతో
నాసామణిశోభివదనయా భరితమ్ ॥ 188 ॥
నవయావకాభసిచయాన్వితయా
గజయానయా దయాపరయా ।
ధృతయామినీశకలయా
ధియా కయాపి క్షతామయా హి వయమ్ ॥ 189 ॥
అలమలమకుసుమబాణై-
-రబిమ్బశోణైరపుణ్డ్రకోదణ్డైః ।
అకుముదబాన్ధవచూడై-
-రన్యైరిహ జగతి దైవతం మన్యైః ॥ 190 ॥
కువలయసదృక్షనయనైః
కులగిరికూటస్థబన్ధుకుచభారైః ।
కరుణాస్పన్దికటాక్షైః
కవచితచిత్తోఽస్మి కతిపయైః కుతుకైః ॥ 191 ॥
నతజనసులభాయ నమో
నాలీకసనాభిలోచనాయ నమః ।
నన్దితగిరిశాయ నమో
మహసే నవనీపపాటలాయ నమః ॥ 192 ॥
కాదమ్బకుసుమదామ్నే
కాయచ్ఛాయాకణాయితార్యమ్ణే ।
సీమ్నే చిరన్తనగిరాం
భూమ్నే కస్మైచిదాదదే ప్రణతిమ్ ॥ 193 ॥
కుటిలకబరీభరేభ్యః
కుఙ్కుమసబ్రహ్మచారికిరణేభ్యః ।
కూలఙ్కషస్తనేభ్యః
కుర్మః ప్రణతిం కులాద్రికుతుకేభ్యః ॥ 194 ॥
కోకనదశోణచరణా-
-త్కోమలకురలాలివిజితశైవాలాత్ ।
ఉత్పలసగన్ధినయనా-
-దురరీకుర్మో న దేవతమాన్యామ్ ॥ 195 ॥
ఆపాటలాధరాణా-
-మానీలస్నిగ్ధబర్బరకచానామ్ ।
ఆమ్నాయజీవనానా-
-మాకూతానాం హరస్య దాసోఽహమ్ ॥ 196 ॥
పుఙ్ఖితవిలాసహాస-
-స్ఫురితాసు పురాహితాఙ్కనిలయాసు ।
మగ్నం మనో మదీయం
కాస్వపి కామారిజీవనాడీషు ॥ 197 ॥
లలితా పాతు శిరో మే
లలాటమమ్బా చ మధుమతీరూపా ।
భ్రూయుగ్మం చ భవానీ
పుష్పశరా పాతు లోచనద్వన్ద్వమ్ ॥ 198 ॥
పాయాన్నాసాం బాలా
సుభగా దన్తాంశ్చ సున్దరీ జిహ్వామ్ ।
అధరోష్ఠమాదిశక్తి-
-శ్చక్రేశీ పాతు మే చిరం చిబుకమ్ ॥ 199 ॥
కామేశ్వరీ చ కర్ణౌ
కామాక్షీ పాతు గణ్డయోర్యుగలమ్ ।
శృఙ్గారనాయికావ్యా-
-ద్వదనం సింహాసనేశ్వరీ చ గలమ్ ॥ 200 ॥
స్కన్దప్రసూశ్చ పాతు
స్కన్ధౌ బాహూ చ పాటలాఙ్గీ మే ।
పాణీ చ పద్మనిలయా
పాయాదనిశం నఖావలీర్విజయా ॥ 201 ॥
కోదణ్డినీ చ వక్షః
కుక్షిం చావ్యాత్ కులాచలతనూజా ।
కల్యాణీ చ వలగ్నం
కటిం చ పాయాత్కలాధరశిఖణ్డా ॥ 202 ॥
ఊరుద్వయం చ పాయా-
-దుమా మృడానీ చ జానునీ రక్షేత్ ।
జఙ్ఘే చ షోడశీ మే
పాయాత్ పాదౌ చ పాశసృణిహస్తా ॥ 203 ॥
ప్రాతః పాతు పరా మాం
మధ్యాహ్నే పాతు మణిగృహాధీశా ।
శర్వాణ్యవతు చ సాయం
పాయాద్రాత్రౌ చ భైరవీ సాక్షాత్ ॥ 204 ॥
భార్యాం రక్షతు గౌరీం
పాయాత్ పుత్రాంశ్చ బిన్దుగృహపీఠా ।
శ్రీవిద్యా చ యశో మే
శీలం చావ్యాచ్చిరం మహారాజ్ఞీ ॥ 205 ॥
పవనమయి పావకమయి
క్షోణీమయి గగనమయి కృపీటమయి ।
రవిమయి శశిమయి దిఙ్మయి
సమయమయి ప్రాణమయి శివే పాహి ॥ 206 ॥
కాలి కపాలిని శూలిని
భైరవి మాతఙ్గి పఞ్చమి త్రిపురే ।
వాగ్దేవి విన్ధ్యవాసిని
బాలే భువనేశి పాలయ చిరం మామ్ ॥ 207 ॥
అభినవసిన్దూరాభా-
-మమ్బ త్వాం చిన్తయన్తి యే హృదయే ।
ఉపరి నిపతన్తి తేషా-
-ముత్పలనయనాకటాక్షకల్లోలాః ॥ 208 ॥
వర్గాష్టకమిలితాభి-
-ర్వశినీముఖ్యాభిరావృతాం భవతీమ్ ।
చిన్తయతాం సితవర్ణాం
వాచో నిర్యాన్త్యయత్నతో వదనాత్ ॥ 209 ॥
కనకశలాకాగౌరీం
కర్ణవ్యాలోలకుణ్డలద్వితయామ్ ।
ప్రహసితముఖీం చ భవతీం
ధ్యాయన్తో యే త ఏవ భూధనదాః ॥ 210 ॥
శీర్షామ్భోరుహమధ్యే
శీతలపీయూషవర్షిణీం భవతీమ్ ।
అనుదినమనుచిన్తయతా-
-మాయుష్యం భవతి పుష్కలమవన్యామ్ ॥ 211 ॥
మధురస్మితాం మదారుణనయనాం
మాతఙ్గకుమ్భవక్షోజామ్ ।
చన్ద్రవతంసినీం త్వాం
సవిధే పశ్యన్తి సుకృతినః కేచిత్ ॥ 212 ॥
లలితాయాః స్తవరత్నం
లలితపదాభిః ప్రణీతమార్యాభిః ।
ప్రతిదినమవనౌ పఠతాం
ఫలాని వక్తుం ప్రగల్భతే సైవ ॥ 213 ॥
సదసదనుగ్రహనిగ్రహ-
-గృహీతమునివిగ్రహో భగవాన్ ।
సర్వాసాముపనిషదాం
దుర్వాసా జయతి దేశికః ప్రథమః ॥ 214 ॥
ఇతి మహర్షిదుర్వాసః విరచితం శ్రీలలితాస్తవరత్నమ్ ।
