యామామనన్తి మునయః ప్రకృతిం పురాణీం
విద్యేతి యాం శ్రుతిరహస్యవిదో వదన్తి ।
తామర్ధపల్లవితశఙ్కరరూపముద్రాం
దేవీమనన్యశరణః శరణం ప్రపద్యే ॥ 1 ॥
అమ్బ స్తవేషు తవ తావదకర్తృకాణి
కుణ్ఠీభవన్తి వచసామపి గుమ్భనాని ।
డిమ్భస్య మే స్తుతిరసావసమఞ్జసాపి
వాత్సల్యనిఘ్నహృదయాం భవతీం ధినోతు ॥ 2 ॥
వ్యోమేతి బిన్దురితి నాద ఇతీన్దులేఖా-
-రూపేతి వాగ్భవతనూరితి మాతృకేతి ।
నిఃస్యన్దమానసుఖబోధసుధాస్వరూపా
విద్యోతసే మనసి భాగ్యవతాం జనానామ్ ॥ 3 ॥
ఆవిర్భవత్పులకసన్తతిభిః శరీరై-
-ర్నిఃస్యన్దమానసలిలైర్నయనైశ్చ నిత్యమ్ ।
వాగ్భిశ్చ గద్గదపదాభిరుపాసతే యే
పాదౌ తవామ్బ భువనేషు త ఏవ ధన్యాః ॥ 4 ॥
వక్త్రం యదుద్యతమభిష్టుతయే భవత్యా-
-స్తుభ్యం నమో యదపి దేవి శిరః కరోతి ।
చేతశ్చ యత్త్వయి పరాయణమమ్బ తాని
కస్యాపి కైరపి భవన్తి తపోవిశేషైః ॥ 5 ॥
మూలాలవాలకుహరాదుదితా భవాని
నిర్భిద్య షట్సరసిజాని తటిల్లతేవ ।
భూయోఽపి తత్ర విశసి ధ్రువమణ్డలేన్దు-
-నిఃస్యన్దమానపరమామృతతోయరూపా ॥ 6 ॥
దగ్ధం యదా మదనమేకమనేకధా తే
ముగ్ధః కటాక్షవిధిరఙ్కురయాఞ్చకార ।
ధత్తే తదాప్రభృతి దేవి లలాటనేత్రం
సత్యం హ్రియైవ ముకులీకృతమిన్దుమౌలేః ॥ 7 ॥
అజ్ఞాతసమ్భవమనాకలితాన్వవాయం
భిక్షుం కపాలినమవాససమద్వితీయమ్ ।
పూర్వం కరగ్రహణమఙ్గలతో భవత్యాః
శమ్భుం క ఏవ బుబుధే గిరిరాజకన్యే ॥ 8 ॥
చర్మామ్బరం చ శవభస్మవిలేపనం చ
భిక్షాటనం చ నటనం చ పరేతభూమౌ ।
వేతాలసంహతిపరిగ్రహతా చ శమ్భోః
శోభాం బిభర్తి గిరిజే తవ సాహచర్యాత్ ॥ 9 ॥
కల్పోపసంహరణకేలిషు పణ్డితాని
చణ్డాని ఖణ్డపరశోరపి తాణ్డవాని ।
ఆలోకనేన తవ కోమలితాని మాత-
-ర్లాస్యాత్మనా పరిణమన్తి జగద్విభూత్యై ॥ 10 ॥
జన్తోరపశ్చిమతనోః సతి కర్మసామ్యే
నిఃశేషపాశపటలచ్ఛిదురా నిమేషాత్ ।
కల్యాణి దేశికకటాక్షసమాశ్రయేణ
కారుణ్యతో భవతి శామ్భవవేదదీక్షా ॥ 11 ॥
ముక్తావిభూషణవతీ నవవిద్రుమాభా
యచ్చేతసి స్ఫురసి తారకితేవ సన్ధ్యా ।
ఏకః స ఏవ భువనత్రయసున్దరీణాం
కన్దర్పతాం వ్రజతి పఞ్చశరీం వినాపి ॥ 12 ॥
యే భావయన్త్యమృతవాహిభిరంశుజాలై-
-రాప్యాయమానభువనామమృతేశ్వరీం త్వామ్ ।
తే లఙ్ఘయన్తి నను మాతరలఙ్ఘనీయాం
బ్రహ్మాదిభిః సురవరైరపి కాలకక్షామ్ ॥ 13 ॥
యః స్ఫాటికాక్షగుణపుస్తకకుణ్డికాఢ్యాం
వ్యాఖ్యాసముద్యతకరాం శరదిన్దుశుభ్రామ్ ।
పద్మాసనాం చ హృదయే భవతీముపాస్తే
మాతః స విశ్వకవితార్కికచక్రవర్తీ ॥ 14 ॥
బర్హావతంసయుతబర్బరకేశపాశాం
గుఞ్జావలీకృతఘనస్తనహారశోభామ్ ।
శ్యామాం ప్రవాలవదనాం సుకుమారహస్తాం
త్వామేవ నౌమి శబరీం శబరస్య జాయామ్ ॥ 15 ॥
అర్ధేన కిం నవలతాలలితేన ముగ్ధే
క్రీతం విభోః పరుషమర్ధమిదం త్వయేతి ।
ఆలీజనస్య పరిహాసవచాంసి మన్యే
మన్దస్మితేన తవ దేవి జడీ భవన్తి ॥ 16 ॥
బ్రహ్మాణ్డ బుద్బుదకదమ్బకసఙ్కులోఽయం
మాయోదధిర్వివిధదుఃఖతరఙ్గమాలః ।
ఆశ్చర్యమమ్బ ఝటితి ప్రలయం ప్రయాతి
త్వద్ధ్యానసన్తతిమహాబడబాముఖాగ్నౌ ॥ 17 ॥
దాక్షాయణీతి కుటిలేతి కుహారిణీతి
కాత్యాయనీతి కమలేతి కలావతీతి ।
ఏకా సతీ భగవతీ పరమార్థతోఽపి
సన్దృశ్యసే బహువిధా నను నర్తకీవ ॥ 18 ॥
ఆనన్దలక్షణమనాహతనామ్ని దేశే
నాదాత్మనా పరిణతం తవ రూపమీశే ।
ప్రత్యఙ్ముఖేన మనసా పరిచీయమానం
శంసన్తి నేత్రసలిలైః పులకైశ్చ ధన్యాః ॥ 19 ॥
త్వం చన్ద్రికా శశిని తిగ్మరుచౌ రుచిస్త్వం
త్వం చేతనాసి పురుషే పవనే బలం త్వమ్ ।
త్వం స్వాదుతాసి సలిలే శిఖిని త్వమూష్మా
నిఃసారమేవ నిఖిలం త్వదృతే యది స్యాత్ ॥ 20 ॥
జ్యోతీంషి యద్దివి చరన్తి యదన్తరిక్షం
సూతే పయాంసి యదహిర్ధరణీం చ ధత్తే ।
యద్వాతి వాయురనలో యదుదర్చిరాస్తే
తత్సర్వమమ్బ తవ కేవలమాజ్ఞయైవ ॥ 21 ॥
సఙ్కోచమిచ్ఛసి యదా గిరిజే తదానీం
వాక్తర్కయోస్త్వమసి భూమిరనామరూపా ।
యద్వా వికాసముపయాసి యదా తదానీం
త్వన్నామరూపగణనాః సుకరా భవన్తి ॥ 22 ॥
భోగాయ దేవి భవతీం కృతినః ప్రణమ్య
భ్రూకిఙ్కరీకృతసరోజగృహాః సహస్రమ్ ।
చిన్తామణిప్రచయకల్పితకేలిశైలే
కల్పద్రుమోపవన ఏవ చిరం రమన్తే ॥ 23 ॥
హర్తుం త్వమేవ భవసి త్వదధీనమీశే
సంసారతాపమఖిలం దయయా పశూనామ్ ।
వైకర్తనీ కిరణసంహతిరేవ శక్తా
ధర్మం నిజం శమయితుం నిజయైవ వృష్ట్యా ॥ 24 ॥
శక్తిః శరీరమధిదైవతమన్తరాత్మా
జ్ఞానం క్రియా కరణమాసనజాలమిచ్ఛా ।
ఐశ్వర్యమాయతనమావరణాని చ త్వం
కిం తన్న యద్భవసి దేవి శశాఙ్కమౌలేః ॥ 25 ॥
భూమౌ నివృత్తిరుదితా పయసి ప్రతిష్ఠా
విద్యాఽనలే మరుతి శాన్తిరతీవకాన్తిః ।
వ్యోమ్నీతి యాః కిల కలాః కలయన్తి విశ్వం
తాసాం హి దూరతరమమ్బ పదం త్వదీయమ్ ॥ 26 ॥
యావత్పదం పదసరోజయుగం త్వదీయం
నాఙ్గీకరోతి హృదయేషు జగచ్ఛరణ్యే ।
తావద్వికల్పజటిలాః కుటిలప్రకారా-
-స్తర్కగ్రహాః సమయినాం ప్రలయం న యాన్తి ॥ 27 ॥
నిర్దేవయానపితృయానవిహారమేకే
కృత్వా మనః కరణమణ్డలసార్వభౌమమ్ ।
ధ్యానే నివేశ్య తవ కారణపఞ్చకస్య
పర్వాణి పార్వతి నయన్తి నిజాసనత్వమ్ ॥ 28 ॥
స్థూలాసు మూర్తిషు మహీప్రముఖాసు మూర్తేః
కస్యాశ్చనాపి తవ వైభవమమ్బ యస్యాః ।
పత్యా గిరామపి న శక్యత ఏవ వక్తుం
సాపి స్తుతా కిల మయేతి తితిక్షితవ్యమ్ ॥ 29 ॥
కాలాగ్నికోటిరుచిమమ్బ షడధ్వశుద్ధౌ
ఆప్లావనేషు భవతీమమృతౌఘవృష్టిమ్ ।
శ్యామాం ఘనస్తనతటాం శకలీకృతాఘాం
ధ్యాయన్త ఏవ జగతాం గురవో భవన్తి ॥ 30 ॥
విద్యాం పరాం కతిచిదమ్బరమమ్బ కేచి-
-దానన్దమేవ కతిచిత్కతిచిచ్చ మాయామ్ ।
త్వాం విశ్వమాహురపరే వయమామనామః
సాక్షాదపారకరుణాం గురుమూర్తిమేవ ॥ 31 ॥
కువలయదలనీలం బర్బరస్నిగ్ధకేశం
పృథుతరకుచభారాక్రాన్తకాన్తావలగ్నమ్ ।
కిమిహ బహుభిరుక్తైస్త్వత్స్వరూపం పరం నః
సకలజనని మాతః సన్తతం సన్నిధత్తామ్ ॥ 32 ॥
ఇతి శ్రీకాళిదాస విరచిత పఞ్చస్తవ్యాం చతుర్థః అమ్బాస్తవః ।
