బ్రహ్మోవాచ
శృణు వత్స ప్రవక్ష్యామి ఆద్యాస్తోత్రం మహాఫలమ్ ।
యః పఠేత్ సతతం భక్త్యా స ఏవ విష్ణువల్లభః ॥ 1 ॥
మృత్యుర్వ్యాధిభయం తస్య నాస్తి కిఞ్చిత్ కలౌ యుగే ।
అపుత్రా లభతే పుత్రం త్రిపక్షం శ్రవణం యది ॥ 2 ॥
ద్వౌ మాసౌ బన్ధనాన్ముక్తి విప్రవక్త్రాత్ శ్రుతం యది ।
మృతవత్సా జీవవత్సా షణ్మాసం శ్రవణం యది ॥ 3 ॥
నౌకాయాం సఙ్కటే యుద్ధే పఠనాజ్జయమాప్నుయాత్ ।
లిఖిత్వా స్థాపయేద్గేహే నాగ్నిచౌరభయం క్వచిత్ ॥ 4 ॥
రాజస్థానే జయీ నిత్యం ప్రసన్నాః సర్వదేవతా ।
ఓం హ్రీమ్ ।
బ్రహ్మాణీ బ్రహ్మలోకే చ వైకుణ్ఠే సర్వమఙ్గళా ॥ 5 ॥
ఇన్ద్రాణీ అమరావత్యామమ్బికా వరుణాలయే ।
యమాలయే కాలరూపా కుబేరభవనే శుభా ॥ 6 ॥
మహానన్దాగ్నికోణే చ వాయవ్యాం మృగవాహినీ ।
నైరృత్యాం రక్తదన్తా చ ఐశాన్యాం శూలధారిణీ ॥ 7 ॥
పాతాళే వైష్ణవీరూపా సింహలే దేవమోహినీ ।
సురసా చ మణిద్విపే లఙ్కాయాం భద్రకాళికా ॥ 8 ॥
రామేశ్వరీ సేతుబన్ధే విమలా పురుషోత్తమే ।
విరజా ఔడ్రదేశే చ కామాక్ష్యా నీలపర్వతే ॥ 9 ॥
కాళికా వఙ్గదేశే చ అయోధ్యాయాం మహేశ్వరీ ।
వారాణస్యామన్నపూర్ణా గయాక్షేత్రే గయేశ్వరీ ॥ 10 ॥
కురుక్షేత్రే భద్రకాళీ వ్రజే కాత్యాయనీ పరా ।
ద్వారకాయాం మహామాయా మథురాయాం మహేశ్వరీ ॥ 11 ॥
క్షుధా త్వం సర్వభూతానాం వేలా త్వం సాగరస్య చ ।
నవమీ శుక్లపక్షస్య కృష్ణస్యైకాదశీ పరా ॥ 12 ॥
దక్షసా దుహితా దేవీ దక్షయజ్ఞవినాశినీ ।
రామస్య జానకీ త్వం హి రావణధ్వంసకారిణీ ॥ 13 ॥
చణ్డముణ్డవధే దేవీ రక్తబీజవినాశినీ ।
నిశుమ్భశుమ్భమథినీ మధుకైటభఘాతినీ ॥ 14 ॥
విష్ణుభక్తిప్రదా దుర్గా సుఖదా మోక్షదా సదా ।
ఆద్యాస్తవమిమం పుణ్యం యః పఠేత్ సతతం నరః ॥ 15 ॥
సర్వజ్వరభయం న స్యాత్ సర్వవ్యాధివినాశనమ్ ।
కోటితీర్థఫలం తస్య లభతే నాత్ర సంశయః ॥ 16 ॥
జయా మే చాగ్రతః పాతు విజయా పాతు పృష్ఠతః ।
నారాయణీ శీర్షదేశే సర్వాఙ్గే సింహవాహినీ ॥ 17 ॥
శివదూతీ ఉగ్రచణ్డా ప్రత్యఙ్గే పరమేశ్వరీ ।
విశాలాక్షీ మహామాయా కౌమారీ శఙ్ఖినీ శివా ॥ 18 ॥
చక్రిణీ జయదాత్రీ చ రణమత్తా రణప్రియా ।
దుర్గా జయన్తీ కాళీ చ భద్రకాళీ మహోదరీ ॥ 19 ॥
నారసింహీ చ వారాహీ సిద్ధిదాత్రీ సుఖప్రదా ।
భయఙ్కరీ మహారౌద్రీ మహాభయవినాశినీ ॥ 20 ॥
ఇతి శ్రీబ్రహ్మయామలే బ్రహ్మనారదసంవాదే శ్రీ ఆద్యా స్తోత్రమ్ ॥
