ఆనన్దమన్థరపురన్దరముక్తమాల్యం
మౌలౌ హఠేన నిహితం మహిషాసురస్య ।
పాదామ్బుజం భవతు మే విజయాయ మఞ్జు-
-మఞ్జీరశిఞ్జితమనోహరమమ్బికాయాః ॥ 1 ॥
దేవి త్ర్యమ్బకపత్ని పార్వతి సతి త్రైలోక్యమాతః శివే
శర్వాణి త్రిపురే మృడాని వరదే రుద్రాణి కాత్యాయని ।
భీమే భైరవి చణ్డి శర్వరికలే కాలక్షయే శూలిని
త్వత్పాదప్రణతాననన్యమనసః పర్యాకులాన్పాహి నః ॥ 2 ॥
దేవి త్వాం సకృదేవ యః ప్రణమతి క్షోణీభృతస్తం నమ-
-న్త్యాజన్మస్ఫురదఙ్ఘ్రిపీఠవిలుఠత్కోటీరకోటిచ్ఛటాః ।
యస్త్వామర్చతి సోఽర్చ్యతే సురగణైర్యః స్తౌతి స స్తూయతే
యస్త్వాం ధ్యాయతి తం స్మరార్తివిధురా ధ్యాయన్తి వామభ్రువః ॥ 3 ॥
ఉన్మత్తా ఇవ సగ్రహా ఇవ విషవ్యాసక్తమూర్ఛా ఇవ
ప్రాప్తప్రౌఢమదా ఇవార్తివిరహగ్రస్తా ఇవార్తా ఇవ ।
యే ధ్యాయన్తి హి శైలరాజతనయాం ధన్యాస్త ఏవాగ్రతః
త్యక్తోపాధివివృద్ధరాగమనసో ధ్యాయన్తి తాన్సుభ్రువః ॥ 4 ॥
ధ్యాయన్తి యే క్షణమపి త్రిపురే హృది త్వాం
లావణ్యయౌవనధనైరపి విప్రయుక్తాః ।
తే విస్ఫురన్తి లలితాయతలోచనానాం
చిత్తైకభిత్తిలిఖితప్రతిమాః పుమాంసః ॥ 5 ॥
ఏతం కిం ను దృశా పిబామ్యుత విశామ్యస్యాఙ్గమఙ్గైర్నిజైః
కిం వాఽముం నిగరామ్యనేన సహసా కిం వైకతామాశ్రయే ।
యస్యేత్థం వివశో వికల్పలలితాకూతేన యోషిజ్జనః
కిం తద్యన్న కరోతి దేవి హృదయే యస్య త్వమావర్తసే ॥ 6 ॥
విశ్వవ్యాపిని యద్వదీశ్వర ఇతి స్థాణావనన్యాశ్రయః
శబ్దః శక్తిరితి త్రిలోకజనని త్వయ్యేవ తథ్యస్థితిః ।
ఇత్థం సత్యపి శక్నువన్తి యదిమాః క్షుద్రా రుజో బాధితుం
త్వద్భక్తానపి న క్షిణోషి చ రుషా తద్దేవి చిత్రం మహత్ ॥ 7 ॥
ఇన్దోర్మధ్యగతాం మృగాఙ్కసదృశచ్ఛాయాం మనోహారిణీం
పాణ్డూత్ఫుల్లసరోరుహాసనగతా స్నిగ్ధప్రదీపచ్ఛవిమ్ ।
వర్షన్తీమమృతం భవాని భవతీం ధ్యాయన్తి యే దేహినః
తే నిర్ముక్తరుజో భవన్తి రిపవః ప్రోజ్ఝన్తి తాన్దూరతః ॥ 8 ॥
పూర్ణేన్దోః శకలైరివాతిబహలైః పీయూషపూరైరివ
క్షీరాబ్ధేర్లహరీభరైరివ సుధాపఙ్కస్య పిణ్డైరివ ।
ప్రాలేయైరివ నిర్మితం తవ వపుర్ధ్యాయన్తి యే శ్రద్ధయా
చిత్తాన్తర్నిహితార్తితాపవిపదస్తే సమ్పదం బిభ్రతి ॥ 9 ॥
యే సంస్మరన్తి తరలాం సహసోల్లసన్తీం
త్వాం గ్రన్థిపఞ్చకభిదం తరుణార్కశోణామ్ ।
రాగార్ణవే బహలరాగిణి మజ్జయన్తీం
కృత్స్నం జగద్దధతి చేతసి తాన్మృగాక్ష్యః ॥ 10 ॥
లాక్షారసస్నపితపఙ్కజతన్తుతన్వీం
అన్తః స్మరత్యనుదినం భవతీం భవాని ।
యస్తం స్మరప్రతిమమప్రతిమస్వరూపాః
నేత్రోత్పలైర్మృగదృశో భృశమర్చయన్తి ॥ 11 ॥
స్తుమస్త్వాం వాచమవ్యక్తాం హిమకున్దేన్దురోచిషమ్ ।
కదమ్బమాలాం బిభ్రాణామాపాదతలలమ్బినీమ్ ॥ 12 ॥
మూర్ధ్నీన్దోః సితపఙ్కజాసనగతాం ప్రాలేయపాణ్డుత్విషం
వర్షన్తీమమృతం సరోరుహభువో వక్త్రేఽపి రన్ధ్రేఽపి చ ।
అచ్ఛిన్నా చ మనోహరా చ లలితా చాతిప్రసన్నాపి చ
త్వామేవం స్మరతః స్మరారిదయితే వాక్సర్వతో వల్గతి ॥ 13 ॥
దదాతీష్టాన్భోగాన్ క్షపయతి రిపూన్హన్తి విపదో
దహత్యాధీన్వ్యాధీన్ శమయతి సుఖాని ప్రతనుతే ।
హఠాదన్తర్దుఃఖం దలయతి పినష్టీష్టవిరహం
సకృద్ధ్యాతా దేవీ కిమివ నిరవద్యం న కురుతే ॥ 14 ॥
యస్త్వాం ధ్యాయతి వేత్తి విన్దతి జపత్యాలోకతే చిన్తయ-
-త్యన్వేతి ప్రతిపద్యతే కలయతి స్తౌత్యాశ్రయత్యర్చతి ।
యశ్చ త్ర్యమ్బకవల్లభే తవ గుణానాకర్ణయత్యాదరాత్
తస్య శ్రీర్న గృహాదపైతి విజయస్తస్యాగ్రతో ధావతి ॥ 15 ॥
కిం కిం దుఃఖం దనుజదలిని క్షీయతే న స్మృతాయాం
కా కా కీర్తిః కులకమలిని ఖ్యాప్యతే న స్తుతాయామ్ ।
కా కా సిద్ధిః సురవరనుతే ప్రాప్యతే నార్చితాయాం
కం కం యోగం త్వయి న చినుతే చిత్తమాలమ్బితాయామ్ ॥ 16 ॥
యే దేవి దుర్ధరకృతాన్తముఖాన్తరస్థాః
యే కాలి కాలఘనపాశనితాన్తబద్ధాః ।
యే చణ్డి చణ్డగురుకల్మషసిన్ధుమగ్నాః
తాన్పాసి మోచయసి తారయసి స్మృతైవ ॥ 17 ॥
లక్ష్మీవశీకరణచూర్ణసహోదరాణి
త్వత్పాదపఙ్కజరజాంసి చిరం జయన్తి ।
యాని ప్రణామమిలితాని నృణాం లలాటే
లుమ్పన్తి దైవలిఖితాని దురక్షరాణి ॥ 18 ॥
రే మూఢాః కిమయం వృథైవ తపసా కాయః పరిక్లిశ్యతే
యజ్ఞైర్వా బహుదక్షిణైః కిమితరే రిక్తీక్రియన్తే గృహాః ।
భక్తిశ్చేదవినాశినీ భగవతీపాదద్వయీ సేవ్యతాం
ఉన్నిద్రామ్బురుహాతపత్రసుభగా లక్ష్మీః పురో ధావతి ॥ 19 ॥
యాచే న కఞ్చన న కఞ్చన వఞ్చయామి
సేవే న కఞ్చన నిరస్తసమస్తదైన్యః ।
శ్లక్ష్ణం వసే మధురమద్మి భజే వరస్త్రీః
దేవీ హృది స్ఫురతి మే కులకామధేనుః ॥ 20 ॥
నమామి యామినీనాథలేఖాలఙ్కృతకున్తలామ్ ।
భవానీం భవసన్తాపనిర్వాపణసుధానదీమ్ ॥ 21 ॥
ఇతి శ్రీకాళిదాస విరచిత పఞ్చస్తవ్యాం తృతీయః ఘటస్తవః ।
