న మన్త్రం నో యన్త్రం తదపి చ న జానే స్తుతిమహో
న చాహ్వానం ధ్యానం తదపి చ న జానే స్తుతికథాః ।
న జానే ముద్రాస్తే తదపి చ న జానే విలపనం
పరం జానే మాతస్త్వదనుసరణం క్లేశహరణమ్ ॥ 1 ॥
విధేరజ్ఞానేన ద్రవిణవిరహేణాలసతయా
విధేయాశక్యత్వాత్తవ చరణయోర్యా చ్యుతిరభూత్ ।
తదేతత్ క్షన్తవ్యం జనని సకలోద్ధారిణి శివే
కుపుత్రో జాయేత క్వచిదపి కుమాతా న భవతి ॥ 2 ॥
పృథివ్యాం పుత్రాస్తే జనని బహవః సన్తి సరలాః
పరం తేషాం మధ్యే విరలతరలోఽహం తవ సుతః ।
మదీయోఽయం త్యాగః సముచితమిదం నో తవ శివే
కుపుత్రో జాయేత క్వచిదపి కుమాతా న భవతి ॥ 3 ॥
జగన్మాతర్మాతస్తవ చరణసేవా న రచితా
న వా దత్తం దేవి ద్రవిణమపి భూయస్తవ మయా ।
తథాపి త్వం స్నేహం మయి నిరుపమం యత్ప్రకురుషే
కుపుత్రో జాయేత క్వచిదపి కుమాతా న భవతి ॥ 4 ॥
పరిత్యక్తా దేవాన్వివిధవిధిసేవాకులతయా
మయా పఞ్చాశీతేరధికమపనీతే తు వయసి ।
ఇదానీం చేన్మాతస్తవ యది కృపా నాపి భవితా
నిరాలమ్బో లమ్బోదరజనని కం యామి శరణమ్ ॥ 5 ॥
శ్వపాకో జల్పాకో భవతి మధుపాకోపమగిరా
నిరాతఙ్కో రఙ్కో విహరతి చిరం కోటికనకైః ।
తవాపర్ణే కర్ణే విశతి మనువర్ణే ఫలమిదం
జనః కో జానీతే జనని జపనీయం జపవిధౌ ॥ 6 ॥
చితాభస్మాలేపో గరళమశనం దిక్పటధరో
జటాధారీ కణ్ఠే భుజగపతిహారీ పశుపతిః ।
కపాలీ భూతేశో భజతి జగదీశైకపదవీం
భవానీ త్వత్పాణిగ్రహణపరిపాటీ ఫలమిదమ్ ॥ 7 ॥
న మోక్షస్యాకాఙ్క్షా న చ విభవవాఞ్ఛాపి చ న మే
న విజ్ఞానాపేక్షా శశిముఖి సుఖేచ్ఛాపి న పునః ।
అతస్త్వాం సంయాచే జనని జననం యాతు మమ వై
మృడానీ రుద్రాణీ శివ శివ భవానీతి జపతః ॥ 8 ॥
నారాధితాసి విధినా వివిధోపచారైః
కిం రూక్షచిన్తనపరైర్న కృతం వచోభిః ।
శ్యామే త్వమేవ యది కిఞ్చన మయ్యనాథే
ధత్సే కృపాముచితమమ్బ పరం తవైవ ॥ 9 ॥
ఆపత్సు మగ్నః స్మరణం త్వదీయం
కరోమి దుర్గే కరుణార్ణవే శివే ।
నైతచ్ఛఠత్వం మమ భావయేథాః
క్షుధాతృషార్తాః జననీం స్మరన్తి ॥ 10 ॥
జగదమ్బ విచిత్రమత్ర కిం
పరిపూర్ణా కరుణాస్తి చేన్మయి ।
అపరాధపరమ్పరావృతం
న హి మాతా సముపేక్షతే సుతమ్ ॥ 11 ॥
మత్సమః పాతకీ నాస్తి పాపఘ్నీ త్వత్సమా న హి ।
ఏవం జ్ఞాత్వా మహాదేవీ యథా యోగ్యం తథా కురు ॥ 12 ॥
ఇతి శ్రీమచ్ఛఙ్కరాచార్య విరచితం దేవ్యపరాధక్షమాపణ స్తోత్రమ్ ।
