అజానన్తో యాన్తి క్షయమవశమన్యోన్యకలహై-
-రమీ మాయాగ్రన్థౌ తవ పరిలుఠన్తః సమయినః ।
జగన్మాతర్జన్మజ్వరభయతమః కౌముది వయం
నమస్తే కుర్వాణాః శరణముపయామో భగవతీమ్ ॥ 1 ॥

వచస్తర్కాగమ్యస్వరసపరమానన్దవిభవ-
-ప్రబోధాకారాయ ద్యుతితులితనీలోత్పలరుచే ।
శివాద్యారాధ్యాయ స్తనభరవినమ్రాయ సతతం
నమస్తస్మై కస్మైచన భవతు ముగ్ధాయ మహసే ॥ 2 ॥

అనాద్యన్తాభేదప్రణయరసికాపి ప్రణయినీ
శివస్యాసీర్యత్త్వం పరిణయవిధౌ దేవి గృహిణీ ।
సవిత్రీ భూతానామపి యదుదభూః శైలతనయా
తదేతత్సంసారప్రణయనమహానాటకముఖమ్ ॥ 3 ॥

బ్రువన్త్యేకే తత్త్వం భగవతి సదన్యే విదురస-
-త్పరే మాతః ప్రాహుస్తవ సదసదన్యే సుకవయః ।
పరే నైతత్సర్వం సమభిదధతే దేవి సుధియ-
-స్తదేతత్త్వన్మాయావిలసితమశేషం నను శివే ॥ 4 ॥

లుఠద్గుఞ్జాహారస్తనభరనమన్మధ్యలతికా-
-ముదఞ్చద్ధర్మామ్భః కణగుణితవక్త్రామ్బుజరుచమ్ ।
శివం పార్థత్రాణప్రవణమృగయాకారగుణితం
శివామన్వగ్యాన్తీం శరణమహమన్వేమి శబరీమ్ ॥ 5 ॥

మిథః కేశాకేశిప్రథననిధనాస్తర్కఘటనాః
బహుశ్రద్ధాభక్తిప్రణతివిషయాః శాస్త్రవిధయః ।
ప్రసీద ప్రత్యక్షీభవ గిరిసుతే దేహి శరణం
నిరాలమ్బం చేతః పరిలుఠతి పారిప్లవమిదమ్ ॥ 6 ॥

శునాం వా వహ్నేర్వా ఖగపరిషదో వా యదశనం
కదా కేన క్వేతి క్వచిదపి న కశ్చిత్కలయతి ।
అముష్మిన్విశ్వాసం విజహిహి మమాహ్నాయ వపుషి
ప్రపద్యేథాశ్చేతః సకలజననీమేవ శరణమ్ ॥ 7 ॥

తటిత్కోటిజ్యోతిర్ద్యుతిదలితషడ్గ్రన్థిగహనం
ప్రవిష్టం స్వాధారం పునరపి సుధావృష్టివపుషా ।
కిమప్యష్టావింశత్కిరణసకలీభూతమనిశం
భజే ధామ శ్యామం కుచభరనతం బర్బరకచమ్ ॥ 8 ॥

చతుష్పత్రాన్తః షడ్దలపుటభగాన్తస్త్రివలయ-
-స్ఫురద్విద్యుద్వహ్నిద్యుమణినియుతాభద్యుతిలతే ।
షడశ్రం భిత్త్వాదౌ దశదలమథ ద్వాదశదలం
కలాశ్రం చ ద్వ్యశ్రం గతవతి నమస్తే గిరిసుతే ॥ 9 ॥

కులం కేచిత్ప్రాహుర్వపురకులమన్యే తవ బుధాః
పరే తత్సమ్భేదం సమభిదధతే కౌలమపరే ।
చతుర్ణామప్యేషాముపరి కిమపి ప్రాహురపరే
మహామాయే తత్త్వం తవ కథమమీ నిశ్చినుమహే ॥ 10 ॥

షడధ్వారణ్యానీం ప్రలయరవికోటిప్రతిరుచా
రుచా భస్మీకృత్య స్వపదకమలప్రహ్వశిరసామ్ ।
వితన్వానః శైవం కిమపి వపురిన్దీవరరుచిః
కుచాభ్యామానమ్రస్తవ పురుషకారో విజయతే ॥ 11 ॥

ప్రకాశానన్దాభ్యామవిదితచరీం మధ్యపదవీం
ప్రవిశ్యైతద్ద్వన్ద్వం రవిశశిసమాఖ్యం కబలయన్ ।
ప్రపద్యోర్ధ్వం నాదం లయదహనభస్మీకృతకులః
ప్రసాదాత్తే జన్తుః శివమకులమమ్బ ప్రవిశతి ॥ 12 ॥

మనుష్యాస్తిర్యఞ్చో మరుత ఇతి లోకత్రయమిదం
భవామ్భోధౌ మగ్నం త్రిగుణలహరీకోటిలుఠితమ్ ।
కటాక్షశ్చేద్యత్ర క్వచన తవ మాతః కరుణయా
శరీరీ సద్యోఽయం వ్రజతి పరమానన్దతనుతామ్ ॥ 13 ॥

ప్రియఙ్గుశ్యామాఙ్గీమరుణతరవాసం కిసలయాం
సమున్మీలన్ముక్తాఫలవహలనేపథ్యసుభగామ్ ।
స్తనద్వన్ద్వస్ఫారస్తబకనమితాం కల్పలతికాం
సకృద్ధ్యాయన్తస్త్వాం దధతి శివచిన్తామణిపదమ్ ॥ 14 ॥

షడాధారావర్తైరపరిమితమన్త్రోర్మిపటలైః
లసన్ముద్రాఫేనైర్బహువిధలసద్దైవతఝషైః ।
క్రమస్రోతోభిస్త్వం వహసి పరనాదామృతనదీ
భవాని ప్రత్యగ్రా శివచిదమృతాబ్ధిప్రణయినీ ॥ 15 ॥

మహీపాథోవహ్నిశ్వసనవియదాత్మేన్దురవిభి-
-ర్వపుర్భిగ్రస్తాశైరపి తవ కియానమ్బ మహిమా ।
అమూన్యాలోక్యన్తే భగవతి న కుత్రాప్యణుతమా-
-మవస్థాం ప్రాప్తాని త్వయి తు పరమవ్యోమవపుషి ॥ 16 ॥

కలామాజ్ఞాం ప్రజ్ఞాం సమయమనుభూతిం సమరసం
గురుం పారమ్పర్యం వినయముపదేశం శివపదమ్ ।
ప్రమాణం నిర్వాణం ప్రకృతిమభిభూతిం పరగుహాం
విధిం విద్యామాహుః సకలజననీమేవ మునయః ॥ 17 ॥

ప్రలీనే శబ్దౌఘే తదను విరతే బిన్దువిభవే
తతస్తత్త్వే చాష్టధ్వనిభిరనపాయిన్యధిగతే ।
శ్రితే శాక్తే పర్వణ్యనుకలితచిన్మాత్ర గహనాం
స్వసంవిత్తిం యోగీ రసయతి శివాఖ్యాం భగవతీమ్ ॥ 18 ॥

పరానన్దాకారాం నిరవధిశివైశ్వర్యవపుషం
నిరాకారాం జ్ఞానప్రకృతిమపరిచ్ఛిన్నకరుణామ్ ।
సవిత్రీం లోకానాం నిరతిశయధామాస్పదపదాం
భవో వా మోక్షో వా భవతు భవతీమేవ భజతామ్ ॥ 19 ॥

జగత్కాయే కృత్వా తదపి హృదయే తచ్చ పురుషే
పుమాంసం బిన్దుస్థం తదపి వియదాఖ్యే చ గహనే ।
తదేతద్జ్ఞానాఖ్యే తదపి పరమానన్దగహనే
మహావ్యోమాకారే త్వదనుభవశీలో విజయతే ॥ 20 ॥

విధే వేద్యే విద్యే వివిధసమయే వేదగులికే
విచిత్రే విశ్వాద్యే వినయసులభే వేదజనని ।
శివజ్ఞే శూలస్థే శివపదవదాన్యే శివనిధే
శివే మాతర్మహ్యం త్వయి వితర భక్తిం నిరుపమామ్ ॥ 21 ॥

విధేర్ముణ్డం హృత్వా యదకురుత పాత్రం కరతలే
హరిం శూలప్రోతం యదగమయదంసాభరణతామ్ ।
అలఞ్చక్రే కణ్ఠం యదపి గరలేనామ్బ గిరిశః
శివస్థాయాః శక్తేస్తదిదమఖిలం తే విలసితమ్ ॥ 22 ॥

విరిఞ్చ్యాఖ్యా మాతః సృజసి హరిసఞ్జ్ఞా త్వమవసి
త్రిలోకీం రుద్రాఖ్యా హరసి విదధాసీశ్వరదశామ్ ।
భవన్తీ నాదాఖ్యా విహరసి చ పాశౌఘదలనీ
త్వమేవైకాఽనేకా భవసి కృతిభేదైర్గిరిసుతే ॥ 23 ॥

మునీనాం చేతోభిః ప్రమృదితకషాయైరపి మనా-
-గశక్యం సంస్ప్రష్టుం చకితచకితైరమ్బ సతతమ్ ।
శ్రుతీనాం మూర్ధానః ప్రకృతికఠినాః కోమలతరే
కథం తే విన్దన్తే పదకిసలయే పార్వతి పదమ్ ॥ 24 ॥

తటిద్వల్లీం నిత్యామమృతసరితం పారరహితాం
మలోత్తీర్ణాం జ్యోత్స్నాం ప్రకృతిమగుణగ్రన్థిగహనామ్ ।
గిరాం దూరాం విద్యామవినతకుచాం విశ్వజననీ-
-మపర్యన్తాం లక్ష్మీమభిదధతి సన్తో భగవతీమ్ ॥ 25 ॥

శరీరం క్షిత్యమ్భః ప్రభృతిరచితం కేవలమచిత్
సుఖం దుఃఖం చాయం కలయతి పుమాంశ్చేతన ఇతి ।
స్ఫుటం జానానోఽపి ప్రభవతి న దేహీ రహయితుం
శరీరాహఙ్కారం తవ సమయబాహ్యో గిరిసుతే ॥ 26 ॥

పితా మాతా భ్రాతా సుహృదనుచరః సద్మ గృహిణీ
వపుః క్షేత్రం మిత్రం ధనమపి యదా మాం విజహతి ।
తదా మే భిన్దానా సపది భయమోహాన్ధతమసం
మహాజ్యోత్స్నే మాతర్భవ కరుణయా సన్నిధికరీ ॥ 27 ॥

సుతా దక్షస్యాదౌ కిల సకలమాతస్త్వముదభూః
సదోషం తం హిత్వా తదను గిరిరాజస్య దుహితా ।
అనాద్యన్తా శమ్భోరపృథగపి శక్తిర్భగవతీ
వివాహాజ్జాయాసీత్యహహ చరితం వేత్తి తవ కః ॥ 28 ॥

కణాస్త్వద్దీప్తీనాం రవిశశికృశానుప్రభృతయః
పరం బ్రహ్మ క్షుద్రం తవ నియతమానన్దకణికా ।
శివాది క్షిత్యన్తం త్రివలయతనోః సర్వముదరే
తవాస్తే భక్తస్య స్ఫురసి హృది చిత్రం భగవతి ॥ 29 ॥

పురః పశ్చాదన్తర్బహిరపరిమేయం పరిమితం
పరం స్థూలం సూక్ష్మం సకలమకులం గుహ్యమగుహమ్ ।
దవీయో నేదీయః సదసదితి విశ్వం భగవతీ
సదా పశ్యన్త్యాఖ్యాం వహసి భువనక్షోభజననీమ్ ॥ 30 ॥

ప్రవిశ్య త్వన్మార్గం సహజదయయా దేశికదృశా
షడధ్వధ్వాన్తౌఘచ్ఛిదురగణనాతీతకరుణామ్ ।
పరామాజ్ఞాకారాం సపది శివయన్తీం శివతనుం
స్వమాత్మానం ధన్యాశ్చిరముపలభన్తే భగవతీమ్ ॥ 31 ॥

మయూఖాః పూష్ణీవ జ్వలన ఇవ తద్దీప్తికణికాః
పయోధౌ కల్లోలాః ప్రతిహతమహిమ్నీవ పృషతః ।
ఉదేత్యోదేత్యామ్బ త్వయి సహ నిజైః సాత్త్వికగుణై-
-ర్భజన్తే తత్త్వౌఘాః ప్రశమమనుకల్పం పరవశాః ॥ 32 ॥

విధుర్విష్ణుర్బ్రహ్మా ప్రకృతిరణురాత్మా దినకరః
స్వభావో జైనేన్ద్రః సుగతమునిరాకాశమలినః ।
శివః శక్తిశ్చేతి శ్రుతివిషయతాం తాముపగతాం
వికల్పైరేభిస్త్వామభిదధతి సన్తో భగవతీమ్ ॥ 33 ॥

శివస్త్వం శక్తిస్త్వం త్వమసి సమయా త్వం సమయినీ
త్వమాత్మా త్వం దీక్షా త్వమయమణిమాదిర్గుణగణః ।
అవిద్యా త్వం విద్యా త్వమసి నిఖిలం త్వం కిమపరం
పృథక్తత్త్వం త్వత్తో భగవతి న వీక్షామహ ఇమే ॥ 34 ॥

త్వయాసౌ జానీతే రచయతి భవత్యైవ సతతం
త్వయైవేచ్ఛత్యమ్బ త్వమసి నిఖిలా యస్య తనవః ।
జగత్సామ్యం శమ్భోర్వహసి పరమవ్యోమవపుషః
తథాప్యర్ధం భూత్వా విహరసి శివస్యేతి కిమిదమ్ ॥ 35 ॥

అసఙ్ఖ్యైః ప్రాచీనైర్జనని జననైః కర్మవిలయా-
-త్సకృజ్జన్మన్యన్తే గురువపుషమాసాద్య గిరిశమ్ ।
అవాప్యాజ్ఞాం శైవీం శివతనుమపి త్వాం విదితవా-
-న్నయేయం త్వత్పూజాస్తుతివిరచనేనైవ దివసాన్ ॥ 36 ॥

యత్షట్పత్రం కమలముదితం తస్య యా కర్ణికాఖ్యా
యోనిస్తస్యాః ప్రథితముదరే యత్తదోఙ్కారపీఠమ్ ।
తస్యాప్యన్తః కుచభరనతాం కుణ్డలీతి ప్రసిద్ధాం
శ్యామాకారాం సకలజననీం సన్తతం భావయామి ॥ 37 ॥

భువి పయసి కృశానౌ మారుతే ఖే శశాఙ్కే
సవితరి యజమానేఽప్యష్టధా శక్తిరేకా ।
వహసి కుచభరాభ్యాం యావనమ్రాపి విశ్వం
సకలజనని సా త్వం పాహి మామిత్యవాచ్యమ్ ॥ 38 ॥

ఇతి శ్రీకాళిదాస విరచిత పఞ్చస్తవ్యాం పఞ్చమః సకలజననీస్తవః ।