శ్రీకృష్ణ ఉవాచ ।
త్వమేవ సర్వజననీ మూలప్రకృతిరీశ్వరీ ।
త్వమేవాద్యా సృష్టివిధౌ స్వేచ్ఛయా త్రిగుణాత్మికా ॥ 1 ॥
కార్యార్థే సగుణా త్వం చ వస్తుతో నిర్గుణా స్వయమ్ ।
పరబ్రహ్మస్వరూపా త్వం సత్యా నిత్యా సనాతనీ ॥ 2 ॥
తేజః స్వరూపా పరమా భక్తానుగ్రవిగ్రహా ।
సర్వస్వరూపా సర్వేశా సర్వాధారా పరాత్పరా ॥ 3 ॥
సర్వబీజస్వరూపా చ సర్వపూజ్యా నిరాశ్రయా ।
సర్వజ్ఞా సర్వతోభద్రా సర్వమఙ్గళమఙ్గళా ॥ 4 ॥
సర్వబుద్ధిస్వరూపా చ సర్వశక్తిస్వరూపిణీ ।
సర్వజ్ఞానప్రదా దేవీ సర్వజ్ఞా సర్వభావినీ ॥ 5 ॥
త్వం స్వాహా దేవదానే చ పితృదానే స్వధా స్వయమ్ ।
దక్షిణా సర్వదానే చ సర్వశక్తిస్వరూపిణీ ॥ 6 ॥
నిద్రా త్వం చ దయా త్వం చ తృష్ణా త్వం చాత్మనః ప్రియా ।
క్షుత్ క్షాన్తిః శాన్తిరీశా చ కాన్తిస్తుష్టిశ్చ శాశ్వతీ ॥ 7 ॥
శ్రద్ధా పుష్టిశ్చ తన్ద్రా చ లజ్జా శోభా దయా తథా ।
సతాం సమ్పత్స్వరూపా శ్రీర్విపత్తిరసతామిహ ॥ 8 ॥
ప్రీతిరూపా పుణ్యవతాం పాపినాం కలహాఙ్కురా ।
శశ్వత్కర్మమయీ శక్తిః సర్వదా సర్వజీవినామ్ ॥ 9 ॥
దేవేభ్యః స్వపదో దాత్రీ ధాతుర్ధాత్రీ కృపామయీ ।
హితాయ సర్వదేవానాం సర్వాసురవినాశినీ ॥ 10 ॥
యోగినిద్రా యోగరూపా యోగదాత్రీ చ యోగినామ్ ।
సిద్ధిస్వరూపా సిద్ధానాం సిద్ధిదా సిద్ధయోగినీ ॥ 11 ॥
మాహేశ్వరీ చ బ్రహ్మాణీ విష్ణుమాయా చ వైష్ణవీ ।
భద్రదా భద్రకాలీ చ సర్వలోకభయఙ్కరీ ॥ 12 ॥
గ్రామే గ్రామే గ్రామదేవీ గృహదేవీ గృహే గృహే ।
సతాం కీర్తిః ప్రతిష్ఠా చ నిన్దా త్వమసతాం సదా ॥ 13 ॥
మహాయుద్ధే మహామారీ దుష్టసంహారరూపిణీ ।
రక్షాస్వరూపా శిష్టానాం మాతేవ హితకారిణీ ॥ 14 ॥
వన్ద్యా పూజ్యా స్తుతా త్వం చ బ్రహ్మాదీనాం చ సర్వదా ।
బ్రహ్మణ్యరూపా విప్రాణాం తపస్యా చ తపస్వినామ్ ॥ 15 ॥
విద్యా విద్యావతాం త్వం చ బుద్ధిర్బుద్ధిమతాం సతామ్ ।
మేధా స్మృతిస్వరూపా చ ప్రతిభా ప్రతిభావతామ్ ॥ 16 ॥
రాజ్ఞాం ప్రతాపరూపా చ విశాం వాణిజ్యరూపిణీ ।
సృష్టౌ సృష్టిస్వరూపా త్వం రక్షారూపా చ పాలనే ॥ 17 ॥
తథాన్తే త్వం మహామారీ విశ్వే విశ్వైశ్చ పూజితే ।
కాలరాత్రిర్మహారాత్రిర్మోహరాత్రిశ్చ మోహినీ ॥ 18 ॥
దురత్యయా మే మాయా త్వం యయా సమ్మోహితం జగత్ ।
యయా ముగ్ధో హి విద్వాంశ్చ మోక్షమార్గం న పశ్యతి ॥ 19 ॥
ఇత్యాత్మనా కృతం స్తోత్రం దుర్గాయా దుర్గనాశనమ్ ।
పూజాకాలే పఠేద్యో హి సిద్ధిర్భవతి వాఞ్ఛితా ॥ 20 ॥
ఇతి శ్రీబ్రహ్మవైవర్తే మహాపురాణే ద్వితీయే ప్రకృతిఖణ్డే నారదనారాయణసంవాదే దుర్గోపాఖ్యానే షట్షష్టితమోఽధ్యాయే శ్రీ దుర్గా స్తోత్రమ్ ।
