ఐన్ద్రస్యేవ శరాసనస్య దధతీ మధ్యేలలాటం ప్రభాం
శౌక్లీం కాన్తిమనుష్ణగోరివ శిరస్యాతన్వతీ సర్వతః ।
ఏషాసౌ త్రిపురా హృది ద్యుతిరివోష్ణాంశోః సదాహః స్థితాత్
ఛిన్ద్యాన్నః సహసా పదైస్త్రిభిరఘం జ్యోతిర్మయీ వాఙ్మయీ ॥ 1 ॥
యా మాత్రా త్రపుసీలతాతనులసత్తన్తూత్థితిస్పర్ధినీ
వాగ్బీజే ప్రథమే స్థితా తవ సదా తాం మన్మహే తే వయమ్ ।
శక్తిః కుణ్డలినీతి విశ్వజననవ్యాపారబద్ధోద్యమాః
జ్ఞాత్వేత్థం న పునః స్పృశన్తి జననీగర్భేఽర్భకత్వం నరాః ॥ 2 ॥
దృష్ట్వా సమ్భ్రమకారి వస్తు సహసా ఐ ఐ ఇతి వ్యాహృతం
యేనాకూతవశాదపీహ వరదే బిన్దుం వినాప్యక్షరమ్ ।
తస్యాపి ధ్రువమేవ దేవి తరసా జాతే తవానుగ్రహే
వాచఃసూక్తిసుధారసద్రవముచో నిర్యాన్తి వక్త్రామ్బుజాత్ ॥ 3 ॥
యన్నిత్యే తవ కామరాజమపరం మన్త్రాక్షరం నిష్కలం
తత్సారస్వతమిత్యవైతి విరలః కశ్చిద్బుధశ్చేద్భువి ।
ఆఖ్యానం ప్రతిపర్వ సత్యతపసో యత్కీర్తయన్తో ద్విజాః
ప్రారమ్భే ప్రణవాస్పదప్రణయితాం నీత్వోచ్చరన్తి స్ఫుటమ్ ॥ 4 ॥
యత్సద్యో వచసాం ప్రవృత్తికరణే దృష్టప్రభావం బుధైః
తార్తీయం తదహం నమామి మనసా త్వద్బీజమిన్దుప్రభమ్ ।
అస్త్యౌర్వోఽపి సరస్వతీమనుగతో జాడ్యామ్బువిచ్ఛిత్తయే
గోశబ్దో గిరి వర్తతే సనియతం యోగం వినా సిద్ధిదః ॥ 5 ॥
ఏకైకం తవ దేవి బీజమనఘం సవ్యఞ్జనావ్యఞ్జనం
కూటస్థం యది వా పృథక్ క్రమగతం యద్వా స్థితం వ్యుత్క్రమాత్ ।
యం యం కామమపేక్ష్య యేన విధినా కేనాపి వా చిన్తితం
జప్తం వా సఫలీకరోతి సతతం తం తం సమస్తం నృణామ్ ॥ 6 ॥
వామే పుస్తకధారిణీమభయదాం సాక్షస్రజం దక్షిణే
భక్తేభ్యో వరదానపేశలకరాం కర్పూరకున్దోజ్జ్వలామ్ ।
ఉజ్జృమ్భామ్బుజపత్రకాన్తినయనస్నిగ్ధప్రభాలోకినీం
యే త్వామమ్బ న శీలయన్తి మనసా తేషాం కవిత్వం కుతః ॥ 7 ॥
యే త్వాం పాణ్డురపుణ్డరీకపటలస్పష్టాభిరామప్రభాం
సిఞ్చన్తీమమృతద్రవైరివ శిరో ధ్యాయన్తి మూర్ధ్ని స్థితామ్ ।
అశ్రాన్తా వికటస్ఫుటాక్షరపదా నిర్యాతి వక్త్రామ్బుజాత్
తేషాం భారతి భారతీ సురసరిత్కల్లోలలోలోర్మివత్ ॥ 8 ॥
యే సిన్దూరపరాగపిఞ్జపిహితాం త్వత్తేజసాద్యామిమాం
ఉర్వీం చాపి విలీనయావకరసప్రస్తారమగ్నామివ ।
పశ్యన్తి క్షణమప్యనన్యమనసస్తేషామనఙ్గజ్వర-
-క్లాన్తస్రస్తకురఙ్గశాబకదృశో వశ్యా భవన్తి స్ఫుటమ్ ॥ 9 ॥
చఞ్చత్కాఞ్చనకుణ్డలాఙ్గదధరామాబద్ధకాఞ్చీస్రజం
యే త్వాం చేతసి తద్గతే క్షణమపి ధ్యాయన్తి కృత్వా స్థిరామ్ ।
తేషాం వేశ్మసు విభ్రమాదహరహః స్ఫారీభవన్త్యశ్చిరం
మాద్యత్కుఞ్జరకర్ణతాలతరలాః స్థైర్యం భజన్తే శ్రియః ॥ 10 ॥
ఆర్భట్యా శశిఖణ్డమణ్డితజటాజూటాం నృముణ్డస్రజం
బన్ధూకప్రసవారుణామ్బరధరాం ప్రేతాసనాధ్యాసినీమ్ ।
త్వాం ధ్యాయన్తి చతుర్భుజాం త్రినయనామాపీనతుఙ్గస్తనీం
మధ్యే నిమ్నవలిత్రయాఙ్కితతనుం త్వద్రూపసంవిత్తయే ॥ 11 ॥
జాతోఽప్యల్పపరిచ్ఛదే క్షితిభుజాం సామాన్యమాత్రే కులే
నిఃశేషావనిచక్రవర్తిపదవీం లబ్ధ్వా ప్రతాపోన్నతః ।
యద్విద్యాధర బృన్దవన్దితపదః శ్రీవత్సరాజోఽభవత్
దేవి త్వచ్చరణామ్బుజ ప్రణతిజః సోఽయం ప్రసాదోదయః ॥ 12 ॥
చణ్డి త్వచ్చరణామ్బుజార్చనకృతే బిల్వాదిలోల్లుణ్ఠన-
-త్రుట్యత్కణ్టకకోటిభిః పరిచయం యేషాం న జగ్ముః కరాః ।
తే దణ్డాఙ్కుశచక్రచాపకులిశశ్రీవత్సమత్స్యాఙ్కితైః
జాయన్తే పృథివీభుజః కథమివామ్భోజప్రభైః పాణిభిః ॥ 13 ॥
విప్రాః క్షోణిభుజో విశస్తదితరే క్షీరాజ్యమధ్వాసవైః ।
త్వాం దేవి త్రిపురే పరాపరమయీం సన్తర్ప్య పూజావిధౌ ।
యాం యాం ప్రార్థయతే మనః స్థిరధియాం తేషాం త ఏవ ధ్రువం
తాం తాం సిద్ధిమవాప్నువన్తి తరసా విఘ్నైరవిఘ్నీకృతాః ॥ 14 ॥
శబ్దానాం జననీ త్వమత్ర భువనే వాగ్వాదినీత్యుచ్యసే
త్వత్తః కేశవవాసవ ప్రభృతయోఽప్యావిర్భవన్తి స్ఫుటమ్ ।
లీయన్తే ఖలు యత్ర కల్పవిరమే బ్రహ్మాదయస్తేఽప్యమీ
సా త్వం కాచిదచిన్త్యరూపమహిమా శక్తిః పరా గీయసే ॥ 15 ॥
దేవానాం త్రితయం త్రయీ హుతభుజాం శక్తిత్రయం త్రిః స్వరాః
త్రైలోక్యం త్రిపదీ త్రిపుష్కరమథో త్రిబ్రహ్మ వర్ణాస్త్రయః ।
యత్కిఞ్చిజ్జగతి త్రిధా నియమితం వస్తు త్రివర్గాదికం
తత్సర్వం త్రిపురేతి నామ భగవత్యన్వేతి తే తత్త్వతః ॥ 16 ॥
లక్ష్మీం రాజకులే జయాం రణభువి క్షేమఙ్కరీమధ్వని
క్రవ్యాదద్విపసర్పభాజి శబరీం కాన్తారదుర్గే గిరౌ ।
భూతప్రేతపిశాచజమ్బుకభయే స్మృత్వా మహాభైరవీం
వ్యామోహే త్రిపురాం తరన్తి విపదస్తారాం చ తోయప్లవే ॥ 17 ॥
మాయా కుణ్డలినీ క్రియా మధుమతీ కాలీ కలామాలినీ
మాతఙ్గీ విజయా జయా భగవతీ దేవీ శివా శామ్భవీ ।
శక్తిః శఙ్కరవల్లభా త్రినయనా వాగ్వాదినీ భైరవీ
హ్రీఙ్కారీ త్రిపురా పరాపరమయీ మాతా కుమారీత్యసి ॥ 18 ॥
ఆఈపల్లవితైః పరస్పరయుతైర్ద్విత్రిక్రమాద్యక్షరై
కాద్యైః క్షాన్తగతైః స్వరాదిభిరథ క్షాన్తైశ్చ తైః సస్వరైః ।
నామాని త్రిపురే భవన్తి ఖలు యాన్యత్యన్తగుహ్యాని తే
తేభ్యో భైరవపత్ని వింశతిసహస్రేభ్యః పరేభ్యో నమః ॥ 19 ॥
బోద్ధవ్యా నిపుణం బుధైః స్తుతిరియం కృత్వా మనస్తద్గతం
భారత్యాస్త్రిపురేత్యనన్యమనసా యత్రాద్యవృత్తే స్ఫుటమ్ ।
ఏకద్విత్రిపదక్రమేణ కథితస్తత్పాదసఙ్ఖ్యాక్షరైః
మన్త్రోద్ధార విధిర్విశేషసహితః సత్సమ్ప్రదాయాన్వితః ॥ 20 ॥
సావద్యం నిరవద్యమస్తు యది వా కిం వానయా చిన్తయా
నూనం స్తోత్రమిదం పఠిష్యతి జనో యస్యాస్తి భక్తిస్త్వయి ।
సఞ్చిన్త్యాపి లఘుత్వమాత్మని దృఢం సఞ్జాయమానం హఠాత్
త్వద్భక్త్యా ముఖరీకృతేన రచితం యస్మాన్మయాపి ధృవమ్ ॥ 21 ॥
ఇతి శ్రీకాళిదాస విరచిత పఞ్చస్తవ్యాం ప్రథమః లఘుస్తవః ।
