VR 1.34 Bala Kanda - Sarga 34 - Grantha

Collection of Spiritual and Devotional Literature in Various Indian Languages

View this in:

1.34 𑌬𑌾𑌲𑌕𑌾𑌂𑌡 - 𑌚𑌤𑍁𑌸𑍍𑌤𑍍𑌰𑌿𑌂𑌶 𑌸𑌰𑍍𑌗𑌃

𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌬𑌾𑌲𑌕𑌾𑌂𑌡𑌮𑍍 ।
𑌅𑌥 𑌚𑌤𑍁𑌸𑍍𑌤𑍍𑌰𑌿𑌂𑌶𑌸𑍍𑌸𑌰𑍍𑌗𑌃 ।

𑌕𑍃𑌤𑍋𑌦𑍍𑌵𑌾𑌹𑍇 𑌗𑌤𑍇 𑌤𑌸𑍍𑌮𑌿𑌨𑍍 𑌬𑍍𑌰𑌹𑍍𑌮𑌦𑌤𑍍𑌤𑍇 𑌚 𑌰𑌾𑌘𑌵 ।
𑌅𑌪𑍁𑌤𑍍𑌰𑌃 𑌪𑍁𑌤𑍍𑌰𑌲𑌾𑌭𑌾𑌯 𑌪𑍌𑌤𑍍𑌰𑍀𑌮𑌿𑌷𑍍𑌟𑌿𑌮𑌕𑌲𑍍𑌪𑌯𑌤𑍍 ॥ 1 ॥

𑌇𑌷𑍍𑌟𑍍𑌯𑌾𑌂 𑌤𑍁 𑌵𑌰𑍍𑌤𑌮𑌾𑌨𑌾𑌯𑌾𑌂 𑌕𑍁𑌶𑌨𑌾𑌭𑌂 𑌮𑌹𑍀𑌪𑌤𑌿𑌮𑍍 ।
𑌉𑌵𑌾𑌚 𑌪𑌰𑌮𑍋𑌦𑌾𑌰𑌃 𑌕𑍁𑌶𑍋 𑌬𑍍𑌰𑌹𑍍𑌮𑌸𑍁𑌤𑌸𑍍𑌤𑌦𑌾 ॥ 2 ॥

𑌪𑍁𑌤𑍍𑌰𑌸𑍍𑌤𑍇 𑌸𑌦𑍃𑌶𑌃 𑌪𑍁𑌤𑍍𑌰 𑌭𑌵𑌿𑌷𑍍𑌯𑌤𑌿 𑌸𑍁𑌧𑌾𑌰𑍍𑌮𑌿𑌕𑌃 ।
𑌗𑌾𑌧𑌿𑌂 𑌪𑍍𑌰𑌾𑌪𑍍𑌸𑍍𑌯𑌸𑌿 𑌤𑍇𑌨 𑌤𑍍𑌵𑌂 𑌕𑍀𑌰𑍍𑌤𑌿𑌂 𑌲𑍋𑌕𑍇 𑌚 𑌶𑌾𑌶𑍍𑌵𑌤𑍀𑌮𑍍 ॥ 3 ॥

𑌏𑌵𑌮𑍁𑌕𑍍𑌤𑍍𑌵𑌾 𑌕𑍁𑌶𑍋 𑌰𑌾𑌮 𑌕𑍁𑌶𑌨𑌾𑌭𑌂 𑌮𑌹𑍀𑌪𑌤𑌿𑌮𑍍 ।
𑌜𑌗𑌾𑌮𑌾𑌕𑌾𑌶𑌮𑌾𑌵𑌿𑌶𑍍𑌯 𑌬𑍍𑌰𑌹𑍍𑌮𑌲𑍋𑌕𑌂 𑌸𑌨𑌾𑌤𑌨𑌾𑌮𑍍 ॥ 4 ॥

𑌕𑌸𑍍𑌯 𑌚𑌿𑌤𑍍𑌤𑍍𑌵𑌥 𑌕𑌾𑌲𑌸𑍍𑌯 𑌕𑍁𑌶𑌨𑌾𑌭𑌸𑍍𑌯 𑌧𑍀𑌮𑌤𑌃 ।
𑌜𑌜𑍍𑌞𑍇 𑌪𑌰𑌮𑌧𑌰𑍍𑌮𑌿𑌷𑍍𑌠𑍋 𑌗𑌾𑌧𑌿𑌰𑌿𑌤𑍍𑌯𑍇𑌵 𑌨𑌾𑌮𑌤𑌃 ॥ 5 ॥

𑌸 𑌪𑌿𑌤𑌾 𑌮𑌮 𑌕𑌾𑌕𑍁𑌤𑍍𑌸𑍍𑌥 𑌗𑌾𑌧𑌿𑌃 𑌪𑌰𑌮𑌧𑌾𑌰𑍍𑌮𑌿𑌕𑌃 ।
𑌕𑍁𑌶𑌵𑌂𑌶𑌪𑍍𑌰𑌸𑍂𑌤𑍋𑌽𑌸𑍍𑌮𑌿 𑌕𑍌𑌶𑌿𑌕𑍋 𑌰𑌘𑍁𑌨𑌂𑌦𑌨 ॥ 6 ॥

𑌪𑍂𑌰𑍍𑌵𑌜𑌾 𑌭𑌗𑌿𑌨𑍀 𑌚𑌾𑌪𑌿 𑌮𑌮 𑌰𑌾𑌘𑌵 𑌸𑍁𑌵𑍍𑌰𑌤𑌾 ।
𑌨𑌾𑌮𑍍𑌨𑌾 𑌸𑌤𑍍𑌯𑌵𑌤𑍀 𑌨𑌾𑌮 𑌋𑌚𑍀𑌕𑍇 𑌪𑍍𑌰𑌤𑌿𑌪𑌾𑌦𑌿𑌤𑌾 ॥ 𑍭 ॥

𑌸𑌶𑌰𑍀𑌰𑌾 𑌗𑌤𑌾 𑌸𑍍𑌵𑌰𑍍𑌗𑌂 𑌭𑌰𑍍𑌤𑌾𑌰𑌮𑌨𑍁𑌵𑌰𑍍𑌤𑌿𑌨𑍀 ।
𑌕𑍌𑌶𑌿𑌕𑍀 𑌪𑌰𑌮𑍋𑌦𑌾𑌰𑌾 𑌪𑍍𑌰𑌵𑍃𑌤𑍍𑌤𑌾 𑌚 𑌮𑌹𑌾𑌨𑌦𑍀 ॥ 𑍮 ॥

𑌦𑌿𑌵𑍍𑌯𑌾 𑌪𑍁𑌣𑍍𑌯𑍋𑌦𑌕𑌾 𑌰𑌮𑍍𑌯𑌾 𑌹𑌿𑌮𑌵𑌂𑌤𑌮𑍁𑌪𑌾𑌶𑍍𑌰𑌿𑌤𑌾 ।
𑌲𑍋𑌕𑌸𑍍𑌯 𑌹𑌿𑌤𑌕𑌾𑌮𑌾𑌰𑍍𑌥𑌂 𑌪𑍍𑌰𑌵𑍃𑌤𑍍𑌤𑌾 𑌭𑌗𑌿𑌨𑍀 𑌮𑌮 ॥ 𑍯 ॥

𑌤𑌤𑍋𑌽𑌹𑌂 𑌹𑌿𑌮𑌵𑌤𑍍𑌪𑌾𑌰𑍍𑌶𑍍𑌵𑍇 𑌵𑌸𑌾𑌮𑌿 𑌨𑌿𑌰𑌤𑌸𑍍𑌸𑍁𑌖𑌮𑍍 ।
𑌭𑌗𑌿𑌨𑍍𑌯𑌾𑌂 𑌸𑍍𑌨𑍇𑌹𑌸𑌂𑌯𑍁𑌕𑍍𑌤𑌃 𑌕𑍌𑌶𑌿𑌕𑍍𑌯𑌾𑌂 𑌰𑌘𑍁𑌨𑌂𑌦𑌨 ॥ 10 ॥

𑌸𑌾 𑌤𑍁 𑌸𑌤𑍍𑌯𑌵𑌤𑍀 𑌪𑍁𑌣𑍍𑌯𑌾 𑌸𑌤𑍍𑌯𑍇 𑌧𑌰𑍍𑌮𑍇 𑌪𑍍𑌰𑌤𑌿𑌷𑍍𑌠𑌿𑌤𑌾 ।
𑌪𑌤𑌿𑌵𑍍𑌰𑌤𑌾 𑌮𑌹𑌾𑌭𑌾𑌗𑌾 𑌕𑍌𑌶𑌿𑌕𑍀 𑌸𑌰𑌿𑌤𑌾𑌂 𑌵𑌰𑌾 ॥ 11 ॥

𑌅𑌹𑌂 𑌹𑌿 𑌨𑌿𑌯𑌮𑌾𑌦𑍍𑌰𑌾𑌮 𑌹𑌿𑌤𑍍𑌵𑌾 𑌤𑌾𑌂 𑌸𑌮𑍁𑌪𑌾𑌗𑌤𑌃 ।
𑌸𑌿𑌦𑍍𑌧𑌾𑌶𑍍𑌰𑌮𑌮𑌨𑍁𑌪𑍍𑌰𑌾𑌪𑍍𑌯 𑌸𑌿𑌦𑍍𑌧𑍋𑌽𑌸𑍍𑌮𑌿 𑌤𑌵 𑌤𑍇𑌜𑌸𑌾 ॥ 12 ॥

𑌏𑌷𑌾 𑌰𑌾𑌮 𑌮𑌮𑍋𑌤𑍍𑌪𑌤𑍍𑌤𑌿𑌸𑍍𑌸𑍍𑌵𑌸𑍍𑌯 𑌵𑌂𑌶𑌸𑍍𑌯 𑌕𑍀𑌰𑍍𑌤𑌿𑌤𑌾 ।
𑌦𑍇𑌶𑌸𑍍𑌯 𑌚 𑌮𑌹𑌾𑌬𑌾𑌹𑍋 𑌯𑌨𑍍𑌮𑌾𑌂 𑌤𑍍𑌵𑌂 𑌪𑌰𑌿𑌪𑍃𑌚𑍍𑌛𑌸𑌿 ॥ 13 ॥

𑌗𑌤𑍋𑌽𑌰𑍍𑌧𑌰𑌾𑌤𑍍𑌰𑌃 𑌕𑌾𑌕𑍁𑌤𑍍𑌸𑍍𑌥 𑌕𑌥𑌾𑌃 𑌕𑌥𑌯𑌤𑍋 𑌮𑌮 ।
𑌨𑌿𑌦𑍍𑌰𑌾𑌮𑌭𑍍𑌯𑍇𑌹𑌿 𑌭𑌦𑍍𑌰𑌂 𑌤𑍇 𑌮𑌾 𑌭𑍂𑌦𑍍𑌵𑌿𑌘𑍍𑌨𑍋𑌽𑌧𑍍𑌵𑌨𑍀𑌹 𑌨𑌃 ॥ 14 ॥

𑌨𑌿𑌷𑍍𑌪𑌂𑌦𑌾𑌸𑍍𑌤𑌰𑌵𑌸𑍍𑌸𑌰𑍍𑌵𑍇 𑌨𑌿𑌲𑍀𑌨𑌮𑍃𑌗𑌪𑌕𑍍𑌷𑌿𑌣𑌃 ।
𑌨𑍈𑌶𑍇𑌨 𑌤𑌮𑌸𑌾 𑌵𑍍𑌯𑌾𑌪𑍍𑌤𑌾 𑌦𑌿𑌶𑌶𑍍𑌚 𑌰𑌘𑍁𑌨𑌂𑌦𑌨 ॥ 15 ॥

𑌶𑌨𑍈𑌰𑍍𑌵𑌿𑌯𑍁𑌜𑍍𑌯𑌤𑍇 𑌸𑌂𑌧𑍍𑌯𑌾 𑌨𑌭𑍋 𑌨𑍇𑌤𑍍𑌰𑍈𑌰𑌿𑌵𑌾𑌵𑍃𑌤𑌮𑍍 ।
𑌨𑌕𑍍𑌷𑌤𑍍𑌰𑌤𑌾𑌰𑌾𑌗𑌹𑌨𑌂 𑌜𑍍𑌯𑍋𑌤𑌿𑌰𑍍𑌭𑌿𑌰𑌿𑌵 𑌭𑌾𑌸𑌤𑍇 ॥ 16 ॥

𑌉𑌤𑍍𑌤𑌿𑌷𑍍𑌠𑌤𑌿 𑌚 𑌶𑍀𑌤𑌾𑌂𑌶𑍁𑌶𑍍𑌶𑌶𑍀 𑌲𑍋𑌕𑌤𑌮𑍋𑌨𑍁𑌦𑌃 ।
𑌹𑍍𑌲𑌾𑌦𑌯𑌨𑍍 𑌪𑍍𑌰𑌾𑌣𑌿𑌨𑌾𑌂 𑌲𑍋𑌕𑍇 𑌮𑌨𑌾𑌂𑌸𑌿 𑌪𑍍𑌰𑌭𑌯𑌾 𑌵𑌿𑌭𑍋 ॥ 1𑍭 ॥

𑌨𑍈𑌶𑌾𑌨𑌿 𑌸𑌰𑍍𑌵𑌭𑍂𑌤𑌾𑌨𑌿 𑌪𑍍𑌰𑌚𑌰𑌂𑌤𑌿 𑌤𑌤𑌸𑍍𑌤𑌤𑌃 ।
𑌯𑌕𑍍𑌷𑌰𑌾𑌕𑍍𑌷𑌸𑌸𑌂𑌘𑌾𑌶𑍍𑌚 𑌰𑍌𑌦𑍍𑌰𑌾𑌶𑍍𑌚 𑌪𑌿𑌶𑌿𑌤𑌾𑌶𑌨𑌾𑌃 ॥ 1𑍮 ॥

𑌏𑌵𑌮𑍁𑌕𑍍𑌤𑍍𑌵𑌾 𑌮𑌹𑌾𑌤𑍇𑌜𑌾 𑌵𑌿𑌰𑌰𑌾𑌮 𑌮𑌹𑌾𑌮𑍁𑌨𑌿𑌃 ।
𑌸𑌾𑌧𑍁 𑌸𑌾𑌧𑍍𑌵𑌿𑌤𑌿 𑌤𑌂 𑌸𑌰𑍍𑌵𑍇 𑌋𑌷𑌯𑍋 𑌹𑍍𑌯𑌭𑍍𑌯𑌪𑍂𑌜𑌯𑌨𑍍 ॥ 1𑍯 ॥

𑌕𑍁𑌶𑌿𑌕𑌾𑌨𑌾𑌮𑌯𑌂 𑌵𑌂𑌶𑍋 𑌮𑌹𑌾𑌨𑍍 𑌧𑌰𑍍𑌮𑌪𑌰𑌸𑍍𑌸𑌦𑌾 ।
𑌬𑍍𑌰𑌹𑍍𑌮𑍋𑌪𑌮𑌾 𑌮𑌹𑌾𑌤𑍍𑌮𑌾𑌨𑌃 𑌕𑍁𑌶𑌵𑌂𑌶𑍍𑌯𑌾 𑌨𑌰𑍋𑌤𑍍𑌤𑌮𑌾𑌃 ॥ 20 ॥

𑌵𑌿𑌶𑍇𑌷𑍇𑌣 𑌭𑌵𑌾𑌨𑍇𑌵 𑌵𑌿𑌶𑍍𑌵𑌾𑌮𑌿𑌤𑍍𑌰𑍋 𑌮𑌹𑌾𑌯𑌶𑌾𑌃 ।
𑌕𑍌𑌶𑌿𑌕𑍀 𑌸𑌰𑌿𑌤𑌾𑌂 𑌶𑍍𑌰𑍇𑌷𑍍𑌠𑌾 𑌕𑍁𑌲𑍋𑌦𑍍𑌯𑍋𑌤𑌕𑌰𑍀 𑌤𑌵 ॥ 21 ॥

𑌇𑌤𑌿 𑌤𑍈𑌰𑍍𑌮𑍁𑌨𑌿𑌶𑌾𑌰𑍍𑌦𑍂𑌲𑍈𑌃 𑌪𑍍𑌰𑌶𑌸𑍍𑌤𑌃 𑌕𑍁𑌶𑌿𑌕𑌾𑌤𑍍𑌮𑌜𑌃 ।
𑌨𑌿𑌦𑍍𑌰𑌾𑌮𑍁𑌪𑌾𑌗𑌮𑌚𑍍𑌛𑍍𑌰𑍀𑌮𑌾𑌨𑍍 𑌅𑌸𑍍𑌤𑌂𑌗𑌤 𑌇𑌵𑌾𑌂𑌶𑍁𑌮𑌾𑌨𑍍 ॥ 22 ॥

𑌰𑌾𑌮𑍋𑌽𑌪𑌿 𑌸𑌹𑌸𑍌𑌮𑌿𑌤𑍍𑌰𑌿𑌃 𑌕𑌿𑌂𑌚𑌿𑌦𑌾𑌗𑌤𑌵𑌿𑌸𑍍𑌮𑌯𑌃 ।
𑌪𑍍𑌰𑌶𑌸𑍍𑌯 𑌮𑍁𑌨𑌿𑌶𑌾𑌰𑍍𑌦𑍂𑌲𑌂 𑌨𑌿𑌦𑍍𑌰𑌾𑌂 𑌸𑌮𑍁𑌪𑌸𑍇𑌵𑌤𑍇 ॥ 23 ॥

𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌬𑌾𑌲𑌕𑌾𑌂𑌡𑍇 𑌚𑌤𑍁𑌸𑍍𑌤𑍍𑌰𑌿𑌂𑌶𑌸𑍍𑌸𑌰𑍍𑌗𑌃 ॥

Browse Related Categories: