Meaning, Multimedia
View this in:
| English | Devanagari | Telugu | Tamil | Kannada | Malayalam | Gujarati | Odia | Bengali  |
| Marathi | Assamese | Punjabi | Hindi | Samskritam | Konkani | Nepali | Sinhala | Grantha  |

2.54 𑌅𑌯𑍋𑌧𑍍𑌯𑌾𑌕𑌾𑌂𑌡 - 𑌚𑌤𑍁𑌃𑌪𑌂𑌚𑌾𑌶 𑌸𑌰𑍍𑌗𑌃

𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑌮𑍍 ।
𑌅𑌥 𑌚𑌤𑍁𑌃𑌪𑌂𑌚𑌾𑌶𑌸𑍍𑌸𑌰𑍍𑌗𑌃 ।

𑌤𑍇 𑌤𑍁 𑌤𑌸𑍍𑌮𑌿𑌨𑍍𑌮𑌹𑌾𑌵𑍃𑌕𑍍𑌷𑍇 𑌉𑌷𑌿𑌤𑍍𑌵𑌾 𑌰𑌜𑌨𑍀𑌂 𑌶𑌿𑌵𑌾𑌮𑍍 ।
𑌵𑌿𑌮𑌲𑍇𑌽𑌭𑍍𑌯𑍁𑌦𑌿𑌤𑍇 𑌸𑍂𑌰𑍍𑌯𑍇 𑌤𑌸𑍍𑌮𑌾𑌦𑍍𑌦𑍇𑌶𑌾𑌤𑍍𑌪𑍍𑌰𑌤𑌸𑍍𑌥𑌿𑌰𑍇 ॥ 1 ॥

𑌯𑌤𑍍𑌰 𑌭𑌾𑌗𑍀𑌰𑌥𑍀𑌂 𑌗𑌂𑌗𑌾𑌂 𑌯𑌮𑍁𑌨𑌾𑌭𑌿𑌪𑍍𑌰𑌵𑌰𑍍𑌤𑌤𑍇 ।
𑌜𑌗𑍍𑌮𑍁𑌸𑍍𑌤𑌂 𑌦𑍇𑌶𑌮𑍁𑌦𑍍𑌦𑌿𑌶𑍍𑌯 𑌵𑌿𑌗𑌾𑌹𑍍𑌯 𑌸𑍁𑌮𑌹𑌦𑍍𑌵𑌨𑌮𑍍 ॥ 2 ॥

𑌤𑍇 𑌭𑍂𑌮𑌿𑌭𑌾𑌗𑌾𑌨𑍍𑌵𑌿𑌵𑌿𑌧𑌾𑌨𑍍 𑌦𑍇𑌶𑌾𑌂𑌶𑍍𑌚𑌾𑌪𑌿 𑌮𑌨𑍋𑌰𑌮𑌾𑌨𑍍 ।
𑌅𑌦𑍃𑌷𑍍𑌟𑌪𑍂𑌰𑍍𑌵𑌾𑌨𑍍 𑌪𑌶𑍍𑌯𑌂𑌤𑌸𑍍𑌤𑌤𑍍𑌰 𑌤𑌤𑍍𑌰 𑌯𑌶𑌶𑍍𑌵𑌿𑌨𑌃 ॥ 3 ॥

𑌯𑌥𑌾 𑌕𑍍𑌷𑍇𑌮𑍇𑌣 𑌗𑌚𑍍𑌛𑌨𑍍 𑌸 𑌪𑌶𑍍𑌯𑌂𑌶𑍍𑌚 𑌵𑌿𑌵𑌿𑌧𑌾𑌨𑍍 𑌦𑍍𑌰𑍁𑌮𑌾𑌨𑍍 ।
𑌨𑌿𑌵𑍃𑌤𑍍𑌤𑌮𑌾𑌤𑍍𑌰𑍇 𑌦𑌿𑌵𑌸𑍇 𑌰𑌾𑌮𑌃 𑌸𑍌𑌮𑌿𑌤𑍍𑌰𑌿𑌮𑌬𑍍𑌰𑌵𑍀𑌤𑍍 ॥ 4 ॥

𑌪𑍍𑌰𑌯𑌾𑌗𑌮𑌭𑌿𑌤𑌃 𑌪𑌶𑍍𑌯 𑌸𑍌𑌮𑌿𑌤𑍍𑌰𑍇 𑌧𑍂𑌮𑌮𑍁𑌨𑍍𑌨𑌤𑌮𑍍 ।
𑌅𑌗𑍍𑌨𑍇𑌰𑍍𑌭𑌗𑌵𑌤𑌃 𑌕𑍇𑌤𑍁𑌂 𑌮𑌨𑍍𑌯𑍇 𑌸𑌨𑍍𑌨𑌿𑌹𑌿𑌤𑍋 𑌮𑍁𑌨𑌿𑌃 ॥ 5 ॥

𑌨𑍂𑌨𑌂 𑌪𑍍𑌰𑌾𑌪𑍍𑌤𑌾𑌃 𑌸𑍍𑌮 𑌸𑌂𑌭𑍇𑌦𑌂 𑌗𑌂𑌗𑌾𑌯𑌮𑍁𑌨𑌯𑍋𑌰𑍍𑌵𑌯𑌮𑍍 ।
𑌤𑌥𑌾 𑌹𑌿 𑌶𑍍𑌰𑍂𑌯𑌤𑍇 𑌶𑌬𑍍𑌦𑍋 𑌵𑌾𑌰𑌿𑌣𑍋 𑌵𑌾𑌰𑌿𑌘𑌟𑍍𑌟𑌿𑌤𑌃 ॥ 6 ॥

𑌦𑌾𑌰𑍂𑌣𑌿 𑌪𑌰𑌿𑌭𑌿𑌨𑍍𑌨𑌾𑌨𑌿 𑌵𑌨𑌜𑍈𑌰𑍁𑌪𑌜𑍀𑌵𑌿𑌭𑌿𑌃 ।
𑌭𑌰𑌦𑍍𑌵𑌾𑌜𑌾𑌶𑍍𑌰𑌮𑍇 𑌚𑍈𑌤𑍇 𑌦𑍃𑌶𑍍𑌯𑌂𑌤𑍇 𑌵𑌿𑌵𑌿𑌧𑌾 𑌦𑍍𑌰𑍁𑌮𑌾𑌃 ॥ 𑍭 ॥

𑌧𑌨𑍍𑌵𑌿𑌨𑍌 𑌤𑍌 𑌸𑍁𑌖𑌂 𑌗𑌤𑍍𑌵𑌾 𑌲𑌂𑌬𑌮𑌾𑌨𑍇 𑌦𑌿𑌵𑌾𑌕𑌰𑍇 ।
𑌗𑌂𑌗𑌾𑌯𑌮𑍁𑌨𑌯𑍋𑌸𑍍𑌸𑌂𑌧𑍌 𑌪𑍍𑌰𑌾𑌪𑌤𑍁𑌰𑍍𑌨𑌿𑌲𑌯𑌂 𑌮𑍁𑌨𑍇𑌃 ॥ 𑍮 ॥

𑌰𑌾𑌮𑌸𑍍𑌤𑍍𑌵𑌾𑌶𑍍𑌰𑌮𑌮𑌾𑌸𑌾𑌦𑍍𑌯 𑌤𑍍𑌰𑌾𑌸𑌯𑌨𑍍𑌮𑍃𑌗𑌪𑌕𑍍𑌷𑌿𑌣𑌃 ।
𑌗𑌤𑍍𑌵𑌾 𑌮𑍁𑌹𑍂𑌰𑍍𑌤𑌮𑌧𑍍𑌵𑌾𑌨𑌂 𑌭𑌰𑌦𑍍𑌵𑌾𑌜𑌮𑍁𑌪𑌾𑌗𑌮𑌤𑍍 ॥ 𑍯 ॥

𑌤𑌤𑌸𑍍𑌤𑍍𑌵𑌾𑌶𑍍𑌰𑌮𑌾𑌸𑌾𑌦𑍍𑌯 𑌮𑍁𑌨𑍇𑌰𑍍𑌦𑌰𑍍𑌶𑌨𑌕𑌾𑌂𑌕𑍍𑌷𑌿𑌣𑍌 ।
𑌸𑍀𑌤𑌯𑌾𑌨𑍁𑌗𑌤𑍌 𑌵𑍀𑌰𑍌 𑌦𑍂𑌰𑌾𑌦𑍇𑌵𑌾𑌵𑌤𑌸𑍍𑌥𑌤𑍁𑌃 ॥ 10 ॥

𑌸 𑌪𑍍𑌰𑌵𑌿𑌶𑍍𑌯 𑌮𑌹𑌾𑌤𑍍𑌮𑌾𑌨𑌮𑍃𑌷𑌿𑌂 𑌶𑌿𑌷𑍍𑌯𑌗𑌣𑍈𑌰𑍍𑌵𑍃𑌤𑌮𑍍 ।
𑌸𑌂𑌶𑌿𑌤𑌵𑍍𑌰𑌤𑌮𑍇𑌕𑌾𑌗𑍍𑌰𑌂 𑌤𑌪𑌸𑌾 𑌲𑌬𑍍𑌧𑌚𑌕𑍍𑌷𑍁𑌷𑌮𑍍 ॥ 11 ॥

𑌹𑍁𑌤𑌾𑌗𑍍𑌨𑌿𑌹𑍋𑌤𑍍𑌰𑌂 𑌦𑍃𑌷𑍍𑌟𑍍𑌵𑍈𑌵 𑌮𑌹𑌾𑌭𑌾𑌗𑌂 𑌕𑍃𑌤𑌾𑌂𑌜𑌲𑌿𑌃 ।
𑌰𑌾𑌮𑌃 𑌸𑍌𑌮𑌿𑌤𑍍𑌰𑌿𑌣𑌾 𑌸𑌾𑌰𑍍𑌧𑌂 𑌸𑍀𑌤𑌯𑌾 𑌚𑌾𑌭𑍍𑌯𑌵𑌾𑌦𑌯𑌤𑍍 ॥ 12 ॥

𑌨𑍍𑌯𑌵𑍇𑌦𑌯𑌤 𑌚𑌾𑌤𑍍𑌮𑌾𑌨𑌂 𑌤𑌸𑍍𑌮𑍈 𑌲𑌕𑍍𑌷𑍍𑌮𑌣𑌪𑍂𑌰𑍍𑌵𑌜𑌃 ।
𑌪𑍁𑌤𑍍𑌰𑍌 𑌦𑌶𑌰𑌥𑌸𑍍𑌯𑌾𑌵𑌾𑌂 𑌭𑌗𑌵𑌨𑍍 𑌰𑌾𑌮𑌲𑌕𑍍𑌷𑍍𑌮𑌣𑍌 ॥ 13 ॥

𑌭𑌾𑌰𑍍𑌯𑌾 𑌮𑌮𑍇𑌯𑌂 𑌵𑍈𑌦𑍇𑌹𑍀 𑌕𑌲𑍍𑌯𑌾𑌣𑍀 𑌜𑌨𑌕𑌾𑌤𑍍𑌮𑌜𑌾 ।
𑌮𑌾𑌂 𑌚𑌾𑌨𑍁𑌯𑌾𑌤𑌾 𑌵𑌿𑌜𑌨𑌂 𑌤𑌪𑍋𑌵𑌨𑌮𑌨𑌿𑌂𑌦𑌿𑌤𑌾 ॥ 14 ॥

𑌪𑌿𑌤𑍍𑌰𑌾 𑌪𑍍𑌰𑌵𑍍𑌰𑌾𑌜𑍍𑌯𑌮𑌾𑌨𑌂 𑌮𑌾𑌂 𑌸𑍌𑌮𑌿𑌤𑍍𑌰𑌿𑌰𑌨𑍁𑌜 𑌪𑍍𑌰𑌿𑌯𑌃 ।
𑌅𑌯𑌮𑌨𑍍𑌵𑌗𑌮𑌦𑍍𑌭𑍍𑌰𑌾𑌤𑌾 𑌵𑌨𑌮𑍇𑌵 𑌦𑍃𑌢𑌵𑍍𑌰𑌤𑌃 ॥ 15 ॥

𑌪𑌿𑌤𑍍𑌰𑌾 𑌨𑌿𑌯𑍁𑌕𑍍𑌤𑌾 𑌭𑌗𑌵𑌨𑍍 𑌪𑍍𑌰𑌵𑍇𑌕𑍍𑌷𑍍𑌯𑌾𑌮𑌸𑍍𑌤𑌪𑍋𑌵𑌨𑌮𑍍 ।
𑌧𑌰𑍍𑌮𑌮𑍇𑌵 𑌚𑌰𑌿𑌷𑍍𑌯𑌾𑌮 𑌸𑍍𑌤𑌤𑍍𑌰 𑌮𑍂𑌲𑌫𑌲𑌾𑌶𑌨𑌾𑌃 ॥ 16 ॥

𑌤𑌸𑍍𑌯 𑌤𑌦𑍍𑌵𑌚𑌨𑌂 𑌶𑍍𑌰𑍁𑌤𑍍𑌵𑌾 𑌰𑌾𑌜𑌪𑍁𑌤𑍍𑌰𑌸𑍍𑌯 𑌧𑍀𑌮𑌤𑌃 ।
𑌉𑌪𑌾𑌨𑌯𑌤 𑌧𑌰𑍍𑌮𑌾𑌤𑍍𑌮𑌾 𑌗𑌾𑌮𑌰𑍍𑌘𑍍𑌯𑌮𑍁𑌦𑌕𑌂 𑌤𑌤𑌃 ॥ 1𑍭 ॥

𑌨𑌾𑌨𑌾𑌵𑌿𑌧𑌾𑌨𑌨𑍍𑌨𑌰𑌸𑌾𑌨𑍍 𑌵𑌨𑍍𑌯𑌮𑍂𑌲𑌫𑌲𑌾𑌶𑍍𑌰𑌯𑌾𑌨𑍍 ।
𑌤𑍇𑌭𑍍𑌯𑍋 𑌦𑌦𑍌 𑌤𑌪𑍍𑌤𑌤𑌪𑌾 𑌵𑌾𑌸𑌂 𑌚𑍈𑌵𑌾𑌭𑍍𑌯𑌕𑌲𑍍𑌪𑌯𑌤𑍍 ॥ 1𑍮 ॥

𑌮𑍃𑌗𑌪𑌕𑍍𑌷𑌿𑌭𑌿𑌰𑌾𑌸𑍀𑌨𑍋 𑌮𑍁𑌨𑌿𑌭𑌿𑌶𑍍𑌚 𑌸𑌮𑌂𑌤𑌤𑌃 ।
𑌰𑌾𑌮𑌮𑌾𑌗𑌤𑌮𑌭𑍍𑌯𑌰𑍍𑌚𑍍𑌯 𑌸𑍍𑌵𑌾𑌗𑌤𑍇𑌨𑌾𑌹𑌤𑌂 𑌮𑍁𑌨𑌿𑌃 ॥ 1𑍯 ॥

𑌪𑍍𑌰𑌤𑌿𑌗𑍃𑌹𑍍𑌯 𑌚 𑌤𑌾𑌮𑌰𑍍𑌚𑌾𑌮𑍁𑌪𑌵𑌿𑌷𑍍𑌟𑌂 𑌸 𑌰𑌾𑌘𑌵𑌮𑍍 ।
𑌭𑌰𑌦𑍍𑌵𑌾𑌜𑍋𑌽𑌬𑍍𑌰𑌵𑍀𑌦𑍍𑌵𑌾𑌕𑍍𑌯𑌂 𑌧𑌰𑍍𑌮𑌯𑍁𑌕𑍍𑌤𑌮𑌿𑌦𑌂 𑌤𑌦𑌾 ॥ 20 ॥

𑌚𑌿𑌰𑌸𑍍𑌯 𑌖𑌲𑍁 𑌕𑌾𑌕𑍁𑌤𑍍𑌸𑍍𑌥 𑌪𑌶𑍍𑌯𑌾𑌮𑌿 𑌤𑍍𑌵𑌾𑌮𑌿𑌹𑌾𑌗𑌤𑌮𑍍 ।
𑌶𑍍𑌰𑍁𑌤𑌂 𑌤𑌵 𑌮𑌯𑌾 𑌚𑍇𑌦𑌂 𑌵𑌿𑌵𑌾𑌸𑌨𑌮𑌕𑌾𑌰𑌣𑌮𑍍 ॥ 21 ॥

𑌅𑌵𑌕𑌾𑌶𑍋 𑌵𑌿𑌵𑌿𑌕𑍍𑌤𑍋𑌽𑌯𑌂 𑌮𑌹𑌾𑌨𑌦𑍍𑌯𑍋𑌸𑍍𑌸𑌮𑌾𑌗𑌮𑍇 ।
𑌪𑍁𑌣𑍍𑌯𑌶𑍍𑌚 𑌰𑌮𑌣𑍀𑌯𑌶𑍍𑌚 𑌵𑌸𑌤𑍍𑌵𑌿𑌹 𑌭𑌵𑌾𑌨𑍍 𑌸𑍁𑌖𑌮𑍍 ॥ 22 ॥

𑌏𑌵𑌮𑍁𑌕𑍍𑌤𑌸𑍍𑌤𑍁 𑌵𑌚𑌨𑌂 𑌭𑌰𑌦𑍍𑌵𑌾𑌜𑍇𑌨 𑌰𑌾𑌘𑌵𑌃 ।
𑌪𑍍𑌰𑌤𑍍𑌯𑍁𑌵𑌾𑌚 𑌶𑍁𑌭𑌂 𑌵𑌾𑌕𑍍𑌯𑌂 𑌰𑌾𑌮𑌃 𑌸𑌰𑍍𑌵𑌹𑌿𑌤𑍇 𑌰𑌤𑌃 ॥ 23 ॥

𑌭𑌗𑌵𑌨𑍍𑌨𑌿𑌤 𑌆𑌸𑌨𑍍𑌨𑌃 𑌪𑍌𑌰𑌜𑌾𑌨𑌪𑌦𑍋 𑌜𑌨𑌃 ।
𑌸𑍁𑌦𑌰𑍍𑌶𑌮𑌿𑌹 𑌮𑌾𑌂 𑌪𑍍𑌰𑍇𑌕𑍍𑌷𑍍𑌯 𑌮𑌨𑍍𑌯𑍇𑌽𑌹𑌮𑌿𑌮𑌮𑌾𑌶𑍍𑌰𑌮𑌮𑍍 ॥ 24 ॥

𑌆𑌗𑌮𑌿𑌷𑍍𑌯𑌤𑌿 𑌵𑍈𑌦𑍇𑌹𑍀𑌂 𑌮𑌾𑌂 𑌚𑌾𑌪𑌿 𑌪𑍍𑌰𑍇𑌕𑍍𑌷𑌕𑍋 𑌜𑌨𑌃 ।
𑌅𑌨𑍇𑌨 𑌕𑌾𑌰𑌣𑍇𑌨𑌾𑌹𑌮𑌿𑌹 𑌵𑌾𑌸𑌂 𑌨 𑌰𑍋𑌚𑌯𑍇 ॥ 25 ॥

𑌏𑌕𑌾𑌂𑌤𑍇 𑌪𑌶𑍍𑌯 𑌭𑌗𑌵𑌨𑍍𑌨𑌾𑌶𑍍𑌰𑌮𑌸𑍍𑌥𑌾𑌨𑌮𑍁𑌤𑍍𑌤𑌮𑌮𑍍 ।
𑌰𑌮𑍇𑌤 𑌯𑌤𑍍𑌰 𑌵𑍈𑌦𑍇𑌹𑍀 𑌸𑍁𑌖𑌾𑌰𑍍𑌹𑌾 𑌜𑌨𑌕𑌾𑌤𑍍𑌮𑌜𑌾 ॥ 26 ॥

𑌏𑌤𑌛𑍍𑌰𑍁𑌤𑍍𑌵𑌾 𑌶𑍁𑌭𑌂 𑌵𑌾𑌕𑍍𑌯𑌂 𑌭𑌰𑌦𑍍𑌵𑌾𑌜𑍋 𑌮𑌹𑌾𑌮𑍁𑌨𑌿𑌃 ।
𑌰𑌾𑌘𑌵𑌸𑍍𑌯 𑌤𑌤𑍋 𑌵𑌾𑌕𑍍𑌯𑌮𑌰𑍍𑌥𑌗𑍍𑌰𑌾𑌹𑌕𑌮𑌬𑍍𑌰𑌵𑍀𑌤𑍍 ॥ 2𑍭 ॥

𑌦𑌶𑌕𑍍𑌰𑍋𑌶 𑌇𑌤𑌸𑍍𑌤𑌾𑌤 𑌗𑌿𑌰𑌿𑌰𑍍𑌯𑌤𑍍𑌰𑌨𑌿𑌵𑌤𑍍𑌸𑍍𑌯𑌸𑌿 ।
𑌮𑌹𑌰𑍍𑌷𑌿𑌸𑍇𑌵𑌿𑌤𑌃 𑌪𑍁𑌣𑍍𑌯𑌃 𑌸𑌰𑍍𑌵𑌤𑌃 𑌸𑍁𑌖𑌦𑌰𑍍𑌶𑌨𑌃 ॥ 2𑍮 ॥

𑌗𑍋𑌲𑌾𑌂𑌗𑍂𑌲𑌾𑌨𑍁𑌚𑌰𑌿𑌤𑍋 𑌵𑌾𑌨𑌰𑌰𑍍𑌕𑍍𑌷𑌨𑌿𑌷𑍇𑌵𑌿𑌤𑌃 ।
𑌚𑌿𑌤𑍍𑌰𑌕𑍂𑌟 𑌇𑌤𑌿 𑌖𑍍𑌯𑌾𑌤𑍋 𑌗𑌂𑌧𑌮𑌾𑌦𑌨𑌸𑌨𑍍𑌨𑌿𑌭𑌃 ॥ 2𑍯 ॥

𑌯𑌾𑌵𑌤𑌾 𑌚𑌿𑌤𑍍𑌰𑌕𑍂𑌟𑌸𑍍𑌯 𑌨𑌰𑌶𑍃𑌂𑌗𑌾𑌨𑍍𑌯𑌵𑍇𑌕𑍍𑌷𑌤𑍇 ।
𑌕𑌲𑍍𑌯𑌾𑌣𑌾𑌨𑌿 𑌸𑌮𑌾𑌧𑌤𑍍𑌤𑍇 𑌨 𑌪𑌾𑌪𑍇 𑌕𑍁𑌰𑍁𑌤𑍇 𑌮𑌨𑌃 ॥ 30 ॥

𑌋𑌷𑌯𑌸𑍍𑌤𑌤𑍍𑌰 𑌬𑌹𑌵𑍋 𑌵𑌿𑌹𑍃𑌤𑍍𑌯 𑌶𑌰𑌦𑌾𑌂 𑌶𑌤𑌮𑍍 ।
𑌤𑌪𑌸𑌾 𑌦𑌿𑌵𑌮𑌾𑌰𑍂𑌢𑌾𑌃 𑌕𑌪𑌾𑌲𑌶𑌿𑌰𑌸𑌾 𑌸𑌹 ॥ 31 ॥

𑌪𑍍𑌰𑌵𑌿𑌵𑌿𑌕𑍍𑌤𑌮𑌹𑌂 𑌮𑌨𑍍𑌯𑍇 𑌤𑌂 𑌵𑌾𑌸𑌂 𑌭𑌵𑌤𑌸𑍍𑌸𑍁𑌖𑌮𑍍 ।
𑌇𑌹 𑌵𑌾 𑌵𑌨𑌵𑌾𑌸𑌾𑌯 𑌵𑌸 𑌰𑌾𑌮 𑌮𑌯𑌾 𑌸𑌹 ॥ 32 ॥

𑌸 𑌰𑌾𑌮𑌂 𑌸𑌰𑍍𑌵𑌕𑌾𑌮𑍈𑌸𑍍𑌤𑌂 𑌭𑌰𑌦𑍍𑌵𑌾𑌜𑌃 𑌪𑍍𑌰𑌿𑌯𑌾𑌤𑌿𑌥𑌿𑌮𑍍 ।
𑌸𑌭𑌾𑌰𑍍𑌯𑌂 𑌸𑌹 𑌚 𑌭𑍍𑌰𑌾𑌤𑍍𑌰𑌾 𑌪𑍍𑌰𑌤𑌿𑌜𑌗𑍍𑌰𑌾𑌹 𑌧𑌰𑍍𑌮𑌵𑌿𑌤𑍍 ॥ 33 ॥

𑌤𑌸𑍍𑌯 𑌪𑍍𑌰𑌯𑌾𑌗𑍇 𑌰𑌾𑌮𑌸𑍍𑌯 𑌤𑌂 𑌮𑌹𑌰𑍍𑌷𑌿𑌮𑍁𑌪𑍇𑌯𑍁𑌷𑌃 ।
𑌪𑍍𑌰𑌪𑌨𑍍𑌨𑌾 𑌰𑌜𑌨𑍀 𑌪𑍁𑌣𑍍𑌯𑌾𑌃 𑌚𑌿𑌤𑍍𑌰𑌾𑌃 𑌕𑌥𑌯𑌤𑌃 𑌕𑌥𑌾𑌃 ॥ 34 ॥

𑌸𑍀𑌤𑌾𑌤𑍃𑌤𑍀𑌯𑌃 𑌕𑌾𑌕𑍁𑌤𑍍𑌸𑍍𑌥𑌃 𑌪𑌰𑌿𑌶𑍍𑌰𑌾𑌂𑌤𑌃 𑌸𑍁𑌖𑍋𑌚𑌿𑌤𑌃 ।
𑌭𑌰𑌦𑍍𑌵𑌾𑌜𑌾𑌶𑍍𑌰𑌮𑍇 𑌰𑌮𑍍𑌯𑍇 𑌤𑌾𑌂 𑌰𑌾𑌤𑍍𑌰𑌿𑌮𑌵𑌸𑌤𑍍𑌸𑍁𑌖𑌮𑍍 ॥ 35 ॥

𑌪𑍍𑌰𑌭𑌾𑌤𑌾𑌯𑌾𑌂 𑌰𑌜𑌨𑍍𑌯𑌾𑌂 𑌤𑍁 𑌭𑌰𑌦𑍍𑌵𑌾𑌜𑌮𑍁𑌪𑌾𑌗𑌮𑌤𑍍 ।
𑌉𑌵𑌾𑌚 𑌨𑌰𑌶𑌾𑌰𑍍𑌦𑍂𑌲𑍋 𑌮𑍁𑌨𑌿𑌂 𑌜𑍍𑌵𑌲𑌿𑌤𑌤𑍇𑌜𑌸𑌮𑍍 ॥ 36 ॥

𑌶𑌰𑍍𑌵𑌰𑍀𑌂 𑌭𑌗𑌵𑌨𑍍𑌨𑌦𑍍𑌯 𑌸𑌤𑍍𑌯𑌶𑍀𑌲 𑌤𑌵𑌾𑌶𑍍𑌰𑌮𑍇 ।
𑌉𑌷𑌿𑌤𑌾𑌃 𑌸𑍍𑌮𑍇𑌹 𑌵𑌸𑌤𑌿𑌮𑌨𑍁𑌜𑌾𑌨𑌾𑌤𑍁 𑌨𑍋 𑌭𑌵𑌾𑌨𑍍 ॥ 3𑍭 ॥

𑌰𑌾𑌤𑍍𑌰𑍍𑌯𑌾𑌂 𑌤𑍁 𑌤𑌸𑍍𑌯𑌾𑌂 𑌵𑍍𑌯𑍁𑌷𑍍𑌟𑌾𑌯𑌾𑌂 𑌭𑌰𑌦𑍍𑌵𑌾𑌜𑍋𑌽𑌬𑍍𑌰𑌵𑍀𑌦𑌿𑌦𑌮𑍍 ।
𑌮𑌧𑍁𑌮𑍂𑌲𑌫𑌲𑍋𑌪𑍇𑌤𑌂 𑌚𑌿𑌤𑍍𑌰𑌕𑍂𑌟𑌂 𑌵𑍍𑌰𑌜𑍇𑌤𑌿 𑌹 ॥ 3𑍮 ॥

𑌵𑌾𑌸𑌮𑍌𑌪𑌯𑌿𑌕𑌂 𑌮𑌨𑍍𑌯𑍇 𑌤𑌵 𑌰𑌾𑌮 𑌮𑌹𑌾𑌬𑌲 𑌨𑌾𑌨𑌾𑌨𑌗𑌗𑌣𑍋𑌪𑍇𑌤𑌃 𑌕𑌿𑌨𑍍𑌨𑌰𑍋𑌰𑌗𑌸𑍇𑌵𑌿𑌤𑌃 ।
𑌮𑌯𑍂𑌰𑌨𑌾𑌦𑌾𑌭𑌿𑌰𑍁𑌤𑍋 𑌗𑌜𑌰𑌾𑌜𑌨𑌿𑌷𑍇𑌵𑌿𑌤𑌃 ॥ 3𑍯 ॥

𑌗𑌮𑍍𑌯𑌤𑌾𑌂 𑌭𑌵𑌤𑌾 𑌶𑍈𑌲 𑌶𑍍𑌚𑌿𑌤𑍍𑌰𑌕𑍂𑌟𑌃 𑌸 𑌵𑌿𑌶𑍍𑌰𑍁𑌤𑌃 ।
𑌪𑍁𑌣𑍍𑌯𑌶𑍍𑌚 𑌰𑌮𑌣𑍀𑌯𑌶𑍍𑌚 𑌬𑌹𑍁𑌮𑍂𑌲𑌫𑌲𑌾𑌯𑍁𑌤𑌃 ॥ 40 ॥

𑌤𑌤𑍍𑌰 𑌕𑍁𑌂𑌜𑌰𑌯𑍂𑌥𑌾𑌨𑌿 𑌮𑍃𑌗𑌯𑍂𑌥𑌾𑌨𑌿 𑌚𑌾𑌭𑌿𑌤𑌃 ।
𑌵𑌿𑌚𑌰𑌂𑌤𑌿 𑌵𑌨𑌾𑌂𑌤𑍇𑌸𑍍𑌮𑌿𑌨𑍍 𑌤𑌾𑌨𑌿 𑌦𑍍𑌰𑌕𑍍𑌷𑍍𑌯𑌸𑌿 𑌰𑌾𑌘𑌵 ॥ 41 ॥

𑌸𑌰𑌿𑌤𑍍𑌪𑍍𑌰𑌸𑍍𑌰𑌵𑌣𑌪𑍍𑌰𑌸𑍍𑌥𑌾𑌨𑍍 𑌦𑌰𑍀𑌕𑌂𑌦𑌰𑌨𑌿𑌰𑍍𑌝𑌰𑌾𑌨𑍍 ।
𑌚𑌰𑌤𑌃 𑌸𑍀𑌤𑌯𑌾 𑌸𑌾𑌰𑍍𑌧𑌂 𑌨𑌂𑌦𑌿𑌷𑍍𑌯𑌤𑌿 𑌮𑌨𑌸𑍍𑌤𑌵 ॥ 42 ॥

𑌪𑍍𑌰𑌹𑍃𑌷𑍍𑌟𑌕𑍋𑌯𑌷𑍍𑌟𑌿𑌕𑌕𑍋𑌕𑌿𑌲𑌸𑍍𑌵𑌨𑍈𑌰𑍍𑌵𑌿𑌨𑌾𑌦𑌿𑌤𑌂 𑌤𑌂 𑌵𑌸𑍁𑌧𑌾𑌧𑌰𑌂 𑌶𑌿𑌵𑌮𑍍 ।
𑌮𑍃𑌗𑍈𑌶𑍍𑌚 𑌮𑌤𑍍𑌤𑍈𑌰𑍍𑌬𑌹𑍁𑌭𑌿𑌶𑍍𑌚 𑌕𑍁𑌂𑌜𑌰𑍈𑌃 𑌸𑍁𑌰𑌮𑍍𑌯𑌮𑌾𑌸𑌾𑌦𑍍𑌯 𑌸𑌮𑌾𑌵𑌸𑌾𑌶𑍍𑌰𑌮𑌮𑍍 ॥ 43 ॥

𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑍇 𑌚𑌤𑍁𑌃𑌪𑌂𑌚𑌾𑌶𑌸𑍍𑌸𑌰𑍍𑌗𑌃 ॥


Browse Related Categories: