𑌓𑌂 𑌅𑌸𑍍𑌯 𑌶𑍍𑌰𑍀 𑌰𑌾𑌮𑌰𑌕𑍍𑌷𑌾 𑌸𑍍𑌤𑍋𑌤𑍍𑌰𑌮𑌂𑌤𑍍𑌰𑌸𑍍𑌯
𑌬𑍁𑌧𑌕𑍌𑌶𑌿𑌕 𑌋𑌷𑌿𑌃
𑌶𑍍𑌰𑍀 𑌸𑍀𑌤𑌾𑌰𑌾𑌮 𑌚𑌂𑌦𑍍𑌰𑍋𑌦𑍇𑌵𑌤𑌾
𑌅𑌨𑍁𑌷𑍍𑌟𑍁𑌪𑍍 𑌛𑌂𑌦𑌃
𑌸𑍀𑌤𑌾 𑌶𑌕𑍍𑌤𑌿𑌃
𑌶𑍍𑌰𑍀𑌮𑌦𑍍 𑌹𑌨𑍁𑌮𑌾𑌨𑍍 𑌕𑍀𑌲𑌕𑌮𑍍
𑌶𑍍𑌰𑍀𑌰𑌾𑌮𑌚𑌂𑌦𑍍𑌰 𑌪𑍍𑌰𑍀𑌤𑍍𑌯𑌰𑍍𑌥𑍇 𑌰𑌾𑌮𑌰𑌕𑍍𑌷𑌾 𑌸𑍍𑌤𑍋𑌤𑍍𑌰𑌜𑌪𑍇 𑌵𑌿𑌨𑌿𑌯𑍋𑌗𑌃 ॥

𑌧𑍍𑌯𑌾𑌨𑌮𑍍
𑌧𑍍𑌯𑌾𑌯𑍇𑌦𑌾𑌜𑌾𑌨𑍁𑌬𑌾𑌹𑍁𑌂 𑌧𑍃𑌤𑌶𑌰 𑌧𑌨𑍁𑌷𑌂 𑌬𑌦𑍍𑌧 𑌪𑌦𑍍𑌮𑌾𑌸𑌨𑌸𑍍𑌥𑌂
𑌪𑍀𑌤𑌂 𑌵𑌾𑌸𑍋𑌵𑌸𑌾𑌨𑌂 𑌨𑌵𑌕𑌮𑌲 𑌦𑌳𑌸𑍍𑌪𑌰𑍍𑌥𑌿 𑌨𑍇𑌤𑍍𑌰𑌂 𑌪𑍍𑌰𑌸𑌨𑍍𑌨𑌮𑍍 ।
𑌵𑌾𑌮𑌾𑌂𑌕𑌾𑌰𑍂𑌢 𑌸𑍀𑌤𑌾𑌮𑍁𑌖 𑌕𑌮𑌲𑌮𑌿𑌲𑌲𑍍𑌲𑍋𑌚𑌨𑌂 𑌨𑍀𑌰𑌦𑌾𑌭𑌂
𑌨𑌾𑌨𑌾𑌲𑌂𑌕𑌾𑌰 𑌦𑍀𑌪𑍍𑌤𑌂 𑌦𑌧𑌤𑌮𑍁𑌰𑍁 𑌜𑌟𑌾𑌮𑌂𑌡𑌲𑌂 𑌰𑌾𑌮𑌚𑌂𑌦𑍍𑌰𑌮𑍍 ॥

𑌸𑍍𑌤𑍋𑌤𑍍𑌰𑌮𑍍
𑌚𑌰𑌿𑌤𑌂 𑌰𑌘𑍁𑌨𑌾𑌥𑌸𑍍𑌯 𑌶𑌤𑌕𑍋𑌟𑌿 𑌪𑍍𑌰𑌵𑌿𑌸𑍍𑌤𑌰𑌮𑍍 ।
𑌏𑌕𑍈𑌕𑌮𑌕𑍍𑌷𑌰𑌂 𑌪𑍁𑌂𑌸𑌾𑌂 𑌮𑌹𑌾𑌪𑌾𑌤𑌕 𑌨𑌾𑌶𑌨𑌮𑍍 ॥ 1 ॥

𑌧𑍍𑌯𑌾𑌤𑍍𑌵𑌾 𑌨𑍀𑌲𑍋𑌤𑍍𑌪𑌲 𑌶𑍍𑌯𑌾𑌮𑌂 𑌰𑌾𑌮𑌂 𑌰𑌾𑌜𑍀𑌵𑌲𑍋𑌚𑌨𑌮𑍍 ।
𑌜𑌾𑌨𑌕𑍀 𑌲𑌕𑍍𑌷𑍍𑌮𑌣𑍋𑌪𑍇𑌤𑌂 𑌜𑌟𑌾𑌮𑍁𑌕𑍁𑌟 𑌮𑌂𑌡𑌿𑌤𑌮𑍍 ॥ 2 ॥

𑌸𑌾𑌸𑌿𑌤𑍂𑌣 𑌧𑌨𑍁𑌰𑍍𑌬𑌾𑌣 𑌪𑌾𑌣𑌿𑌂 𑌨𑌕𑍍𑌤𑌂 𑌚𑌰𑌾𑌂𑌤𑌕𑌮𑍍 ।
𑌸𑍍𑌵𑌲𑍀𑌲𑌯𑌾 𑌜𑌗𑌤𑍍𑌤𑍍𑌰𑌾𑌤𑍁 𑌮𑌾𑌵𑌿𑌰𑍍𑌭𑍂𑌤𑌮𑌜𑌂 𑌵𑌿𑌭𑍁𑌮𑍍 ॥ 3 ॥

𑌰𑌾𑌮𑌰𑌕𑍍𑌷𑌾𑌂 𑌪𑌠𑍇𑌤𑍍𑌪𑍍𑌰𑌾𑌜𑍍𑌞𑌃 𑌪𑌾𑌪𑌘𑍍𑌨𑍀𑌂 𑌸𑌰𑍍𑌵𑌕𑌾𑌮𑌦𑌾𑌮𑍍 ।
𑌶𑌿𑌰𑍋 𑌮𑍇 𑌰𑌾𑌘𑌵𑌃 𑌪𑌾𑌤𑍁 𑌫𑌾𑌲𑌂 (𑌭𑌾𑌲𑌂) 𑌦𑌶𑌰𑌥𑌾𑌤𑍍𑌮𑌜𑌃 ॥ 4 ॥

𑌕𑍌𑌸𑌲𑍍𑌯𑍇𑌯𑍋 𑌦𑍃𑌶𑍌𑌪𑌾𑌤𑍁 𑌵𑌿𑌶𑍍𑌵𑌾𑌮𑌿𑌤𑍍𑌰𑌪𑍍𑌰𑌿𑌯𑌃 𑌶𑍃𑌤𑍀 ।
𑌘𑍍𑌰𑌾𑌣𑌂 𑌪𑌾𑌤𑍁 𑌮𑌖𑌤𑍍𑌰𑌾𑌤𑌾 𑌮𑍁𑌖𑌂 𑌸𑍌𑌮𑌿𑌤𑍍𑌰𑌿𑌵𑌤𑍍𑌸𑌲𑌃 ॥ 5 ॥

𑌜𑌿𑌹𑍍𑌵𑌾𑌂 𑌵𑌿𑌦𑍍𑌯𑌾𑌨𑌿𑌧𑌿𑌃 𑌪𑌾𑌤𑍁 𑌕𑌂𑌠𑌂 𑌭𑌰𑌤𑌵𑌂𑌦𑌿𑌤𑌃 ।
𑌸𑍍𑌕𑌂𑌧𑍌 𑌦𑌿𑌵𑍍𑌯𑌾𑌯𑍁𑌧𑌃 𑌪𑌾𑌤𑍁 𑌭𑍁𑌜𑍌 𑌭𑌗𑍍𑌨𑍇𑌶𑌕𑌾𑌰𑍍𑌮𑍁𑌕𑌃 ॥ 6 ॥

𑌕𑌰𑍌 𑌸𑍀𑌤𑌾𑌪𑌤𑌿𑌃 𑌪𑌾𑌤𑍁 𑌹𑍃𑌦𑌯𑌂 𑌜𑌾𑌮𑌦𑌗𑍍𑌨𑍍𑌯𑌜𑌿𑌤𑍍 ।
𑌮𑌧𑍍𑌯𑌂 𑌪𑌾𑌤𑍁 𑌖𑌰𑌧𑍍𑌵𑌂𑌸𑍀 𑌨𑌾𑌭𑌿𑌂 𑌜𑌾𑌂𑌬𑌵𑌦𑌾𑌶𑍍𑌰𑌯𑌃 ॥ 𑍭 ॥

𑌸𑍁𑌗𑍍𑌰𑍀𑌵𑍇𑌶𑌃 𑌕𑌟𑌿𑌂 𑌪𑌾𑌤𑍁 𑌸𑌕𑍍𑌥𑌿𑌨𑍀 𑌹𑌨𑍁𑌮𑌤𑍍-𑌪𑍍𑌰𑌭𑍁𑌃 ।
𑌊𑌰𑍂 𑌰𑌘𑍂𑌤𑍍𑌤𑌮𑌃 𑌪𑌾𑌤𑍁 𑌰𑌕𑍍𑌷𑌃𑌕𑍁𑌲 𑌵𑌿𑌨𑌾𑌶𑌕𑍃𑌤𑍍 ॥ 𑍮 ॥

𑌜𑌾𑌨𑍁𑌨𑍀 𑌸𑍇𑌤𑍁𑌕𑍃𑌤𑍍-𑌪𑌾𑌤𑍁 𑌜𑌂𑌘𑍇 𑌦𑌶𑌮𑍁𑌖𑌾𑌂𑌤𑌕𑌃 ।
𑌪𑌾𑌦𑍌 𑌵𑌿𑌭𑍀𑌷𑌣𑌶𑍍𑌰𑍀𑌦𑌃 𑌪𑌾𑌤𑍁 𑌰𑌾𑌮𑍋𑌽𑌖𑌿𑌲𑌂 𑌵𑌪𑍁𑌃 ॥ 𑍯 ॥

𑌏𑌤𑌾𑌂 𑌰𑌾𑌮𑌬𑌲𑍋𑌪𑍇𑌤𑌾𑌂 𑌰𑌕𑍍𑌷𑌾𑌂 𑌯𑌃 𑌸𑍁𑌕𑍃𑌤𑍀 𑌪𑌠𑍇𑌤𑍍 ।
𑌸 𑌚𑌿𑌰𑌾𑌯𑍁𑌃 𑌸𑍁𑌖𑍀 𑌪𑍁𑌤𑍍𑌰𑍀 𑌵𑌿𑌜𑌯𑍀 𑌵𑌿𑌨𑌯𑍀 𑌭𑌵𑍇𑌤𑍍 ॥ 10 ॥

𑌪𑌾𑌤𑌾𑌳-𑌭𑍂𑌤𑌲-𑌵𑍍𑌯𑍋𑌮-𑌚𑌾𑌰𑌿𑌣-𑌶𑍍𑌚𑌦𑍍𑌮-𑌚𑌾𑌰𑌿𑌣𑌃 ।
𑌨 𑌦𑍍𑌰𑌷𑍍𑌟𑍁𑌮𑌪𑌿 𑌶𑌕𑍍𑌤𑌾𑌸𑍍𑌤𑍇 𑌰𑌕𑍍𑌷𑌿𑌤𑌂 𑌰𑌾𑌮𑌨𑌾𑌮𑌭𑌿𑌃 ॥ 11 ॥

𑌰𑌾𑌮𑍇𑌤𑌿 𑌰𑌾𑌮𑌭𑌦𑍍𑌰𑍇𑌤𑌿 𑌰𑌾𑌮𑌚𑌂𑌦𑍍𑌰𑍇𑌤𑌿 𑌵𑌾 𑌸𑍍𑌮𑌰𑌨𑍍 ।
𑌨𑌰𑍋 𑌨 𑌲𑌿𑌪𑍍𑌯𑌤𑍇 𑌪𑌾𑌪𑍈𑌰𑍍𑌭𑍁𑌕𑍍𑌤𑌿𑌂 𑌮𑍁𑌕𑍍𑌤𑌿𑌂 𑌚 𑌵𑌿𑌂𑌦𑌤𑌿 ॥ 12 ॥

𑌜𑌗𑌜𑍍𑌜𑍈𑌤𑍍𑌰𑍈𑌕 𑌮𑌂𑌤𑍍𑌰𑍇𑌣 𑌰𑌾𑌮𑌨𑌾𑌮𑍍𑌨𑌾𑌭𑌿 𑌰𑌕𑍍𑌷𑌿𑌤𑌮𑍍 ।
𑌯𑌃 𑌕𑌂𑌠𑍇 𑌧𑌾𑌰𑌯𑍇𑌤𑍍𑌤𑌸𑍍𑌯 𑌕𑌰𑌸𑍍𑌥𑌾𑌃 𑌸𑌰𑍍𑌵𑌸𑌿𑌦𑍍𑌧𑌯𑌃 ॥ 13 ॥

𑌵𑌜𑍍𑌰𑌪𑌂𑌜𑌰 𑌨𑌾𑌮𑍇𑌦𑌂 𑌯𑍋 𑌰𑌾𑌮𑌕𑌵𑌚𑌂 𑌸𑍍𑌮𑌰𑍇𑌤𑍍 ।
𑌅𑌵𑍍𑌯𑌾𑌹𑌤𑌾𑌜𑍍𑌞𑌃 𑌸𑌰𑍍𑌵𑌤𑍍𑌰 𑌲𑌭𑌤𑍇 𑌜𑌯𑌮𑌂𑌗𑌳𑌮𑍍 ॥ 14 ॥

𑌆𑌦𑌿𑌷𑍍𑌟𑌵𑌾𑌨𑍍-𑌯𑌥𑌾 𑌸𑍍𑌵𑌪𑍍𑌨𑍇 𑌰𑌾𑌮𑌰𑌕𑍍𑌷𑌾𑌮𑌿𑌮𑌾𑌂 𑌹𑌰𑌃 ।
𑌤𑌥𑌾 𑌲𑌿𑌖𑌿𑌤𑌵𑌾𑌨𑍍-𑌪𑍍𑌰𑌾𑌤𑌃 𑌪𑍍𑌰𑌬𑍁𑌦𑍍𑌧𑍌 𑌬𑍁𑌧𑌕𑍌𑌶𑌿𑌕𑌃 ॥ 15 ॥

𑌆𑌰𑌾𑌮𑌃 𑌕𑌲𑍍𑌪𑌵𑍃𑌕𑍍𑌷𑌾𑌣𑌾𑌂 𑌵𑌿𑌰𑌾𑌮𑌃 𑌸𑌕𑌲𑌾𑌪𑌦𑌾𑌮𑍍 ।
𑌅𑌭𑌿𑌰𑌾𑌮-𑌸𑍍𑌤𑍍𑌰𑌿𑌲𑍋𑌕𑌾𑌨𑌾𑌂 𑌰𑌾𑌮𑌃 𑌶𑍍𑌰𑍀𑌮𑌾𑌨𑍍 𑌸 𑌨𑌃 𑌪𑍍𑌰𑌭𑍁𑌃 ॥ 16 ॥

𑌤𑌰𑍁𑌣𑍌 𑌰𑍂𑌪𑌸𑌂𑌪𑌨𑍍𑌨𑍌 𑌸𑍁𑌕𑍁𑌮𑌾𑌰𑍌 𑌮𑌹𑌾𑌬𑌲𑍌 ।
𑌪𑍁𑌂𑌡𑌰𑍀𑌕 𑌵𑌿𑌶𑌾𑌲𑌾𑌕𑍍𑌷𑍌 𑌚𑍀𑌰𑌕𑍃𑌷𑍍𑌣𑌾𑌜𑌿𑌨𑌾𑌂𑌬𑌰𑍌 ॥ 1𑍭 ॥

𑌫𑌲𑌮𑍂𑌲𑌾𑌶𑌿𑌨𑍌 𑌦𑌾𑌂𑌤𑍌 𑌤𑌾𑌪𑌸𑍌 𑌬𑍍𑌰𑌹𑍍𑌮𑌚𑌾𑌰𑌿𑌣𑍌 ।
𑌪𑍁𑌤𑍍𑌰𑍌 𑌦𑌶𑌰𑌥𑌸𑍍𑌯𑍈𑌤𑍌 𑌭𑍍𑌰𑌾𑌤𑌰𑍌 𑌰𑌾𑌮𑌲𑌕𑍍𑌷𑍍𑌮𑌣𑍌 ॥ 1𑍮 ॥

𑌶𑌰𑌣𑍍𑌯𑍌 𑌸𑌰𑍍𑌵𑌸𑌤𑍍𑌤𑍍𑌵𑌾𑌨𑌾𑌂 𑌶𑍍𑌰𑍇𑌷𑍍𑌠𑍌 𑌸𑌰𑍍𑌵𑌧𑌨𑍁𑌷𑍍𑌮𑌤𑌾𑌮𑍍 ।
𑌰𑌕𑍍𑌷𑌃𑌕𑍁𑌲 𑌨𑌿𑌹𑌂𑌤𑌾𑌰𑍌 𑌤𑍍𑌰𑌾𑌯𑍇𑌤𑌾𑌂 𑌨𑍋 𑌰𑌘𑍂𑌤𑍍𑌤𑌮𑍌 ॥ 1𑍯 ॥

𑌆𑌤𑍍𑌤 𑌸𑌜𑍍𑌯 𑌧𑌨𑍁𑌷𑌾 𑌵𑌿𑌷𑍁𑌸𑍍𑌪𑍃𑌶𑌾 𑌵𑌕𑍍𑌷𑌯𑌾𑌶𑍁𑌗 𑌨𑌿𑌷𑌂𑌗 𑌸𑌂𑌗𑌿𑌨𑍌 ।
𑌰𑌕𑍍𑌷𑌣𑌾𑌯 𑌮𑌮 𑌰𑌾𑌮𑌲𑌕𑍍𑌷𑌣𑌾𑌵𑌗𑍍𑌰𑌤𑌃 𑌪𑌥𑌿 𑌸𑌦𑍈𑌵 𑌗𑌚𑍍𑌛𑌤𑌾𑌮𑍍 ॥ 20 ॥

𑌸𑌨𑍍𑌨𑌦𑍍𑌧𑌃 𑌕𑌵𑌚𑍀 𑌖𑌡𑍍𑌗𑍀 𑌚𑌾𑌪𑌬𑌾𑌣𑌧𑌰𑍋 𑌯𑍁𑌵𑌾 ।
𑌗𑌚𑍍𑌛𑌨𑍍 𑌮𑌨𑍋𑌰𑌥𑌾𑌨𑍍𑌨𑌶𑍍𑌚 (𑌮𑌨𑍋𑌰𑌥𑍋𑌽𑌸𑍍𑌮𑌾𑌕𑌂) 𑌰𑌾𑌮𑌃 𑌪𑌾𑌤𑍁 𑌸 𑌲𑌕𑍍𑌷𑍍𑌮𑌣𑌃 ॥ 21 ॥

𑌰𑌾𑌮𑍋 𑌦𑌾𑌶𑌰𑌥𑌿 𑌶𑍍𑌶𑍂𑌰𑍋 𑌲𑌕𑍍𑌷𑍍𑌮𑌣𑌾𑌨𑍁𑌚𑌰𑍋 𑌬𑌲𑍀 ।
𑌕𑌾𑌕𑍁𑌤𑍍𑌸𑌃 𑌪𑍁𑌰𑍁𑌷𑌃 𑌪𑍂𑌰𑍍𑌣𑌃 𑌕𑍌𑌸𑌲𑍍𑌯𑍇𑌯𑍋 𑌰𑌘𑍂𑌤𑍍𑌤𑌮𑌃 ॥ 22 ॥

𑌵𑍇𑌦𑌾𑌂𑌤𑌵𑍇𑌦𑍍𑌯𑍋 𑌯𑌜𑍍𑌞𑍇𑌶𑌃 𑌪𑍁𑌰𑌾𑌣 𑌪𑍁𑌰𑍁𑌷𑍋𑌤𑍍𑌤𑌮𑌃 ।
𑌜𑌾𑌨𑌕𑍀𑌵𑌲𑍍𑌲𑌭𑌃 𑌶𑍍𑌰𑍀𑌮𑌾𑌨𑌪𑍍𑌰𑌮𑍇𑌯 𑌪𑌰𑌾𑌕𑍍𑌰𑌮𑌃 ॥ 23 ॥

𑌇𑌤𑍍𑌯𑍇𑌤𑌾𑌨𑌿 𑌜𑌪𑍇𑌨𑍍𑌨𑌿𑌤𑍍𑌯𑌂 𑌮𑌦𑍍𑌭𑌕𑍍𑌤𑌃 𑌶𑍍𑌰𑌦𑍍𑌧𑌯𑌾𑌨𑍍𑌵𑌿𑌤𑌃 ।
𑌅𑌶𑍍𑌵𑌮𑍇𑌧𑌾𑌧𑌿𑌕𑌂 𑌪𑍁𑌣𑍍𑌯𑌂 𑌸𑌂𑌪𑍍𑌰𑌾𑌪𑍍𑌨𑍋𑌤𑌿 𑌨 𑌸𑌂𑌶𑌯𑌃 ॥ 24 ॥

𑌰𑌾𑌮𑌂 𑌦𑍂𑌰𑍍𑌵𑌾𑌦𑌳 𑌶𑍍𑌯𑌾𑌮𑌂 𑌪𑌦𑍍𑌮𑌾𑌕𑍍𑌷𑌂 𑌪𑍀𑌤𑌵𑌾𑌸𑌸𑌮𑍍 ।
𑌸𑍍𑌤𑍁𑌵𑌂𑌤𑌿 𑌨𑌾𑌭𑌿-𑌰𑍍𑌦𑌿𑌵𑍍𑌯𑍈-𑌰𑍍𑌨𑌤𑍇 𑌸𑌂𑌸𑌾𑌰𑌿𑌣𑍋 𑌨𑌰𑌾𑌃 ॥ 25 ॥

𑌰𑌾𑌮𑌂 𑌲𑌕𑍍𑌷𑍍𑌮𑌣 𑌪𑍂𑌰𑍍𑌵𑌜𑌂 𑌰𑌘𑍁𑌵𑌰𑌂 𑌸𑍀𑌤𑌾𑌪𑌤𑌿𑌂 𑌸𑍁𑌂𑌦𑌰𑌮𑍍
𑌕𑌾𑌕𑍁𑌤𑍍𑌸𑍍𑌥𑌂 𑌕𑌰𑍁𑌣𑌾𑌰𑍍𑌣𑌵𑌂 𑌗𑍁𑌣𑌨𑌿𑌧𑌿𑌂 𑌵𑌿𑌪𑍍𑌰𑌪𑍍𑌰𑌿𑌯𑌂 𑌧𑌾𑌰𑍍𑌮𑌿𑌕𑌮𑍍 ।
𑌰𑌾𑌜𑍇𑌂𑌦𑍍𑌰𑌂 𑌸𑌤𑍍𑌯𑌸𑌂𑌧𑌂 𑌦𑌶𑌰𑌥𑌤𑌨𑌯𑌂 𑌶𑍍𑌯𑌾𑌮𑌲𑌂 𑌶𑌾𑌂𑌤𑌮𑍂𑌰𑍍𑌤𑌿𑌮𑍍
𑌵𑌂𑌦𑍇 𑌲𑍋𑌕𑌾𑌭𑌿𑌰𑌾𑌮𑌂 𑌰𑌘𑍁𑌕𑍁𑌲 𑌤𑌿𑌲𑌕𑌂 𑌰𑌾𑌘𑌵𑌂 𑌰𑌾𑌵𑌣𑌾𑌰𑌿𑌮𑍍 ॥ 26 ॥

𑌰𑌾𑌮𑌾𑌯 𑌰𑌾𑌮𑌭𑌦𑍍𑌰𑌾𑌯 𑌰𑌾𑌮𑌚𑌂𑌦𑍍𑌰𑌾𑌯 𑌵𑍇𑌧𑌸𑍇 ।
𑌰𑌘𑍁𑌨𑌾𑌥𑌾𑌯 𑌨𑌾𑌥𑌾𑌯 𑌸𑍀𑌤𑌾𑌯𑌾𑌃 𑌪𑌤𑌯𑍇 𑌨𑌮𑌃 ॥ 2𑍭 ॥

𑌶𑍍𑌰𑍀𑌰𑌾𑌮 𑌰𑌾𑌮 𑌰𑌘𑍁𑌨𑌂𑌦𑌨 𑌰𑌾𑌮 𑌰𑌾𑌮
𑌶𑍍𑌰𑍀𑌰𑌾𑌮 𑌰𑌾𑌮 𑌭𑌰𑌤𑌾𑌗𑍍𑌰𑌜 𑌰𑌾𑌮 𑌰𑌾𑌮 ।
𑌶𑍍𑌰𑍀𑌰𑌾𑌮 𑌰𑌾𑌮 𑌰𑌣𑌕𑌰𑍍𑌕𑌶 𑌰𑌾𑌮 𑌰𑌾𑌮
𑌶𑍍𑌰𑍀𑌰𑌾𑌮 𑌰𑌾𑌮 𑌶𑌰𑌣𑌂 𑌭𑌵 𑌰𑌾𑌮 𑌰𑌾𑌮 ॥ 2𑍮 ॥

𑌶𑍍𑌰𑍀𑌰𑌾𑌮 𑌚𑌂𑌦𑍍𑌰 𑌚𑌰𑌣𑍌 𑌮𑌨𑌸𑌾 𑌸𑍍𑌮𑌰𑌾𑌮𑌿
𑌶𑍍𑌰𑍀𑌰𑌾𑌮 𑌚𑌂𑌦𑍍𑌰 𑌚𑌰𑌣𑍌 𑌵𑌚𑌸𑌾 𑌗𑍃𑌹𑍍𑌣𑌾𑌮𑌿 ।
𑌶𑍍𑌰𑍀𑌰𑌾𑌮 𑌚𑌂𑌦𑍍𑌰 𑌚𑌰𑌣𑍌 𑌶𑌿𑌰𑌸𑌾 𑌨𑌮𑌾𑌮𑌿
𑌶𑍍𑌰𑍀𑌰𑌾𑌮 𑌚𑌂𑌦𑍍𑌰 𑌚𑌰𑌣𑍌 𑌶𑌰𑌣𑌂 𑌪𑍍𑌰𑌪𑌦𑍍𑌯𑍇 ॥ 2𑍯 ॥

𑌮𑌾𑌤𑌾 𑌰𑌾𑌮𑍋 𑌮𑌤𑍍-𑌪𑌿𑌤𑌾 𑌰𑌾𑌮𑌚𑌂𑌦𑍍𑌰𑌃
𑌸𑍍𑌵𑌾𑌮𑍀 𑌰𑌾𑌮𑍋 𑌮𑌤𑍍-𑌸𑌖𑌾 𑌰𑌾𑌮𑌚𑌂𑌦𑍍𑌰𑌃 ।
𑌸𑌰𑍍𑌵𑌸𑍍𑌵𑌂 𑌮𑍇 𑌰𑌾𑌮𑌚𑌂𑌦𑍍𑌰𑍋 𑌦𑌯𑌾𑌳𑍁𑌃
𑌨𑌾𑌨𑍍𑌯𑌂 𑌜𑌾𑌨𑍇 𑌨𑍈𑌵 𑌜𑌾𑌨𑍇 𑌨 𑌜𑌾𑌨𑍇 ॥ 30 ॥

𑌦𑌕𑍍𑌷𑌿𑌣𑍇 𑌲𑌕𑍍𑌷𑍍𑌮𑌣𑍋 𑌯𑌸𑍍𑌯 𑌵𑌾𑌮𑍇 𑌚 (𑌤𑍁) 𑌜𑌨𑌕𑌾𑌤𑍍𑌮𑌜𑌾 ।
𑌪𑍁𑌰𑌤𑍋 𑌮𑌾𑌰𑍁𑌤𑌿𑌰𑍍𑌯𑌸𑍍𑌯 𑌤𑌂 𑌵𑌂𑌦𑍇 𑌰𑌘𑍁𑌨𑌂𑌦𑌨𑌮𑍍 ॥ 31 ॥

𑌲𑍋𑌕𑌾𑌭𑌿𑌰𑌾𑌮𑌂 𑌰𑌣𑌰𑌂𑌗𑌧𑍀𑌰𑌂
𑌰𑌾𑌜𑍀𑌵𑌨𑍇𑌤𑍍𑌰𑌂 𑌰𑌘𑍁𑌵𑌂𑌶𑌨𑌾𑌥𑌮𑍍 ।
𑌕𑌾𑌰𑍁𑌣𑍍𑌯𑌰𑍂𑌪𑌂 𑌕𑌰𑍁𑌣𑌾𑌕𑌰𑌂 𑌤𑌂
𑌶𑍍𑌰𑍀𑌰𑌾𑌮𑌚𑌂𑌦𑍍𑌰𑌂 𑌶𑌰𑌣𑍍𑌯𑌂 𑌪𑍍𑌰𑌪𑌦𑍍𑌯𑍇 ॥ 32 ॥

𑌮𑌨𑍋𑌜𑌵𑌂 𑌮𑌾𑌰𑍁𑌤 𑌤𑍁𑌲𑍍𑌯 𑌵𑍇𑌗𑌂
𑌜𑌿𑌤𑍇𑌂𑌦𑍍𑌰𑌿𑌯𑌂 𑌬𑍁𑌦𑍍𑌧𑌿𑌮𑌤𑌾𑌂 𑌵𑌰𑌿𑌷𑍍𑌟𑌮𑍍 ।
𑌵𑌾𑌤𑌾𑌤𑍍𑌮𑌜𑌂 𑌵𑌾𑌨𑌰𑌯𑍂𑌥 𑌮𑍁𑌖𑍍𑌯𑌂
𑌶𑍍𑌰𑍀𑌰𑌾𑌮𑌦𑍂𑌤𑌂 𑌶𑌰𑌣𑌂 𑌪𑍍𑌰𑌪𑌦𑍍𑌯𑍇 ॥ 33 ॥

𑌕𑍂𑌜𑌂𑌤𑌂 𑌰𑌾𑌮𑌰𑌾𑌮𑍇𑌤𑌿 𑌮𑌧𑍁𑌰𑌂 𑌮𑌧𑍁𑌰𑌾𑌕𑍍𑌷𑌰𑌮𑍍 ।
𑌆𑌰𑍁𑌹𑍍𑌯𑌕𑌵𑌿𑌤𑌾 𑌶𑌾𑌖𑌾𑌂 𑌵𑌂𑌦𑍇 𑌵𑌾𑌲𑍍𑌮𑍀𑌕𑌿 𑌕𑍋𑌕𑌿𑌲𑌮𑍍 ॥ 34 ॥

𑌆𑌪𑌦𑌾𑌮𑌪𑌹𑌰𑍍𑌤𑌾𑌰𑌂 𑌦𑌾𑌤𑌾𑌰𑌂 𑌸𑌰𑍍𑌵𑌸𑌂𑌪𑌦𑌾𑌮𑍍 ।
𑌲𑍋𑌕𑌾𑌭𑌿𑌰𑌾𑌮𑌂 𑌶𑍍𑌰𑍀𑌰𑌾𑌮𑌂 𑌭𑍂𑌯𑍋𑌭𑍂𑌯𑍋 𑌨𑌮𑌾𑌮𑍍𑌯𑌹𑌮𑍍 ॥ 35 ॥

𑌭𑌰𑍍𑌜𑌨𑌂 𑌭𑌵𑌬𑍀𑌜𑌾𑌨𑌾𑌮𑌰𑍍𑌜𑌨𑌂 𑌸𑍁𑌖𑌸𑌂𑌪𑌦𑌾𑌮𑍍 ।
𑌤𑌰𑍍𑌜𑌨𑌂 𑌯𑌮𑌦𑍂𑌤𑌾𑌨𑌾𑌂 𑌰𑌾𑌮 𑌰𑌾𑌮𑍇𑌤𑌿 𑌗𑌰𑍍𑌜𑌨𑌮𑍍 ॥ 36 ॥

𑌰𑌾𑌮𑍋 𑌰𑌾𑌜𑌮𑌣𑌿𑌃 𑌸𑌦𑌾 𑌵𑌿𑌜𑌯𑌤𑍇 𑌰𑌾𑌮𑌂 𑌰𑌮𑍇𑌶𑌂 𑌭𑌜𑍇
𑌰𑌾𑌮𑍇𑌣𑌾𑌭𑌿𑌹𑌤𑌾 𑌨𑌿𑌶𑌾𑌚𑌰𑌚𑌮𑍂 𑌰𑌾𑌮𑌾𑌯 𑌤𑌸𑍍𑌮𑍈 𑌨𑌮𑌃 ।
𑌰𑌾𑌮𑌾𑌨𑍍𑌨𑌾𑌸𑍍𑌤𑌿 𑌪𑌰𑌾𑌯𑌣𑌂 𑌪𑌰𑌤𑌰𑌂 𑌰𑌾𑌮𑌸𑍍𑌯 𑌦𑌾𑌸𑍋𑌸𑍍𑌮𑍍𑌯𑌹𑌂
𑌰𑌾𑌮𑍇 𑌚𑌿𑌤𑍍𑌤𑌲𑌯𑌃 𑌸𑌦𑌾 𑌭𑌵𑌤𑍁 𑌮𑍇 𑌭𑍋 𑌰𑌾𑌮 𑌮𑌾𑌮𑍁𑌦𑍍𑌧𑌰 ॥ 3𑍭 ॥

𑌶𑍍𑌰𑍀𑌰𑌾𑌮 𑌰𑌾𑌮 𑌰𑌾𑌮𑍇𑌤𑌿 𑌰𑌮𑍇 𑌰𑌾𑌮𑍇 𑌮𑌨𑍋𑌰𑌮𑍇 ।
𑌸𑌹𑌸𑍍𑌰𑌨𑌾𑌮 𑌤𑌤𑍍𑌤𑍁𑌲𑍍𑌯𑌂 𑌰𑌾𑌮 𑌨𑌾𑌮 𑌵𑌰𑌾𑌨𑌨𑍇 ॥ 3𑍮 ॥

𑌇𑌤𑌿 𑌶𑍍𑌰𑍀𑌬𑍁𑌧𑌕𑍌𑌶𑌿𑌕𑌮𑍁𑌨𑌿 𑌵𑌿𑌰𑌚𑌿𑌤𑌂 𑌶𑍍𑌰𑍀𑌰𑌾𑌮 𑌰𑌕𑍍𑌷𑌾𑌸𑍍𑌤𑍋𑌤𑍍𑌰𑌂 𑌸𑌂𑌪𑍂𑌰𑍍𑌣𑌮𑍍 ।

𑌶𑍍𑌰𑍀𑌰𑌾𑌮 𑌜𑌯𑌰𑌾𑌮 𑌜𑌯𑌜𑌯𑌰𑌾𑌮 ।