𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑌮𑍍 ।
𑌅𑌥 𑌸𑌪𑍍𑌤𑌦𑌶𑌸𑍍𑌸𑌰𑍍𑌗𑌃 ।
𑌸 𑌰𑌾𑌮𑍋 𑌰𑌥𑌮𑌾𑌸𑍍𑌥𑌾𑌯 𑌸𑌂𑌪𑍍𑌰𑌹𑍃𑌷𑍍𑌟𑌸𑍁𑌹𑍃𑌜𑍍𑌜𑌨𑌃 ।
𑌪𑌤𑌾𑌕𑌾𑌧𑍍𑌵𑌜𑌸𑌂𑌪𑌨𑍍𑌨𑌂 𑌮𑌹𑌾𑌰𑍍𑌹𑌾𑌗𑌰𑍁𑌧𑍂𑌪𑌿𑌤𑌮𑍍 ॥ 1 ॥
𑌅𑌪𑌶𑍍𑌯𑌨𑍍𑌨𑌗𑌰𑌂 𑌶𑍍𑌰𑍀𑌮𑌾𑌨𑍍𑌨𑌾𑌨𑌾𑌜𑌨𑌸𑌮𑌾𑌕𑍁𑌲𑌮𑍍 ।
𑌸 𑌗𑍃𑌹𑍈𑌰𑌭𑍍𑌰𑌸𑌂𑌕𑌾𑌶𑍈𑌃 𑌪𑌾𑌂𑌡𑍁𑌰𑍈𑌰𑍁𑌪𑌶𑍋𑌭𑌿𑌤𑌮𑍍 ॥ 2 ॥
𑌰𑌾𑌜𑌮𑌾𑌰𑍍𑌗𑌂 𑌯𑌯𑍌 𑌰𑌾𑌮𑍋 𑌮𑌧𑍍𑌯𑍇𑌨𑌾𑌗𑌰𑍁𑌧𑍂𑌪𑌿𑌤𑌮𑍍 ।
𑌚𑌂𑌦𑌨𑌾𑌨𑌾𑌂 𑌚 𑌮𑍁𑌖𑍍𑌯𑌾𑌨𑌾𑌮𑌗𑌰𑍂𑌣𑌾𑌂 𑌚 𑌸𑌂𑌚𑌯𑍈𑌃 ॥ 3 ॥
𑌉𑌤𑍍𑌤𑌮𑌾𑌨𑌾𑌂 𑌚 𑌗𑌂𑌧𑌾𑌨𑌾𑌂 𑌕𑍍𑌷𑍌𑌮𑌕𑍋𑌶𑌾𑌂𑌬𑌰𑌸𑍍𑌯 𑌚 ।
𑌅𑌵𑌿𑌦𑍍𑌧𑌾𑌭𑌿𑌶𑍍𑌚 𑌮𑍁𑌕𑍍𑌤𑌾𑌭𑌿𑌰𑍁𑌤𑍍𑌤𑌮𑍈𑌸𑍍𑌸𑍍𑌫𑌾𑌟𑌿𑌕𑍈𑌰𑌪𑌿 ॥ 4 ॥
𑌶𑍋𑌭𑌮𑌾𑌨𑌮𑌸𑌂𑌬𑌾𑌧𑍈𑌸𑍍𑌤𑌂 𑌰𑌾𑌜𑌪𑌥𑌮𑍁𑌤𑍍𑌤𑌮𑌮𑍍 ।
𑌸𑌂𑌵𑍃𑌤𑌂 𑌵𑌿𑌵𑌿𑌧𑍈𑌃𑌪𑍁𑌷𑍍𑌪𑍈𑌰𑍍𑌭𑌕𑍍𑌷𑍍𑌯𑍈𑌰𑍁𑌚𑍍𑌚𑌾𑌵𑌚𑍈𑌰𑌪𑌿 ॥ 5 ॥
𑌦𑌦𑌰𑍍𑌶 𑌤𑌂 𑌰𑌾𑌜𑌪𑌥𑌂 𑌦𑌿𑌵𑌿 𑌦𑍇𑌵𑌪𑌥𑌂 𑌯𑌥𑌾 ।
𑌦𑌧𑍍𑌯𑌕𑍍𑌷𑌤𑌹𑌵𑌿𑌰𑍍𑌲𑌾𑌜𑍈𑌰𑍍𑌧𑍂𑌪𑍈𑌰𑌗𑌰𑍁𑌚𑌂𑌦𑌨𑍈𑌃 ॥ 6 ॥
𑌨𑌾𑌨𑌾𑌮𑌾𑌲𑍍𑌯𑍋𑌪𑌗𑌂𑌧𑍈𑌶𑍍𑌚 𑌸𑌦𑌾𑌽𑌭𑍍𑌯𑌰𑍍𑌚𑌿𑌤𑌚𑌤𑍍𑌵𑌰𑌮𑍍 ।
𑌅𑌶𑍀𑌰𑍍𑌵𑌾𑌦𑌾𑌨𑍍𑌬𑌹𑍂𑌨𑍍 𑌶𑍃𑌣𑍍𑌵𑌨𑍍𑌸𑍁𑌹𑍃𑌦𑍍𑌭𑌿𑌸𑍍𑌸𑌮𑍁𑌦𑍀𑌰𑌿𑌤𑌾𑌨𑍍 ॥ ॥
𑌯𑌥𑌾𑌰𑍍𑌹𑌂 𑌚𑌾𑌪𑌿 𑌸𑌂𑌪𑍂𑌜𑍍𑌯 𑌸𑌰𑍍𑌵𑌾𑌨𑍇𑌵 𑌨𑌰𑌾𑌨𑍍𑌯𑌯𑍌 ।
𑌪𑌿𑌤𑌾𑌮𑌹𑍈𑌰𑌾𑌚𑌰𑌿𑌤𑌂 𑌤𑌥𑍈𑌵 𑌪𑍍𑌰𑌪𑌿𑌤𑌾𑌮𑌹𑍈𑌃 ॥ ॥
𑌅𑌦𑍍𑌯𑍋𑌪𑌾𑌦𑌾𑌯 𑌤𑌂 𑌮𑌾𑌰𑍍𑌗𑌮𑌭𑌿𑌷𑌿𑌕𑍍𑌤𑍋𑌽𑌨𑍁𑌪𑌾𑌲𑌯 ।
𑌯𑌥𑌾𑌸𑍍𑌮 𑌪𑍋𑌷𑌿𑌤𑌾𑌃 𑌪𑌿𑌤𑍍𑌰𑌾 𑌯𑌥𑌾 𑌸𑌰𑍍𑌵𑍈𑌃 𑌪𑌿𑌤𑌾𑌮𑌹𑍈𑌃 ॥ ॥
𑌤𑌤𑌸𑍍𑌸𑍁𑌖𑌤𑌰𑌂 𑌰𑌾𑌮𑍇 𑌵𑌤𑍍𑌸𑍍𑌯𑌾𑌮𑌸𑍍𑌸𑌤𑌿 𑌰𑌾𑌜𑌨𑌿 ।
𑌅𑌲𑌮𑌦𑍍𑌯 𑌹𑌿 𑌭𑍁𑌕𑍍𑌤𑍇𑌨 𑌪𑌰𑌮𑌾𑌰𑍍𑌥𑍈𑌰𑌲𑌂 𑌚 𑌨𑌃 ॥ 10 ॥
𑌯𑌦𑌿 𑌪𑌶𑍍𑌯𑌾𑌮 𑌨𑌿𑌰𑍍𑌯𑌾𑌂𑌤𑌂 𑌰𑌾𑌮𑌂 𑌰𑌾𑌜𑍍𑌯𑍇 𑌪𑍍𑌰𑌤𑌿𑌷𑍍𑌠𑌿𑌤𑌮𑍍 ।
𑌅𑌤𑍋 𑌹𑌿 𑌨𑌃 𑌪𑍍𑌰𑌿𑌯𑌤𑌰𑌂 𑌨𑌾𑌨𑍍𑌯𑌤𑍍𑌕𑌿𑌂𑌚𑌿𑌦𑍍𑌭𑌵𑌿𑌷𑍍𑌯𑌤𑌿 ॥ 11 ॥
𑌯𑌥𑌾𑌽𑌭𑌿𑌷𑍇𑌕𑍋 𑌰𑌾𑌮𑌸𑍍𑌯 𑌰𑌾𑌜𑍍𑌯𑍇𑌨𑌾𑌮𑌿𑌤𑌤𑍇𑌜𑌸𑌃 ।
𑌏𑌤𑌾𑌶𑍍𑌚𑌾𑌨𑍍𑌯𑌾𑌶𑍍𑌚 𑌸𑍁𑌹𑍃𑌦𑌾𑌮𑍁𑌦𑌾𑌸𑍀𑌨𑌃 𑌕𑌥𑌾𑌶𑍍𑌶𑍁𑌭𑌾𑌃 ॥ 12 ॥
𑌆𑌤𑍍𑌮𑌸𑌂𑌪𑍂𑌜𑌨𑍀𑌶𑍍𑌶𑍃𑌣𑍍𑌵𑌨𑍍𑌯𑌯𑍌 𑌰𑌾𑌮𑍋 𑌮𑌹𑌾𑌪𑌥𑌮𑍍 ।
𑌨 𑌹𑌿 𑌤𑌸𑍍𑌮𑌾𑌨𑍍𑌮𑌨𑌃 𑌕𑌶𑍍𑌚𑌿𑌚𑍍𑌚𑌕𑍍𑌷𑍁𑌷𑍀 𑌵𑌾 𑌨𑌰𑍋𑌤𑍍𑌤𑌮𑌾𑌤𑍍 ॥ 13 ॥
𑌨𑌰 𑌶𑍍𑌶𑌕𑍍𑌨𑍋𑌤𑍍𑌯𑌪𑌾𑌕𑍍𑌰𑌷𑍍𑌟𑍁𑌮𑌤𑌿𑌕𑍍𑌰𑌾𑌂𑌤𑍇𑌽𑌪𑌿 𑌰𑌾𑌘𑌵𑍇 ।
𑌯𑌶𑍍𑌚 𑌰𑌾𑌮𑌂 𑌨 𑌪𑌶𑍍𑌯𑍇𑌤𑍍𑌤𑍁 𑌯𑌂 𑌚 𑌰𑌾𑌮𑍋 𑌨 𑌪𑌶𑍍𑌯𑌤𑌿 ॥ 14 ॥
𑌨𑌿𑌂𑌦𑌿𑌤 𑌸𑍍𑌸𑌰𑍍𑌵𑌲𑍍𑌲𑍋𑌕𑍇𑌷𑍁 𑌸𑍍𑌵𑌾𑌤𑍍𑌮𑌾𑌽𑌪𑍍𑌯𑍇𑌨𑌂 𑌵𑌿𑌗𑌰𑍍𑌹𑌤𑍇 ।
𑌸𑌰𑍍𑌵𑍇𑌷𑍁 𑌹𑌿 𑌸 𑌧𑌰𑍍𑌮𑌾𑌤𑍍𑌮𑌾 𑌵𑌰𑍍𑌣𑌾𑌨𑌾𑌂 𑌕𑍁𑌰𑍁𑌤𑍇 𑌦𑌯𑌾𑌮𑍍 ॥ 15 ॥
𑌚𑌤𑍁𑌰𑍍𑌣𑌾𑌂 𑌹𑌿 𑌵𑌯𑌃 𑌸𑍍𑌥𑌾𑌨𑌾𑌂 𑌤𑍇𑌨 𑌤𑍇 𑌤𑌮𑌨𑍁𑌵𑍍𑌰𑌤𑌾𑌃 ।
𑌚𑌤𑍁𑌷𑍍𑌪𑌥𑌾𑌂𑌦𑍇𑌵𑌪𑌥𑌾𑌂𑌶𑍍𑌚𑍈𑌤𑍍𑌯𑌾𑌨𑍍𑌯𑌾𑌯𑌤𑌨𑌾𑌨𑌿 𑌚 ॥ 16 ॥
𑌪𑍍𑌰𑌦𑌕𑍍𑌷𑌿𑌣𑌂 𑌪𑌰𑌿𑌹𑌰𑌨𑍍 𑌜𑌗𑌾𑌮 𑌨𑍃𑌪𑌤𑍇 𑌸𑍍𑌸𑍁𑌤𑌃 ।
𑌸 𑌰𑌾𑌜𑌕𑍁𑌲𑌮𑌾𑌸𑌾𑌦𑍍𑌯 𑌮𑍇𑌘𑌸𑌂𑌘𑍋𑌪𑌮𑍈 𑌶𑍍𑌶𑍁𑌭𑍈𑌃 ॥ 1 ॥
𑌪𑍍𑌰𑌾𑌸𑌾𑌦𑌶𑍃𑌂𑌗𑍈𑌰𑍍𑌵𑌿𑌵𑌿𑌧𑍈𑌃𑌕𑍈𑌲𑌾𑌸 𑌶𑌿𑌖𑌰𑍋𑌪𑌮𑍈𑌃 ।
𑌆𑌵𑌾𑌰𑌯𑌦𑍍𑌭𑌿𑌰𑍍𑌗𑌗𑌨𑌂 𑌵𑌿𑌮𑌾𑌨𑍈𑌰𑌿𑌵 𑌪𑌾𑌂𑌡𑍁𑌰𑍈𑌃 ॥ 1 ॥
𑌵𑌰𑍍𑌧𑌮𑌾𑌨𑌗𑍃𑌹𑍈𑌶𑍍𑌚𑌾𑌪𑌿 𑌰𑌤𑍍𑌨𑌜𑌾𑌲𑌪𑌰𑌿𑌷𑍍𑌕𑍃𑌤𑍈𑌃 ।
𑌤𑌤𑍍𑌪𑍃𑌥𑌿𑌵𑍍𑌯𑌾𑌂 𑌗𑍃𑌹𑌵𑌰𑌂 𑌮𑌹𑍇𑌂𑌦𑍍𑌰𑌸𑌦𑌨𑍋𑌪𑌮𑌮𑍍 ॥ 1 ॥
𑌰𑌾𑌜𑌪𑍁𑌤𑍍𑌰𑌃 𑌪𑌿𑌤𑍁𑌰𑍍𑌵𑍇𑌶𑍍𑌮 𑌪𑍍𑌰𑌵𑌿𑌵𑍇𑌶 𑌶𑍍𑌰𑌿𑌯𑌾 𑌜𑍍𑌵𑌲𑌨𑍍 ।
𑌸 𑌕𑌕𑍍𑌷𑍍𑌯𑌾 𑌧𑌨𑍍𑌵𑌿𑌭𑌿𑌰𑍍𑌗𑍁𑌪𑍍𑌤𑌾𑌸𑍍𑌤𑌿𑌸𑍍𑌰𑍋𑌽𑌤𑌿𑌕𑍍𑌰𑌮𑍍𑌯 𑌵𑌾𑌜𑌿𑌭𑌿𑌃 ॥ 20 ॥
𑌪𑌦𑌾𑌤𑌿𑌰𑌪𑌰𑍇 𑌕𑌕𑍍𑌷𑍍𑌯𑍇 𑌦𑍍𑌵𑍇 𑌜𑌗𑌾𑌮 𑌨𑌰𑍋𑌤𑍍𑌤𑌮𑌃 ।
𑌸 𑌸𑌰𑍍𑌵𑌾 𑌸𑍍𑌸𑌮𑌤𑌿𑌕𑍍𑌰𑌮𑍍𑌯 𑌕𑌕𑍍𑌷𑍍𑌯𑌾 𑌦𑌶𑌰𑌥𑌾𑌤𑍍𑌮𑌜𑌃 ।
𑌸𑌨𑍍𑌨𑌿𑌵𑌰𑍍𑌤𑍍𑌯 𑌜𑌨𑌂 𑌸𑌰𑍍𑌵𑌂 𑌶𑍁𑌦𑍍𑌧𑌾𑌂𑌤𑌃 𑌪𑍁𑌰𑌮𑌭𑍍𑌯𑌗𑌾𑌤𑍍 ॥ 21 ॥
𑌤𑌸𑍍𑌮𑌿𑌨𑍍 𑌪𑍍𑌰𑌵𑌿𑌷𑍍𑌟𑍇 𑌪𑌿𑌤𑍁𑌰𑌂𑌤𑌿𑌕𑌂 𑌤𑌦𑌾 𑌜𑌨 𑌸𑍍𑌸 𑌸𑌰𑍍𑌵𑍋 𑌮𑍁𑌦𑌿𑌤𑍋 𑌨𑍃𑌪𑌾𑌤𑍍𑌮𑌜𑍇 ।
𑌪𑍍𑌰𑌤𑍀𑌕𑍍𑌷𑌤𑍇 𑌤𑌸𑍍𑌯 𑌪𑍁𑌨𑌃 𑌸𑍍𑌮 𑌨𑌿𑌰𑍍𑌗𑌮𑌂 𑌯𑌥𑍋𑌦𑌯𑌂 𑌚𑌂𑌦𑍍𑌰𑌮𑌸𑌸𑍍𑌸𑌰𑌿𑌤𑍍𑌪𑌤𑌿𑌃 ॥ 22 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑍇 𑌸𑌪𑍍𑌤𑌦𑌶𑌸𑍍𑌸𑌰𑍍𑌗𑌃 ॥
