Meaning, Multimedia
View this in:
| English | Devanagari | Telugu | Tamil | Kannada | Malayalam | Gujarati | Odia | Bengali  |
| Marathi | Assamese | Punjabi | Hindi | Samskritam | Konkani | Nepali | Sinhala | Grantha  |

3.46 𑌅𑌰𑌣𑍍𑌯𑌕𑌾𑌂𑌡 - 𑌷𑌟𑍍𑌚𑌤𑍍𑌵𑌾𑌰𑌿𑌂𑌶 𑌸𑌰𑍍𑌗𑌃

𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌰𑌣𑍍𑌯𑌕𑌾𑌂𑌡𑌮𑍍 ।
𑌅𑌥 𑌷𑌟𑍍𑌚𑌤𑍍𑌵𑌾𑌰𑌿𑌂𑌶𑌸𑍍𑌸𑌰𑍍𑌗𑌃 ।

𑌤𑌯𑌾 𑌪𑌰𑍁𑌷𑌮𑍁𑌕𑍍𑌤𑌸𑍍𑌤𑍁 𑌕𑍁𑌪𑌿𑌤𑍋 𑌰𑌾𑌘𑌵𑌾𑌨𑍁𑌜𑌃 ।
𑌸 𑌵𑌿𑌕𑌾𑌂𑌕𑍍𑌷𑌨𑍍𑌭𑍃𑌶𑌂 𑌰𑌾𑌮𑌂 𑌪𑍍𑌰𑌤𑌸𑍍𑌥𑍇 𑌨𑌚𑌿𑌰𑌾𑌦𑌿𑌵 ॥ 1 ॥

𑌤𑌦𑌾𑌸𑌾𑌦𑍍𑌯 𑌦𑌶𑌗𑍍𑌰𑍀𑌵𑌃 𑌕𑍍𑌷𑌿𑌪𑍍𑌰𑌮𑌂𑌤𑌰𑌮𑌾𑌸𑍍𑌥𑌿𑌤𑌃 ।
𑌅𑌭𑌿𑌚𑌕𑍍𑌰𑌾𑌮 𑌵𑍈𑌦𑍇𑌹𑍀𑌂 𑌪𑌰𑌿𑌵𑍍𑌰𑌾𑌜𑌕𑌰𑍂𑌪𑌧𑍃𑌕𑍍 ॥ 2 ॥

𑌶𑍍𑌲𑌕𑍍𑌷𑍍𑌣𑌕𑌾𑌷𑌾𑌯𑌸𑌂𑌵𑍀𑌤𑌶𑍍𑌶𑌿𑌖𑍀 𑌛𑌤𑍍𑌰𑍀 𑌉𑌪𑌾𑌨𑌹𑍀 ।
𑌵𑌾𑌮𑍇 𑌚𑌾𑌂𑌸𑍇𑌽𑌵𑌸𑌜𑍍𑌯𑌾𑌥 𑌶𑍁𑌭𑍇 𑌯𑌷𑍍𑌟𑌿𑌕𑌮𑌂𑌡𑌲𑍂 ॥ 3 ॥

𑌪𑌰𑌿𑌵𑍍𑌰𑌾𑌜𑌕𑌰𑍂𑌪𑍇𑌣 𑌵𑍈𑌦𑍇𑌹𑍀𑌮𑌨𑍍𑌵𑌪𑌦𑍍𑌯𑌤 ।
𑌤𑌾𑌮𑌾𑌸𑌸𑌾𑌦𑌾𑌤𑌿𑌬𑌲𑍋 𑌭𑍍𑌰𑌾𑌤𑍃𑌭𑍍𑌯𑌾𑌂 𑌰𑌹𑌿𑌤𑌾𑌂 𑌵𑌨𑍇 ॥ 4 ॥

𑌰𑌹𑌿𑌤𑌾𑌂 𑌚𑌂𑌦𑍍𑌰𑌸𑍂𑌰𑍍𑌯𑌾𑌭𑍍𑌯𑌾𑌂 𑌸𑌂𑌧𑍍𑌯𑌾𑌮𑌿𑌵 𑌮𑌹𑌤𑍍𑌤𑌮𑌃 ।
𑌤𑌾𑌮𑌪𑌶𑍍𑌯𑌤𑍍𑌤𑌤𑍋 𑌬𑌾𑌲𑌾𑌂 𑌰𑌾𑌮𑌪𑌤𑍍𑌨𑍀𑌂 𑌯𑌶𑌸𑍍𑌵𑌿𑌨𑍀𑌮𑍍 ॥ 5 ॥

𑌰𑍋𑌹𑌿𑌣𑍀𑌂 𑌶𑌶𑌿𑌨𑌾 𑌹𑍀𑌨𑌾𑌂 𑌗𑍍𑌰𑌹𑌵𑌦𑍍𑌭𑍃𑌶𑌦𑌾𑌰𑍁𑌣𑌃 ।
𑌤𑌮𑍁𑌗𑍍𑌰𑌤𑍇𑌜𑌃𑌕𑌰𑍍𑌮𑌾𑌣𑌂 𑌜𑌨𑌸𑍍𑌥𑌾𑌨𑌰𑍂𑌹𑌾 𑌦𑍍𑌰𑍁𑌮𑌾𑌃 ॥ 6 ॥

𑌸𑌮𑍀𑌕𑍍𑌷𑍍𑌯 𑌸𑌂𑌪𑍍𑌰𑌕𑌂𑌪𑌂𑌤𑍇 𑌨 𑌪𑍍𑌰𑌵𑌾𑌤𑌿 𑌚 𑌮𑌾𑌰𑍁𑌤𑌃 ।
𑌶𑍀𑌘𑍍𑌰𑌸𑍍𑌰𑍋𑌤𑌾𑌶𑍍𑌚 𑌤𑌂 𑌦𑍃𑌷𑍍𑌟𑍍𑌵𑌾 𑌵𑍀𑌕𑍍𑌷𑌂𑌤𑌂 𑌰𑌕𑍍𑌤𑌲𑍋𑌚𑌨𑌮𑍍 ॥ 𑍭 ॥

𑌸𑍍𑌤𑌿𑌮𑌿𑌤𑌂 𑌗𑌂𑌤𑍁𑌮𑌾𑌰𑍇𑌭𑍇 𑌭𑌯𑌾𑌦𑍍𑌗𑍋𑌦𑌾𑌵𑌰𑍀 𑌨𑌦𑍀 ।
𑌰𑌾𑌮𑌸𑍍𑌯 𑌤𑍍𑌵𑌂𑌤𑌰𑌪𑍍𑌰𑍇𑌪𑍍𑌸𑍁𑌰𑍍𑌦𑌶𑌗𑍍𑌰𑍀𑌵𑌸𑍍𑌤𑌦𑌂𑌤𑌰𑍇 ॥ 𑍮 ॥

𑌉𑌪𑌤𑌸𑍍𑌥𑍇 𑌚 𑌵𑍈 𑌦𑍇𑌹𑍀𑌂 𑌭𑌿𑌕𑍍𑌷𑍁𑌰𑍂𑌪𑍇𑌣 𑌰𑌾𑌵𑌣𑌃 ।
𑌅𑌭𑌵𑍍𑌯𑍋 𑌭𑌵𑍍𑌯𑌰𑍂𑌪𑍇𑌣 𑌭𑌰𑍍𑌤𑌾𑌰𑌮𑌨𑍁𑌶𑍋𑌚𑌤𑍀𑌮𑍍 ॥ 𑍯 ॥

𑌅𑌭𑍍𑌯𑌵𑌰𑍍𑌤𑌤 𑌵𑍈𑌦𑍇𑌹𑍀𑌂 𑌚𑌿𑌤𑍍𑌰𑌾𑌮𑌿𑌵 𑌶𑌨𑍈𑌶𑍍𑌚𑌰𑌃 ।
𑌸 𑌪𑌾𑌪𑍋 𑌭𑌵𑍍𑌯𑌰𑍂𑌪𑍇𑌣 𑌤𑍃𑌣𑍈𑌃 𑌕𑍂𑌪 𑌇𑌵𑌾𑌵𑍃𑌤𑌃 ॥ 10 ॥

𑌅𑌤𑌿𑌷𑍍𑌠𑌤𑍍𑌪𑍍𑌰𑍇𑌕𑍍𑌷𑍍𑌯 𑌵𑍈𑌦𑍇𑌹𑍀𑌂 𑌰𑌾𑌮𑌪𑌤𑍍𑌨𑌿𑌂 𑌯𑌶𑌸𑍍𑌵𑌿𑌨𑍀𑌮𑍍 ।
𑌶𑍁𑌭𑌾𑌂 𑌰𑍁𑌚𑌿𑌰𑌦𑌂𑌤𑍋𑌷𑍍𑌠𑍀𑌂 𑌪𑍂𑌰𑍍𑌣𑌚𑌂𑌦𑍍𑌰𑌨𑌿𑌭𑌾𑌨𑌨𑌾𑌮𑍍 ॥ 11 ॥

𑌆𑌸𑍀𑌨𑌾𑌂 𑌪𑌰𑍍𑌣𑌶𑌾𑌲𑌾𑌯𑌾𑌂 𑌬𑌾𑌷𑍍𑌪𑌶𑍋𑌕𑌾𑌭𑌿𑌪𑍀𑌡𑌿𑌤𑌾𑌮𑍍 ।
𑌸 𑌤𑌾𑌂 𑌪𑌦𑍍𑌮𑌪𑌲𑌾𑌶𑌾𑌕𑍍𑌷𑍀𑌂 𑌪𑍀𑌤𑌕𑍌𑌶𑍇𑌯𑌵𑌾𑌸𑌿𑌨𑍀𑌮𑍍 ॥ 12 ॥

𑌅𑌭𑍍𑌯𑌗𑌚𑍍𑌛𑌤 𑌵𑍈𑌦𑍇𑌹𑍀𑌂 𑌦𑍁𑌷𑍍𑌟𑌚𑍇𑌤𑌾 𑌨𑌿𑌶𑌾𑌚𑌰𑌃 ।
𑌸 𑌮𑌨𑍍𑌮𑌥𑌶𑌰𑌾𑌵𑌿𑌷𑍍𑌟𑍋 𑌬𑍍𑌰𑌹𑍍𑌮𑌘𑍋𑌷𑌮𑍁𑌦𑍀𑌰𑌯𑌨𑍍 ॥ 13 ॥

𑌅𑌬𑍍𑌰𑌵𑍀𑌤𑍍𑌪𑍍𑌰𑌶𑍍𑌰𑌿𑌤𑌂 𑌵𑌾𑌕𑍍𑌯𑌂 𑌰𑌹𑌿𑌤𑍇 𑌰𑌾𑌕𑍍𑌷𑌸𑌾𑌧𑌿𑌪𑌃 ।
𑌤𑌾𑌮𑍁𑌤𑍍𑌤𑌮𑌾𑌂 𑌸𑍍𑌤𑍍𑌰𑌿𑌯𑌂 𑌲𑍋𑌕𑍇 𑌪𑌦𑍍𑌮𑌹𑍀𑌨𑌾𑌮𑌿𑌵 𑌶𑍍𑌰𑌿𑌯𑌮𑍍 ॥ 14 ॥

𑌵𑌿𑌭𑍍𑌰𑌾𑌜𑌮𑌾𑌨𑌾𑌂 𑌵𑌪𑍁𑌷𑌾 𑌰𑌾𑌵𑌣𑌃 𑌪𑍍𑌰𑌶𑌶𑌂𑌸 𑌹 ।
𑌕𑌾 𑌤𑍍𑌵𑌂 𑌕𑌾𑌂𑌚𑌨𑌵𑌰𑍍𑌣𑌾𑌭𑍇 𑌪𑍀𑌤𑌕𑍌𑌶𑍇𑌯𑌵𑌾𑌸𑌿𑌨𑌿 ॥ 15 ॥

𑌕𑌮𑌲𑌾𑌨𑌾𑌂 𑌶𑍁𑌭𑌾𑌂 𑌮𑌾𑌲𑌾𑌂 𑌪𑌦𑍍𑌮𑌿𑌨𑍀𑌵 𑌹𑌿 𑌬𑌿𑌭𑍍𑌰𑌤𑍀 ।
𑌹𑍍𑌰𑍀𑌃 𑌕𑍀𑌰𑍍𑌤𑌿𑌃 𑌶𑍍𑌰𑍀𑌶𑍍𑌶𑍁𑌭𑌾 𑌲𑌕𑍍𑌷𑍍𑌮𑍀𑌰𑌪𑍍𑌸𑌰𑌾 𑌵𑌾 𑌶𑍁𑌭𑌾𑌨𑌨𑍇 ॥ 16 ॥

𑌭𑍂𑌤𑌿𑌰𑍍𑌵𑌾 𑌤𑍍𑌵𑌂 𑌵𑌰𑌾𑌰𑍋𑌹𑍇 𑌰𑌤𑌿𑌰𑍍𑌵𑌾 𑌸𑍍𑌵𑍈𑌰𑌚𑌾𑌰𑌿𑌣𑍀 ।
𑌸𑌮𑌾𑌶𑍍𑌶𑌿𑌖𑌰𑌿𑌣𑌸𑍍𑌸𑍍𑌨𑌿𑌗𑍍𑌧𑌾𑌃 𑌪𑌾𑌂𑌡𑍁𑌰𑌾 𑌦𑌶𑌨𑌾𑌸𑍍𑌤𑌵 ॥ 1𑍭 ॥

𑌵𑌿𑌶𑌾𑌲𑍇 𑌵𑌿𑌮𑌲𑍇 𑌨𑍇𑌤𑍍𑌰𑍇 𑌰𑌕𑍍𑌤𑌾𑌂𑌤𑍇 𑌕𑍃𑌷𑍍𑌣𑌤𑌾𑌰𑌕𑍇 ।
𑌵𑌿𑌶𑌾𑌲𑌂 𑌜𑌘𑌨𑌂 𑌪𑍀𑌨𑌮𑍂𑌰𑍂 𑌕𑌰𑌿𑌕𑌰𑍋𑌪𑌮𑍌 ॥ 1𑍮 ॥

𑌏𑌤𑌾𑌵𑍁𑌪𑌚𑌿𑌤𑍌 𑌵𑍃𑌤𑍍𑌤𑍌 𑌸𑌂𑌹𑌤𑍌 𑌸𑌂𑌪𑍍𑌰𑌵𑌲𑍍𑌗𑌿𑌤𑍌 ।
𑌪𑍀𑌨𑍋𑌨𑍍𑌨𑌤𑌮𑍁𑌖𑍌 𑌕𑌾𑌂𑌤𑍌 𑌸𑍍𑌨𑌿𑌗𑍍𑌧𑍌 𑌤𑌾𑌲𑌫𑌲𑍋𑌪𑌮𑍌 ॥ 1𑍯 ॥

𑌮𑌣𑌿𑌪𑍍𑌰𑌵𑍇𑌕𑌾𑌭𑌰𑌣𑍌 𑌰𑍁𑌚𑌿𑌰𑍌 𑌤𑍇 𑌪𑌯𑍋𑌧𑌰𑍌 ।
𑌚𑌾𑌰𑍁𑌸𑍍𑌮𑌿𑌤𑍇 𑌚𑌾𑌰𑍁𑌦𑌤𑌿 𑌚𑌾𑌰𑍁𑌨𑍇𑌤𑍍𑌰𑍇 𑌵𑌿𑌲𑌾𑌸𑌿𑌨𑌿 ॥ 20 ॥

𑌮𑌨𑍋 𑌹𑌰𑌸𑌿 𑌮𑍇 𑌕𑌾𑌂𑌤𑍇 𑌨𑌦𑍀 𑌕𑍂𑌲𑌮𑌿𑌵𑌾𑌂𑌭𑌸𑌾 ।
𑌕𑌰𑌾𑌂𑌤𑌮𑌿𑌤𑌮𑌧𑍍𑌯𑌾𑌸𑌿 𑌸𑍁𑌕𑍇𑌶𑍀 𑌸𑌂𑌹𑌤𑌸𑍍𑌤𑌨𑍀 ॥ 21 ॥

𑌨𑍈𑌵 𑌦𑍇𑌵𑍀 𑌨 𑌗𑌂𑌧𑌰𑍍𑌵𑍀 𑌨 𑌯𑌕𑍍𑌷𑍀 𑌨 𑌚 𑌕𑌿𑌨𑍍𑌨𑌰𑍀 ।
𑌨𑍈𑌵𑌂𑌰𑍂𑌪𑌾 𑌮𑌯𑌾 𑌨𑌾𑌰𑍀 𑌦𑍃𑌷𑍍𑌟𑌪𑍂𑌰𑍍𑌵𑌾 𑌮𑌹𑍀𑌤𑌲𑍇 ॥ 22 ॥

𑌰𑍂𑌪𑌮𑌗𑍍𑌰𑍍𑌯𑌂 𑌚 𑌲𑍋𑌕𑍇𑌷𑍁 𑌸𑍌𑌕𑍁𑌮𑌾𑌰𑍍𑌯𑌂 𑌵𑌯𑌶𑍍𑌚𑌤𑍇 ।
𑌇𑌹 𑌵𑌾𑌸𑌶𑍍𑌚 𑌕𑌾𑌂𑌤𑌾𑌰𑍇 𑌚𑌿𑌤𑍍𑌤𑌮𑍁𑌨𑍍𑌮𑌾𑌦𑌯𑌂𑌤𑌿 𑌮𑍇 ॥ 23 ॥

𑌸𑌾 𑌪𑍍𑌰𑌤𑌿𑌕𑍍𑌰𑌾𑌮 𑌭𑌦𑍍𑌰𑌂 𑌤𑍇 𑌨𑍈𑌵𑌂 𑌵𑌸𑍍𑌤𑍁𑌮𑌿𑌹𑌾𑌰𑍍𑌹𑌸𑌿 ।
𑌰𑌾𑌕𑍍𑌷𑌸𑌾𑌨𑌾𑌮𑌯𑌂 𑌵𑌾𑌸𑍋 𑌘𑍋𑌰𑌾𑌣𑌾𑌂 𑌕𑌾𑌮𑌰𑍂𑌪𑌿𑌣𑌾𑌮𑍍 ॥ 24 ॥

𑌪𑍍𑌰𑌾𑌸𑌾𑌦𑌾𑌗𑍍𑌰𑌾𑌣𑌿 𑌰𑌮𑍍𑌯𑌾𑌣𑌿 𑌨𑌗𑌰𑍋𑌪𑌵𑌨𑌾𑌨𑌿 𑌚 ।
𑌸𑌂𑌪𑌨𑍍𑌨𑌾𑌨𑌿 𑌸𑍁𑌗𑌂𑌧𑍀𑌨𑌿 𑌯𑍁𑌕𑍍𑌤𑌾𑌨𑍍𑌯𑌾𑌚𑌰𑌿𑌤𑍁𑌂 𑌤𑍍𑌵𑌯𑌾 ॥ 25 ॥

𑌵𑌰𑌂 𑌮𑌾𑌲𑍍𑌯𑌂 𑌵𑌰𑌂 𑌭𑍋𑌜𑍍𑌯𑌂 𑌵𑌰𑌂 𑌵𑌸𑍍𑌤𑍍𑌰𑌂 𑌚 𑌶𑍋𑌭𑌨𑍇 ।
𑌭𑌰𑍍𑌤𑌾𑌰𑌂 𑌚 𑌵𑌰𑌂 𑌮𑌨𑍍𑌯𑍇 𑌤𑍍𑌵𑌦𑍍𑌯𑍁𑌕𑍍𑌤𑌮𑌸𑌿𑌤𑍇𑌕𑍍𑌷𑌣𑍇 ॥ 26 ॥

𑌕𑌾 𑌤𑍍𑌵𑌂 𑌭𑌵𑌸𑌿 𑌰𑍁𑌦𑍍𑌰𑌾𑌣𑌾𑌂 𑌮𑌰𑍁𑌤𑌾𑌂 𑌵𑌾 𑌵𑌰𑌾𑌨𑌨𑍇 ।
𑌵𑌸𑍂𑌨𑌾𑌂 𑌵𑌾 𑌵𑌰𑌾𑌵𑍋𑌹𑍇 𑌦𑍇𑌵𑌤𑌾 𑌪𑍍𑌰𑌤𑌿𑌭𑌾𑌸𑌿 𑌮𑍇 ॥ 2𑍭 ॥

𑌨𑍇𑌹 𑌗𑌚𑍍𑌛𑌂𑌤𑌿 𑌗𑌂𑌧𑌰𑍍𑌵𑌾 𑌨 𑌦𑍇𑌵𑌾 𑌨 𑌚 𑌕𑌿𑌨𑍍𑌨𑌰𑌾𑌃 ।
𑌰𑌾𑌕𑍍𑌷𑌸𑌾𑌨𑌾𑌮𑌯𑌂 𑌵𑌾𑌸𑌃 𑌕𑌥𑌂 𑌨𑍁 𑌤𑍍𑌵𑌮𑌿𑌹𑌾𑌗𑌤𑌾 ॥ 2𑍮 ॥

𑌇𑌹 𑌶𑌾𑌖𑌾𑌮𑍃𑌗𑌾𑌸𑍍𑌸𑌿𑌂𑌹𑌾 𑌦𑍍𑌵𑍀𑌪𑌿𑌵𑍍𑌯𑌾𑌘𑍍𑌰𑌮𑍃𑌗𑌾𑌸𑍍𑌤𑌥𑌾 ।
𑌋𑌕𑍍𑌷𑌾𑌸𑍍𑌤𑌰𑌕𑍍𑌷𑌵𑌃 𑌕𑌂𑌕𑌾𑌃 𑌕𑌥𑌂 𑌤𑍇𑌭𑍍𑌯𑍋 𑌨 𑌬𑌿𑌭𑍍𑌯𑌸𑌿 ॥ 2𑍯 ॥

𑌮𑌦𑌾𑌨𑍍𑌵𑌿𑌤𑌾𑌨𑌾𑌂 𑌘𑍋𑌰𑌾𑌣𑌾𑌂 𑌕𑍁𑌂𑌜𑌰𑌾𑌣𑌾𑌂 𑌤𑌰𑌸𑍍𑌵𑌿𑌨𑌾𑌮𑍍 ।
𑌕𑌥𑌮𑍇𑌕𑌾 𑌮𑌹𑌾𑌰𑌣𑍍𑌯𑍇 𑌨 𑌬𑌿𑌭𑍇𑌷𑌿 𑌵𑌰𑌾𑌨𑌨𑍇 ॥ 30 ॥

𑌕𑌾𑌸𑌿 𑌕𑌸𑍍𑌯 𑌕𑍁𑌤𑌶𑍍𑌚𑌿𑌤𑍍𑌤𑍍𑌵𑌂 𑌕𑌿𑌂 𑌨𑌿𑌮𑌿𑌤𑍍𑌤𑌂 𑌚 𑌦𑌂𑌡𑌕𑌾𑌨𑍍 ।
𑌏𑌕𑌾 𑌚𑌰𑌸𑌿 𑌕𑌲𑍍𑌯𑌾𑌣𑌿 𑌘𑍋𑌰𑌾𑌨𑍍𑌰𑌾𑌕𑍍𑌷𑌸𑌸𑍇𑌵𑌿𑌤𑌾𑌨𑍍 ॥ 31 ॥

𑌇𑌤𑌿 𑌪𑍍𑌰𑌶𑌸𑍍𑌤𑌾 𑌵𑍈𑌦𑍇𑌹𑍀 𑌰𑌾𑌵𑌣𑍇𑌨 𑌦𑍁𑌰𑌾𑌤𑍍𑌮𑌨𑌾 ।
𑌦𑍍𑌵𑌿𑌜𑌾𑌤𑌿𑌵𑍇𑌶𑍇𑌣 𑌹𑌿 𑌤𑌂 𑌦𑍃𑌷𑍍𑌟𑍍𑌵𑌾 𑌰𑌾𑌵𑌣𑌮𑌾𑌗𑌤𑌮𑍍 ॥ 32 ॥

𑌸𑌰𑍍𑌵𑍈𑌰𑌤𑌿𑌥𑌿𑌸𑌤𑍍𑌕𑌾𑌰𑍈𑌃 𑌪𑍂𑌜𑌯𑌾𑌮𑌾𑌸 𑌮𑍈𑌥𑌿𑌲𑍀 ।
𑌉𑌪𑌨𑍀𑌯𑌾𑌸𑌨𑌂 𑌪𑍂𑌰𑍍𑌵𑌂 𑌪𑌾𑌦𑍍𑌯𑍇𑌨𑌾𑌭𑌿𑌨𑌿𑌮𑌂𑌤𑍍𑌰𑍍𑌯 𑌚 ॥ 33 ॥

𑌅𑌬𑍍𑌰𑌵𑍀𑌤𑍍𑌸𑌿𑌦𑍍𑌧𑌮𑌿𑌤𑍍𑌯𑍇𑌵 𑌤𑌦𑌾 𑌤𑌂 𑌸𑍌𑌮𑍍𑌯𑌦𑌰𑍍𑌶𑌨𑌮𑍍 ।
𑌦𑍍𑌵𑌿𑌜𑌾𑌤𑌿𑌵𑍇𑌷𑍇𑌣 𑌸𑌮𑍀𑌕𑍍𑌷𑍍𑌯 𑌮𑍈𑌥𑌿𑌲𑍀 𑌸𑌮𑌾𑌗𑌤𑌂 𑌪𑌾𑌤𑍍𑌰𑌕𑍁𑌸𑍁𑌂𑌭𑌧𑌾𑌰𑌿𑌣𑌮𑍍 ।
𑌅𑌶𑌕𑍍𑌯𑌮𑍁𑌦𑍍𑌵𑍇𑌷𑍍𑌟𑍁𑌮𑌪𑌾𑌯𑌦𑌰𑍍𑌶𑌨𑌂 𑌨𑍍𑌯𑌮𑌂𑌤𑍍𑌰𑌯𑌦𑍍𑌬𑍍𑌰𑌾𑌹𑍍𑌮𑌣𑌵𑌤𑍍𑌤𑌦𑌾𑌂𑌗𑌨𑌾 ॥ 34 ॥

𑌇𑌯𑌂 𑌬𑍃𑌸𑍀 𑌬𑍍𑌰𑌾𑌹𑍍𑌮𑌣 𑌕𑌾𑌮𑌮𑌾𑌸𑍍𑌯𑌤𑌾𑌮𑌿𑌦𑌂 𑌚 𑌪𑌾𑌦𑍍𑌯𑌂 𑌪𑍍𑌰𑌤𑌿𑌗𑍃𑌹𑍍𑌯𑌤𑌾𑌮𑌿𑌤𑌿 ।
𑌇𑌦𑌂 𑌚 𑌸𑌿𑌦𑍍𑌧𑌂 𑌵𑌨𑌜𑌾𑌤𑌮𑍁𑌤𑍍𑌤𑌮𑌂 𑌤𑍍𑌵𑌦𑌰𑍍𑌥𑌮𑌵𑍍𑌯𑌗𑍍𑌰𑌮𑌿𑌹𑍋𑌪𑌭𑍁𑌜𑍍𑌯𑌤𑌾𑌮𑍍 ॥ 35 ॥

𑌨𑌿𑌮𑌂𑌤𑍍𑌰𑍍𑌯𑌮𑌾𑌣𑌃 𑌪𑍍𑌰𑌤𑌿𑌪𑍂𑌰𑍍𑌣𑌭𑌾𑌷𑌿𑌣𑍀𑌂 𑌨𑌰𑍇𑌂𑌦𑍍𑌰𑌪𑌤𑍍𑌨𑍀𑌂 𑌪𑍍𑌰𑌸𑌮𑍀𑌕𑍍𑌷𑍍𑌯 𑌮𑍈𑌥𑌿𑌲𑍀𑌮𑍍 ।
𑌪𑍍𑌰𑌸𑌹𑍍𑌯 𑌤𑌸𑍍𑌯𑌾𑌹𑌰𑌣𑍇 𑌧𑍃𑌤𑌂 𑌮𑌨𑌃 𑌸𑌮𑌰𑍍𑌪𑌯𑌤𑍍𑌸𑍍𑌵𑌾𑌤𑍍𑌮𑌵𑌧𑌾𑌯 𑌰𑌾𑌵𑌣𑌃 ॥ 36 ॥

𑌤𑌤𑌃 𑌸𑍁𑌵𑍇𑌷𑌂 𑌮𑍃𑌗𑌯𑌾𑌗𑌤𑌂 𑌪𑌤𑌿𑌂 𑌪𑍍𑌰𑌤𑍀𑌕𑍍𑌷𑌮𑌾𑌣𑌾 𑌸𑌹𑌲𑌕𑍍𑌷𑍍𑌮𑌣𑌂 𑌤𑌦𑌾 ।
𑌵𑌿𑌵𑍀𑌕𑍍𑌷𑌮𑌾𑌣𑌾 𑌹𑌰𑌿𑌤𑌂 𑌦𑌦𑌰𑍍𑌶 𑌤𑌨𑍍𑌮𑌹𑌦𑍍𑌵𑌨𑌂 𑌨𑍈𑌵 𑌤𑍁 𑌰𑌾𑌮𑌲𑌕𑍍𑌷𑍍𑌣𑍌 ॥ 3𑍭 ॥

𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌰𑌣𑍍𑌯𑌕𑌾𑌂𑌡𑍇 𑌷𑌟𑍍𑌚𑌤𑍍𑌵𑌾𑌰𑌿𑌂𑌶𑌸𑍍𑌸𑌰𑍍𑌗𑌃 ॥


Browse Related Categories: