𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑌮𑍍 ।
𑌅𑌥 𑌦𑍍𑌵𑌾𑌦𑌶𑌾𑌧𑌿𑌕𑌶𑌤𑌤𑌮𑌸𑍍𑌸𑌰𑍍𑌗𑌃 ।
𑌤𑌮𑌪𑍍𑌰𑌤𑌿𑌮𑌤𑍇𑌜𑍋𑌭𑍍𑌯𑌾𑌂 𑌭𑍍𑌰𑌾𑌤𑍃𑌭𑍍𑌯𑌾𑌂 𑌰𑍋𑌮𑌹𑌰𑍍𑌷𑌣𑌮𑍍 ।
𑌵𑌿𑌸𑍍𑌮𑌿𑌤𑌾𑌃 𑌸𑌂𑌗𑌮𑌂 𑌪𑍍𑌰𑍇𑌕𑍍𑌷𑍍𑌯 𑌸𑌮𑌵𑍇𑌤𑌾 𑌮𑌹𑌰𑍍𑌷𑌯𑌃 ॥ 1 ॥
𑌅𑌂𑌤𑌰𑍍𑌹𑌿𑌤𑌾 𑌮𑍁𑌨𑌿𑌗𑌣𑌾𑌸𑍍𑌸𑌿𑌦𑍍𑌧𑌾𑌶𑍍𑌚 𑌪𑌰𑌮𑌰𑍍𑌷𑌯𑌃 ।
𑌤𑍌 𑌭𑍍𑌰𑌾𑌤𑌰𑍌 𑌮𑌹𑌾𑌤𑍍𑌮𑌾𑌨𑍌 𑌕𑌾𑌕𑍁𑌤𑍍𑌸𑍍𑌥𑍌 𑌪𑍍𑌰𑌶𑌶𑌂𑌸𑌿𑌰𑍇 ॥ 2 ॥
𑌸 𑌧𑌨𑍍𑌯𑍋 𑌯𑌸𑍍𑌯 𑌪𑍁𑌤𑍍𑌰𑍌 𑌦𑍍𑌵𑍌 𑌧𑌰𑍍𑌮𑌜𑍍𑌞𑍌 𑌧𑌰𑍍𑌮𑌵𑌿𑌕𑍍𑌰𑌮𑍌 ।
𑌶𑍍𑌰𑍁𑌤𑍍𑌵𑌾 𑌵𑌯𑌂 𑌹𑌿 𑌸𑌂𑌭𑌾𑌷𑌾𑌮𑍁𑌭𑌯𑍋𑌸𑍍𑌸𑍍𑌪𑍃𑌹𑌯𑌾𑌮𑌹𑍇 ॥ 3 ॥
𑌤𑌤𑌸𑍍𑌤𑍍𑌵𑍃𑌷𑌿𑌗𑌣𑌾𑌃 𑌕𑍍𑌷𑌿𑌪𑍍𑌰𑌂 𑌦𑌶𑌗𑍍𑌰𑍀𑌵𑌵𑌧𑍈𑌷𑌿𑌣𑌃 ।
𑌭𑌰𑌤𑌂 𑌰𑌾𑌜𑌶𑌾𑌰𑍍𑌦𑍂𑌲𑌮𑌿𑌤𑍍𑌯𑍂𑌚𑍁𑌃 𑌸𑌂𑌗𑌤𑌾 𑌵𑌚𑌃 ॥ 4 ॥
𑌕𑍁𑌲𑍇 𑌜𑌾𑌤 𑌮𑌹𑌾𑌪𑍍𑌰𑌾𑌜𑍍𑌞 𑌮𑌹𑌾𑌵𑍃𑌤𑍍𑌤 𑌮𑌹𑌾𑌯𑌶𑌃 ।
𑌗𑍍𑌰𑌾𑌹𑍍𑌯𑌂 𑌰𑌾𑌮𑌸𑍍𑌯 𑌵𑌾𑌕𑍍𑌯𑌂 𑌤𑍇 𑌪𑌿𑌤𑌰𑌂 𑌯𑌦𑍍𑌯𑌵𑍇𑌕𑍍𑌷𑌸𑍇 ॥ 5 ॥
𑌸𑌦𑌾𑌽𑌨𑍃𑌣𑌮𑌿𑌮𑌂 𑌰𑌾𑌮𑌂 𑌵𑌯𑌮𑌿𑌚𑍍𑌛𑌾𑌮𑌹𑍇 𑌪𑌿𑌤𑍁𑌃 ।
𑌆𑌨𑍃𑌣𑌤𑍍𑌵𑌾𑌚𑍍𑌚 𑌕𑍈𑌕𑍇𑌯𑍍𑌯𑌾𑌃 𑌸𑍍𑌵𑌰𑍍𑌗𑌂 𑌦𑌶𑌰𑌥𑍋 𑌗𑌤𑌃 ॥ 6 ॥
𑌏𑌤𑌾𑌵𑌦𑍁𑌕𑍍𑌤𑍍𑌵𑌾 𑌵𑌚𑌨𑌂 𑌗𑌂𑌧𑌰𑍍𑌵𑌾𑌃 𑌸𑌮𑌹𑌰𑍍𑌷𑌯𑌃 ।
𑌰𑌾𑌜𑌰𑍍𑌷𑌯𑌶𑍍𑌚𑍈𑌵 𑌤𑌦𑌾 𑌸𑌰𑍍𑌵𑍇 𑌸𑍍𑌵𑌾𑌂 𑌸𑍍𑌵𑌾𑌂 𑌗𑌤𑌿𑌂 𑌗𑌤𑌾𑌃 ॥ ॥
𑌹𑍍𑌲𑌾𑌦𑌿𑌤𑌸𑍍𑌤𑍇𑌨 𑌵𑌾𑌕𑍍𑌯𑍇𑌨 𑌶𑍁𑌭𑍇𑌨 𑌶𑍁𑌭𑌦𑌰𑍍𑌶𑌨𑌃 ।
𑌰𑌾𑌮 𑌸𑍍𑌸𑌂𑌹𑍃𑌷𑍍𑌟𑌵𑌦𑌨𑌸𑍍𑌤𑌾𑌨𑍃𑌷𑍀𑌨𑌭𑍍𑌯𑌪𑍂𑌜𑌯𑌤𑍍 ॥ ॥
𑌤𑍍𑌰𑌸𑍍𑌤𑌗𑌾𑌤𑍍𑌰𑌸𑍍𑌤𑍁 𑌭𑌰𑌤𑌸𑍍𑌸 𑌵𑌾𑌚𑌾 𑌸𑌜𑍍𑌜𑌮𑌾𑌨𑌯𑌾 ।
𑌕𑍃𑌤𑌾𑌂𑌜𑌲𑌿𑌰𑌿𑌦𑌂 𑌵𑌾𑌕𑍍𑌯𑌂 𑌰𑌾𑌘𑌵𑌂 𑌪𑍁𑌨𑌰𑌬𑍍𑌰𑌵𑍀𑌤𑍍 ॥ ॥
𑌰𑌾𑌜𑌧𑌰𑍍𑌮𑌮𑌨𑍁𑌪𑍍𑌰𑍇𑌕𑍍𑌷𑍍𑌯 𑌕𑍁𑌲𑌧𑌰𑍍𑌮𑌾𑌨𑍁𑌸𑌂𑌤𑌤𑌿𑌮𑍍 ।
𑌕𑌰𑍍𑌤𑍁𑌮𑌰𑍍𑌹𑌸𑌿 𑌕𑌾𑌕𑍁𑌤𑍍𑌸𑍍𑌥 𑌮𑌮 𑌮𑌾𑌤𑍁𑌶𑍍𑌚 𑌯𑌾𑌚𑌨𑌾𑌮𑍍 ॥ 10 ॥
𑌰𑌕𑍍𑌷𑌿𑌤𑍁𑌂 𑌸𑍁𑌮𑌹𑌦𑍍𑌰𑌾𑌜𑍍𑌯𑌮𑌹𑌮𑍇𑌕𑌸𑍍𑌤𑍁 𑌨𑍋𑌤𑍍𑌸𑌹𑍇 ।
𑌪𑍌𑌰𑌜𑌾𑌨𑌪𑌦𑌾𑌂𑌶𑍍𑌚𑌾𑌪𑌿 𑌰𑌕𑍍𑌤𑌾𑌨𑍍𑌰𑌂𑌜𑌯𑌿𑌤𑍁𑌂 𑌤𑌥𑌾 ॥ 11 ॥
𑌜𑍍𑌞𑌾𑌤𑌯𑌶𑍍𑌚 𑌹𑌿 𑌯𑍋𑌧𑌾𑌶𑍍𑌚 𑌮𑌿𑌤𑍍𑌰𑌾𑌣𑌿 𑌸𑍁𑌹𑍃𑌦𑌶𑍍𑌚 𑌨𑌃 ।
𑌤𑍍𑌵𑌾𑌮𑍇𑌵 𑌪𑍍𑌰𑌤𑌿𑌵𑍀𑌕𑍍𑌷𑌂𑌤𑍇 𑌪𑌰𑍍𑌜𑌨𑍍𑌯𑌮𑌿𑌵 𑌕𑌰𑍍𑌷𑌕𑌾𑌃 ॥ 12 ॥
𑌇𑌦𑌂 𑌰𑌾𑌜𑍍𑌯𑌂 𑌮𑌹𑌾𑌪𑍍𑌰𑌾𑌜𑍍𑌞 𑌸𑍍𑌥𑌾𑌪𑌯 𑌪𑍍𑌰𑌤𑌿𑌪𑌦𑍍𑌯 𑌹𑌿 ।
𑌶𑌕𑍍𑌤𑌿𑌮𑌾𑌨𑌸𑌿 𑌕𑌾𑌕𑍁𑌤𑍍𑌸𑍍𑌥 𑌲𑍋𑌕𑌸𑍍𑌯 𑌪𑌰𑌿𑌪𑌾𑌲𑌨𑍇 ॥ 13 ॥
𑌇𑌤𑍍𑌯𑍁𑌕𑍍𑌤𑍍𑌵𑌾 𑌨𑍍𑌯𑌪𑌤𑌦𑍍𑌭𑍍𑌰𑌾𑌤𑍁𑌃 𑌪𑌾𑌦𑌯𑍋𑌰𑍍𑌭𑌰𑌤𑌸𑍍𑌤𑌦𑌾 ।
𑌭𑍃𑌶𑌂 𑌸𑌂𑌪𑍍𑌰𑌾𑌰𑍍𑌥𑌯𑌾𑌮𑌾𑌸 𑌰𑌾𑌮𑌮𑍇𑌵 𑌪𑍍𑌰𑌿𑌯𑌂𑌵𑌦𑌃 ॥ 14 ॥
𑌤𑌮𑌂𑌕𑍇 𑌭𑌰𑌤𑌂 𑌕𑍃𑌤𑍍𑌵𑌾 𑌰𑌾𑌮𑍋 𑌵𑌚𑌨𑌮𑌬𑍍𑌰𑌵𑍀𑌤𑍍 ।
𑌶𑍍𑌯𑌾𑌮𑌂 𑌨𑌲𑌿𑌨𑌪𑌤𑍍𑌰𑌾𑌕𑍍𑌷𑌂 𑌮𑌤𑍍𑌤𑌹𑌂𑌸𑌸𑍍𑌵𑌰𑌂 𑌸𑍍𑌵𑌯𑌮𑍍 ॥ 15 ॥
𑌆𑌗𑌤𑌾 𑌤𑍍𑌵𑌾𑌮𑌿𑌯𑌂 𑌬𑍁𑌦𑍍𑌧𑌿𑌸𑍍𑌸𑍍𑌵𑌜𑌾 𑌵𑍈𑌨𑌯𑌿𑌕𑍀 𑌚 𑌯𑌾 ।
𑌭𑍃𑌶𑌮𑍁𑌤𑍍𑌸𑌹𑌸𑍇 𑌤𑌾𑌤 𑌰𑌕𑍍𑌷𑌿𑌤𑍁𑌂 𑌪𑍃𑌥𑌿𑌵𑍀𑌮𑌪𑌿 ॥ 16 ॥
𑌅𑌮𑌾𑌤𑍍𑌯𑍈𑌶𑍍𑌚 𑌸𑍁𑌹𑍃𑌦𑍍𑌭𑌿𑌶𑍍𑌚 𑌬𑍁𑌦𑍍𑌧𑌿𑌮𑌦𑍍𑌭𑌿𑌶𑍍𑌚 𑌮𑌂𑌤𑍍𑌰𑌿𑌭𑌿𑌃 ।
𑌸𑌰𑍍𑌵𑌕𑌾𑌰𑍍𑌯𑌾𑌣𑌿 𑌸𑌮𑍍𑌮𑌂𑌤𑍍𑌰𑍍𑌯 𑌸𑍁𑌮𑌹𑌂𑌤𑍍𑌯𑌪𑌿 𑌕𑌾𑌰𑌯 ॥ 1 ॥
𑌲𑌕𑍍𑌷𑍍𑌮𑍀𑌶𑍍𑌚𑌂𑌦𑍍𑌰𑌾𑌦𑌪𑍇𑌯𑌾𑌦𑍍𑌵𑌾 𑌹𑌿𑌮𑌵𑌾𑌨𑍍𑌵𑌾 𑌹𑌿𑌮𑌂 𑌤𑍍𑌯𑌜𑍇𑌤𑍍 ।
𑌅𑌤𑍀𑌯𑌾𑌤𑍍𑌸𑌾𑌗𑌰𑍋 𑌵𑍇𑌲𑌾𑌂 𑌨 𑌪𑍍𑌰𑌤𑌿𑌜𑍍𑌞𑌾𑌮𑌹𑌂 𑌪𑌿𑌤𑍁𑌃 ॥ 1 ॥
𑌕𑌾𑌮𑌾𑌦𑍍𑌵𑌾 𑌤𑌾𑌤 𑌲𑍋𑌭𑌾𑌦𑍍𑌵𑌾 𑌮𑌾𑌤𑍍𑌰𑌾𑌤𑍁𑌭𑍍𑌯𑌮𑌿𑌦𑌂 𑌕𑍃𑌤𑌮𑍍 ।
𑌨 𑌤𑌨𑍍𑌮𑌨𑌸𑌿 𑌕𑌰𑍍𑌤𑌵𑍍𑌯𑌂 𑌵𑌰𑍍𑌤𑌿𑌤𑌵𑍍𑌯𑌂 𑌚 𑌮𑌾𑌤𑍃𑌵𑌤𑍍 ॥ 1 ॥
𑌏𑌵𑌂 𑌬𑍍𑌰𑍁𑌵𑌾𑌣𑌂 𑌭𑌰𑌤𑌃 𑌕𑍌𑌸𑌲𑍍𑌯𑌾𑌸𑍁𑌤𑌮𑌬𑍍𑌰𑌵𑍀𑌤𑍍 ।
𑌤𑍇𑌜𑌸𑌾𑌽𑌽𑌦𑌿𑌤𑍍𑌯𑌸𑌂𑌕𑌾𑌶𑌂 𑌪𑍍𑌰𑌤𑌿𑌪𑌚𑍍𑌚𑌂𑌦𑍍𑌰𑌦𑌰𑍍𑌶𑌨𑌮𑍍 ॥ 20 ॥
𑌆𑌧𑌿𑌰𑍋𑌹𑌾𑌽𑌰𑍍𑌯 𑌪𑌾𑌦𑌾𑌭𑍍𑌯𑌾𑌂 𑌪𑌾𑌦𑍁𑌕𑍇 𑌹𑍇𑌮𑌭𑍂𑌷𑌿𑌤𑍇 ।
𑌏𑌤𑍇𑌹𑌿 𑌸𑌰𑍍𑌵𑌲𑍋𑌕𑌸𑍍𑌯 𑌯𑍋𑌗𑌕𑍍𑌷𑍇𑌮𑌂 𑌵𑌿𑌧𑌾𑌸𑍍𑌯𑌤𑌃 ॥ 21 ॥
𑌸𑍋𑌽𑌧𑌿𑌰𑍁𑌹𑍍𑌯 𑌨𑌰𑌵𑍍𑌯𑌾𑌘𑍍𑌰𑌃 𑌪𑌾𑌦𑍁𑌕𑍇 𑌹𑍍𑌯𑌵𑌰𑍁𑌹𑍍𑌯 𑌚 ।
𑌪𑍍𑌰𑌾𑌯𑌚𑍍𑌛𑌤𑍍𑌸𑍁𑌮𑌹𑌾𑌤𑍇𑌜𑌾 𑌭𑌰𑌤𑌾𑌯 𑌮𑌹𑌾𑌤𑍍𑌮𑌨𑍇 ॥ 22 ॥
𑌸 𑌪𑌾𑌦𑍁𑌕𑍇 𑌸𑌂𑌪𑍍𑌰𑌣𑌮𑍍𑌯 𑌰𑌾𑌮𑌂 𑌵𑌚𑌨𑌮𑌬𑍍𑌰𑌵𑍀𑌤𑍍 𑌚𑌤𑍁𑌰𑍍𑌦𑌶 𑌹𑌿 𑌵𑌰𑍍𑌷𑌾𑌣𑌿 𑌜𑌟𑌾𑌚𑍀𑌰𑌧𑌰𑍋 𑌹𑍍𑌯𑌾𑌹𑌮𑍍 ॥ 23 ॥
𑌫𑌲𑌮𑍂𑌲𑌾𑌶𑌨𑍋 𑌵𑍀𑌰 𑌭𑌵𑍇𑌯𑌂 𑌰𑌘𑍁𑌨𑌂𑌦𑌨 ।
𑌤𑌵𑌾𑌽𑌗𑌮𑌨𑌮𑌾𑌕𑌾𑌂𑌕𑍍𑌷𑌾𑌨𑍍𑌵𑌸𑌨𑍍𑌵𑍈 𑌨𑌗𑌰𑌾𑌦𑍍𑌬𑌹𑌿𑌃 ॥ 24 ॥
𑌤𑌵 𑌪𑌾𑌦𑍁𑌕𑌯𑍋𑌰𑍍𑌨𑍍𑌯𑌸𑍍𑌤𑌰𑌾𑌜𑍍𑌯𑌤𑌂𑌤𑍍𑌰𑌃 𑌪𑌰𑌂𑌤𑌪 ।
𑌚𑌤𑍁𑌰𑍍𑌦𑌶𑍇 𑌤𑍁 𑌸𑌂𑌪𑍂𑌰𑍍𑌣𑍇 𑌵𑌰𑍍𑌷𑍇𑌽𑌹𑌨𑌿 𑌰𑌘𑍂𑌤𑍍𑌤𑌮 ॥ 25 ॥
𑌨 𑌦𑍍𑌰𑌕𑍍𑌷𑍍𑌯𑌾𑌮𑌿 𑌯𑌦𑌿 𑌤𑍍𑌵𑌾𑌂 𑌤𑍁 𑌪𑍍𑌰𑌵𑍇𑌕𑍍𑌷𑍍𑌯𑌾𑌮𑌿 𑌹𑍁𑌤𑌾𑌶𑌨𑌮𑍍 ।
𑌤𑌥𑍇𑌤𑌿 𑌚 𑌪𑍍𑌰𑌤𑌿𑌜𑍍𑌞𑌾𑌯 𑌤𑌂 𑌪𑌰𑌿𑌷𑍍𑌵𑌜𑍍𑌯 𑌸𑌾𑌦𑌰𑌮𑍍 ॥ 26 ॥
𑌶𑌤𑍍𑌰𑍁𑌘𑍍𑌨𑌂 𑌚 𑌪𑌰𑌿𑌷𑍍𑌵𑌜𑍍𑌯 𑌭𑌰𑌤𑌂 𑌚𑍇𑌦𑌮𑌬𑍍𑌰𑌵𑍀𑌤𑍍 ।
𑌮𑌾𑌤𑌰𑌂 𑌰𑌕𑍍𑌷 𑌕𑍈𑌕𑍇𑌯𑍀𑌂 𑌮𑌾 𑌰𑍋𑌷𑌂 𑌕𑍁𑌰𑍁 𑌤𑌾𑌂 𑌪𑍍𑌰𑌤𑌿 ॥ 2 ॥
𑌮𑌯𑌾 𑌚 𑌸𑍀𑌤𑌯𑌾 𑌚𑍈𑌵 𑌶𑌪𑍍𑌤𑍋𑌽𑌸𑌿 𑌰𑌘𑍁𑌸𑌤𑍍𑌤𑌮 ।
𑌇𑌤𑍍𑌯𑍁𑌕𑍍𑌤𑍍𑌵𑌾𑌽𑌶𑍍𑌰𑍁𑌪𑌰𑍀𑌤𑌾𑌕𑍍𑌷𑍋 𑌭𑍍𑌰𑌾𑌤𑌰𑌂 𑌵𑌿𑌸𑌸𑌰𑍍𑌜 𑌹 ॥ 2 ॥
𑌸 𑌪𑌾𑌦𑍁𑌕𑍇 𑌤𑍇 𑌭𑌰𑌤𑌃 𑌪𑍍𑌰𑌤𑌾𑌪𑌵𑌾𑌨𑍍 𑌸𑍍𑌵𑌲𑌂𑌕𑍃𑌤𑍇 𑌸𑌂𑌪𑌰𑌿𑌪𑍂𑌜𑍍𑌯 𑌧𑌰𑍍𑌮𑌵𑌿𑌤𑍍 ।
𑌪𑍍𑌰𑌦𑌕𑍍𑌷𑌿𑌣𑌂 𑌚𑍈𑌵 𑌚𑌕𑌾𑌰 𑌰𑌾𑌘𑌵𑌂 𑌚𑌕𑌾𑌰 𑌤𑍇 𑌚𑍋𑌤𑍍𑌤𑌮𑌨𑌾𑌗𑌮𑍂𑌰𑍍𑌧𑌨𑌿 ॥ 2 ॥
𑌅𑌥𑌾𑌽𑌨𑍁𑌪𑍂𑌰𑍍𑌵𑍍𑌯𑌾𑌤𑍍𑌪𑍍𑌰𑌤𑌿𑌨𑌂𑌦𑍍𑌯 𑌤𑌂 𑌜𑌨𑌂 𑌗𑍁𑌰𑍂𑌂𑌶𑍍𑌚 𑌮𑌂𑌤𑍍𑌰𑌿𑌪𑍍𑌰𑌕𑍃𑌤𑍀𑌸𑍍𑌤𑌥𑌾𑌽𑌨𑍁𑌜𑍌 ।
𑌵𑍍𑌯𑌸𑌰𑍍𑌜𑌯𑌦𑍍𑌰𑌾𑌘𑌵𑌵𑌂𑌶𑌵𑌰𑍍𑌧𑌨𑌸𑍍𑌥𑌿𑌰𑌃 𑌸𑍍𑌵𑌧𑌰𑍍𑌮𑍇 𑌹𑌿𑌮𑌵𑌾𑌨𑌿𑌵𑌾𑌚𑌲𑌃 ॥ 30 ॥
𑌤𑌂 𑌮𑌾𑌤𑌰𑍋 𑌬𑌾𑌷𑍍𑌪𑌗𑍃𑌹𑍀𑌤𑌕𑌂𑌠𑍍𑌯𑍋 𑌦𑍁𑌃𑌖𑍇𑌨 𑌨𑌾𑌮𑌂𑌤𑍍𑌰𑌯𑌿𑌤𑍁𑌂 𑌹𑌿 𑌶𑍇𑌕𑍁𑌃 ।
𑌸 𑌤𑍍𑌵𑍇𑌵 𑌮𑌾𑌤𑍍𑌰𑍃𑌰𑌭𑌿𑌵𑌾𑌦𑍍𑌯 𑌸𑌰𑍍𑌵𑌾𑌰𑍁𑌦𑌨𑍍𑌕𑍁𑌟𑍀𑌂 𑌸𑍍𑌵𑌾𑌂 𑌪𑍍𑌰𑌵𑌿𑌵𑍇𑌶 𑌰𑌾𑌘𑌵𑌃 ॥ 31 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑍇 𑌦𑍍𑌵𑌾𑌦𑌶𑌾𑌧𑌿𑌕𑌶𑌤𑌤𑌮𑌸𑍍𑌸𑌰𑍍𑌗𑌃 ॥
