𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑌮𑍍 ।
𑌅𑌥 𑌚𑌤𑍁𑌰𑌧𑌿𑌕𑌶𑌤𑌤𑌮𑌸𑍍𑌸𑌰𑍍𑌗𑌃 ।
𑌤𑌂 𑌤𑍁 𑌰𑌾𑌮 𑌸𑍍𑌸𑌮𑌾𑌶𑍍𑌵𑌾𑌸𑍍𑌯 𑌭𑍍𑌰𑌾𑌤𑌰𑌂 𑌗𑍁𑌰𑌵𑌤𑍍𑌸𑌲𑌮𑍍 ।
𑌲𑌕𑍍𑌷𑍍𑌮𑌣𑍇𑌨 𑌸𑌹 𑌭𑍍𑌰𑌾𑌤𑍍𑌰𑌾 𑌪𑍍𑌰𑌷𑍍𑌟𑍁𑌂 𑌸𑌮𑍁𑌪𑌚𑌕𑍍𑌰𑌮𑍇 ॥ 1 ॥
𑌕𑌿𑌮𑍇𑌤𑌦𑌿𑌚𑍍𑌛𑍇𑌯𑌮𑌹𑌂 𑌶𑍍𑌰𑍋𑌤𑍁𑌂 𑌪𑍍𑌰𑌵𑍍𑌯𑌾𑌹𑍃𑌤𑌂 𑌤𑍍𑌵𑌯𑌾 ।
𑌯𑌸𑍍𑌮𑌾𑌤𑍍𑌤𑍍𑌵𑌮𑌾𑌗𑌤𑍋 𑌦𑍇𑌶𑌮𑌿𑌮𑌂 𑌚𑍀𑌰𑌜𑌟𑌾𑌜𑌿𑌨𑌃 ॥ 2 ॥
𑌯𑌨𑍍𑌨𑌿𑌮𑌿𑌤𑍍𑌤𑌮𑌿𑌮𑌂 𑌦𑍇𑌶𑌂 𑌕𑍃𑌷𑍍𑌣𑌾𑌜𑌿𑌨𑌜𑌟𑌾𑌧𑌰𑌃 ।
𑌹𑌿𑌤𑍍𑌵𑌾 𑌰𑌾𑌜𑍍𑌯𑌂 𑌪𑍍𑌰𑌵𑌿𑌷𑍍𑌟𑌸𑍍𑌤𑍍𑌵𑌂 𑌤𑌤𑍍𑌸𑌰𑍍𑌵𑌂 𑌵𑌕𑍍𑌤𑍁𑌮𑌰𑍍𑌹𑌸𑌿 ॥ 3 ॥
𑌇𑌤𑍍𑌯𑍁𑌕𑍍𑌤𑌃 𑌕𑍈𑌕𑌯𑍀𑌪𑍁𑌤𑍍𑌰𑌃 𑌕𑌾𑌕𑍁𑌤𑍍𑌸𑍍𑌥𑍇𑌨 𑌮𑌹𑌾𑌤𑍍𑌮𑌨𑌾 ।
𑌪𑍍𑌰𑌗𑍃𑌹𑍍𑌯 𑌬𑌲𑌵𑌦𑍍𑌭𑍂𑌯𑌃 𑌪𑍍𑌰𑌾𑌂𑌜𑌲𑌿𑌰𑍍𑌵𑌾𑌕𑍍𑌯𑌮𑌬𑍍𑌰𑌵𑍀𑌤𑍍 ॥ 4 ॥
𑌆𑌰𑍍𑌯𑌂 𑌤𑌾𑌤𑌃 𑌪𑌰𑌿𑌤𑍍𑌯𑌜𑍍𑌯 𑌕𑍃𑌤𑍍𑌵𑌾 𑌕𑌰𑍍𑌮 𑌸𑍁𑌦𑍁𑌷𑍍𑌕𑌰𑌮𑍍 ।
𑌗𑌤𑌃 𑌸𑍍𑌵𑌰𑍍𑌗 𑌮𑌹𑌾𑌬𑌾𑌹𑍁𑌃 𑌪𑍁𑌤𑍍𑌰𑌶𑍋𑌕𑌾𑌭𑌿𑌪𑍀𑌡𑌿𑌤𑌃 ॥ 5 ॥
𑌸𑍍𑌤𑍍𑌰𑌿𑌯𑌾 𑌨𑌿𑌯𑍁𑌕𑍍𑌤𑌃 𑌕𑍈𑌕𑍇𑌯𑍍𑌯𑌾 𑌮𑌮 𑌮𑌾𑌤𑍍𑌰𑌾 𑌪𑌰𑌂𑌤𑌪 ।
𑌚𑌕𑌾𑌰 𑌸𑌾 𑌮𑌹𑌤𑍍𑌪𑌾𑌪𑌮𑌿𑌦𑌮𑌾𑌤𑍍𑌮𑌯𑌶𑍋𑌹𑌰𑌮𑍍 ॥ 6 ॥
𑌸𑌾 𑌰𑌾𑌜𑍍𑌯𑌫𑌲𑌮𑌪𑍍𑌰𑌾𑌪𑍍𑌯 𑌵𑌿𑌧𑌵𑌾 𑌶𑍋𑌕𑌕𑌰𑍍𑌶𑌿𑌤𑌾 ।
𑌪𑌤𑌿𑌷𑍍𑌯𑌤𑌿 𑌮𑌹𑌾𑌘𑍋𑌰𑍇 𑌨𑌿𑌰𑌯𑍇 𑌜𑌨𑌨𑍀 𑌮𑌮 ॥ ॥
𑌤𑌸𑍍𑌯 𑌮𑍇 𑌦𑌾𑌸𑌭𑍂𑌤𑌸𑍍𑌯 𑌪𑍍𑌰𑌸𑌾𑌦𑌂 𑌕𑌰𑍍𑌤𑍁𑌮𑌰𑍍𑌹𑌸𑌿 ।
𑌅𑌭𑌿𑌷𑌿𑌂𑌚𑌸𑍍𑌵 𑌚𑌾𑌦𑍍𑌯𑍇𑌵 𑌰𑌾𑌜𑍍𑌯𑍇𑌨 𑌮𑌘𑌵𑌾𑌨𑌿𑌵 ॥ ॥
𑌇𑌮𑌾𑌃 𑌪𑍍𑌰𑌕𑍃𑌤𑌯 𑌸𑍍𑌸𑌰𑍍𑌵𑌾 𑌵𑌿𑌧𑌵𑌾 𑌮𑌾𑌤𑌰𑌶𑍍𑌚 𑌯𑌾𑌃 ।
𑌤𑍍𑌵𑌤𑍍𑌸𑌕𑌾𑌶𑌮𑌨𑍁𑌪𑍍𑌰𑌾𑌪𑍍𑌤𑌾 𑌪𑍍𑌰𑌸𑌾𑌦𑌂 𑌕𑌰𑍍𑌤𑍁𑌮𑌰𑍍𑌹𑌸𑌿 ॥ ॥
𑌤𑌦𑌾𑌨𑍁𑌪𑍂𑌰𑍍𑌵𑍍𑌯𑌾 𑌯𑍁𑌕𑍍𑌤𑌂 𑌚 𑌯𑍁𑌕𑍍𑌤𑌂 𑌚𑌾𑌤𑍍𑌮𑌨𑌿 𑌮𑌾𑌨𑌦 ।
𑌰𑌾𑌜𑍍𑌯𑌂 𑌪𑍍𑌰𑌾𑌪𑍍𑌨𑍁𑌹𑌿 𑌧𑌰𑍍𑌮𑍇𑌣 𑌸𑌕𑌾𑌮𑌾𑌨𑍍𑌸𑍁𑌹𑍃𑌦𑌃 𑌕𑍁𑌰𑍁 ॥ 10 ॥
𑌭𑌵𑌤𑍍𑌵𑌵𑌿𑌧𑌵𑌾 𑌭𑍂𑌮𑌿 𑌸𑍍𑌸𑌮𑌗𑍍𑌰𑌾 𑌪𑌤𑌿𑌨𑌾 𑌤𑍍𑌵𑌯𑌾 ।
𑌶𑌶𑌿𑌨𑌾 𑌵𑌿𑌮𑌲𑍇𑌨𑍇𑌵 𑌶𑌾𑌰𑌦𑍀 𑌰𑌜𑌨𑍀 𑌯𑌥𑌾 ॥ 11 ॥
𑌏𑌭𑌿𑌶𑍍𑌚 𑌸𑌚𑌿𑌵𑍈𑌸𑍍𑌸𑌾𑌰𑍍𑌧𑌂 𑌶𑌿𑌰𑌸𑌾 𑌯𑌾𑌚𑌿𑌤𑍋 𑌮𑌯𑌾 ।
𑌭𑍍𑌰𑌾𑌤𑍁 𑌶𑌿𑌷𑍍𑌯𑌸𑍍𑌯 𑌦𑌾𑌸𑌸𑍍𑌯 𑌪𑍍𑌰𑌸𑌾𑌦𑌂 𑌕𑌰𑍍𑌤𑍁𑌮𑌰𑍍𑌹𑌸𑌿 ॥ 12 ॥
𑌤𑌦𑌿𑌦𑌂 𑌶𑌾𑌶𑍍𑌵𑌤𑌂 𑌪𑌿𑌤𑍍𑌰𑍍𑌯𑌂 𑌸𑌰𑍍𑌵𑌂 𑌪𑍍𑌰𑌕𑍃𑌤𑌿𑌮𑌂𑌡𑌲𑌮𑍍 ।
𑌪𑍂𑌜𑌿𑌤𑌂 𑌪𑍁𑌰𑍁𑌷𑌵𑍍𑌯𑌾𑌘𑍍𑌰 𑌨𑌾𑌤𑌿𑌕𑍍𑌰𑌮𑌿𑌤𑍁𑌮𑌰𑍍𑌹𑌸𑌿 ॥ 13 ॥
𑌏𑌵𑌮𑍁𑌕𑍍𑌤𑍍𑌵𑌾 𑌮𑌹𑌾𑌬𑌾𑌹𑍁 𑌸𑍍𑌸𑌬𑌾𑌷𑍍𑌪𑌃 𑌕𑍈𑌕𑌯𑍀𑌸𑍁𑌤𑌃 ।
𑌰𑌾𑌮𑌸𑍍𑌯 𑌶𑌿𑌰𑌸𑌾 𑌪𑌾𑌦𑍌 𑌜𑌗𑍍𑌰𑌾𑌹 𑌭𑌰𑌤𑌃 𑌪𑍁𑌨𑌃 ॥ 14 ॥
𑌤𑌂 𑌮𑌤𑍍𑌤𑌮𑌿𑌵 𑌮𑌾𑌤𑌂𑌗𑌂 𑌨𑌿𑌃𑌶𑍍𑌵𑌸𑌂𑌤𑌂 𑌪𑍁𑌨 𑌪𑍁𑌨𑌃 ।
𑌭𑍍𑌰𑌾𑌤𑌰𑌂 𑌭𑌰𑌤𑌂 𑌰𑌾𑌮𑌃 𑌪𑌰𑌿𑌷𑍍𑌵𑌜𑍍𑌯𑍇𑌦𑌮𑌬𑍍𑌰𑌵𑍀𑌤𑍍 ॥ 15 ॥
𑌕𑍁𑌲𑍀𑌨𑌃𑌸𑌤𑍍𑌤𑍍𑌵𑌸𑌂𑌪𑌨𑍍𑌨𑌸𑍍𑌤𑍇𑌜𑌸𑍍𑌵𑍀 𑌚𑌰𑌿𑌤𑌵𑍍𑌰𑌤𑌃 ।
𑌰𑌾𑌜𑍍𑌯𑌹𑍇𑌤𑍋𑌃 𑌕𑌥𑌂 𑌪𑌾𑌪𑌮𑌾𑌚𑌰𑍇𑌤𑍍𑌤𑍍𑌵𑌦𑍍𑌵𑌿𑌧𑍋 𑌜𑌨𑌃 ॥ 16 ॥
𑌨 𑌦𑍋𑌷𑌂 𑌤𑍍𑌵𑌯𑌿 𑌪𑌶𑍍𑌯𑌾𑌮𑌿 𑌸𑍂𑌕𑍍𑌷𑍍𑌮𑌮𑌪𑍍𑌯𑌰𑌿𑌸𑍂𑌦𑌨 ।
𑌨 𑌚𑌾𑌪𑌿 𑌜𑌨𑌨𑍀𑌂 𑌬𑌾𑌲𑍍𑌯𑌾𑌤𑍍𑌤𑍍𑌵𑌂 𑌵𑌿𑌗𑌰𑍍𑌹𑌿𑌤𑍁𑌮𑌰𑍍𑌹𑌸𑌿 ॥ 1 ॥
𑌕𑌾𑌮𑌕𑌾𑌰𑍋 𑌮𑌹𑌾𑌪𑍍𑌰𑌾𑌜𑍍𑌞 𑌗𑍁𑌰𑍂𑌣𑌾𑌂 𑌸𑌰𑍍𑌵𑌦𑌾𑌽𑌨𑌘 ।
𑌉𑌪𑌪𑌨𑍍𑌨𑍇𑌷𑍁 𑌦𑌾𑌰𑍇𑌷𑍁 𑌪𑍁𑌤𑍍𑌰𑍇𑌷𑍁 𑌚 𑌵𑌿𑌧𑍀𑌯𑌤𑍇 ॥ 1 ॥
𑌵𑌯𑌮𑌸𑍍𑌯 𑌯𑌥𑌾 𑌲𑍋𑌕𑍇 𑌸𑌂𑌖𑍍𑌯𑌾𑌤𑌾𑌃 𑌸𑍌𑌮𑍍𑌯 𑌸𑌾𑌧𑍁𑌭𑌿𑌃 ।
𑌭𑌾𑌰𑍍𑌯𑌾𑌃 𑌪𑍁𑌤𑍍𑌰𑌾𑌶𑍍𑌚 𑌶𑌿𑌷𑍍𑌯𑌾𑌶𑍍𑌚 𑌤𑍍𑌵𑌮𑌨𑍁𑌜𑍍𑌞𑌾𑌤𑍁𑌮𑌰𑍍𑌹𑌸𑌿 ॥ 1 ॥
𑌵𑌨𑍇 𑌵𑌾 𑌚𑍀𑌰𑌵𑌸𑌨𑌂 𑌸𑍌𑌮𑍍𑌯 𑌕𑍃𑌷𑍍𑌣𑌾𑌜𑌿𑌨𑌾𑌂𑌬𑌰𑌮𑍍 ।
𑌰𑌾𑌜𑍍𑌯𑍇 𑌵𑌾𑌽𑌪𑌿 𑌮𑌹𑌾𑌰𑌾𑌜𑍋 𑌮𑌾𑌂 𑌵𑌾𑌸𑌯𑌿𑌤𑍁𑌮𑍀𑌶𑍍𑌵𑌰𑌃 ॥ 20 ॥
𑌯𑌾𑌵𑌤 𑌪𑌿𑌤𑌰𑌿 𑌧𑌰𑍍𑌮𑌜𑍍𑌞𑍇 𑌗𑍌𑌰𑌵𑌂 𑌲𑍋𑌕𑌸𑌤𑍍𑌕𑍃𑌤𑌮𑍍 ।
𑌤𑌾𑌵𑌦𑍍𑌧𑌰𑍍𑌮𑌭𑍃𑌤𑌾𑌂 𑌶𑍍𑌰𑍇𑌷𑍍𑌠 𑌜𑌨𑌨𑍍𑌯𑌾𑌮𑌪𑌿 𑌗𑍌𑌰𑌵𑌮𑍍 ॥ 21 ॥
𑌏𑌤𑌾𑌭𑍍𑌯𑌾𑌂 𑌧𑌰𑍍𑌮𑌶𑍀𑌲𑌾𑌭𑍍𑌯𑌾𑌂 𑌵𑌨𑌂 𑌗𑌚𑍍𑌛𑍇𑌤𑌿 𑌰𑌾𑌘𑌵 ।
𑌮𑌾𑌤𑌾𑌪𑌿𑌤𑍃𑌭𑍍𑌯𑌾𑌮𑍁𑌕𑍍𑌤𑍋𑌽𑌹𑌂 𑌕𑌥𑌮𑌨𑍍𑌯𑌤𑍍𑌸𑌮𑌾𑌚𑌰𑍇 ॥ 22 ॥
𑌤𑍍𑌵𑌯𑌾 𑌰𑌾𑌜𑍍𑌯𑌮𑌯𑍋𑌧𑍍𑌯𑌾𑌯𑌾𑌂 𑌪𑍍𑌰𑌾𑌪𑍍𑌤𑌵𑍍𑌯𑌂 𑌲𑍋𑌕𑌸𑌤𑍍𑌕𑍃𑌤𑌮𑍍 ।
𑌵𑌸𑍍𑌤𑌵𑍍𑌯𑌂 𑌦𑌂𑌡𑌕𑌾𑌰𑌣𑍍𑌯𑍇 𑌮𑌯𑌾 𑌵𑌲𑍍𑌕𑌲𑌵𑌾𑌸𑌸𑌾 ॥ 23 ॥
𑌏𑌵𑌂 𑌕𑍃𑌤𑍍𑌵𑌾 𑌮𑌹𑌾𑌰𑌾𑌜𑍋 𑌵𑌿𑌭𑌾𑌗𑌂 𑌲𑍋𑌕𑌸𑌨𑍍𑌨𑌿𑌧𑍌 ।
𑌵𑍍𑌯𑌾𑌦𑌿𑌶𑍍𑌯 𑌚 𑌮𑌹𑌾𑌤𑍇𑌜𑌾 𑌦𑌿𑌵𑌂 𑌦𑌶𑌰𑌥𑍋 𑌗𑌤𑌃 ॥ 24 ॥
𑌸 𑌚 𑌪𑍍𑌰𑌮𑌾𑌣𑌂 𑌧𑌰𑍍𑌮𑌾𑌤𑍍𑌮𑌾 𑌰𑌾𑌜𑌾 𑌲𑍋𑌕𑌗𑍁𑌰𑍁𑌸𑍍𑌤𑌵 ।
𑌪𑌿𑌤𑍍𑌰𑌾 𑌦𑌤𑍍𑌤𑌂 𑌯𑌥𑌾𑌭𑌾𑌗𑌮𑍁𑌪𑌭𑍋𑌕𑍍𑌤𑍁𑌂 𑌤𑍍𑌵𑌮𑌰𑍍𑌹𑌸𑌿 ॥ 25 ॥
𑌚𑌤𑍁𑌰𑍍𑌦𑌶 𑌸𑌮𑌾𑌸𑍍𑌸𑍌𑌮𑍍𑌯 𑌦𑌂𑌡𑌕𑌾𑌰𑌣𑍍𑌯𑌮𑌾𑌶𑍍𑌰𑌿𑌤𑌃 ।
𑌉𑌪𑌭𑍋𑌕𑍍𑌷𑍍𑌯𑍇 𑌤𑍍𑌵𑌹𑌂 𑌦𑌤𑍍𑌤𑌂 𑌭𑌾𑌗𑌂 𑌪𑌿𑌤𑍍𑌰𑌾 𑌮𑌹𑌾𑌤𑍍𑌮𑌨𑌾 ॥ 26 ॥
𑌯𑌦𑌬𑍍𑌰𑌵𑍀𑌨𑍍𑌮𑌾𑌂 𑌨𑌰𑌲𑍋𑌕𑌸𑌤𑍍𑌕𑍃𑌤𑌃 𑌪𑌿𑌤𑌾 𑌮𑌹𑌾𑌤𑍍𑌮𑌾 𑌵𑌿𑌬𑍁𑌧𑌾𑌧𑌿𑌪𑍋𑌪𑌮𑌃 ।
𑌤𑌦𑍇𑌵 𑌮𑌨𑍍𑌯𑍇 𑌪𑌰𑌮𑌾𑌤𑍍𑌮𑌨𑍋 𑌹𑌿𑌤𑌂 𑌨 𑌸𑌰𑍍𑌵𑌲𑍋𑌕𑍇𑌶𑍍𑌵𑌰 𑌭𑌾𑌵𑌮𑌪𑍍𑌯𑌯𑌮𑍍 ॥ 2 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑍇 𑌚𑌤𑍁𑌰𑌧𑌿𑌕𑌶𑌤𑌤𑌮𑌸𑍍𑌸𑌰𑍍𑌗𑌃 ॥
