Meaning, Multimedia
View this in:
| English | Devanagari | Telugu | Tamil | Kannada | Malayalam | Gujarati | Odia | Bengali  |
| Marathi | Assamese | Punjabi | Hindi | Samskritam | Konkani | Nepali | Sinhala | Grantha  |

2.3𑍭 𑌅𑌯𑍋𑌧𑍍𑌯𑌾𑌕𑌾𑌂𑌡 - 𑌸𑌪𑍍𑌤𑌤𑍍𑌰𑌿𑌂𑌶 𑌸𑌰𑍍𑌗𑌃

𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑌮𑍍 ।
𑌅𑌥 𑌸𑌪𑍍𑌤𑌤𑍍𑌰𑌿𑌂𑌶𑌸𑍍𑌸𑌰𑍍𑌗𑌃 ।

𑌮𑌹𑌾𑌮𑌾𑌤𑍍𑌰𑌵𑌚𑌃 𑌶𑍍𑌰𑍁𑌤𑍍𑌵𑌾 𑌰𑌾𑌮𑍋 𑌦𑌶𑌰𑌥𑌂 𑌤𑌦𑌾 ।
𑌅𑌭𑍍𑌯𑌭𑌾𑌷𑌤 𑌵𑌾𑌕𑍍𑌯𑌂 𑌤𑍁 𑌵𑌿𑌨𑌯𑌜𑍍𑌞𑍋 𑌵𑌿𑌨𑍀𑌤𑌵𑌤𑍍 ॥ 1 ॥

𑌤𑍍𑌯𑌕𑍍𑌤𑌭𑍋𑌗𑌸𑍍𑌯 𑌮𑍇 𑌰𑌾𑌜𑌨𑍍 𑌵𑌨𑍇 𑌵𑌨𑍍𑌯𑍇𑌨 𑌜𑍀𑌵𑌤𑌃 ।
𑌕𑌿𑌂 𑌕𑌾𑌰𑍍𑌯𑌮𑌨𑍁𑌯𑌾𑌤𑍍𑌰𑍇𑌣 𑌤𑍍𑌯𑌕𑍍𑌤𑌸𑌂𑌗𑌸𑍍𑌯 𑌸𑌰𑍍𑌵𑌤𑌃 ॥ 2 ॥

𑌯𑍋 𑌹𑌿 𑌦𑌤𑍍𑌤𑍍𑌵𑌾 𑌦𑍍𑌵𑌿𑌪𑌶𑍍𑌰𑍇𑌷𑍍𑌠𑌂 𑌕𑌕𑍍𑌷𑍍𑌯𑌾𑌯𑌾𑌂 𑌕𑍁𑌰𑍁𑌤𑍇 𑌮𑌨𑌃 ।
𑌰𑌜𑍍𑌜𑍁𑌸𑍍𑌨𑍇𑌹𑍇𑌨 𑌕𑌿𑌂 𑌤𑌸𑍍𑌯 𑌤𑍍𑌯𑌜𑌤𑌃 𑌕𑍁𑌂𑌜𑌰𑍋𑌤𑍍𑌤𑌮𑌮𑍍 ॥ 3 ॥

𑌤𑌥𑌾 𑌮𑌮 𑌸𑌤𑌾𑌂 𑌶𑍍𑌰𑍇𑌷𑍍𑌠 𑌕𑌿𑌂 𑌧𑍍𑌵𑌜𑌿𑌨𑍍𑌯𑌾 𑌜𑌗𑌤𑍍𑌪𑌤𑍇 ।
𑌸𑌰𑍍𑌵𑌾𑌣𑍍𑌯𑍇𑌵𑌾𑌨𑍁𑌜𑌾𑌨𑌾𑌮𑌿 𑌚𑍀𑌰𑌾𑌣𑍍𑌯𑍇𑌵𑌾𑌽𑌨𑌯𑌂𑌤𑍁 𑌮𑍇 ॥ 4 ॥

𑌖𑌨𑌿𑌤𑍍𑌰𑌪𑌿𑌟𑌕𑍇 𑌚𑍋𑌭𑍇 𑌸𑌮𑌾𑌨𑌯𑌤 𑌗𑌚𑍍𑌛𑌤𑌃 ।
𑌚𑌤𑍁𑌰𑍍𑌦𑌶 𑌵𑌨𑍇 𑌵𑌾𑌸𑌂 𑌵𑌰𑍍𑌷𑌾𑌣𑌿 𑌵𑌸𑌤𑍋 𑌮𑌮 ॥ 5 ॥

𑌅𑌥 𑌚𑍀𑌰𑌾𑌣𑌿 𑌕𑍈𑌕𑍇𑌯𑍀 𑌸𑍍𑌵𑌯𑌮𑌾𑌹𑍃𑌤𑍍𑌯 𑌰𑌾𑌘𑌵𑌮𑍍 ।
𑌉𑌵𑌾𑌚 𑌪𑌰𑌿𑌧𑌤𑍍𑌸𑍍𑌵𑍇𑌤𑌿 𑌜𑌨𑍌𑌘𑍇 𑌨𑌿𑌰𑌪𑌤𑍍𑌰𑌪𑌾 ॥ 6 ॥

𑌸 𑌚𑍀𑌰𑍇 𑌪𑍁𑌰𑍁𑌷𑌵𑍍𑌯𑌾𑌘𑍍𑌰𑌃 𑌕𑍈𑌕𑍇𑌯𑍍𑌯𑌾 𑌪𑍍𑌰𑌤𑌿𑌗𑍃𑌹𑍍𑌯 𑌤𑍇 ।
𑌸𑍂𑌕𑍍𑌷𑍍𑌮𑌵𑌸𑍍𑌤𑍍𑌰𑌮𑌵𑌕𑍍𑌷𑌿𑌪𑍍𑌯 𑌮𑍁𑌨𑌿𑌵𑌸𑍍𑌤𑍍𑌰𑌾𑌣𑍍𑌯𑌵𑌸𑍍𑌤 𑌹 ॥ 𑍭 ॥

𑌲𑌕𑍍𑌷𑍍𑌮𑌣𑌶𑍍𑌚𑌾𑌪𑌿 𑌤𑌤𑍍𑌰𑍈𑌵 𑌵𑌿𑌹𑌾𑌯 𑌵𑌸𑌨𑍇 𑌶𑍁𑌭𑍇 ।
𑌤𑌾𑌪𑌸𑌾𑌚𑍍𑌛𑌾𑌦𑌨𑍇 𑌚𑍈𑌵 𑌜𑌗𑍍𑌰𑌾𑌹 𑌪𑌿𑌤𑍁𑌰𑌗𑍍𑌰𑌤𑌃 ॥ 𑍮 ॥

𑌅𑌥𑌾𑌽𑌤𑍍𑌮𑌪𑌰𑌿𑌧𑌾𑌨𑌾𑌰𑍍𑌥𑌂 𑌸𑍀𑌤𑌾 𑌕𑍌𑌶𑍇𑌯𑌵𑌾𑌸𑌿𑌨𑍀 ।
𑌸𑌮𑍀𑌕𑍍𑌷𑍍𑌯 𑌚𑍀𑌰𑌂 𑌸𑌂𑌤𑍍𑌰𑌸𑍍𑌤𑌾 𑌪𑍃𑌷𑌤𑍀 𑌵𑌾𑌗𑍁𑌰𑌾𑌮𑌿𑌵 ॥ 𑍯 ॥

𑌸𑌾 𑌵𑍍𑌯𑌪𑌤𑍍𑌰𑌪𑌮𑌾𑌣𑍇𑌵 𑌪𑍍𑌰𑌗𑍃𑌹𑍍𑌯 𑌚 𑌸𑍁𑌦𑍁𑌰𑍍𑌮𑌨𑌾𑌃 ।
𑌕𑍈𑌕𑍇𑌯𑍀 𑌕𑍁𑌶𑌚𑍀𑌰𑍇 𑌤𑍇 𑌜𑌾𑌨𑌕𑍀 𑌶𑍁𑌭𑌲𑌕𑍍𑌷𑌣𑌾 ॥ 10 ॥

𑌅𑌶𑍍𑌰𑍁𑌸𑌂𑌪𑍂𑌰𑍍𑌣 𑌨𑍇𑌤𑍍𑌰𑌾 𑌚 𑌧𑌰𑍍𑌮𑌜𑍍𑌞𑌾 𑌧𑌰𑍍𑌮𑌦𑌰𑍍𑌶𑌿𑌨𑍀 ।
𑌗𑌂𑌧𑌰𑍍𑌵𑌰𑌾𑌜𑌪𑍍𑌰𑌤𑌿𑌮𑌂 𑌭𑌰𑍍𑌤𑌾𑌰𑌮𑌿𑌦𑌮𑌬𑍍𑌰𑌵𑍀𑌤𑍍 ॥ 11 ॥

𑌕𑌥𑌂 𑌨𑍁 𑌚𑍀𑌰𑌂 𑌬𑌧𑍍𑌨𑌂𑌤𑌿 𑌮𑍁𑌨𑌯𑍋 𑌵𑌨𑌵𑌾𑌸𑌿𑌨𑌃 ।
𑌇𑌤𑌿 𑌹𑍍𑌯𑌕𑍁𑌶𑌲𑌾 𑌸𑍀𑌤𑌾 𑌸𑌾 𑌮𑍁𑌮𑍋𑌹 𑌮𑍁𑌹𑍁𑌰𑍍𑌮𑍁𑌹𑍁𑌃 ॥ 12 ॥

𑌕𑍃𑌤𑍍𑌵𑌾 𑌕𑌂𑌠𑍇 𑌚 𑌸𑌾 𑌚𑍀𑌰𑌮𑍇𑌕𑌮𑌾𑌦𑌾𑌯 𑌪𑌾𑌣𑌿𑌨𑌾 ।
𑌤𑌸𑍍𑌥𑍌 𑌹𑍍𑌯𑌕𑍁𑌶𑌲𑌾 𑌤𑌤𑍍𑌰 𑌵𑍍𑌰𑍀𑌡𑌿𑌤𑌾 𑌜𑌨𑌕𑌾𑌤𑍍𑌮𑌜𑌾 ॥ 13 ॥

𑌤𑌸𑍍𑌯𑌾𑌸𑍍𑌤𑌤𑍍𑌕𑍍𑌷𑌿𑌪𑍍𑌰𑌮𑌾𑌗𑌮𑍍𑌯 𑌰𑌾𑌮𑍋 𑌧𑌰𑍍𑌮𑌭𑍃𑌤𑌾𑌂 𑌵𑌰𑌃 ।
𑌚𑍀𑌰𑌂 𑌬𑌬𑌂𑌧 𑌸𑍀𑌤𑌾𑌯𑌾𑌃 𑌕𑍌𑌶𑍇𑌯𑌸𑍍𑌯𑍋𑌪𑌰𑌿 𑌸𑍍𑌵𑌯𑌮𑍍 ॥ 14 ॥

𑌰𑌾𑌮𑌂 𑌪𑍍𑌰𑍇𑌕𑍍𑌷𑍍𑌯 𑌤𑍁 𑌸𑍀𑌤𑌾𑌯𑌾 𑌬𑌧𑍍𑌨𑌂𑌤𑌂 𑌚𑍀𑌰𑌮𑍁𑌤𑍍𑌤𑌮𑌮𑍍 ।
𑌅𑌂𑌤𑌃𑌪𑍁𑌰𑌗𑌤𑌾 𑌨𑌾𑌰𑍍𑌯𑍋 𑌮𑍁𑌮𑍁𑌚𑍁𑌰𑍍𑌵𑌾𑌰𑌿 𑌨𑍇𑌤𑍍𑌰𑌜𑌮𑍍 ॥ 15 ॥

𑌊𑌚𑍁𑌶𑍍𑌚 𑌪𑌰𑌮𑌾𑌯𑌸𑍍𑌤𑌾 𑌰𑌾𑌮𑌂 𑌜𑍍𑌵𑌲𑌿𑌤𑌤𑍇𑌜𑌸𑌮𑍍 ।
𑌵𑌤𑍍𑌸 𑌨𑍈𑌵𑌂 𑌨𑌿𑌯𑍁𑌕𑍍𑌤𑍇𑌯𑌂 𑌵𑌨𑌵𑌾𑌸𑍇 𑌮𑌨𑌸𑍍𑌵𑌿𑌨𑍀 ॥ 16 ॥

𑌪𑌿𑌤𑍁𑌰𑍍𑌵𑌾𑌕𑍍𑌯𑌾𑌨𑍁𑌰𑍋𑌧𑍇𑌨 𑌗𑌤𑌸𑍍𑌯 𑌵𑌿𑌜𑌨𑌂 𑌵𑌨𑌮𑍍 ।
𑌤𑌾𑌵𑌦𑍍𑌦𑌰𑍍𑌶𑌨𑌮𑌸𑍍𑌯𑌾 𑌨𑌃 𑌸𑌫𑌲𑌂 𑌭𑌵𑌤𑍁 𑌪𑍍𑌰𑌭𑍋 ॥ 1𑍭 ॥

𑌲𑌕𑍍𑌷𑍍𑌮𑌣𑍇𑌨 𑌸𑌹𑌾𑌯𑍇𑌨 𑌵𑌨𑌂 𑌗𑌚𑍍𑌛𑌸𑍍𑌵 𑌪𑍁𑌤𑍍𑌰𑌕 ।
𑌨𑍇𑌯𑌮𑌰𑍍𑌹𑌤𑌿 𑌕𑌲𑍍𑌯𑌾𑌣𑍀 𑌵𑌸𑍍𑌤𑍁𑌂 𑌤𑌾𑌪𑌸𑌵𑌦𑍍𑌵𑌨𑍇 ॥ 1𑍮 ॥

𑌕𑍁𑌰𑍁 𑌨𑍋 𑌯𑌾𑌚𑌨𑌾𑌂 𑌪𑍁𑌤𑍍𑌰 𑌸𑍀𑌤𑌾 𑌤𑌿𑌷𑍍𑌠𑌤𑍁 𑌭𑌾𑌮𑌿𑌨𑍀 ।
𑌧𑌰𑍍𑌮𑌨𑌿𑌤𑍍𑌯𑌸𑍍𑌸𑍍𑌵𑌯𑌂 𑌸𑍍𑌥𑌾𑌤𑍁𑌂 𑌨 𑌹𑍀𑌦𑌾𑌨𑍀𑌂 𑌤𑍍𑌵𑌮𑌿𑌚𑍍𑌛𑌸𑌿 ॥ 1𑍯 ॥

𑌤𑌾𑌸𑌾𑌮𑍇𑌵𑌂𑌵𑌿𑌧𑌾 𑌵𑌾𑌚 𑌶𑍃𑌣𑍍𑌵𑌨𑍍 𑌦𑌶𑌰𑌥𑌾𑌤𑍍𑌮𑌜𑌃 ।
𑌬𑌬𑌂𑌧𑍈𑌵 𑌤𑌦𑌾 𑌚𑍀𑌰𑌂 𑌸𑍀𑌤𑌯𑌾 𑌤𑍁𑌲𑍍𑌯𑌶𑍀𑌲𑌯𑌾 ॥ 20 ॥

𑌚𑍀𑌰𑍇 𑌗𑍃𑌹𑍀𑌤𑍇 𑌤𑍁 𑌤𑌯𑌾 𑌸𑌮𑍀𑌕𑍍𑌷𑍍𑌯 𑌨𑍃𑌪𑌤𑍇𑌰𑍍𑌗𑍁𑌰𑍁𑌃 ।
𑌨𑌿𑌵𑌾𑌰𑍍𑌯 𑌸𑍀𑌤𑌾𑌂 𑌕𑍈𑌕𑍇𑌯𑍀𑌂 𑌵𑌸𑌿𑌷𑍍𑌠𑍋 𑌵𑌾𑌕𑍍𑌯𑌮𑌬𑍍𑌰𑌵𑍀𑌤𑍍 ॥ 21 ॥

𑌅𑌤𑌿𑌪𑍍𑌰𑌵𑍃𑌤𑍍𑌤𑍇 𑌦𑍁𑌰𑍍𑌮𑍇𑌧𑍇 𑌕𑍈𑌕𑍇𑌯𑌿 𑌕𑍁𑌲𑌪𑌾𑌂𑌸𑌨𑌿 ।
𑌵𑌂𑌚𑌯𑌿𑌤𑍍𑌵𑌾 𑌚 𑌰𑌾𑌜𑌾𑌨𑌂 𑌨 𑌪𑍍𑌰𑌮𑌾𑌣𑍇𑌽𑌵𑌤𑌿𑌷𑍍𑌠𑌸𑍇 ॥ 22 ॥

𑌨 𑌗𑌂𑌤𑌵𑍍𑌯𑌂 𑌵𑌨𑌂 𑌦𑍇𑌵𑍍𑌯𑌾 𑌸𑍀𑌤𑌯𑌾 𑌶𑍀𑌲𑌵𑌰𑍍𑌜𑌿𑌤𑍇 ।
𑌅𑌨𑍁𑌷𑍍𑌠𑌾𑌸𑍍𑌯𑌤𑌿 𑌰𑌾𑌮𑌸𑍍𑌯 𑌸𑍀𑌤𑌾 𑌪𑍍𑌰𑌕𑍃𑌤𑌮𑌾𑌸𑌨𑌮𑍍 ॥ 23 ॥

𑌆𑌤𑍍𑌮𑌾 𑌹𑌿 𑌦𑌾𑌰𑌾𑌸𑍍𑌸𑌰𑍍𑌵𑍇𑌷𑌾𑌂 𑌦𑌾𑌰𑌸𑌂𑌗𑍍𑌰𑌹𑌵𑌰𑍍𑌤𑌿𑌨𑌾𑌮𑍍 ।
𑌆𑌤𑍍𑌮𑍇𑌯𑌮𑌿𑌤𑌿 𑌰𑌾𑌮𑌸𑍍𑌯 𑌪𑌾𑌲𑌯𑌿𑌷𑍍𑌯𑌤𑌿 𑌮𑍇𑌦𑌿𑌨𑍀𑌮𑍍 ॥ 24 ॥

𑌅𑌥 𑌯𑌾𑌸𑍍𑌯𑌤𑌿 𑌵𑍈𑌦𑍇𑌹𑍀 𑌵𑌨𑌂 𑌰𑌾𑌮𑍇𑌣 𑌸𑌂𑌗𑌤𑌾 ।
𑌵𑌯𑌮𑌪𑍍𑌯𑌨𑍁𑌯𑌾𑌸𑍍𑌯𑌾𑌮𑌃 𑌪𑍁𑌰𑌂 𑌚𑍇𑌦𑌂 𑌗𑌮𑌿𑌷𑍍𑌯𑌤𑌿 ॥ 25 ॥

𑌅𑌂𑌤𑌪𑌾𑌲𑌾𑌶𑍍𑌚 𑌯𑌾𑌸𑍍𑌯𑌂𑌤𑌿 𑌸𑌦𑌾𑌰𑍋 𑌯𑌤𑍍𑌰 𑌰𑌾𑌘𑌵𑌃 ।
𑌸𑌹𑍋𑌪𑌜𑍀𑌵𑍍𑌯𑌂 𑌰𑌾𑌷𑍍𑌟𑍍𑌰𑌂 𑌚 𑌪𑍁𑌰𑌂 𑌚 𑌸𑌪𑌰𑌿𑌚𑍍𑌛𑌦𑌮𑍍 ॥ 26 ॥

𑌭𑌰𑌤𑌶𑍍𑌚 𑌸𑌶𑌤𑍍𑌰𑍁𑌘𑍍𑌨𑌶𑍍𑌚𑍀𑌰𑌵𑌾𑌸𑌾 𑌵𑌨𑍇𑌚𑌰𑌃 ।
𑌵𑌨𑍇 𑌵𑌸𑌂𑌤𑌂 𑌕𑌾𑌕𑍁𑌤𑍍𑌸𑍍𑌥 𑌮𑌨𑍁𑌵𑌤𑍍𑌸𑍍𑌯𑌤𑌿 𑌪𑍂𑌰𑍍𑌵𑌜𑌮𑍍 ॥ 2𑍭 ॥

𑌤𑌤 𑌶𑍍𑌶𑍂𑌨𑍍𑌯𑌾𑌂 𑌗𑌤𑌜𑌨𑌾𑌂 𑌵𑌸𑍁𑌧𑌾𑌂 𑌪𑌾𑌦𑌪𑍈 𑌸𑍍𑌸𑌹 ।
𑌤𑍍𑌵𑌮𑍇𑌕𑌾 𑌶𑌾𑌧𑌿 𑌦𑍁𑌰𑍍𑌵𑍃𑌤𑍍𑌤𑌾 𑌪𑍍𑌰𑌜𑌾𑌨𑌾𑌮𑌹𑌿𑌤𑍇 𑌸𑍍𑌥𑌿𑌤𑌾 ॥ 2𑍮 ॥

𑌨 𑌹𑌿 𑌤𑌦𑍍𑌭𑌵𑌿𑌤𑌾 𑌰𑌾𑌷𑍍𑌟𑍍𑌰𑌂 𑌯𑌤𑍍𑌰 𑌰𑌾𑌮𑍋 𑌨 𑌭𑍂𑌪𑌤𑌿𑌃 ।
𑌤𑌦𑍍𑌵𑌨𑌂 𑌭𑌵𑌿𑌤𑌾 𑌰𑌾𑌷𑍍𑌟𑍍𑌰𑌂 𑌯𑌤𑍍𑌰 𑌰𑌾𑌮𑍋 𑌨𑌿𑌵𑌤𑍍𑌸𑍍𑌯𑌤𑌿 ॥ 2𑍯 ॥

𑌨 𑌹𑍍𑌯𑌦𑌤𑍍𑌤𑌾𑌂 𑌮𑌹𑍀𑌂 𑌪𑌿𑌤𑍍𑌰𑌾 𑌭𑌰𑌤𑌃 𑌶𑌾𑌸𑍍𑌤𑍁𑌮𑌰𑍍𑌹𑌤𑌿 ।
𑌤𑍍𑌵𑌯𑌿 𑌵𑌾 𑌪𑍁𑌤𑍍𑌰𑌵𑌦𑍍𑌵𑌸𑍍𑌤𑍁𑌂 𑌯𑌦𑌿 𑌜𑌾𑌤𑍋 𑌮𑌹𑍀𑌪𑌤𑍇𑌃 ॥ 30 ॥

𑌯𑌦𑍍𑌯𑌪𑌿 𑌤𑍍𑌵𑌂 𑌕𑍍𑌷𑌿𑌤𑌿𑌤𑌲𑌾𑌦𑍍𑌗𑌗𑌨𑌂 𑌚𑍋𑌤𑍍𑌪𑌤𑌿𑌷𑍍𑌯𑌸𑌿 ।
𑌪𑌿𑌤𑍃𑌰𑍍𑌵𑌂𑌶𑌚𑌰𑌿𑌤𑍍𑌰𑌜𑍍𑌞𑌃 𑌸𑍋𑌽𑌨𑍍𑌯𑌥𑌾 𑌨 𑌕𑌰𑌿𑌷𑍍𑌯𑌤𑌿 ॥ 31 ॥

𑌤𑌤𑍍𑌤𑍍𑌵𑌯𑌾 𑌪𑍁𑌤𑍍𑌰𑌗𑌰𑍍𑌧𑌿𑌨𑍍𑌯𑌾 𑌪𑍁𑌤𑍍𑌰𑌸𑍍𑌯 𑌕𑍃𑌤𑌮𑌪𑍍𑌰𑌿𑌯𑌮𑍍 ।
𑌲𑍋𑌕𑍇 𑌹𑌿 𑌸 𑌨 𑌵𑌿𑌦𑍍𑌯𑍇𑌤 𑌯𑍋 𑌨 𑌰𑌾𑌮𑌮𑌨𑍁𑌵𑍍𑌰𑌤𑌃 ॥ 32 ॥

𑌦𑍍𑌰𑌕𑍍𑌷𑍍𑌯𑌸𑍍𑌯𑌦𑍍𑌯𑍈𑌵 𑌕𑍈𑌕𑍇𑌯𑍀 𑌪𑌶𑍁𑌵𑍍𑌯𑌾𑌲𑌮𑍃𑌗𑌦𑍍𑌵𑌿𑌜𑌾𑌨𑍍 ।
𑌗𑌚𑍍𑌛𑌤𑌸𑍍𑌸𑌹 𑌰𑌾𑌮𑍇𑌣 𑌪𑌾𑌦𑌪𑌾𑌂𑌶𑍍𑌚 𑌤𑌦𑍁𑌨𑍍𑌮𑍁𑌖𑌾𑌨𑍍 ॥ 33 ॥

𑌅𑌥𑍋𑌤𑍍𑌤𑌮𑌾𑌨𑍍𑌯𑌾𑌭𑌰𑌣𑌾𑌨𑌿 𑌦𑍇𑌵𑌿 𑌦𑍇𑌹𑌿 𑌸𑍍𑌨𑍁𑌷𑌾𑌯𑍈 𑌵𑍍𑌯𑌪𑌨𑍀𑌯 𑌚𑍀𑌰𑌮𑍍 ।
𑌨 𑌚𑍀𑌰𑌮𑌸𑍍𑌯𑌾𑌃 𑌪𑍍𑌰𑌵𑌿𑌧𑍀𑌯𑌤𑍇𑌤𑌿 𑌨𑍍𑌯𑌵𑌾𑌰𑌯𑌤𑍍𑌤𑌦𑍍𑌵𑌸𑌨𑌂 𑌵𑌸𑌿𑌷𑍍𑌟𑌃 ॥ 34 ॥

𑌏𑌕𑌸𑍍𑌯 𑌰𑌾𑌮𑌸𑍍𑌯 𑌵𑌨𑍇 𑌨𑌿𑌵𑌾𑌸 𑌸𑍍𑌤𑍍𑌵𑌯𑌾 𑌵𑍃𑌤𑌃𑌕𑍇𑌕𑌯𑌰𑌾𑌜𑌪𑍁𑌤𑍍𑌰𑍀 ।
𑌵𑌿𑌭𑍂𑌷𑌿𑌤𑍇𑌯𑌂 𑌪𑍍𑌰𑌤𑌿𑌕𑌰𑍍𑌮𑌨𑌿𑌤𑍍𑌯𑌾 𑌵𑌸𑌤𑍍𑌵𑌰𑌣𑍍𑌯𑍇 𑌸𑌹 𑌰𑌾𑌘𑌵𑍇𑌣 ॥ 35 ॥

𑌯𑌾𑌨𑍈𑌶𑍍𑌚 𑌮𑍁𑌖𑍍𑌯𑍈𑌃 𑌪𑌰𑌿𑌚𑌾𑌰𑌕𑍈𑌶𑍍𑌚 𑌸𑍁𑌸𑌂𑌵𑍃𑌤𑌾 𑌗𑌚𑍍𑌛𑌤𑍁 𑌰𑌾𑌜𑌪𑍁𑌤𑍍𑌰𑍀 ।
𑌵𑌸𑍍𑌤𑍍𑌰𑍈𑌶𑍍𑌚 𑌸𑌰𑍍𑌵𑍈𑌸𑍍𑌸𑌹𑌿𑌤𑍈𑌰𑍍𑌵𑌿𑌧𑌾𑌨𑍈 𑌰𑍍𑌨𑍇𑌯𑌂 𑌵𑍃𑌤𑌾 𑌤𑍇 𑌵𑌰𑌸𑌂𑌪𑍍𑌰𑌦𑌾𑌨𑍇 ॥ 36 ॥

𑌤𑌸𑍍𑌮𑌿𑌂𑌸𑍍𑌤𑌥𑌾 𑌜𑌲𑍍𑌪𑌤𑌿 𑌵𑌿𑌪𑍍𑌰𑌮𑍁𑌖𑍍𑌯𑍇 𑌗𑍁𑌰𑍌 𑌨𑍃𑌪𑌸𑍍𑌯𑌾𑌪𑍍𑌰𑌤𑌿𑌮𑌪𑍍𑌰𑌭𑌾𑌵𑍇 ।
𑌨𑍈𑌵 𑌸𑍍𑌮 𑌸𑍀𑌤𑌾 𑌵𑌿𑌨𑌿𑌵𑍃𑌤𑍍𑌤𑌭𑌾𑌵𑌾 𑌪𑍍𑌰𑌿𑌯𑌸𑍍𑌯 𑌭𑌰𑍍𑌤𑍁𑌃 𑌪𑍍𑌰𑌤𑌿𑌕𑌾𑌰𑌕𑌾𑌮𑌾 ॥ 3𑍭 ॥

𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑍇 𑌸𑌪𑍍𑌤𑌤𑍍𑌰𑌿𑌂𑌶𑌸𑍍𑌸𑌰𑍍𑌗𑌃 ॥


Browse Related Categories: