VR 2.81 Ayodhya Kanda - Sarga 81 - Grantha

Collection of Spiritual and Devotional Literature in Various Indian Languages

View this in:

2.𑍮1 𑌅𑌯𑍋𑌧𑍍𑌯𑌾𑌕𑌾𑌂𑌡 - 𑌏𑌕𑌾𑌶𑍀𑌤𑌿𑌤𑌮 𑌸𑌰𑍍𑌗𑌃

𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑌮𑍍 ।
𑌅𑌥 𑌏𑌕𑌾𑌶𑍀𑌤𑌿𑌤𑌮𑌸𑍍𑌸𑌰𑍍𑌗𑌃 ।

𑌤𑌤𑍋 𑌨𑌾𑌂𑌦𑍀𑌮𑍁𑌖𑍀𑌂 𑌰𑌾𑌤𑍍𑌰𑌿𑌂 𑌭𑌰𑌤𑌂 𑌸𑍂𑌤𑌮𑌾𑌗𑌧𑌾𑌃 ।
𑌤𑍁𑌷𑍍𑌟𑍁𑌵𑍁𑌰𑍍𑌵𑌾𑌗𑍍𑌵𑌿𑌶𑍇𑌷𑌜𑍍𑌞𑌾𑌸𑍍𑌸𑍍𑌤𑌵𑍈𑌰𑍍𑌮𑌂𑌗𑌲𑌸𑌂𑌹𑌿𑌤𑍈𑌃 ॥ 1 ॥

𑌸𑍁𑌵𑌰𑍍𑌣𑌕𑍋𑌣𑌾𑌭𑌿𑌹𑌤𑌃 𑌪𑍍𑌰𑌾𑌣𑌦𑌦𑍍𑌯𑌾𑌮𑌦𑍁𑌂𑌦𑍁𑌭𑌿𑌃 ।
𑌦𑌧𑍍𑌮𑍁𑌶𑍍𑌶𑌂𑌖𑌾𑌂𑌶𑍍𑌚 𑌶𑌤𑌶𑍋 𑌨𑌾𑌦𑌾𑌂𑌶𑍍𑌚𑍋𑌚𑍍𑌚𑌾𑌵𑌚𑌸𑍍𑌵𑌰𑌾𑌨𑍍 ॥ 2 ॥

𑌸 𑌤𑍂𑌰𑍍𑌯𑌘𑍋𑌷 𑌸𑍍𑌸𑍁𑌮𑌹𑌾𑌂𑌦𑌿𑌵𑌮𑌾𑌪𑍂𑌰𑌯𑌨𑍍𑌨𑌿𑌵 ।
𑌭𑌰𑌤𑌂 𑌶𑍋𑌕𑌸𑌂𑌤𑌪𑍍𑌤𑌂 𑌭𑍂𑌯𑌶𑍍𑌶𑍋𑌕𑍈𑌰𑌰𑌂𑌧𑍍𑌰𑌯𑌤𑍍 ॥ 3 ॥

𑌤𑌤𑌃 𑌪𑍍𑌰𑌬𑍁𑌦𑍍𑌧𑍋 𑌭𑌰𑌤𑌸𑍍𑌤𑌂 𑌘𑍋𑌷𑌂 𑌸𑌨𑍍𑌨𑌿𑌵𑌰𑍍𑌤𑍍𑌯 𑌚 ।
𑌨𑌾𑌹𑌂 𑌰𑌾𑌜𑍇𑌤𑌿 𑌚𑌾𑌪𑍍𑌯𑍁𑌕𑍍𑌤𑍍𑌵𑌾 𑌶𑌤𑍍𑌰𑍁𑌘𑍍𑌨𑌮𑌿𑌦𑌮𑌬𑍍𑌰𑌵𑍀𑌤𑍍 ॥ 4 ॥

𑌪𑌶𑍍𑌯 𑌶𑌤𑍍𑌰𑍁𑌘𑍍𑌨 𑌕𑍈𑌕𑍇𑌯𑍍𑌯𑌾 𑌲𑍋𑌕𑌸𑍍𑌯𑌾𑌪𑌕𑍃𑌤𑌂 𑌮𑌹𑌤𑍍 ।
𑌵𑌿𑌸𑍃𑌜𑍍𑌯 𑌮𑌯𑌿 𑌦𑍁𑌃𑌖𑌾𑌨𑌿 𑌰𑌾𑌜𑌾 𑌦𑌶𑌰𑌥𑍋 𑌗𑌤𑌃 ॥ 5 ॥

𑌤𑌸𑍍𑌯𑍈𑌷𑌾 𑌧𑌰𑍍𑌮𑌰𑌾𑌜𑌸𑍍𑌯 𑌧𑌰𑍍𑌮𑌮𑍂𑌲𑌾 𑌮𑌹𑌾𑌤𑍍𑌮𑌨𑌃 ।
𑌪𑌰𑌿𑌭𑍍𑌰𑌮𑌤𑌿 𑌰𑌾𑌜𑍍𑌯 𑌶𑍍𑌰𑍀𑌰𑍍𑌨𑍌𑌰𑌿𑌵𑌾𑌕𑌰𑍍𑌣𑌿𑌕𑌾 𑌜𑌲𑍇 ॥ 6 ॥

𑌯𑍋 𑌹𑌿 𑌨 𑌸𑍍𑌸𑍁𑌮𑌹𑌾𑌨𑍍𑌨𑌾𑌥𑌸𑍍𑌸𑍋𑌽𑌪𑌿 𑌪𑍍𑌰𑌵𑍍𑌰𑌾𑌜𑌿𑌤𑍋 𑌵𑌨𑌮𑍍 ।
𑌅𑌨𑌯𑌾 𑌧𑌰𑍍𑌮𑌮𑍁𑌤𑍍𑌸𑍃𑌜𑍍𑌯 𑌮𑌾𑌤𑍍𑌰𑌾 𑌮𑍇 𑌰𑌾𑌘𑌵𑌸𑍍𑌸𑍍𑌵𑌯𑌮𑍍 ॥ 𑍭 ॥

𑌇𑌤𑍍𑌯𑍇𑌵𑌂 𑌭𑌰𑌤𑌂 𑌪𑍍𑌰𑍇𑌕𑍍𑌷𑍍𑌯 𑌵𑌿𑌲𑌪𑌂𑌤𑌂 𑌵𑌿𑌚𑍇𑌤𑌨𑌮𑍍 ।
𑌕𑍃𑌪𑌣𑌂 𑌰𑍁𑌰𑍁𑌦𑍁𑌸𑍍𑌸𑌰𑍍𑌵𑌾𑌸𑍍𑌸𑌸𑍍𑌵𑌰𑌂 𑌯𑍋𑌷𑌿𑌤 𑌸𑍍𑌤𑌦𑌾 ॥ 𑍮 ॥

𑌤𑌥𑌾 𑌤𑌸𑍍𑌮𑌿𑌨𑍍𑌵𑌿𑌲𑌪𑌤𑌿 𑌵𑌸𑌿𑌷𑍍𑌠𑍋 𑌰𑌾𑌜𑌧𑌰𑍍𑌮𑌵𑌿𑌤𑍍 ।
𑌸𑌭𑌾𑌮𑌿𑌕𑍍𑌷𑍍𑌵𑌾𑌕𑍁𑌨𑌾𑌥𑌸𑍍𑌯 𑌪𑍍𑌰𑌵𑌿𑌵𑍇𑌶 𑌮𑌹𑌾𑌯𑌶𑌾𑌃 ॥ 𑍯 ॥

𑌶𑌾𑌤𑌕𑍁𑌂𑌭𑌮𑌯𑍀𑌂 𑌰𑌮𑍍𑌯𑌾𑌂 𑌮𑌣𑌿𑌰𑌤𑍍𑌨𑌸𑌮𑌾𑌕𑍁𑌲𑌾𑌮𑍍 ।
𑌸𑍁𑌧𑌰𑍍𑌮𑌾𑌮𑌿𑌵 𑌧𑌰𑍍𑌮𑌾𑌤𑍍𑌮𑌾 𑌸𑌗𑌣𑌃 𑌪𑍍𑌰𑌤𑍍𑌯𑌪𑌦𑍍𑌯𑌤 ॥ 10 ॥

𑌸 𑌕𑌾𑌂𑌚𑌨𑌮𑌯𑌂 𑌪𑍀𑌠𑌂 𑌸𑍁𑌖𑌾𑌸𑍍𑌤𑌰𑌣𑌸𑌂𑌵𑍃𑌤𑌮𑍍 ।
𑌅𑌧𑍍𑌯𑌾𑌸𑍍𑌤 𑌸𑌰𑍍𑌵𑌵𑍇𑌦𑌜𑍍𑌞𑍋 𑌦𑍂𑌤𑌾𑌨𑌨𑍁𑌶𑌶𑌾𑌸 𑌚 ॥ 11 ॥

𑌬𑍍𑌰𑌾𑌹𑍍𑌮𑌣𑌾𑌨𑍍 𑌕𑍍𑌷𑌤𑍍𑌰𑌿𑌯𑌾𑌨𑍍𑌵𑍈𑌶𑍍𑌯𑌨𑌮𑌾𑌤𑍍𑌯𑌾𑌨𑍍𑌗𑌣𑌵𑌲𑍍𑌲𑌭𑌾𑌨𑍍 ।
𑌕𑍍𑌷𑌿𑌪𑍍𑌰𑌮𑌾𑌨𑌯𑌤𑌾𑌽𑌵𑍍𑌯𑌗𑍍𑌰𑌾𑌃 𑌕𑍃𑌤𑍍𑌯𑌮𑌾𑌤𑍍𑌯𑌯𑌿𑌕𑌂 𑌹𑌿 𑌨𑌃 ॥ 12 ॥

𑌸𑌰𑌾𑌜𑌭𑍃𑌤𑍍𑌯𑌂 𑌶𑌤𑍍𑌰𑍁𑌘𑍍𑌨𑌂 𑌭𑌰𑌤𑌂 𑌚 𑌯𑌶𑌸𑍍𑌵𑌿𑌨𑌮𑍍 ।
𑌯𑍁𑌧𑌾𑌜𑌿𑌤𑌂 𑌸𑍁𑌮𑌂𑌤𑍍𑌰𑌂 𑌚 𑌯𑍇 𑌚 𑌤𑌤𑍍𑌰 𑌹𑌿𑌤𑌾 𑌜𑌨𑌾𑌃 ॥ 13 ॥

𑌤𑌤𑍋 𑌹𑌲𑌹𑌲𑌾𑌶𑌬𑍍𑌦𑌸𑍍𑌸𑍁𑌮𑌹𑌾𑌨𑍍𑌸𑌮𑌪𑌦𑍍𑌯𑌤 ।
𑌰𑌥𑍈𑌰𑌶𑍍𑌵𑍈𑌰𑍍𑌗𑌜𑍈𑌶𑍍𑌚𑌾𑌪𑌿 𑌜𑌨𑌾𑌨𑌾𑌮𑍁𑌪𑌗𑌚𑍍𑌛𑌤𑌾𑌮𑍍 ॥ 14 ॥

𑌤𑌤𑍋 𑌭𑌰𑌤𑌮𑌾𑌯𑌾𑌂𑌤𑌂 𑌶𑌤𑌕𑍍𑌰𑌤𑍁𑌮𑌿𑌵𑌾𑌮𑌰𑌾𑌃 ।
𑌪𑍍𑌰𑌤𑍍𑌯𑌨𑌂𑌦𑌨𑍍𑌪𑍍𑌰𑌕𑍃𑌤𑌯𑍋 𑌯𑌥𑌾 𑌦𑌶𑌰𑌥𑌂 𑌤𑌥𑌾 ॥ 15 ॥

𑌹𑍍𑌰𑌦 𑌇𑌵 𑌤𑌿𑌮𑌿𑌨𑌾𑌗𑌸𑌂𑌵𑍃𑌤𑌃 𑌸𑍍𑌤𑌿𑌮𑌿𑌤𑌜𑌲𑍋 𑌮𑌣𑌿𑌶𑌂𑌖𑌶𑌰𑍍𑌕𑌰𑌃 ।
𑌦𑌶𑌰𑌥𑌸𑍁𑌤𑌶𑍋𑌭𑌿𑌤𑌾 𑌸𑌭𑌾 𑌸𑌦𑌶𑌰𑌥𑍇𑌵 𑌬𑌭𑍌 𑌯𑌥𑌾 𑌪𑍁𑌰𑌾 ॥ 16 ॥

𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑍇 𑌏𑌕𑌾𑌶𑍀𑌤𑌿𑌤𑌮𑌸𑍍𑌸𑌰𑍍𑌗𑌃 ॥

Browse Related Categories: