𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑌮𑍍 ।
𑌅𑌥 𑌪𑌂𑌚𑌦𑌶𑌾𑌧𑌿𑌕𑌶𑌤𑌤𑌮𑌸𑍍𑌸𑌰𑍍𑌗𑌃 ।
𑌤𑌤𑍋 𑌨𑌿𑌕𑍍𑌷𑌿𑌪𑍍𑌯 𑌮𑌾𑌤𑍃 𑌸𑍍𑌸 𑌅𑌯𑍋𑌧𑍍𑌯𑌾𑌯𑌾𑌂 𑌦𑍃𑌢 𑌵𑍍𑌰𑌤𑌃 ।
𑌭𑌰𑌤 𑌶𑍍𑌶𑍋𑌕𑌸𑌂𑌤𑌪𑍍𑌤𑍋 𑌗𑍁𑌰𑍂𑌨𑌿𑌦𑌮𑌥𑌾𑌬𑍍𑌰𑌵𑍀𑌤𑍍 ॥ 1 ॥
𑌨𑌂𑌦𑌿𑌗𑍍𑌰𑌾𑌮𑌂 𑌗𑌮𑌿𑌷𑍍𑌯𑌾𑌮𑌿 𑌸𑌰𑍍𑌵𑌾𑌨𑌾𑌮𑌂𑌤𑍍𑌰𑌯𑍇𑌽𑌦𑍍𑌯 𑌵𑌃 ।
𑌤𑌤𑍍𑌰 𑌦𑍁𑌃𑌖𑌮𑌿𑌦𑌂 𑌸𑌰𑍍𑌵𑌂 𑌸𑌹𑌿𑌷𑍍𑌯𑍇 𑌰𑌾𑌘𑌵𑌂 𑌵𑌿𑌨𑌾 ॥ 2 ॥
𑌗𑌤𑌶𑍍𑌚 𑌵𑌾 𑌦𑌿𑌵𑌂 𑌰𑌾𑌜𑌾 𑌵𑌨𑌸𑍍𑌥𑌶𑍍𑌚 𑌗𑍁𑌰𑍁𑌰𑍍𑌮𑌮 ।
𑌰𑌾𑌮𑌂 𑌪𑍍𑌰𑌤𑍀𑌕𑍍𑌷𑍇 𑌰𑌾𑌜𑍍𑌯𑌾𑌯 𑌸 𑌹𑌿 𑌰𑌾𑌜𑌾 𑌮𑌹𑌾𑌯𑌶𑌾𑌃 ॥ 3 ॥
𑌏𑌤𑌚𑍍𑌛𑍍𑌰𑍁𑌤𑍍𑌵𑌾 𑌶𑍁𑌭𑌂 𑌵𑌾𑌕𑍍𑌯𑌂 𑌭𑌰𑌤𑌸𑍍𑌯 𑌮𑌹𑌾𑌤𑍍𑌮𑌨𑌃 ।
𑌅𑌬𑍍𑌰𑍁𑌵𑌨𑍍𑌮𑌂𑌤𑍍𑌰𑌿𑌣𑌸𑍍𑌸𑌰𑍍𑌵𑍇 𑌵𑌸𑌿𑌷𑍍𑌠𑌶𑍍𑌚 𑌪𑍁𑌰𑍋𑌹𑌿𑌤𑌃 ॥ 4 ॥
𑌸𑍁𑌭𑍃𑌶𑌂 𑌶𑍍𑌲𑌾𑌘𑌨𑍀𑌯𑌂 𑌚 𑌯𑌦𑍁𑌕𑍍𑌤𑌂 𑌭𑌰𑌤 𑌤𑍍𑌵𑌯𑌾 ।
𑌵𑌚𑌨𑌂 𑌭𑍍𑌰𑌾𑌤𑍃𑌵𑌾𑌤𑍍𑌸𑌲𑍍𑌯𑌾𑌦𑌨𑍁𑌰𑍂𑌪𑌂 𑌤𑌵𑍈𑌵 𑌤𑌤𑍍 ॥ 5 ॥
𑌨𑌿𑌤𑍍𑌯𑌂 𑌤𑍇 𑌬𑌂𑌧𑍁𑌲𑍁𑌬𑍍𑌧𑌸𑍍𑌯 𑌤𑌿𑌷𑍍𑌠𑌤𑍋 𑌭𑍍𑌰𑌾𑌤𑍃𑌸𑍌𑌹𑍃𑌦𑍇 ।
𑌆𑌰𑍍𑌯𑌮𑌾𑌰𑍍𑌗𑌂 𑌪𑍍𑌰𑌪𑌨𑍍𑌨𑌸𑍍𑌯 𑌨𑌾𑌨𑍁𑌮𑌨𑍍𑌯𑍇𑌤 𑌕𑌃 𑌪𑍁𑌮𑌾𑌨𑍍 ॥ 6 ॥
𑌮𑌂𑌤𑍍𑌰𑌿𑌣𑌾𑌂 𑌵𑌚𑌨𑌂 𑌶𑍍𑌰𑍁𑌤𑍍𑌵𑌾 𑌯𑌥𑌾𑌭𑌿𑌲𑌷𑌿𑌤𑌂 𑌪𑍍𑌰𑌿𑌯𑌮𑍍 ।
𑌅𑌬𑍍𑌰𑌵𑍀𑌤𑍍𑌸𑌾𑌰𑌥𑌿𑌂 𑌵𑌾𑌕𑍍𑌯𑌂 𑌰𑌥𑍋 𑌮𑍇 𑌯𑍁𑌜𑍍𑌯𑌤𑌾𑌮𑌿𑌤𑌿 ॥ ॥
𑌪𑍍𑌰𑌹𑍃𑌷𑍍𑌟𑌵𑌦𑌨 𑌸𑍍𑌸𑌰𑍍𑌵𑌾 𑌮𑌾𑌤𑍃 𑌸𑍍𑌸𑌮𑌭𑌿𑌵𑌾𑌦𑍍𑌯 𑌸𑌃 ।
𑌆𑌰𑍁𑌰𑍋𑌹 𑌰𑌥𑌂 𑌶𑍍𑌰𑍀𑌮𑌾𑌨𑍍 𑌶𑌤𑍍𑌰𑍁𑌘𑍍𑌨𑍇𑌨 𑌸𑌮𑌨𑍍𑌵𑌿𑌤𑌃 ॥ ॥
𑌆𑌰𑍁𑌹𑍍𑌯 𑌚 𑌰𑌥𑌂 𑌶𑍀𑌘𑍍𑌰𑌂 𑌶𑌤𑍍𑌰𑍁𑌘𑍍𑌨𑌭𑌰𑌤𑌾𑌵𑍁𑌭𑍌 ।
𑌯𑌯𑌤𑍁𑌃 𑌪𑌰𑌮𑌪𑍍𑌰𑍀𑌤𑍌 𑌵𑍃𑌤𑍌 𑌮𑌂𑌤𑍍𑌰𑌿𑌪𑍁𑌰𑍋𑌹𑌿𑌤𑍈𑌃 ॥ ॥
𑌅𑌗𑍍𑌰𑌤𑍋 𑌗𑍁𑌰𑌵𑌃 𑌸𑌰𑍍𑌵𑍇 𑌵𑌸𑌿𑌷𑍍𑌠𑌪𑍍𑌰𑌮𑍁𑌖𑌾 𑌦𑍍𑌵𑌿𑌜𑌾𑌃 ।
𑌪𑍍𑌰𑌯𑌯𑍁𑌃 𑌪𑍍𑌰𑌾𑌂𑌗𑍍𑌮𑍁𑌖𑌾 𑌸𑍍𑌸𑌰𑍍𑌵𑍇 𑌨𑌂𑌦𑌿𑌗𑍍𑌰𑌾𑌮𑍋 𑌯𑌤𑍋𑌽𑌭𑌵𑌤𑍍 ॥ 10 ॥
𑌬𑌲𑌂 𑌚 𑌤𑌦𑌨𑌾𑌹𑍂𑌤𑌂 𑌗𑌜𑌾𑌶𑍍𑌵𑌰𑌥𑌸𑌂𑌕𑍁𑌲𑌮𑍍 ।
𑌪𑍍𑌰𑌯𑌯𑍌 𑌭𑌰𑌤𑍇 𑌯𑌾𑌤𑍇 𑌸𑌰𑍍𑌵𑍇 𑌚 𑌪𑍁𑌰𑌵𑌾𑌸𑌿𑌨𑌃 ॥ 11 ॥
𑌰𑌥𑌸𑍍𑌥𑌃 𑌸 𑌤𑍁 𑌧𑌰𑍍𑌮𑌾𑌤𑍍𑌮𑌾 𑌭𑌰𑌤𑍋 𑌭𑍍𑌰𑌾𑌤𑍃𑌵𑌤𑍍𑌸𑌲𑌃 ।
𑌨𑌂𑌦𑌿𑌗𑍍𑌰𑌾𑌮𑌂 𑌯𑌯𑍌 𑌤𑍂𑌰𑍍𑌣𑌂 𑌶𑌿𑌰𑌸𑍍𑌯𑌾𑌦𑌾𑌯 𑌪𑌾𑌦𑍁𑌕𑍇 ॥ 12 ॥
𑌤𑌤𑌸𑍍𑌤𑍁 𑌭𑌰𑌤𑌃 𑌕𑍍𑌷𑌿𑌪𑍍𑌰𑌂 𑌨𑌂𑌦𑌿𑌗𑍍𑌰𑌾𑌮𑌂 𑌪𑍍𑌰𑌵𑌿𑌶𑍍𑌯 𑌸𑌃 ।
𑌅𑌵𑌤𑍀𑌰𑍍𑌯 𑌰𑌥𑌾𑌤𑍍𑌤𑍂𑌰𑍍𑌣𑌂 𑌗𑍁𑌰𑍂𑌨𑌿𑌦𑌮𑍁𑌵𑌾𑌚 𑌹 ॥ 13 ॥
𑌏𑌤𑌦𑍍𑌰𑌾𑌜𑍍𑌯𑌂 𑌮𑌮 𑌭𑍍𑌰𑌾𑌤𑍍𑌰𑌾 𑌦𑌤𑍍𑌤𑌂 𑌸𑌨𑍍𑌨𑌯𑌾𑌸𑌵𑌤𑍍𑌸𑍍𑌵𑌯𑌮𑍍 ।
𑌯𑍋𑌗𑌕𑍍𑌷𑍇𑌮𑌵𑌹𑍇 𑌚𑍇𑌮𑍇 𑌪𑌾𑌦𑍁𑌕𑍇 𑌹𑍇𑌮𑌭𑍂𑌷𑌿𑌤𑍇 ॥ 14 ॥
𑌭𑌰𑌤 𑌶𑍍𑌶𑌿𑌰𑌸𑌾 𑌕𑍃𑌤𑍍𑌵𑌾 𑌸𑌨𑍍𑌨𑍍𑌯𑌾𑌸𑌂 𑌪𑌾𑌦𑍁𑌕𑍇 𑌤𑌤𑌃 ।
𑌅𑌬𑍍𑌰𑌵𑍀𑌦𑍍𑌧𑍁𑌃𑌖𑌸𑌂𑌤𑌪𑍍𑌤 𑌸𑍍𑌸𑌰𑍍𑌵𑌂 𑌪𑍍𑌰𑌕𑍃𑌤𑌿𑌮𑌂𑌡𑌲𑌮𑍍 ॥ 15 ॥
𑌛𑌤𑍍𑌰𑌂 𑌧𑌾𑌰𑌯𑌤 𑌕𑍍𑌷𑌿𑌪𑍍𑌰𑌮𑌾𑌰𑍍𑌯𑌪𑌾𑌦𑌾𑌵𑌿𑌮𑍌 𑌮𑌤𑍌 ।
𑌆𑌭𑍍𑌯𑌾𑌂 𑌰𑌾𑌜𑍍𑌯𑍇 𑌸𑍍𑌥𑌿𑌤𑍋 𑌧𑌰𑍍𑌮𑌃 𑌪𑌾𑌦𑍁𑌕𑌾𑌭𑍍𑌯𑌾𑌂 𑌗𑍁𑌰𑍋𑌰𑍍𑌮𑌮 ॥ 16 ॥
𑌭𑍍𑌰𑌾𑌤𑍍𑌰𑌾 𑌹𑌿 𑌮𑌯𑌿 𑌸𑌂𑌨𑍍𑌯𑌾𑌸𑍋 𑌨𑌿𑌕𑍍𑌷𑌿𑌪𑍍𑌤 𑌸𑍍𑌸𑍌𑌹𑍃𑌦𑌾𑌦𑌯𑌮𑍍 ।
𑌤𑌮𑌿𑌮𑌂 𑌪𑌾𑌲𑌯𑌿𑌷𑍍𑌯𑌾𑌮𑌿 𑌰𑌾𑌘𑌵𑌾𑌗𑌮𑌨𑌂 𑌪𑍍𑌰𑌤𑌿 ॥ 1 ॥
𑌕𑍍𑌷𑌿𑌪𑍍𑌰𑌂 𑌸𑌂𑌯𑍋𑌜𑌯𑌿𑌤𑍍𑌵𑌾𑌤𑍁 𑌰𑌾𑌘𑌵𑌸𑍍𑌯 𑌪𑍁𑌨𑌸𑍍𑌸𑍍𑌵𑌯𑌮𑍍 ।
𑌚𑌰𑌣𑍌 𑌤𑍌 𑌤𑍁 𑌰𑌾𑌮𑌸𑍍𑌯 𑌦𑍍𑌰𑌕𑍍𑌷𑍍𑌯𑌾𑌮𑌿 𑌸𑌹𑌪𑌾𑌦𑍁𑌕𑍌 ॥ 1 ॥
𑌤𑌤𑍋 𑌨𑌿𑌕𑍍𑌷𑌿𑌪𑍍𑌤𑌭𑌾𑌰𑍋𑌽𑌹𑌂 𑌰𑌾𑌘𑌵𑍇𑌣 𑌸𑌮𑌾𑌗𑌤𑌃 ।
𑌨𑌿𑌵𑍇𑌦𑍍𑌯 𑌗𑍁𑌰𑌵𑍇 𑌰𑌾𑌜𑍍𑌯𑌂 𑌭𑌜𑌿𑌷𑍍𑌯𑍇 𑌗𑍁𑌰𑍁𑌵𑍃𑌤𑍍𑌤𑌿𑌤𑌾𑌮𑍍 ॥ 1 ॥
𑌰𑌾𑌘𑌵𑌾𑌯 𑌚 𑌸𑌨𑍍𑌯𑌾𑌸𑌂 𑌦𑌤𑍍𑌤𑍍𑌵𑍇𑌮𑍇 𑌵𑌰𑌪𑌾𑌦𑍁𑌕𑍇 ।
𑌰𑌾𑌜𑍍𑌯𑌂 𑌚𑍇𑌦𑌮𑌯𑍋𑌧𑍍𑌯𑌾𑌂 𑌚 𑌧𑍂𑌤𑌪𑌾𑌪𑍋 𑌭𑌵𑌾𑌮𑌿 𑌚 ॥ 20 ॥
𑌅𑌭𑌿𑌷𑌿𑌕𑍍𑌤𑍇 𑌤𑍁 𑌕𑌾𑌕𑍁𑌤𑍍𑌸𑍍𑌥𑍇 𑌪𑍍𑌰𑌹𑍃𑌷𑍍𑌟𑌮𑍁𑌦𑌿𑌤𑍇 𑌜𑌨𑍇 ।
𑌪𑍍𑌰𑍀𑌤𑌿𑌰𑍍𑌮𑌮 𑌯𑌶𑌶𑍍𑌚𑍈𑌵 𑌭𑌵𑍇𑌦𑍍𑌰𑌾𑌜𑍍𑌯𑌾𑌚𑍍𑌚𑌤𑍁𑌰𑍍𑌗𑍁𑌣𑌮𑍍 ॥ 21 ॥
𑌏𑌵𑌂 𑌤𑍁 𑌵𑌿𑌲𑌪𑌂𑌦𑍀𑌨𑍋 𑌭𑌰𑌤 𑌸𑍍𑌸𑌮𑌹𑌾𑌯𑌶𑌾𑌃 ।
𑌨𑌂𑌦𑌿𑌗𑍍𑌰𑌾𑌮𑍇𑌽𑌕𑌰𑍋𑌦𑍍𑌰𑌾𑌜𑍍𑌯𑌂 𑌦𑍁𑌃𑌖𑌿𑌤𑍋 𑌮𑌂𑌤𑍍𑌰𑌿𑌭𑌿𑌸𑍍𑌸𑌹 ॥ 22 ॥
𑌸 𑌵𑌲𑍍𑌕𑌲𑌜𑌟𑌾𑌧𑌾𑌰𑍀 𑌮𑍁𑌨𑌿𑌵𑍇𑌷𑌧𑌰𑌃 𑌪𑍍𑌰𑌭𑍁𑌃 ।
𑌨𑌂𑌦𑌿𑌗𑍍𑌰𑌾𑌮𑍇𑌽𑌵𑌸𑌦𑍍𑌵𑍀𑌰 𑌸𑍍𑌸𑌸𑍈𑌨𑍍𑌯𑍋 𑌭𑌰𑌤𑌸𑍍𑌤𑌦𑌾 ॥ 23 ॥
𑌰𑌾𑌮𑌾𑌗𑌮𑌨𑌮𑌾𑌕𑌾𑌂𑌕𑍍𑌷𑌨𑍍𑌭𑌰𑌤𑍋 𑌭𑍍𑌰𑌾𑌤𑍃𑌵𑌤𑍍𑌸𑌲𑌃 ।
𑌭𑍍𑌰𑌾𑌤𑍁𑌰𑍍𑌵𑌚𑌨𑌕𑌾𑌰𑍀 𑌚 𑌪𑍍𑌰𑌤𑌿𑌜𑍍𑌞𑌾𑌪𑌾𑌰𑌗𑌸𑍍𑌤𑌥𑌾 ॥ 24 ॥
𑌪𑌾𑌦𑍁𑌕𑍇 𑌤𑍍𑌵𑌭𑌿𑌷𑌿𑌚𑍍𑌯𑌾𑌥 𑌨𑌂𑌦𑌿𑌗𑍍𑌰𑌾𑌮𑍇𑌽𑌵𑌸𑌤𑍍𑌤𑌦𑌾 ।
𑌸 𑌵𑌾𑌲𑌵𑍍𑌯𑌜𑌨𑌂 𑌛𑌤𑍍𑌰𑌂 𑌧𑌾𑌰𑌯𑌾𑌮𑌾𑌸 𑌸 𑌸𑍍𑌵𑌯𑌮𑍍 ।
𑌭𑌰𑌤 𑌶𑍍𑌶𑌾𑌸𑌨𑌂 𑌸𑌰𑍍𑌵𑌂 𑌪𑌾𑌦𑍁𑌕𑌾𑌭𑍍𑌯𑌾𑌂 𑌨𑌿𑌵𑍇𑌦𑌯𑌨𑍍 ॥ 25 ॥
𑌤𑌤𑌸𑍍𑌤𑍁 𑌭𑌰𑌤 𑌶𑌶𑍍𑌰𑍀𑌮𑌾𑌨𑌭𑌿𑌷𑌿𑌚𑍍𑌯𑌾𑌽𑌽𑌰𑍍𑌯𑌪𑌾𑌦𑍁𑌕𑍇 ।
𑌤𑌦𑌧𑍀𑌨𑌸𑍍𑌤𑌦𑌾 𑌰𑌾𑌜𑍍𑌯𑌂 𑌕𑌾𑌰𑌯𑌾𑌮𑌾𑌸 𑌸𑌰𑍍𑌵𑌦𑌾 ॥ 26 ॥
𑌤𑌦𑌾 𑌹𑌿 𑌯𑌤𑍍𑌕𑌾𑌰𑍍𑌯𑌮𑍁𑌪𑍈𑌤𑌿 𑌕𑌿𑌂𑌚𑌿𑌦𑍁𑌪𑌾𑌯𑌨𑌂 𑌚𑍋𑌪𑌹𑍃𑌤𑌂 𑌮𑌹𑌾𑌰𑍍𑌹𑌮𑍍 ।
𑌸 𑌪𑌾𑌦𑍁𑌕𑌾𑌭𑍍𑌯𑌾𑌂 𑌪𑍍𑌰𑌥𑌮𑌂 𑌨𑌿𑌵𑍇𑌦𑍍𑌯 𑌚𑌕𑌾𑌰 𑌪𑌶𑍍𑌚𑌾𑌦𑍍𑌭𑌰𑌤𑍋 𑌯𑌥𑌾𑌵𑌤𑍍 ॥ 2 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑍇 𑌪𑌂𑌚𑌦𑌶𑌾𑌧𑌿𑌕𑌶𑌤𑌤𑌮𑌸𑍍𑌸𑌰𑍍𑌗𑌃 ॥
