Meaning, Multimedia
View this in:
| English | Devanagari | Telugu | Tamil | Kannada | Malayalam | Gujarati | Odia | Bengali  |
| Marathi | Assamese | Punjabi | Hindi | Samskritam | Konkani | Nepali | Sinhala | Grantha  |

3.11 𑌅𑌰𑌣𑍍𑌯𑌕𑌾𑌂𑌡 - 𑌏𑌕𑌾𑌦𑌶 𑌸𑌰𑍍𑌗𑌃

𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌰𑌣𑍍𑌯𑌕𑌾𑌂𑌡𑌮𑍍 ।
𑌅𑌥 𑌏𑌕𑌾𑌦𑌶𑌸𑍍𑌸𑌰𑍍𑌗𑌃 ।

𑌅𑌗𑍍𑌰𑌤𑌃 𑌪𑍍𑌰𑌯𑌯𑍌 𑌰𑌾𑌮𑌸𑍍𑌸𑍀𑌤𑌾 𑌮𑌧𑍍𑌯𑍇 𑌸𑍁𑌮𑌧𑍍𑌯𑌮𑌾 ।
𑌪𑍃𑌷𑍍𑌠𑌤𑌸𑍍𑌤𑍁 𑌧𑌨𑍁𑌷𑍍𑌪𑌾𑌣𑌿𑌰𑍍𑌲𑌕𑍍𑌷𑍍𑌮𑌣𑍋𑌽𑌨𑍁𑌜𑌗𑌾𑌮 𑌹 ॥ 1 ॥

𑌤𑍌 𑌪𑌶𑍍𑌯𑌮𑌾𑌨𑍌 𑌵𑌿𑌵𑌿𑌧𑌾𑌨𑍍 𑌶𑍈𑌲𑌪𑍍𑌰𑌸𑍍𑌥𑌾𑌨𑍍𑌵𑌨𑌾𑌨𑌿 𑌚 ।
𑌨𑌦𑍀𑌶𑍍𑌚 𑌵𑌿𑌵𑌿𑌧𑌾 𑌰𑌮𑍍𑌯𑌾 𑌜𑌗𑍍𑌮𑌤𑍁𑌸𑍍𑌸𑍀𑌤𑌯𑌾 𑌸𑌹 ॥ 2 ॥

𑌸𑌾𑌰𑌸𑌾𑌂𑌶𑍍𑌚𑌕𑍍𑌰𑌵𑌾𑌕𑌾𑌂𑌶𑍍𑌚 𑌨𑌦𑍀𑌪𑍁𑌲𑌿𑌨𑌚𑌾𑌰𑌿𑌣𑌃 ।
𑌸𑌰𑌾𑌂𑌸𑌿 𑌚 𑌸𑌪𑌦𑍍𑌮𑌾𑌨𑌿 𑌯𑍁𑌕𑍍𑌤𑌾𑌨𑌿 𑌜𑌲𑌜𑍈𑌃 𑌖𑌗𑍈𑌃 ॥ 3 ॥

𑌯𑍂𑌥𑌬𑌦𑍍𑌧𑌾𑌂𑌶𑍍𑌚 𑌪𑍃𑌷𑌤𑌾𑌨𑍍𑌮𑌦𑍋𑌨𑍍𑌮𑌤𑍍𑌤𑌾𑌨𑍍 𑌵𑌿𑌷𑌾𑌣𑌿𑌨𑌃 ।
𑌮𑌹𑌿𑌷𑌾𑌂𑌶𑍍𑌚 𑌵𑌰𑌾𑌹𑌾𑌂𑌶𑍍𑌚 𑌨𑌾𑌗𑌾𑌂𑌶𑍍𑌚 𑌦𑍍𑌰𑍁𑌮𑌵𑍈𑌰𑌿𑌣𑌃 ॥ 4 ॥

𑌤𑍇 𑌗𑌤𑍍𑌵𑌾 𑌦𑍂𑌰𑌮𑌧𑍍𑌵𑌾𑌨𑌂 𑌲𑌂𑌬𑌮𑌾𑌨𑍇 𑌦𑌿𑌵𑌾𑌕𑌰𑍇 ।
𑌦𑌦𑍃𑌶𑍁𑌸𑍍𑌸𑌹𑌿𑌤𑌾 𑌰𑌮𑍍𑌯𑌂 𑌤𑌟𑌾𑌕𑌂 𑌯𑍋𑌜𑌨𑌾𑌯𑌤𑌮𑍍 ॥ 5 ॥

𑌪𑌦𑍍𑌮𑌪𑍁𑌷𑍍𑌕𑌰𑌸𑌂𑌬𑌾𑌧𑌂 𑌗𑌜𑌯𑍂𑌥𑍈𑌰𑌲𑌂𑌕𑍃𑌤𑌮𑍍 ।
𑌸𑌾𑌰𑌸𑍈𑌰𑍍𑌹𑌂𑌸𑌕𑌾𑌦𑌂𑌬𑍈𑌸𑍍𑌸𑌂𑌕𑍁𑌲𑌂 𑌜𑌲𑌚𑌾𑌰𑌿𑌭𑌿𑌃 ॥ 6 ॥

𑌪𑍍𑌰𑌸𑌨𑍍𑌨𑌸𑌲𑌿𑌲𑍇 𑌰𑌮𑍍𑌯𑍇 𑌤𑌸𑍍𑌮𑌿𑌨𑍍𑌸𑌰𑌸𑌿 𑌶𑍁𑌶𑍍𑌰𑍁𑌵𑍇 ।
𑌗𑍀𑌤𑌵𑌾𑌦𑌿𑌤𑍍𑌰𑌨𑌿𑌰𑍍𑌘𑍋𑌷𑍋 𑌨 𑌤𑍁 𑌕𑌶𑍍𑌚𑌨 𑌦𑍃𑌶𑍍𑌯𑌤𑍇 ॥ 𑍭 ॥

𑌤𑌤𑌃 𑌕𑍌𑌤𑍂𑌹𑌲𑌾𑌦𑍍𑌰𑌾𑌮𑍋 𑌲𑌕𑍍𑌷𑍍𑌮𑌣𑌶𑍍𑌚 𑌮𑌹𑌾𑌬𑌲𑌃 ।
𑌮𑍁𑌨𑌿𑌂 𑌧𑌰𑍍𑌮𑌭𑍃𑌤𑌂 𑌨𑌾𑌮 𑌪𑍍𑌰𑌷𑍍𑌟𑍁𑌂 𑌸𑌮𑍁𑌪𑌚𑌕𑍍𑌰𑌮𑍇 ॥ 𑍮 ॥

𑌇𑌦𑌮𑌤𑍍𑌯𑌦𑍍𑌭𑍁𑌤𑌂 𑌶𑍍𑌰𑍁𑌤𑍍𑌵𑌾 𑌸𑌰𑍍𑌵𑍇𑌷𑌾𑌂 𑌨𑍋 𑌮𑌹𑌾𑌮𑍁𑌨𑍇 ।
𑌕𑍌𑌤𑍂𑌹𑌲𑌂 𑌮𑌹𑌜𑍍𑌜𑌾𑌤𑌂 𑌕𑌿𑌮𑌿𑌦𑌂 𑌸𑌾𑌧𑍁 𑌕𑌥𑍍𑌯𑌤𑌾𑌮𑍍 ॥ 𑍯 ॥

𑌵𑌕𑍍𑌤𑌵𑍍𑌯𑌂 𑌯𑌦𑌿 𑌚𑍇𑌦𑌵𑌿𑌪𑍍𑌰 𑌨𑌾𑌤𑌿𑌗𑍁𑌹𑍍𑌯𑌮𑌪𑌿 𑌪𑍍𑌰𑌭𑍋 ।
𑌤𑍇𑌨𑍈𑌵𑌮𑍁𑌕𑍍𑌤𑍋 𑌧𑌰𑍍𑌮𑌾𑌤𑍍𑌮𑌾 𑌰𑌾𑌘𑌵𑍇𑌣 𑌮𑍁𑌨𑌿𑌸𑍍𑌤𑌦𑌾 ॥ 10 ॥

𑌪𑍍𑌰𑌭𑌵𑌂 𑌸𑌰𑌸𑌃 𑌕𑍃𑌤𑍍𑌸𑍍𑌨𑌮𑌾𑌖𑍍𑌯𑌾𑌤𑍁𑌮𑍁𑌪𑌚𑌕𑍍𑌰𑌮𑍇 ।
𑌇𑌦𑌂 𑌪𑌂𑌚𑌾𑌪𑍍𑌸𑌰𑍋 𑌨𑌾𑌮 𑌤𑌟𑌾𑌕𑌂 𑌸𑌾𑌰𑍍𑌵𑌕𑌾𑌲𑌿𑌕𑌮𑍍 ॥ 11 ॥

𑌨𑌿𑌰𑍍𑌮𑌿𑌤𑌂 𑌤𑌪𑌸𑌾 𑌰𑌾𑌮 𑌮𑍁𑌨𑌿𑌨𑌾 𑌮𑌾𑌂𑌡𑌕𑌰𑍍𑌣𑌿𑌨𑌾 ।
𑌸 𑌹𑌿 𑌤𑍇𑌪𑍇 𑌤𑌪𑌸𑍍𑌤𑍀𑌵𑍍𑌰𑌂 𑌮𑌾𑌂𑌡𑌕𑌰𑍍𑌣𑌿𑌰𑍍𑌮𑌹𑌾𑌮𑍁𑌨𑌿𑌃 ॥ 12 ॥

𑌦𑌶𑌵𑌰𑍍𑌷𑌸𑌹𑌸𑍍𑌰𑌾𑌣𑌿 𑌵𑌾𑌯𑍁𑌭𑌕𑍍𑌷𑍋 𑌜𑌲𑌾𑌶𑍍𑌰𑌯𑌃 ।
𑌤𑌤𑌃 𑌪𑍍𑌰𑌵𑍍𑌯𑌥𑌿𑌤𑌾𑌸𑍍𑌸𑌰𑍍𑌵𑍇 𑌦𑍇𑌵𑌾𑌸𑍍𑌸𑌾𑌗𑍍𑌨𑌿𑌪𑍁𑌰𑍋𑌗𑌮𑌾𑌃 ॥ 13 ॥

𑌅𑌬𑍍𑌰𑍁𑌵𑌨𑍍 𑌵𑌚𑌨𑌂 𑌸𑌰𑍍𑌵𑍇 𑌪𑌰𑌸𑍍𑌪𑌰𑌸𑌮𑌾𑌗𑌤𑌾𑌃 ।
𑌅𑌸𑍍𑌮𑌾𑌕𑌂 𑌕𑌸𑍍𑌯𑌚𑌿𑌤𑍍 𑌸𑍍𑌥𑌾𑌨𑌮𑍇𑌷 𑌪𑍍𑌰𑌾𑌰𑍍𑌥𑌯𑌤𑍇 𑌮𑍁𑌨𑌿𑌃 ॥ 14 ॥

𑌇𑌤𑌿 𑌸𑌂𑌵𑌿𑌗𑍍𑌨𑌮𑌨𑌸𑌸𑍍𑌸𑌰𑍍𑌵𑍇 𑌤𑍇 𑌤𑍍𑌰𑌿𑌦𑌿𑌵𑍌𑌕𑌸𑌃 ।
𑌤𑌤𑍍𑌰 𑌕𑌰𑍍𑌤𑍁𑌂 𑌤𑌪𑍋𑌵𑌿𑌘𑍍𑌨𑌂 𑌦𑍇𑌵𑍈𑌸𑍍𑌸𑌰𑍍𑌵𑍈𑌰𑍍𑌨𑌿𑌯𑍋𑌜𑌿𑌤𑌾𑌃 ॥ 15 ॥

𑌪𑍍𑌰𑌧𑌾𑌨𑌾𑌪𑍍𑌸𑌰𑌸𑌃 𑌪𑌂𑌚 𑌵𑌿𑌦𑍍𑌯𑍁𑌚𑍍𑌚𑌲𑌿𑌤𑌵𑌰𑍍𑌚𑌸𑌃 ।
𑌅𑌪𑍍𑌸𑌰𑍋𑌭𑌿𑌸𑍍𑌤𑌤𑌸𑍍𑌤𑌾𑌭𑌿𑌰𑍍𑌮𑍁𑌨𑌿𑌰𑍍𑌦𑍃𑌷𑍍𑌟𑌪𑌰𑌾𑌵𑌰𑌃 ॥ 16 ॥

𑌨𑍀𑌤𑍋 𑌮𑌦𑌨𑌵𑌶𑍍𑌯𑌤𑍍𑌵𑌂 𑌸𑍁𑌰𑌾𑌣𑌾𑌂 𑌕𑌾𑌰𑍍𑌯𑌸𑌿𑌦𑍍𑌧𑌯𑍇 ।
𑌤𑌾𑌶𑍍𑌚𑍈𑌵𑌾𑌪𑍍𑌸𑌰𑌸𑌃 𑌪𑌂𑌚 𑌮𑍁𑌨𑍇𑌃 𑌪𑌤𑍍𑌨𑍀𑌤𑍍𑌵𑌮𑌾𑌗𑌤𑌾𑌃 ॥ 1𑍭 ॥

𑌤𑌟𑌾𑌕𑍇 𑌨𑌿𑌰𑍍𑌮𑌿𑌤𑌂 𑌤𑌾𑌸𑌾𑌮𑌸𑍍𑌮𑌿𑌨𑍍𑌨𑌂𑌤𑌰𑍍𑌹𑌿𑌤𑌂 𑌗𑍃𑌹𑌮𑍍 ।
𑌤𑌥𑍈𑌵𑌾𑌪𑍍𑌸𑌰𑌸𑌃 𑌪𑌂𑌚 𑌨𑌿𑌵𑌸𑌂𑌤𑍍𑌯𑍋 𑌯𑌥𑌾𑌸𑍁𑌖𑌮𑍍 ॥ 1𑍮 ॥

𑌰𑌮𑌯𑌂𑌤𑌿 𑌤𑌪𑍋𑌯𑍋𑌗𑌾𑌨𑍍𑌮𑍁𑌨𑌿𑌂 𑌯𑍌𑌵𑌨𑌮𑌾𑌸𑍍𑌥𑌿𑌤𑌮𑍍 ।
𑌤𑌾𑌸𑌾𑌂 𑌸𑌂𑌕𑍍𑌰𑍀𑌡𑌮𑌾𑌨𑌾𑌨𑌾𑌮𑍇𑌷 𑌵𑌾𑌦𑌿𑌤𑍍𑌰𑌨𑌿𑌸𑍍𑌸𑍍𑌵𑌨𑌃 ॥ 1𑍯 ॥

𑌶𑍍𑌰𑍂𑌯𑌤𑍇 𑌭𑍂𑌷𑌣𑍋𑌨𑍍𑌮𑌿𑌶𑍍𑌰𑍋 𑌗𑍀𑌤𑌶𑌬𑍍𑌦𑍋 𑌮𑌨𑍋𑌹𑌰𑌃 ।
𑌆𑌶𑍍𑌚𑌰𑍍𑌯𑌮𑌿𑌤𑌿 𑌤𑌸𑍍𑌯𑍈𑌤𑌦𑍍𑌵𑌚𑌨𑌂 𑌭𑌾𑌵𑌿𑌤𑌾𑌤𑍍𑌮𑌨𑌃 ॥ 20 ॥

𑌰𑌾𑌘𑌵𑌃 𑌪𑍍𑌰𑌤𑌿𑌜𑌗𑍍𑌰𑌾𑌹 𑌸𑌹 𑌭𑍍𑌰𑌾𑌤𑍍𑌰𑌾 𑌮𑌹𑌾𑌯𑌶𑌾𑌃 ।
𑌏𑌵𑌂 𑌕𑌥𑌯𑌮𑌾𑌨𑌸𑍍𑌯 𑌦𑌦𑌰𑍍𑌶𑌾𑌶𑍍𑌰𑌮𑌮𑌂𑌡𑌲𑌮𑍍 ॥ 21 ॥

𑌕𑍁𑌶𑌚𑍀𑌰𑌪𑌰𑌿𑌕𑍍𑌷𑌿𑌪𑍍𑌤𑌂 𑌬𑍍𑌰𑌾𑌹𑍍𑌮𑍍𑌯𑌾 𑌲𑌕𑍍𑌷𑍍𑌮𑍍𑌯𑌾 𑌸𑌮𑌾𑌵𑍃𑌤𑌮𑍍 ।
𑌪𑍍𑌰𑌵𑌿𑌶𑍍𑌯 𑌸𑌹 𑌵𑍈𑌦𑍇𑌹𑍍𑌯𑌾 𑌲𑌕𑍍𑌷𑍍𑌮𑌣𑍇𑌨 𑌚 𑌰𑌾𑌘𑌵𑌃 ॥ 22 ॥

𑌉𑌵𑌾𑌸 𑌮𑍁𑌨𑌿𑌭𑌿𑌸𑍍𑌸𑌰𑍍𑌵𑍈𑌃 𑌪𑍂𑌜𑍍𑌯𑌮𑌾𑌨𑍋 𑌮𑌹𑌾𑌯𑌶𑌾𑌃 ।
𑌤𑌦𑌾 𑌤𑌸𑍍𑌮𑌿𑌨𑍍𑌸𑌕𑌾𑌕𑍁𑌤𑍍𑌥𑍍𑌸𑌃 𑌶𑍍𑌰𑍀𑌮𑌤𑍍𑌯𑌾𑌶𑍍𑌰𑌮𑌮𑌂𑌡𑌲𑍇 ॥ 23 ॥

𑌉𑌷𑌿𑌤𑍍𑌵𑌾 𑌤𑍁 𑌸𑍁𑌖𑌂 𑌤𑌤𑍍𑌰 𑌪𑍂𑌜𑍍𑌯𑌮𑌾𑌨𑍋 𑌮𑌹𑌰𑍍𑌷𑌿𑌭𑌿𑌃 ।
𑌜𑌗𑌾𑌮 𑌚𑌾𑌶𑍍𑌰𑌮𑌾𑌂𑌸𑍍𑌤𑍇𑌷𑌾𑌂 𑌪𑌰𑍍𑌯𑌾𑌯𑍇𑌣 𑌤𑌪𑌸𑍍𑌵𑌿𑌨𑌾𑌮𑍍 ॥ 24 ॥

𑌯𑍇𑌷𑌾𑌮𑍁𑌷𑌿𑌤𑌵𑌾𑌨𑍍 𑌪𑍂𑌰𑍍𑌵𑌂 𑌸𑌕𑌾𑌶𑍇 𑌸 𑌮𑌹𑌾𑌸𑍍𑌤𑍍𑌰𑌵𑌿𑌤𑍍 ।
𑌕𑍍𑌵𑌚𑌿𑌤𑍍𑌪𑌰𑌿𑌦𑌶𑌾𑌨𑍍𑌮𑌾𑌸𑌾𑌨𑍇𑌕𑌂 𑌸𑌂𑌵𑌤𑍍𑌸𑌰𑌂 𑌕𑍍𑌵𑌚𑌿𑌤𑍍 ॥ 25 ॥

𑌕𑍍𑌵𑌚𑌿𑌚𑍍𑌛 𑌚𑌤𑍁𑌰𑍋 𑌮𑌾𑌸𑌾𑌨𑍍 𑌪𑌂𑌚 𑌷𑌟𑍍𑌚𑌾𑌪𑌰𑌾𑌨𑍍𑌕𑍍𑌵𑌚𑌿𑌤𑍍 ।
𑌅𑌪𑌰𑌤𑍍𑌰𑌾𑌧𑌿𑌕𑌂 𑌮𑌾𑌸𑌾𑌦𑌪𑍍𑌯𑌰𑍍𑌧𑌮𑌧𑌿𑌕𑌂 𑌕𑍍𑌵𑌚𑌿𑌤𑍍 ॥ 26 ॥

𑌤𑍍𑌰𑍀𑌨𑍍𑌮𑌾𑌸𑌾𑌨𑌷𑍍𑌟𑌮𑌾𑌸𑌾𑌂𑌶𑍍𑌚 𑌰𑌾𑌘𑌵𑍋 𑌨𑍍𑌯𑌵𑌸𑌤𑍍𑌸𑍁𑌖𑌮𑍍 ।
𑌤𑌥𑌾 𑌸𑌂𑌵𑌸𑌤𑌸𑍍𑌤𑌸𑍍𑌯 𑌮𑍁𑌨𑍀𑌨𑌾𑌮𑌾𑌶𑍍𑌰𑌮𑍇𑌷𑍁 𑌵𑍈 ॥ 2𑍭 ॥

𑌰𑌮𑌤𑌶𑍍𑌚𑌾𑌨𑍁𑌕𑍂𑌲𑍍𑌯𑍇𑌨 𑌯𑌯𑍁𑌸𑍍𑌸𑌂𑌵𑌤𑍍𑌸𑌰𑌾 𑌦𑌶 ।
𑌪𑌰𑌿𑌵𑍃𑌤𑍍𑌯 𑌚 𑌧𑌰𑍍𑌮𑌜𑍍𑌞𑍋 𑌰𑌾𑌘𑌵𑌸𑍍𑌸𑌹 𑌸𑍀𑌤𑌯𑌾 ॥ 2𑍮 ॥

𑌸𑍁𑌤𑍀𑌕𑍍𑌷𑍍𑌣𑌸𑍍𑌯𑌾𑌶𑍍𑌰𑌮𑌂 𑌶𑍍𑌰𑍀𑌮𑌾𑌨𑍍𑌪𑍁𑌨𑌰𑍇𑌵𑌾𑌜𑌗𑌾𑌮 𑌹 ।
𑌸 𑌤𑌮𑌾𑌶𑍍𑌰𑌮𑌮𑌾𑌸𑌾𑌦𑍍𑌯 𑌮𑍁𑌨𑌿𑌭𑌿𑌃 𑌪𑍍𑌰𑌤𑌿𑌪𑍂𑌜𑌿𑌤𑌃 ॥ 2𑍯 ॥

𑌤𑌤𑍍𑌰𑌾𑌪𑌿 𑌨𑍍𑌯𑌵𑌸𑌦𑍍𑌰𑌾𑌮𑌃 𑌕𑌂𑌚𑌿𑌤𑍍𑌕𑌾𑌲𑌮𑌰𑌿𑌂𑌦𑌮𑌃 ।
𑌤𑌦𑌾𑌶𑍍𑌰𑌮𑌸𑍍𑌥𑍋 𑌵𑌿𑌨𑌯𑌾𑌤𑍍𑌕𑌦𑌾𑌚𑌿𑌤𑍍𑌤𑌂 𑌮𑌹𑌾𑌮𑍁𑌨𑌿𑌮𑍍 ॥ 30 ॥

𑌉𑌪𑌾𑌸𑍀𑌨𑌸𑍍𑌸𑌕𑌾𑌕𑍁𑌤𑍍𑌸𑍍𑌥𑌸𑍍𑌸𑍁𑌤𑍀𑌕𑍍𑌷𑍍𑌣𑌮𑌿𑌦𑌮𑌬𑍍𑌰𑌵𑍀𑌤𑍍 ।
𑌅𑌸𑍍𑌮𑌿𑌨𑍍𑌨𑌰𑌣𑍍𑌯𑍇 𑌭𑌗𑌵𑌾𑌨𑌗𑌸𑍍𑌤𑍍𑌯𑍋 𑌮𑍁𑌨𑌿𑌸𑌤𑍍𑌤𑌮𑌃 ॥ 31 ॥

𑌵𑌸𑌤𑍀𑌤𑌿 𑌮𑌯𑌾 𑌨𑌿𑌤𑍍𑌯𑌂 𑌕𑌥𑌾𑌃 𑌕𑌥𑌯𑌤𑌾𑌂 𑌶𑍍𑌰𑍁𑌤𑌮𑍍 ।
𑌨 𑌤𑍁 𑌜𑌾𑌨𑌾𑌮𑌿 𑌤𑌂 𑌦𑍇𑌶𑌂 𑌵𑌨𑌸𑍍𑌯𑌾𑌸𑍍𑌯 𑌮𑌹𑌤𑍍𑌤𑌯𑌾 ॥ 32 ॥

𑌕𑍁𑌤𑍍𑌰𑌾𑌶𑍍𑌰𑌮𑌪𑌦𑌂 𑌰𑌮𑍍𑌯𑌂 𑌮𑌹𑌰𑍍𑌷𑍇𑌸𑍍𑌤𑌸𑍍𑌯 𑌧𑍀𑌮𑌤𑌃 ।
𑌪𑍍𑌰𑌸𑌾𑌦𑌾𑌤𑍍𑌤𑌤𑍍𑌰 𑌭𑌵𑌤𑌸𑍍𑌸𑌾𑌨𑍁𑌜𑌸𑍍𑌸𑌹 𑌸𑍀𑌤𑌯𑌾 ॥ 33 ॥

𑌅𑌗𑌸𑍍𑌤𑍍𑌯𑌮𑌭𑌿𑌗𑌚𑍍𑌛𑍇𑌯𑌮𑌭𑌿𑌵𑌾𑌦𑌯𑌿𑌤𑍁𑌂 𑌮𑍁𑌨𑌿𑌮𑍍 ।
𑌮𑌨𑍋𑌰𑌥𑍋 𑌮𑌹𑌾𑌨𑍇𑌷 𑌹𑍃𑌦𑌿 𑌮𑍇 𑌪𑌰𑌿𑌵𑌰𑍍𑌤𑌤𑍇 ॥ 34 ॥

𑌯𑌦𑍍𑌯𑌹𑌂 𑌤𑌂 𑌮𑍁𑌨𑌿𑌵𑌰𑌂 𑌶𑍁𑌶𑍍𑌰𑍂𑌷𑍇𑌯𑌮𑌪𑌿 𑌸𑍍𑌵𑌯𑌮𑍍 ।
𑌇𑌤𑌿 𑌰𑌾𑌮𑌸𑍍𑌯 𑌸 𑌮𑍁𑌨𑌿𑌶𑍍𑌶𑍍𑌰𑍁𑌤𑍍𑌵𑌾 𑌧𑌰𑍍𑌮𑌾𑌤𑍍𑌮𑌨𑍋 𑌵𑌚𑌃 ॥ 35 ॥

𑌸𑍁𑌤𑍀𑌕𑍍𑌷𑍍𑌣𑌃 𑌪𑍍𑌰𑌤𑍍𑌯𑍁𑌵𑌾𑌚𑍇𑌦𑌂 𑌪𑍍𑌰𑍀𑌤𑍋 𑌦𑌶𑌰𑌥𑌾𑌤𑍍𑌮𑌜𑌮𑍍 ।
𑌅𑌹𑌮𑌪𑍍𑌯𑍇𑌤𑌦𑍇𑌵 𑌤𑍍𑌵𑌾𑌂 𑌵𑌕𑍍𑌤𑍁𑌕𑌾𑌮𑌸𑍍𑌸𑌲𑌕𑍍𑌷𑍍𑌮𑌣𑌮𑍍 ॥ 36 ॥

𑌅𑌗𑌸𑍍𑌤𑍍𑌯𑌮𑌭𑌿𑌗𑌚𑍍𑌛𑍇𑌤𑌿 𑌸𑍀𑌤𑌯𑌾 𑌸𑌹 𑌰𑌾𑌘𑌵 ।
𑌦𑌿𑌷𑍍𑌟𑍍𑌯𑌾 𑌤𑍍𑌵𑌿𑌦𑌾𑌨𑍀𑌮𑌰𑍍𑌥𑍇𑌽𑌸𑍍𑌮𑌿𑌨𑍍 𑌸𑍍𑌵𑌯𑌮𑍇𑌵 𑌬𑍍𑌰𑌵𑍀𑌷𑌿 𑌮𑌾𑌮𑍍 ॥ 3𑍭 ॥

𑌅𑌹𑌮𑌾𑌖𑍍𑌯𑌾𑌮𑌿 𑌤𑍇 𑌵𑌤𑍍𑌸 𑌯𑌤𑍍𑌰𑌾𑌗𑌸𑍍𑌤𑍍𑌯𑍋 𑌮𑌹𑌾𑌮𑍁𑌨𑌿𑌃 ।
𑌯𑍋𑌜𑌨𑌾𑌨𑍍𑌯𑌾𑌶𑍍𑌰𑌮𑌾𑌤𑍍𑌤𑌾𑌤 𑌯𑌾𑌹𑌿 𑌚𑌤𑍍𑌵𑌾𑌰𑌿 𑌵𑍈 𑌤𑌤𑌃 ॥ 3𑍮 ॥

𑌦𑌕𑍍𑌷𑌿𑌣𑍇𑌨 𑌮𑌹𑌾𑌨𑍍 𑌶𑍍𑌰𑍀𑌮𑌾𑌨𑌗𑌸𑍍𑌤𑍍𑌯𑌭𑍍𑌰𑌾𑌤𑍁𑌰𑌾𑌶𑍍𑌰𑌮𑌃 ।
𑌸𑍍𑌥𑌲𑌪𑍍𑌰𑌾𑌯𑍇 𑌵𑌨𑍋𑌦𑍍𑌦𑍇𑌶𑍇 𑌪𑌿𑌪𑍍𑌪𑌲𑍀𑌵𑌨𑌶𑍋𑌭𑌿𑌤𑍇 ॥ 3𑍯 ॥

𑌬𑌹𑍁𑌪𑍁𑌷𑍍𑌪𑌫𑌲𑍇 𑌰𑌮𑍍𑌯𑍇 𑌨𑌾𑌨𑌾𑌶𑌕𑍁𑌨𑌿𑌨𑌾𑌦𑌿𑌤𑍇 ।
𑌪𑌦𑍍𑌮𑌿𑌨𑍍𑌯𑍋 𑌵𑌿𑌵𑌿𑌧𑌾𑌸𑍍𑌤𑌤𑍍𑌰 𑌪𑍍𑌰𑌸𑌨𑍍𑌨𑌸𑌲𑌿𑌲𑌾𑌶𑍍𑌶𑌿𑌵𑌾𑌃 ॥ 40 ॥

𑌹𑌂𑌸𑌕𑌾𑌰𑌂𑌡𑌵𑌾𑌕𑍀𑌰𑍍𑌣𑌾𑌶𑍍𑌚𑌕𑍍𑌰𑌵𑌾𑌕𑍋𑌪𑌶𑍋𑌭𑌿𑌤𑌾𑌃 ।
𑌤𑌤𑍍𑌰𑍈𑌕𑌾𑌂 𑌰𑌜𑌨𑍀𑌂 𑌵𑍍𑌯𑍁𑌷𑍍𑌯 𑌪𑍍𑌰𑌭𑌾𑌤𑍇 𑌰𑌾𑌮 𑌗𑌮𑍍𑌯𑌤𑌾𑌮𑍍 ॥ 41 ॥

𑌦𑌕𑍍𑌷𑌿𑌣𑌾𑌂 𑌦𑌿𑌶𑌮𑌾𑌸𑍍𑌥𑌾𑌯 𑌵𑌨𑌷𑌂𑌡𑌸𑍍𑌯 𑌪𑌾𑌰𑍍𑌶𑍍𑌵𑌤𑌃 ।
𑌤𑌤𑍍𑌰𑌾𑌗𑌸𑍍𑌤𑍍𑌯𑌾𑌶𑍍𑌰𑌮𑌪𑌦𑌂 𑌗𑌤𑍍𑌵𑌾 𑌯𑍋𑌜𑌨𑌮𑌂𑌤𑌰𑌾 ॥ 42 ॥

𑌰𑌮𑌣𑍀𑌯𑍇 𑌵𑌨𑍋𑌦𑍍𑌧𑍇𑌶𑍇 𑌬𑌹𑍁𑌪𑌾𑌦𑌪𑌸𑌂𑌵𑍃𑌤𑍇 ।
𑌰𑌂𑌸𑍍𑌯𑌤𑍇 𑌤𑌤𑍍𑌰 𑌵𑍈𑌦𑍇𑌹𑍀 𑌲𑌕𑍍𑌷𑍍𑌮𑌣𑌶𑍍𑌚 𑌸𑌹 𑌤𑍍𑌵𑌯𑌾 ॥ 43 ॥

𑌸 𑌹𑌿 𑌰𑌮𑍍𑌯𑍋 𑌵𑌨𑍋𑌦𑍍𑌦𑍇𑌶𑍋 𑌬𑌹𑍁𑌪𑌾𑌦𑌪𑌸𑌂𑌕𑍁𑌲𑌃 ।
𑌯𑌦𑌿 𑌬𑍁𑌦𑍍𑌧𑌿𑌃 𑌕𑍃𑌤𑌾 𑌦𑍍𑌰𑌷𑍍𑌟𑍁𑌮𑌗𑌸𑍍𑌤𑍍𑌯𑌂 𑌤𑌂 𑌮𑌹𑌾𑌮𑍁𑌨𑌿𑌮𑍍 ॥ 44 ॥

𑌅𑌦𑍍𑌯𑍈𑌵 𑌗𑌮𑌨𑍇 𑌬𑍁𑌦𑍍𑌧𑌿𑌂 𑌰𑍋𑌚𑌯𑌸𑍍𑌵 𑌮𑌹𑌾𑌯𑌶𑌃 ।
𑌇𑌤𑌿 𑌰𑌾𑌮𑍋 𑌮𑍁𑌨𑍇𑌶𑍍𑌶𑍍𑌰𑍁𑌤𑍍𑌵𑌾 𑌸𑌹 𑌭𑍍𑌰𑌾𑌤𑍍𑌰𑌾𑌭𑌿𑌵𑌾𑌦𑍍𑌯 𑌚 ॥ 45 ॥

𑌪𑍍𑌰𑌤𑌸𑍍𑌥𑍇𑌽𑌮𑍁𑌦𑍍𑌦𑌿𑌶𑍍𑌯 𑌸𑌾𑌨𑍁𑌜𑌸𑍍𑌸𑍀𑌤𑌯𑌾 𑌸𑌹 ।
𑌪𑌶𑍍𑌯𑌨𑍍𑌵𑌨𑌾𑌨𑌿 𑌰𑌮𑍍𑌯𑌾𑌣𑌿 𑌪𑌰𑍍𑌵𑌤𑌾𑌂𑌶𑍍𑌚𑌾𑌭𑍍𑌰𑌸𑌨𑍍𑌨𑌿𑌭𑌾𑌨𑍍 ॥ 46 ॥

𑌸𑌰𑌾𑌂𑌸𑌿 𑌸𑌰𑌿𑌤𑌶𑍍𑌚𑍈𑌵 𑌪𑌥𑌿 𑌮𑌾𑌰𑍍𑌗𑌵𑌶𑌾𑌨𑍁𑌗𑌾𑌃 ।
𑌸𑍁𑌤𑍀𑌕𑍍𑌷𑍍𑌣𑍇𑌨𑍋𑌪𑌦𑌿𑌷𑍍𑌟𑍇𑌨 𑌗𑌤𑍍𑌵𑌾 𑌤𑍇𑌨 𑌪𑌥𑌾 𑌸𑍁𑌖𑌮𑍍 ॥ 4𑍭 ॥

𑌇𑌦𑌂 𑌪𑌰𑌮𑌸𑌂𑌹𑍃𑌷𑍍𑌟𑍋 𑌵𑌾𑌕𑍍𑌯𑌂 𑌲𑌕𑍍𑌷𑍍𑌮𑌣𑌮𑌬𑍍𑌰𑌵𑍀𑌤𑍍 ।
𑌏𑌤𑌦𑍇𑌵𑌾𑌶𑍍𑌰𑌮𑌪𑌦𑌂 𑌨𑍂𑌨𑌂 𑌤𑌸𑍍𑌯 𑌮𑌹𑌾𑌤𑍍𑌮𑌨𑌃 ॥ 4𑍮 ॥

𑌅𑌗𑌸𑍍𑌤𑍍𑌯𑌸𑍍𑌯 𑌮𑍁𑌨𑍇𑌰𑍍𑌭𑍍𑌰𑌾𑌤𑍁𑌰𑍍𑌦𑍃𑌶𑍍𑌯𑌤𑍇 𑌪𑍁𑌣𑍍𑌯𑌕𑌰𑍍𑌮𑌣𑌃 ।
𑌯𑌥𑌾 𑌹𑌿 𑌮𑍇 𑌵𑌨𑌸𑍍𑌯𑌾𑌸𑍍𑌯 𑌜𑍍𑌞𑌾𑌤𑌾𑌃 𑌪𑌥𑌿 𑌸𑌹𑌸𑍍𑌰𑌶𑌃 ॥ 4𑍯 ॥

𑌸𑌨𑍍𑌨𑌤𑌾𑌃 𑌫𑌲𑌭𑌾𑌰𑍇𑌣 𑌪𑍁𑌷𑍍𑌪𑌭𑌾𑌰𑍇𑌣 𑌚 𑌦𑍍𑌰𑍁𑌮𑌾𑌃 ।
𑌪𑌿𑌪𑍍𑌪𑌲𑍀𑌨𑌾𑌂 𑌚 𑌪𑌕𑍍𑌵𑌾𑌨𑌾𑌂 𑌵𑌨𑌾𑌦𑌸𑍍𑌮𑌾𑌦𑍁𑌪𑌾𑌗𑌤𑌃 ॥ 50 ॥

𑌗𑌂𑌧𑍋𑌽𑌯𑌂 𑌪𑌵𑌨𑍋𑌕𑍍𑌷𑌿𑌪𑍍𑌤𑌸𑍍𑌸𑌹𑌸𑌾 𑌕𑌟𑍁𑌕𑍋𑌦𑌯𑌃 ।
𑌤𑌤𑍍𑌰 𑌤𑌤𑍍𑌰 𑌚 𑌦𑍃𑌶𑍍𑌯𑌂𑌤𑍇 𑌸𑌂𑌕𑍍𑌷𑌿𑌪𑍍𑌤𑌾𑌃 𑌕𑌾𑌷𑍍𑌠𑌸𑌂𑌚𑌯𑌾𑌃 ॥ 51 ॥

𑌲𑍂𑌨𑌾𑌶𑍍𑌚 𑌪𑌥𑌿 𑌦𑍃𑌶𑍍𑌯𑌂𑌤𑍇 𑌦𑌰𑍍𑌭𑌾 𑌵𑍈𑌡𑍂𑌰𑍍𑌯𑌵𑌰𑍍𑌚𑌸𑌃 ।
𑌏𑌤𑌚𑍍𑌚 𑌵𑌨𑌮𑌧𑍍𑌯𑌸𑍍𑌥𑌂 𑌕𑍃𑌷𑍍𑌣𑌾𑌭𑍍𑌰𑌶𑌿𑌖𑌰𑍋𑌪𑌮𑌮𑍍 ॥ 52 ॥

𑌪𑌾𑌵𑌕𑌸𑍍𑌯𑌾𑌶𑍍𑌰𑌮𑌸𑍍𑌥𑌸𑍍𑌯 𑌧𑍂𑌮𑌾𑌗𑍍𑌰𑌂 𑌸𑌂𑌪𑍍𑌰𑌦𑍃𑌶𑍍𑌯𑌤𑍇 ।
𑌵𑌿𑌵𑌿𑌕𑍍𑌤𑍇𑌷𑍁 𑌚 𑌤𑍀𑌰𑍍𑌥𑍇𑌷𑍁 𑌕𑍃𑌤𑌸𑍍𑌨𑌾𑌨𑌾 𑌦𑍍𑌵𑌿𑌜𑌾𑌤𑌯𑌃 ॥ 53 ॥

𑌪𑍁𑌷𑍍𑌪𑍋𑌪𑌹𑌾𑌰𑌂 𑌕𑍁𑌰𑍍𑌵𑌂𑌤𑌿 𑌕𑍁𑌸𑍁𑌮𑍈𑌸𑍍𑌸𑍍𑌵𑌯𑌮𑌰𑍍𑌜𑌿𑌤𑍈 ।
𑌤𑌤𑍍𑌸𑍁𑌤𑍀𑌕𑍍𑌷𑍍𑌣𑌸𑍍𑌯 𑌵𑌚𑌨𑌂 𑌯𑌥𑌾 𑌸𑍌𑌮𑍍𑌯 𑌮𑌯𑌾 𑌶𑍍𑌰𑍁𑌤𑌮𑍍 ॥ 54 ॥

𑌅𑌗𑌸𑍍𑌤𑍍𑌯𑌸𑍍𑌯𑌾𑌶𑍍𑌰𑌮𑍋 𑌭𑍍𑌰𑌾𑌤𑍁𑌰𑍍𑌨𑍂𑌨𑌮𑍇𑌷 𑌭𑌵𑌿𑌷𑍍𑌯𑌤𑌿 ।
𑌨𑌿𑌗𑍃𑌹𑍍𑌯 𑌤𑌪𑌸𑌾 𑌮𑍃𑌤𑍍𑌯𑍁𑌂 𑌲𑍋𑌕𑌾𑌨𑌾𑌂 𑌹𑌿𑌤𑌕𑌾𑌮𑍍𑌯𑌯𑌾 ॥ 55 ॥

𑌯𑌸𑍍𑌯 𑌭𑍍𑌰𑌾𑌤𑍍𑌰𑌾 𑌕𑍃𑌤𑍇𑌯𑌂 𑌦𑌿𑌕𑍍𑌛𑌰𑌣𑍍𑌯𑌾 𑌪𑍁𑌣𑍍𑌯𑌕𑌰𑍍𑌮𑌣𑌾 ।
𑌧𑌾𑌰𑌯𑌨𑍍 𑌬𑍍𑌰𑌾𑌹𑍍𑌮𑌣𑌂 𑌰𑍂𑌪𑌮𑌿𑌲𑍍𑌵𑌲𑌸𑍍𑌸𑌂𑌸𑍍𑌕𑍃𑌤𑌂 𑌵𑌦𑌨𑍍 ॥ 56 ॥

𑌆𑌮𑌂𑌤𑍍𑌰𑌯𑌤𑌿 𑌵𑌿𑌪𑍍𑌰𑌾𑌨𑍍𑌸𑍍𑌮𑌶𑍍𑌰𑌾𑌦𑍍𑌧𑌮𑍁𑌦𑍍𑌦𑌿𑌶𑍍𑌯 𑌨𑌿𑌰𑍍𑌘𑍃𑌣𑌃 ।
𑌭𑍍𑌰𑌾𑌤𑌰𑌂 𑌸𑌂𑌸𑍍𑌕𑍃𑌤𑌂 𑌕𑍃𑌤𑍍𑌵𑌾 𑌤𑌤𑌸𑍍𑌤𑌂 𑌮𑍇𑌷𑌰𑍂𑌪𑌿𑌣𑌮𑍍 ॥ 5𑍭 ॥

𑌤𑌾𑌨𑍍 𑌦𑍍𑌵𑌿𑌜𑌾𑌨𑍍𑌭𑍋𑌜𑌯𑌾𑌮𑌾𑌸 𑌶𑍍𑌰𑌾𑌦𑍍𑌧𑌦𑍃𑌷𑍍𑌟𑍇𑌨 𑌕𑌰𑍍𑌮𑌣𑌾 ।
𑌤𑌤𑍋 𑌭𑍁𑌕𑍍𑌤𑌵𑌤𑌾𑌂 𑌤𑍇𑌷𑌾𑌂 𑌵𑌿𑌪𑍍𑌰𑌾𑌣𑌾𑌮𑌿𑌲𑍍𑌵𑌲𑍋𑌽𑌬𑍍𑌰𑌵𑍀𑌤𑍍 ॥ 5𑍮 ॥

𑌵𑌾𑌤𑌾𑌪𑍇 𑌨𑌿𑌷𑍍𑌕𑍍𑌰𑌮𑌨𑍍𑌵𑍇𑌤𑌿 𑌸𑍍𑌵𑌰𑍇𑌣 𑌮𑌹𑌤𑌾 𑌵𑌦𑌨𑍍 ।
𑌤𑌤𑍋 𑌭𑍍𑌰𑌾𑌤𑍁𑌰𑍍𑌵𑌚𑌶𑍍𑌶𑍍𑌰𑍁𑌤𑍍𑌵𑌾 𑌵𑌾𑌤𑌾𑌪𑌿𑌰𑍍𑌮𑍇𑌷𑌵𑌨𑍍𑌨𑌦𑌨𑍍 ॥ 5𑍯 ॥

𑌭𑌿𑌤𑍍𑌤𑍍𑌵𑌾 𑌭𑌿𑌤𑍍𑌤𑍍𑌵𑌾 𑌶𑌰𑍀𑌰𑌾𑌣𑌿 𑌬𑍍𑌰𑌾𑌹𑍍𑌮𑌣𑌾𑌨𑌾𑌂 𑌵𑌿𑌨𑌿𑌷𑍍𑌪𑌤𑌤𑍍 ।
𑌬𑍍𑌰𑌾𑌹𑍍𑌮𑌾𑌣𑌾𑌨𑌾𑌂 𑌸𑌹𑌸𑍍𑌰𑌾𑌣𑌿 𑌤𑍈𑌰𑍇𑌵𑌂 𑌕𑌾𑌮𑌰𑍂𑌪𑌿𑌭𑌿𑌃 ॥ 60 ॥

𑌵𑌿𑌨𑌾𑌶𑌿𑌤𑌾𑌨𑌿 𑌸𑌂𑌹𑌤𑍍𑌯 𑌨𑌿𑌤𑍍𑌯𑌶𑌃 𑌪𑌿𑌶𑌿𑌤𑌾𑌶𑌨𑍈𑌃 ।
𑌅𑌗𑌸𑍍𑌤𑍍𑌯𑍇𑌨 𑌤𑌦𑌾 𑌦𑍇𑌵𑍈𑌃 𑌪𑍍𑌰𑌾𑌰𑍍𑌥𑌿𑌤𑍇𑌨 𑌮𑌹𑌰𑍍𑌷𑌿𑌣𑌾 ॥ 61 ॥

𑌅𑌨𑍁𑌭𑍂𑌯 𑌕𑌿𑌲 𑌶𑍍𑌰𑌾𑌦𑍍𑌧𑍇 𑌭𑌕𑍍𑌷𑌿𑌤𑌸𑍍𑌸𑌮𑌹𑌾𑌸𑍁𑌰𑌃 ।
𑌤𑌤𑌸𑍍𑌸𑌂𑌪𑌨𑍍𑌨𑌮𑌿𑌤𑍍𑌯𑍁𑌕𑍍𑌤𑍍𑌵𑌾 𑌦𑌤𑍍𑌤𑍍𑌵𑌾 𑌹𑌸𑍍𑌤𑍋𑌦𑌕𑌂 𑌤𑌤𑌃 ॥ 62 ॥

𑌭𑍍𑌰𑌾𑌤𑌰𑌂 𑌨𑌿𑌷𑍍𑌕𑍍𑌰𑌮𑌸𑍍𑌵𑍇𑌤𑌿 𑌚𑍇𑌲𑍍𑌵𑌲𑌸𑍍𑌸𑍋𑌽𑌭𑍍𑌯𑌭𑌾𑌷𑌤 ।
𑌸 𑌤𑌂 𑌤𑌥𑌾 𑌭𑌾𑌷𑌮𑌾𑌣𑌂 𑌭𑍍𑌰𑌾𑌤𑌰𑌂 𑌵𑌿𑌪𑍍𑌰𑌘𑌾𑌤𑌿𑌨𑌮𑍍 ॥ 63 ॥

𑌅𑌬𑍍𑌰𑌵𑍀𑌤𑍍𑌪𑍍𑌰𑌹𑌸𑌂𑌧𑍀𑌮𑌾𑌨𑌗𑌸𑍍𑌤𑍍𑌯𑍋 𑌮𑍁𑌨𑌿𑌸𑌤𑍍𑌤𑌮𑌃 ।
𑌕𑍁𑌤𑍋 𑌨𑌿𑌷𑍍𑌕𑍍𑌰𑌮𑌿𑌤𑍁𑌂 𑌶𑌕𑍍𑌤𑌿𑌰𑍍𑌮𑌯𑌾 𑌜𑍀𑌰𑍍𑌣𑌸𑍍𑌯 𑌰𑌕𑍍𑌷𑌸𑌃 ॥ 64 ॥

𑌭𑍍𑌰𑌾𑌤𑍁𑌸𑍍𑌤𑍇 𑌮𑍇𑌷𑌰𑍂𑌪𑌸𑍍𑌯 𑌗𑌤𑌸𑍍𑌯 𑌯𑌮𑌸𑌾𑌦𑌨𑌮𑍍 ।
𑌅𑌥 𑌤𑌸𑍍𑌯 𑌵𑌚𑌶𑍍𑌶𑍍𑌰𑍁𑌤𑍍𑌵𑌾 𑌭𑍍𑌰𑌾𑌤𑍁𑌰𑍍𑌨𑌿𑌧𑌨𑌸𑌂𑌶𑍍𑌰𑌯𑌮𑍍 ॥ 65 ॥

𑌪𑍍𑌰𑌧𑌰𑍍𑌷𑌯𑌿𑌤𑍁𑌮𑌾𑌰𑍇𑌭𑍇 𑌮𑍁𑌨𑌿𑌂 𑌕𑍍𑌰𑍋𑌧𑌾𑌨𑍍𑌨𑌿𑌶𑌾𑌚𑌰𑌃 ।
𑌸𑍋𑌽𑌭𑌿𑌦𑍍𑌰𑌵𑌨𑍍𑌮𑍁𑌨𑌿𑌶𑍍𑌰𑍇𑌷𑍍𑌠𑌂 𑌮𑍁𑌨𑌿𑌨𑌾 𑌦𑍀𑌪𑍍𑌤𑌤𑍇𑌜𑌸𑌾 ॥ 66 ॥

𑌚𑌕𑍍𑌷𑍁𑌷𑌾𑌨𑌲𑌕𑌲𑍍𑌪𑍇𑌨 𑌨𑌿𑌰𑍍𑌦𑌗𑍍𑌧𑍋 𑌨𑌿𑌧𑌨𑌂 𑌗𑌤𑌃 ।
𑌤𑌸𑍍𑌯𑌾𑌯𑌮𑌾𑌶𑍍𑌰𑌮𑍋 𑌭𑍍𑌰𑌾𑌤𑍁𑌸𑍍𑌤𑌟𑌾𑌕𑌵𑌨𑌶𑍋𑌭𑌿𑌤𑌃 ॥ 6𑍭 ॥

𑌵𑌿𑌪𑍍𑌰𑌾𑌨𑍁𑌕𑌂𑌪𑌯𑌾 𑌯𑍇𑌨 𑌕𑌰𑍍𑌮𑍇𑌦𑌂 𑌦𑍁𑌷𑍍𑌕𑌰𑌂 𑌕𑍃𑌤𑌮𑍍 ।
𑌏𑌵𑌂 𑌕𑌥𑌯𑌮𑌾𑌨𑌸𑍍𑌯 𑌤𑌸𑍍𑌯 𑌸𑍌𑌮𑌿𑌤𑍍𑌰𑌿𑌣𑌾 𑌸𑌹 ।
𑌰𑌾𑌮𑌸𑍍𑌯𑌾𑌸𑍍𑌤𑌂 𑌗𑌤𑌸𑍍𑌸𑍂𑌰𑍍𑌯𑌸𑍍𑌸𑌂𑌧𑍍𑌯𑌾𑌕𑌾𑌲𑍋𑌽𑌭𑍍𑌯𑌵𑌰𑍍𑌤𑌤𑌃 ॥ 6𑍮 ॥

𑌉𑌪𑌾𑌸𑍍𑌯 𑌪𑌶𑍍𑌚𑌿𑌮𑌾𑌂 𑌸𑌂𑌧𑍍𑌯𑌾𑌂 𑌸𑌹 𑌭𑍍𑌰𑌾𑌤𑍍𑌰𑌾 𑌯𑌥𑌾𑌵𑌿𑌧𑌿 ।
𑌪𑍍𑌰𑌵𑌿𑌵𑍇𑌶𑌾𑌽𑌶𑍍𑌰𑌮𑌪𑌦𑌂 𑌤𑌮𑍃𑌷𑌿𑌂 𑌸𑍋𑌽𑌭𑍍𑌯𑌵𑌾𑌦𑌯𑌤𑍍 ॥ 6𑍯 ॥

𑌸𑌮𑍍𑌯𑌕𑍍 𑌪𑍍𑌰𑌤𑌿𑌗𑍃𑌹𑍀𑌤𑌶𑍍𑌚 𑌮𑍁𑌨𑌿𑌨𑌾 𑌤𑍇𑌨 𑌰𑌾𑌘𑌵𑌃 ।
𑌨𑍍𑌯𑌵𑌸𑌤𑍍𑌤𑌾𑌂 𑌨𑌿𑌶𑌾𑌮𑍇𑌕𑌾𑌂 𑌪𑍍𑌰𑌾𑌶𑍍𑌯 𑌮𑍂𑌲𑌫𑌲𑌾𑌨𑌿 𑌚 ॥ 𑍭0 ॥

𑌤𑌸𑍍𑌯𑌾𑌂 𑌰𑌾𑌤𑍍𑌯𑍍𑌰𑌾𑌂 𑌵𑍍𑌯𑌤𑍀𑌤𑌾𑌯𑌾𑌂 𑌵𑌿𑌮𑌲𑍇 𑌸𑍂𑌰𑍍𑌯𑌮𑌂𑌡𑌲𑍇 ।
𑌭𑍍𑌰𑌾𑌤𑌰𑌂 𑌤𑌮𑌗𑌸𑍍𑌤𑍍𑌯𑌸𑍍𑌯 𑌹𑍍𑌯𑌾𑌮𑌂𑌤𑍍𑌰𑌯𑌤 𑌰𑌾𑌘𑌵𑌃 ॥ 𑍭1 ॥

𑌅𑌭𑌿𑌵𑌾𑌦𑌯𑍇 𑌤𑍍𑌵𑌾𑌂 𑌭𑌗𑌵𑌨𑍍 𑌸𑍁𑌖𑌮𑌧𑍍𑌯𑍁𑌷𑌿𑌤𑍋 𑌨𑌿𑌶𑌾𑌮𑍍 ।
𑌆𑌮𑌂𑌤𑍍𑌰𑌯𑍇 𑌤𑍍𑌵𑌾𑌂 𑌗𑌚𑍍𑌛𑌾𑌮𑌿 𑌗𑍁𑌰𑍁𑌂 𑌤𑍇 𑌦𑍍𑌰𑌷𑍍𑌟𑍁𑌮𑌗𑍍𑌰𑌜𑌮𑍍 ॥ 𑍭2 ॥

𑌗𑌮𑍍𑌯𑌤𑌾𑌮𑌿𑌤𑌿 𑌤𑍇𑌨𑍋𑌕𑍍𑌤𑍋 𑌜𑌗𑌾𑌮 𑌰𑌘𑍁𑌨𑌂𑌦𑌨𑌃 ।
𑌯𑌥𑍋𑌦𑍍𑌦𑌿𑌷𑍍𑌟𑍇𑌨 𑌮𑌾𑌰𑍍𑌗𑍇𑌣 𑌵𑌨𑌂 𑌤𑌚𑍍𑌚𑌾𑌵𑌲𑍋𑌕𑌯𑌨𑍍 ॥ 𑍭3 ॥

𑌨𑍀𑌵𑌾𑌰𑌾𑌨𑍍𑌪𑌨𑌸𑌾𑌂𑌸𑍍𑌤𑌾𑌲𑌾𑌂𑌸𑍍𑌤𑌿𑌮𑌿𑌶𑌾𑌨𑍍𑌵𑌂𑌚𑍁𑌲𑌾𑌂𑌧𑌵𑌾𑌨𑍍 ।
𑌚𑌿𑌰𑌿𑌬𑌿𑌲𑍍𑌵𑌾𑌨𑍍𑌮𑌧𑍂𑌕𑌾𑌂𑌶𑍍𑌚 𑌬𑌿𑌲𑍍𑌵𑌾𑌨𑌪𑌿 𑌚 𑌤𑌿𑌂𑌦𑍁𑌕𑌾𑌨𑍍 ॥ 𑍭4 ॥

𑌪𑍁𑌷𑍍𑌪𑌿𑌤𑌾𑌨𑍍𑌪𑍁𑌷𑍍𑌪𑌿𑌤𑌾𑌗𑍍𑌰𑌾𑌭𑌿𑌰𑍍𑌲𑌤𑌾𑌭𑌿𑌰𑌨𑍁𑌵𑍇𑌷𑍍𑌟𑌿𑌤𑌾𑌨𑍍 ।
𑌦𑌦𑌰𑍍𑌶 𑌰𑌾𑌮𑌶𑍍𑌶𑌤𑌶𑌸𑍍𑌤𑌤𑍍𑌰 𑌕𑌾𑌂𑌤𑌾𑌰𑌪𑌾𑌦𑌪𑌾𑌨𑍍 ॥ 𑍭5 ॥

𑌹𑌸𑍍𑌤𑌿𑌹𑌸𑍍𑌤𑍈𑌰𑍍𑌵𑌿𑌮𑍃𑌦𑌿𑌤𑌾𑌨𑍍𑌵𑌾𑌨𑌰𑍈𑌰𑍁𑌪𑌶𑍋𑌭𑌿𑌤𑌾𑌨𑍍 ।
𑌮𑌤𑍍𑌤𑍈𑌶𑍍𑌶𑌕𑍁𑌨𑌿𑌸𑌂𑌘𑍈𑌶𑍍𑌚 𑌶𑌤𑌶𑌶𑍍𑌚 𑌪𑍍𑌰𑌣𑌾𑌦𑌿𑌤𑌾𑌨𑍍 ॥ 𑍭6 ॥

𑌤𑌤𑍋𑌽𑌬𑍍𑌰𑌵𑍀𑌤𑍍𑌸𑌮𑍀𑌪𑌸𑍍𑌥𑌂 𑌰𑌾𑌮𑍋 𑌰𑌾𑌜𑍀𑌵𑌲𑍋𑌚𑌨𑌃 ।
𑌪𑍃𑌷𑍍𑌠𑌤𑍋𑌽𑌨𑍁𑌗𑌤𑌂 𑌵𑍀𑌰𑌂 𑌲𑌕𑍍𑌷𑍍𑌮𑌣𑌂 𑌲𑌕𑍍𑌷𑍍𑌮𑌿𑌵𑌰𑍍𑌧𑌨𑌮𑍍 ॥ 𑍭𑍭 ॥

𑌸𑍍𑌨𑌿𑌗𑍍𑌧𑌪𑌤𑍍𑌰𑌾 𑌯𑌥𑌾 𑌵𑍃𑌕𑍍𑌷𑌾 𑌯𑌥𑌾 𑌕𑍍𑌷𑌾𑌂𑌤𑌾 𑌮𑍃𑌗𑌦𑍍𑌵𑌿𑌜𑌾𑌃 ।
𑌆𑌶𑍍𑌰𑌮𑍋 𑌨𑌾𑌤𑌿𑌦𑍂𑌰𑌸𑍍𑌥𑍋 𑌮𑌹𑌰𑍍𑌷𑍇𑌰𑍍𑌭𑌾𑌵𑌿𑌤𑌾𑌤𑍍𑌮𑌨𑌃 ॥ 𑍭𑍮 ॥

𑌅𑌗𑌸𑍍𑌤𑍍𑌯 𑌇𑌤𑌿 𑌵𑌿𑌖𑍍𑌯𑌾𑌤𑍋 𑌲𑍋𑌕𑍇 𑌸𑍍𑌵𑍇𑌨𑍈𑌵 𑌕𑌰𑍍𑌮𑌣𑌾 ।
𑌆𑌶𑍍𑌰𑌮𑍋 𑌦𑍃𑌶𑍍𑌯𑌤𑍇 𑌤𑌸𑍍𑌯 𑌪𑌰𑌿𑌶𑍍𑌰𑌾𑌂𑌤𑌶𑍍𑌰𑌮𑌾𑌪𑌹𑌃 ॥ 𑍭𑍯 ॥

𑌪𑍍𑌰𑌾𑌜𑍍𑌯𑌧𑍂𑌮𑌾𑌕𑍁𑌲𑌵𑌨𑌶𑍍𑌚𑍀𑌰𑌮𑌾𑌲𑌾𑌪𑌰𑌿𑌷𑍍𑌕𑍃𑌤𑌃 ।
𑌪𑍍𑌰𑌶𑌾𑌂𑌤𑌮𑍃𑌗𑌯𑍂𑌥𑌶𑍍𑌚 𑌨𑌾𑌨𑌾𑌶𑌕𑍁𑌨𑌿𑌨𑌾𑌦𑌿𑌤𑌃 ॥ 𑍮0 ॥

𑌤𑌸𑍍𑌯𑍇𑌦𑌮𑌾𑌶𑍍𑌰𑌮𑌪𑌦𑌂 𑌪𑍍𑌰𑌭𑌾𑌵𑌾𑌦𑍍𑌯𑌸𑍍𑌯 𑌰𑌾𑌕𑍍𑌷𑌸𑍈𑌃 ।
𑌦𑌿𑌗𑌿𑌯𑌂 𑌦𑌕𑍍𑌷𑌿𑌣𑌾 𑌤𑍍𑌰𑌾𑌸𑌾𑌦𑍍𑌦𑍃𑌶𑍍𑌯𑌤𑍇 𑌨𑍋𑌪𑌭𑍁𑌜𑍍𑌯𑌤𑍇 ॥ 𑍮1 ॥

𑌯𑌦𑌾 𑌪𑍍𑌰𑌭𑍃𑌤𑌿 𑌚𑌾𑌕𑍍𑌰𑌾𑌂𑌤𑌾 𑌦𑌿𑌗𑌿𑌯𑌂 𑌪𑍁𑌣𑍍𑌯𑌕𑌰𑍍𑌮𑌣𑌾 ।
𑌤𑌦𑌾 𑌪𑍍𑌰𑌭𑍃𑌤𑌿 𑌨𑌿𑌰𑍍𑌵𑍈𑌰𑌾𑌃 𑌪𑍍𑌰𑌶𑌾𑌂𑌤𑌾 𑌰𑌜𑌨𑍀𑌚𑌰𑌾𑌃 ॥ 𑍮2 ॥

𑌨𑌾𑌮𑍍𑌨𑌾 𑌚𑍇𑌯𑌂 𑌭𑌗𑌵𑌤𑍋 𑌦𑌕𑍍𑌷𑌿𑌣𑌾 𑌦𑌿𑌕𑍍𑌪𑍍𑌰𑌦𑌕𑍍𑌷𑌿𑌣𑌾 ।
𑌪𑍍𑌰𑌥𑌿𑌤𑌾 𑌤𑍍𑌰𑌿𑌷𑍁 𑌲𑍋𑌕𑍇𑌷𑍁 𑌦𑍁𑌰𑍍𑌧𑌰𑍍𑌷𑌾 𑌕𑍍𑌰𑍂𑌰𑌕𑌰𑍍𑌮𑌭𑌿𑌃 ॥ 𑍮3 ॥

𑌮𑌾𑌰𑍍𑌗𑌂 𑌨𑌿𑌰𑍋𑌦𑍍𑌧𑍁𑌂 𑌨𑌿𑌰𑌤𑍋 𑌭𑌾𑌸𑍍𑌕𑌰𑌸𑍍𑌯𑌾𑌚𑌲𑍋𑌤𑍍𑌤𑌮𑌃 ।
𑌨𑌿𑌦𑍇𑌶𑌂 𑌪𑌾𑌲𑌯𑌨𑍍𑌯𑌸𑍍𑌯 𑌵𑌿𑌂𑌧𑍍𑌯𑌶𑍈𑌲𑌾 𑌨 𑌵𑌰𑍍𑌧𑌤𑍇 ॥ 𑍮4 ॥

𑌅𑌯𑌂 𑌦𑍀𑌰𑍍𑌘𑌾𑌯𑍁𑌷𑌸𑍍𑌤𑌸𑍍𑌯 𑌲𑍋𑌕𑍇 𑌵𑌿𑌶𑍍𑌰𑍁𑌤𑌕𑌰𑍍𑌮𑌣𑌃 ।
𑌅𑌗𑌸𑍍𑌤𑍍𑌯𑌸𑍍𑌯𑌾𑌶𑍍𑌰𑌮 𑌶𑍍𑌰𑍀𑌮𑌾𑌨𑍍𑌵𑌿𑌨𑍀𑌤𑌜𑌨𑌸𑍇𑌵𑌿𑌤𑌃 ॥ 𑍮5 ॥

𑌏𑌷 𑌲𑍋𑌕𑌾𑌰𑍍𑌚𑌿𑌤𑌸𑍍𑌸𑌾𑌧𑍁𑌰𑍍𑌹𑌿𑌤𑍇 𑌨𑌿𑌤𑍍𑌯𑌰𑌤𑌸𑍍𑌸𑌤𑌾𑌮𑍍 ।
𑌅𑌸𑍍𑌮𑌾𑌨𑌭𑌿𑌗𑌤𑌾𑌨𑍇𑌷 𑌶𑍍𑌰𑍇𑌯𑌸𑌾 𑌯𑍋𑌜𑌯𑌿𑌷𑍍𑌯𑌤𑌿 ॥ 𑍮6 ॥

𑌆𑌰𑌾𑌧𑌯𑌿𑌷𑍍𑌯𑌾𑌮𑍍𑌯𑌤𑍍𑌰𑌾𑌹𑌮𑌗𑌸𑍍𑌤𑍍𑌯𑌂 𑌤𑌂 𑌮𑌹𑌾𑌮𑍁𑌨𑌿𑌮𑍍 ।
𑌶𑍇𑌷𑌂 𑌚 𑌵𑌨𑌵𑌾𑌸𑌸𑍍𑌯 𑌸𑍌𑌮𑍍𑌯 𑌵𑌤𑍍𑌸𑍍𑌯𑌾𑌮𑍍𑌯𑌹𑌂 𑌪𑍍𑌰𑌭𑍋 ॥ 𑍮𑍭 ॥

𑌅𑌤𑍍𑌰 𑌦𑍇𑌵𑌾𑌸𑍍𑌸𑌗𑌂𑌧𑌰𑍍𑌵𑌾𑌸𑍍𑌸𑌿𑌦𑍍𑌧𑌾𑌶𑍍𑌚 𑌪𑌰𑌮𑌰𑍍𑌷𑌯𑌃 ।
𑌅𑌗𑌸𑍍𑌤𑍍𑌯𑌂 𑌨𑌿𑌯𑌤𑌾𑌹𑌾𑌰𑌂 𑌸𑌤𑌤𑌂 𑌪𑌰𑍍𑌯𑍁𑌪𑌾𑌸𑌤𑍇 ॥ 𑍮𑍮 ॥

𑌨𑌾𑌤𑍍𑌰 𑌜𑍀𑌵𑍇𑌨𑍍𑌮𑍃𑌷𑌾𑌵𑌾𑌦𑍀 𑌕𑍍𑌰𑍂𑌰𑍋 𑌵𑌾 𑌯𑌦𑌿 𑌵𑌾 𑌶𑌠𑌃 ।
𑌨𑍃𑌶𑌂𑌸𑌃 𑌕𑌾𑌮𑌵𑍃𑌤𑍍𑌤𑍋 𑌵𑌾 𑌮𑍁𑌨𑌿𑌰𑍇𑌷 𑌤𑌥𑌾𑌵𑌿𑌧𑌃 ॥ 𑍮𑍯 ॥

𑌅𑌤𑍍𑌰 𑌦𑍇𑌵𑌾𑌶𑍍𑌚 𑌯𑌕𑍍𑌷𑌾𑌶𑍍𑌚 𑌨𑌾𑌗𑌾𑌶𑍍𑌚 𑌪𑌤𑌗𑍈𑌸𑍍𑌸𑌹 ।
𑌵𑌸𑌂𑌤𑌿 𑌨𑌿𑌯𑌤𑌾𑌹𑌾𑌰𑌾 𑌧𑌰𑍍𑌮𑌮𑌾𑌰𑌾𑌧𑌯𑌿𑌷𑍍𑌣𑌵𑌃 ॥ 𑍯0 ॥

𑌅𑌤𑍍𑌰 𑌸𑌿𑌦𑍍𑌧𑌾 𑌮𑌹𑌾𑌤𑍍𑌮𑌾𑌨𑍋 𑌵𑌿𑌮𑌾𑌨𑍈𑌜𑌸𑍍𑌸𑍂𑌰𑍍𑌯𑌸𑌨𑍍𑌨𑌿𑌭𑍈𑌃 ।
𑌤𑍍𑌯𑌕𑍍𑌤𑌦𑍇𑌹𑌾 𑌨𑌵𑍈𑌰𑍍𑌦𑍇𑌹𑍈𑌃 𑌸𑍍𑌵𑌰𑍍𑌯𑌾𑌤𑌾𑌃 𑌪𑌰𑌮𑌰𑍍𑌷𑌯𑌃 ॥ 𑍯1 ॥

𑌯𑌕𑍍𑌷𑌤𑍍𑌵𑌮𑌮𑌰𑌤𑍍𑌵𑌂 𑌚 𑌰𑌾𑌜𑍍𑌯𑌾𑌨𑌿 𑌵𑌿𑌵𑌿𑌧𑌾𑌨𑌿 𑌚 ।
𑌅𑌤𑍍𑌰 𑌦𑍇𑌵𑌾𑌃 𑌪𑍍𑌰𑌯𑌚𑍍𑌛𑌂𑌤𑌿 𑌭𑍂𑌤𑍈𑌰𑌾𑌰𑌾𑌧𑌿𑌤𑌾𑌶𑍍𑌶𑍁𑌭𑍈𑌃 ॥ 𑍯2 ॥

𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌰𑌣𑍍𑌯𑌕𑌾𑌂𑌡𑍇 𑌏𑌕𑌾𑌦𑌶𑌸𑍍𑌸𑌰𑍍𑌗𑌃 ॥


Browse Related Categories: