𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌬𑌾𑌲𑌕𑌾𑌂𑌡𑌮𑍍 ।
𑌅𑌥 𑌤𑍍𑌰𑌿𑌷𑌷𑍍𑌟𑌿𑌤𑌮𑌸𑍍𑌸𑌰𑍍𑌗𑌃 ।
𑌪𑍂𑌰𑍍𑌣𑍇 𑌵𑌰𑍍𑌷𑌸𑌹𑌸𑍍𑌰𑍇 𑌤𑍁 𑌵𑍍𑌰𑌤𑌸𑍍𑌨𑌾𑌤𑌂 𑌮𑌹𑌾𑌮𑍁𑌨𑌿𑌮𑍍 ।
𑌅𑌭𑍍𑌯𑌾𑌗𑌚𑍍𑌛𑌨𑍍 𑌸𑍁𑌰𑌾𑌸𑍍𑌸𑌰𑍍𑌵𑍇 𑌤𑌪𑌃 𑌫𑌲𑌚𑌿𑌕𑍀𑌰𑍍𑌷𑌵𑌃 ॥ 1 ॥
𑌅𑌬𑍍𑌰𑌵𑍀𑌤𑍍𑌸𑍁𑌮𑌹𑌾𑌤𑍇𑌜𑌾 𑌬𑍍𑌰𑌹𑍍𑌮𑌾 𑌸𑍁𑌰𑍁𑌚𑌿𑌰𑌂 𑌵𑌚𑌃 ।
𑌋𑌷𑌿𑌸𑍍𑌤𑍍𑌵𑌮𑌸𑌿 𑌭𑌦𑍍𑌰𑌂 𑌤𑍇 𑌸𑍍𑌵𑌾𑌰𑍍𑌜𑌿𑌤𑍈𑌃 𑌕𑌰𑍍𑌮𑌭𑌿𑌶𑍍𑌶𑍁𑌭𑍈𑌃 ॥ 2 ॥
𑌤𑌮𑍇𑌵𑌮𑍁𑌕𑍍𑌤𑍍𑌵𑌾 𑌦𑍇𑌵𑍇𑌶𑌸𑍍𑌤𑍍𑌰𑌿𑌦𑌿𑌵𑌂 𑌪𑍁𑌨𑌰𑌭𑍍𑌯𑌗𑌾𑌤𑍍 ।
𑌵𑌿𑌶𑍍𑌵𑌾𑌮𑌿𑌤𑍍𑌰𑍋 𑌮𑌹𑌾𑌤𑍇𑌜𑌾 𑌭𑍂𑌯𑌸𑍍𑌤𑍇𑌪𑍇 𑌮𑌹𑌤𑍍𑌤𑌪𑌃 ॥ 3 ॥
𑌤𑌤𑌃 𑌕𑌾𑌲𑍇𑌨 𑌮𑌹𑌤𑌾 𑌮𑍇𑌨𑌕𑌾 𑌪𑌰𑌮𑌾𑌽𑌪𑍍𑌸𑌰𑌾𑌃 ।
𑌪𑍁𑌷𑍍𑌕𑌰𑍇𑌷𑍁 𑌨𑌰𑌶𑍍𑌰𑍇𑌷𑍍𑌠 𑌸𑍍𑌨𑌾𑌤𑍁𑌂 𑌸𑌮𑍁𑌪𑌚𑌕𑍍𑌰𑌮𑍇 ॥ 4 ॥
𑌤𑌾𑌂 𑌦𑌦𑌰𑍍𑌶 𑌮𑌹𑌾𑌤𑍇𑌜𑌾 𑌮𑍇𑌨𑌕𑌾𑌂 𑌕𑍁𑌶𑌿𑌕𑌾𑌤𑍍𑌮𑌜𑌃 ।
𑌰𑍂𑌪𑍇𑌣𑌾𑌪𑍍𑌰𑌤𑌿𑌮𑌾𑌂 𑌤𑌤𑍍𑌰 𑌵𑌿𑌦𑍍𑌯𑍁𑌤𑌂 𑌜𑌲𑌦𑍇 𑌯𑌥𑌾 ॥ 5 ॥
𑌦𑍃𑌷𑍍𑌟𑍍𑌵𑌾 𑌕𑌂𑌦𑌰𑍍𑌪𑌵𑌶𑌗𑍋 𑌮𑍁𑌨𑌿𑌸𑍍𑌤𑌾𑌮𑌿𑌦𑌮𑌬𑍍𑌰𑌵𑍀𑌤𑍍 ।
𑌅𑌪𑍍𑌸𑌰𑌸𑍍𑌸𑍍𑌵𑌾𑌗𑌤𑌂 𑌤𑍇𑌽𑌸𑍍𑌤𑍁 𑌵𑌸 𑌚𑍇𑌹 𑌮𑌮𑌾𑌶𑍍𑌰𑌮𑍇 ॥ 6 ॥
𑌅𑌨𑍁𑌗𑍃𑌹𑍍𑌣𑍀𑌷𑍍𑌵 𑌭𑌦𑍍𑌰𑌂 𑌤𑍇 𑌮𑌦𑌨𑍇𑌨 𑌸𑍁𑌮𑍋𑌹𑌿𑌤𑌮𑍍 ।
𑌇𑌤𑍍𑌯𑍁𑌕𑍍𑌤𑌾 𑌸𑌾 𑌵𑌰𑌾𑌰𑍋𑌹𑌾 𑌤𑌤𑍍𑌰 𑌵𑌾𑌸𑌮𑌥𑌾𑌕𑌰𑍋𑌤𑍍 ॥ ॥
𑌤𑌸𑍍𑌯𑌾𑌂 𑌵𑌸𑌂𑌤𑍍𑌯𑌾𑌂 𑌵𑌰𑍍𑌷𑌾𑌣𑌿 𑌪𑌂𑌚 𑌪𑌂𑌚 𑌚 𑌰𑌾𑌘𑌵 ।
𑌵𑌿𑌶𑍍𑌵𑌾𑌮𑌿𑌤𑍍𑌰𑌾𑌶𑍍𑌰𑌮𑍇 𑌰𑌾𑌮 𑌸𑍁𑌖𑍇𑌨 𑌵𑍍𑌯𑌤𑌿𑌚𑌕𑍍𑌰𑌮𑍁𑌃 ॥ ॥
𑌅𑌥 𑌕𑌾𑌲𑍇 𑌗𑌤𑍇 𑌤𑌸𑍍𑌮𑌿𑌨𑍍𑌵𑌿𑌶𑍍𑌵𑌾𑌮𑌿𑌤𑍍𑌰𑍋 𑌮𑌹𑌾𑌮𑍁𑌨𑌿𑌃 ।
𑌸𑌵𑍍𑌰𑍀𑌡 𑌇𑌵 𑌸𑌮𑍍𑌵𑍃𑌤𑍍𑌤𑌶𑍍𑌚𑌿𑌂𑌤𑌾𑌶𑍋𑌕𑌪𑌰𑌾𑌯𑌣𑌃 ॥ ॥
𑌬𑍁𑌦𑍍𑌧𑌿𑌰𑍍𑌮𑍁𑌨𑍇𑌸𑍍𑌸𑌮𑍁𑌤𑍍𑌪𑌨𑍍𑌨𑌾 𑌸𑌾𑌮𑌰𑍍𑌷𑌾 𑌰𑌘𑍁𑌨𑌂𑌦𑌨 ।
𑌸𑌰𑍍𑌵𑌂 𑌸𑍁𑌰𑌾𑌣𑌾𑌂 𑌕𑌰𑍍𑌮𑍈𑌤𑌤𑍍𑌤𑌪𑍋𑌪𑌹𑌰𑌣𑌂 𑌮𑌹𑌤𑍍 ॥ 10 ॥
𑌅𑌹𑍋𑌰𑌾𑌤𑍍𑌰𑌾𑌪𑌦𑍇𑌶𑍇𑌨 𑌗𑌤𑌾𑌸𑍍𑌸𑌂𑌵𑌤𑍍𑌸𑌰𑌾 𑌦𑌶 ।
𑌕𑌾𑌮𑌮𑍋𑌹𑌾𑌭𑌿𑌭𑍂𑌤𑌸𑍍𑌯 𑌵𑌿𑌘𑍍𑌨𑍋𑌽𑌯𑌂 𑌸𑌮𑍁𑌪𑌸𑍍𑌥𑌿𑌤𑌃 ॥ 11 ॥
𑌵𑌿𑌨𑌿𑌶𑍍𑌶𑍍𑌵𑌸𑌨𑍍𑌮𑍁𑌨𑌿𑌵𑌰𑌃 𑌪𑌶𑍍𑌚𑌾𑌤𑍍𑌤𑌾𑌪𑍇𑌨 𑌦𑍁𑌃𑌖𑌿𑌤𑌃 ।
𑌭𑍀𑌤𑌾𑌮𑌪𑍍𑌸𑌰𑌸𑌂 𑌦𑍃𑌷𑍍𑌟𑍍𑌵𑌾 𑌵𑍇𑌪𑌂𑌤𑍀𑌂 𑌪𑍍𑌰𑌾𑌂𑌜𑌲𑌿𑌂 𑌸𑍍𑌥𑌿𑌤𑌾𑌮𑍍 ॥ 12 ॥
𑌮𑍇𑌨𑌕𑌾𑌂 𑌮𑌧𑍁𑌰𑍈𑌰𑍍𑌵𑌾𑌕𑍍𑌯𑍈𑌰𑍍𑌵𑌿𑌸𑍃𑌜𑍍𑌯 𑌕𑍁𑌶𑌿𑌕𑌾𑌤𑍍𑌮𑌜𑌃 ।
𑌉𑌤𑍍𑌤𑌰𑌂 𑌪𑌰𑍍𑌵𑌤𑌂 𑌰𑌾𑌮 𑌵𑌿𑌶𑍍𑌵𑌾𑌮𑌿𑌤𑍍𑌰𑍋 𑌜𑌗𑌾𑌮 𑌹 ॥ 13 ॥
𑌸 𑌕𑍃𑌤𑍍𑌵𑌾 𑌨𑍈𑌷𑍍𑌠𑌿𑌕𑍀𑌂 𑌬𑍁𑌦𑍍𑌧𑌿𑌂 𑌜𑍇𑌤𑍁𑌕𑌾𑌮𑍋 𑌮𑌹𑌾𑌯𑌶𑌾𑌃 ।
𑌕𑍌𑌶𑌿𑌕𑍀𑌤𑍀𑌰𑌮𑌾𑌸𑌾𑌦𑍍𑌯 𑌤𑌪𑌸𑍍𑌤𑍇𑌪𑍇 𑌸𑍁𑌦𑌾𑌰𑍁𑌣𑌮𑍍 ॥ 14 ॥
𑌤𑌸𑍍𑌯 𑌵𑌰𑍍𑌷𑌸𑌹𑌸𑍍𑌰𑌂 𑌤𑍁 𑌘𑍋𑌰𑌂 𑌤𑌪 𑌉𑌪𑌾𑌸𑌤𑌃 ।
𑌉𑌤𑍍𑌤𑌰𑍇 𑌪𑌰𑍍𑌵𑌤𑍇 𑌰𑌾𑌮 𑌦𑍇𑌵𑌤𑌾𑌨𑌾𑌮𑌭𑍂𑌦𑍍𑌭𑌯𑌮𑍍 ॥ 15 ॥
𑌆𑌮𑌂𑌤𑍍𑌰𑌯𑌨𑍍 𑌸𑌮𑌾𑌗𑌮𑍍𑌯 𑌸𑌰𑍍𑌵𑍇 𑌸𑌰𑍍𑌷𑌿𑌗𑌣𑌾 𑌸𑍍𑌸𑍁𑌰𑌾𑌃 ।
𑌮𑌹𑌰𑍍𑌷𑌿𑌶𑌬𑍍𑌦𑌂 𑌲𑌭𑌤𑌾𑌂 𑌸𑌾𑌧𑍍𑌵𑌯𑌂 𑌕𑍁𑌶𑌿𑌕𑌾𑌤𑍍𑌮𑌜𑌃 ॥ 16 ॥
𑌦𑍇𑌵𑌤𑌾𑌨𑌾𑌂 𑌵𑌚 𑌶𑍍𑌶𑍃𑌤𑍍𑌵𑌾 𑌸𑌰𑍍𑌵𑌲𑍋𑌕𑌪𑌿𑌤𑌾𑌮𑌹𑌃 ।
𑌅𑌬𑍍𑌰𑌵𑍀𑌨𑍍𑌮𑌧𑍁𑌰𑌂 𑌵𑌾𑌕𑍍𑌯𑌂 𑌵𑌿𑌶𑍍𑌵𑌾𑌮𑌿𑌤𑍍𑌰𑌂 𑌤𑌪𑍋𑌧𑌨𑌮𑍍 ॥ 1 ॥
𑌮𑌹𑌰𑍍𑌷𑍇 𑌸𑍍𑌵𑌾𑌗𑌤𑌂 𑌵𑌤𑍍𑌸 𑌤𑌪𑌸𑍋𑌗𑍍𑌰𑍇𑌣 𑌤𑍋𑌷𑌿𑌤𑌃 ।
𑌮𑌹𑌤𑍍𑌤𑍍𑌵𑌮𑍃𑌷𑌿𑌮𑍁𑌖𑍍𑌯𑌤𑍍𑌵𑌂 𑌦𑌦𑌾𑌮𑌿 𑌤𑌵 𑌕𑍌𑌶𑌿𑌕 ॥ 1 ॥
𑌬𑍍𑌰𑌹𑍍𑌮𑌣𑌸𑍍𑌸 𑌵𑌚𑌶𑍍𑌶𑍍𑌰𑍁𑌤𑍍𑌵𑌾 𑌸𑌰𑍍𑌵𑌲𑍋𑌕𑍇𑌶𑍍𑌵𑌰𑌸𑍍𑌯 𑌹 ।
𑌨 𑌵𑌿𑌷𑌣𑍍𑌣𑍋 𑌨 𑌸𑌂𑌤𑍁𑌷𑍍𑌟𑍋 𑌵𑌿𑌶𑍍𑌵𑌾𑌮𑌿𑌤𑍍𑌰𑌸𑍍𑌤𑌪𑍋𑌧𑌨𑌃 ॥ 1 ॥
𑌪𑍍𑌰𑌾𑌂𑌜𑌲𑌿𑌃 𑌪𑍍𑌰𑌣𑌤𑍋 𑌭𑍂𑌤𑍍𑌵𑌾 𑌸𑌰𑍍𑌵𑌲𑍋𑌕𑌪𑌿𑌤𑌾𑌮𑌹𑌮𑍍 ।
𑌪𑍍𑌰𑌤𑍍𑌯𑍁𑌵𑌾𑌚 𑌤𑌤𑍋 𑌵𑌾𑌚𑌂 𑌵𑌿𑌶𑍍𑌵𑌾𑌮𑌿𑌤𑍍𑌰𑍋 𑌮𑌹𑌾𑌮𑍁𑌨𑌿𑌃 ॥ 20 ॥
𑌮𑌹𑌰𑍍𑌷𑌿𑌶𑌬𑍍𑌦𑌮𑌤𑍁𑌲𑌂 𑌸𑍍𑌵𑌾𑌰𑍍𑌜𑌿𑌤𑍈𑌃 𑌕𑌰𑍍𑌮𑌭𑌿𑌶𑍍𑌶𑍁𑌭𑍈𑌃 ।
𑌯𑌦𑌿 𑌮𑍇 𑌭𑌗𑌵𑌾𑌨𑌾𑌹 𑌤𑌤𑍋𑌽𑌹𑌂 𑌵𑌿𑌜𑌿𑌤𑍇𑌂𑌦𑍍𑌰𑌿𑌯𑌃 ॥ 21 ॥
𑌤𑌮𑍁𑌵𑌾𑌚 𑌤𑌤𑍋 𑌬𑍍𑌰𑌹𑍍𑌮𑌾 𑌨 𑌤𑌾𑌵𑌤𑍍 𑌤𑍍𑌤𑍍𑌵𑌂 𑌜𑌿𑌤𑍇𑌂𑌦𑍍𑌰𑌿𑌯𑌃 ।
𑌯𑌤𑌸𑍍𑌵 𑌮𑍁𑌨𑌿𑌶𑌾𑌰𑍍𑌦𑍂𑌲 𑌇𑌤𑍍𑌯𑍁𑌕𑍍𑌤𑍍𑌵𑌾 𑌤𑍍𑌰𑌿𑌦𑌿𑌵𑌂 𑌗𑌤𑌃 ॥ 22 ॥
𑌵𑌿𑌪𑍍𑌰𑌸𑍍𑌥𑌿𑌤𑍇𑌷𑍁 𑌦𑍇𑌵𑍇𑌷𑍁 𑌵𑌿𑌶𑍍𑌵𑌾𑌮𑌿𑌤𑍍𑌰𑍋 𑌮𑌹𑌾𑌮𑍁𑌨𑌿𑌃 ।
𑌊𑌰𑍍𑌧𑍍𑌵𑌬𑌾𑌹𑍁𑌰𑍍𑌨𑌿𑌰𑌾𑌲𑌂𑌬𑍋 𑌵𑌾𑌯𑍁𑌭𑌕𑍍𑌷𑌸𑍍𑌤𑌪𑌶𑍍𑌚𑌰𑌨𑍍 ॥ 23 ॥
𑌘𑌰𑍍𑌮𑍇 𑌪𑌂𑌚𑌤𑌪𑌾 𑌭𑍂𑌤𑍍𑌵𑌾 𑌵𑌰𑍍𑌷𑌾𑌸𑍍𑌵𑌾𑌕𑌾𑌶𑌸𑌂𑌶𑍍𑌰𑌯𑌃 ।
𑌶𑌿𑌶𑌿𑌰𑍇 𑌸𑌲𑌿𑌲𑌸𑍍𑌥𑌾𑌯𑍀 𑌰𑌾𑌤𑍍𑌰𑍍𑌯𑌹𑌾𑌨𑌿 𑌤𑌪𑍋𑌧𑌨𑌃 ॥ 24 ॥
𑌏𑌵𑌂 𑌵𑌰𑍍𑌷𑌸𑌹𑌸𑍍𑌰𑌂 𑌹𑌿 𑌤𑌪𑍋 𑌘𑍋𑌰𑌮𑍁𑌪𑌾𑌗𑌮𑌤𑍍 ।
𑌤𑌸𑍍𑌮𑌿𑌨𑍍 𑌸𑌂𑌤𑌪𑍍𑌯𑌮𑌾𑌨𑍇 𑌤𑍁 𑌵𑌿𑌶𑍍𑌵𑌾𑌮𑌿𑌤𑍍𑌰𑍇 𑌮𑌹𑌾𑌮𑍁𑌨𑍌 ॥ 25 ॥
𑌸𑌂𑌭𑍍𑌰𑌮𑌸𑍍𑌸𑍁𑌮𑌹𑌾𑌨𑌾𑌸𑍀𑌤𑍍𑌸𑍁𑌰𑌾𑌣𑌾𑌂 𑌵𑌾𑌸𑌵𑌸𑍍𑌯 𑌚 ।
𑌰𑌂𑌭𑌾𑌮𑌪𑍍𑌸𑌰𑌸𑌂 𑌶𑌕𑍍𑌰 𑌸𑍍𑌸𑌹 𑌸𑌰𑍍𑌵𑍈𑌰𑍍𑌮𑌰𑍁𑌦𑍍𑌗𑌣𑍈𑌃 ।
𑌉𑌵𑌾𑌚𑌾𑌤𑍍𑌮𑌹𑌿𑌤𑌂 𑌵𑌾𑌕𑍍𑌯𑌮𑌹𑌿𑌤𑌂 𑌕𑍌𑌶𑌿𑌕𑌸𑍍𑌯 𑌚 ॥ 26 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌬𑌾𑌲𑌕𑌾𑌂𑌡𑍇 𑌤𑍍𑌰𑌿𑌷𑌷𑍍𑌟𑌿𑌤𑌮𑌸𑍍𑌸𑌰𑍍𑌗𑌃 ॥
