𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑌮𑍍 ।
𑌅𑌥 𑌦𑍍𑌵𑌾𑌶𑍀𑌤𑌿𑌤𑌮𑌸𑍍𑌸𑌰𑍍𑌗𑌃 ।
𑌤𑌾𑌮𑌾𑌰𑍍𑌯𑌗𑌣𑌸𑌂𑌪𑍂𑌰𑍍𑌣𑌾𑌂 𑌭𑌰𑌤𑌃 𑌪𑍍𑌰𑌗𑍍𑌰𑌹𑌾𑌂 𑌸𑌭𑌾𑌮𑍍 ।
𑌦𑌦𑌰𑍍𑌶 𑌬𑍁𑌦𑍍𑌧𑌿𑌸𑌂𑌪𑌨𑍍𑌨𑌃 𑌪𑍂𑌰𑍍𑌣𑌚𑌂𑌦𑍍𑌰𑍋 𑌨𑌿𑌶𑌾𑌮𑌿𑌵 ॥ 1 ॥
𑌆𑌸𑌨𑌾𑌨𑌿 𑌯𑌥𑌾𑌨𑍍𑌯𑌾𑌯𑌮𑌾𑌰𑍍𑌯𑌾𑌣𑌾𑌂 𑌵𑌿𑌶𑌤𑌾𑌂 𑌤𑌦𑌾 ।
𑌵𑌸𑍍𑌤𑍍𑌰𑌾𑌂𑌗𑌰𑌾𑌗𑌪𑍍𑌰𑌭𑌯𑌾 𑌦𑍍𑌯𑍋𑌤𑌿𑌤𑌾 𑌸𑌾 𑌸𑌭𑍋𑌤𑍍𑌤𑌮𑌾 ॥ 2 ॥
𑌸𑌾 𑌵𑌿𑌦𑍍𑌵𑌜𑍍𑌜𑌨𑌸𑌂𑌪𑍂𑌰𑍍𑌣𑌾 𑌸𑌭𑌾 𑌸𑍁𑌰𑍁𑌚𑌿𑌰𑌾 𑌤𑌦𑌾 ।
𑌅𑌦𑍃𑌶𑍍𑌯𑌤 𑌘𑌨𑌾𑌪𑌾𑌯𑍇 𑌪𑍂𑌰𑍍𑌣𑌚𑌂𑌦𑍍𑌰𑍇𑌵 𑌶𑌰𑍍𑌵𑌰𑍀 ॥ 3 ॥
𑌰𑌾𑌜𑍍𑌞𑌸𑍍𑌤𑍁 𑌪𑍍𑌰𑌕𑍃𑌤𑍀 𑌸𑍍𑌸𑌰𑍍𑌵𑌾 𑌸𑍍𑌸𑌮𑌗𑍍𑌰𑌾𑌃 𑌪𑍍𑌰𑍇𑌕𑍍𑌷𑍍𑌯 𑌧𑌰𑍍𑌮𑌵𑌿𑌤𑍍 ।
𑌇𑌦𑌂 𑌪𑍁𑌰𑍋𑌹𑌿𑌤𑍋 𑌵𑌾𑌕𑍍𑌯𑌂 𑌭𑌰𑌤𑌂 𑌮𑍃𑌦𑍁 𑌚𑌾𑌬𑍍𑌰𑌵𑍀𑌤𑍍 ॥ 4 ॥
𑌤𑌾𑌤 𑌰𑌾𑌜𑌾 𑌦𑌶𑌰𑌥 𑌸𑍍𑌸𑍍𑌵𑌰𑍍𑌗𑌤𑍋 𑌧𑌰𑍍𑌮𑌮𑌾𑌚𑌰𑌨𑍍 ।
𑌧𑌨𑌧𑌾𑌨𑍍𑌯𑌵𑌤𑍀𑌂 𑌸𑍍𑌫𑍀𑌤𑌾𑌂 𑌪𑍍𑌰𑌦𑌾𑌯 𑌪𑍃𑌥𑌿𑌵𑍀𑌂 𑌤𑌵 ॥ 5 ॥
𑌰𑌾𑌮𑌸𑍍𑌤𑌥𑌾 𑌸𑌤𑍍𑌯𑌧𑍃𑌤𑌿𑌸𑍍𑌸𑌤𑌾𑌂 𑌧𑌰𑍍𑌮𑌮𑌨𑍁𑌸𑍍𑌮𑌰𑌨𑍍 ।
𑌨𑌾𑌜𑌹𑌾𑌤𑍍𑌪𑌿𑌤𑍁𑌰𑌾𑌦𑍇𑌶𑌂 𑌶𑌶𑍀 𑌜𑍍𑌯𑍋𑌤𑍍𑌸𑍍𑌨𑌾𑌮𑌿𑌵𑍋𑌦𑌿𑌤𑌃 ॥ 6 ॥
𑌪𑌿𑌤𑍍𑌰𑌾 𑌭𑍍𑌰𑌾𑌤𑍍𑌰𑌾 𑌚 𑌤𑍇 𑌦𑌤𑍍𑌤𑌂 𑌰𑌾𑌜𑍍𑌯𑌂 𑌨𑌿𑌹𑌤𑌕𑌂𑌟𑌕𑌮𑍍 ।
𑌤𑌦𑍍𑌭𑍁𑌂𑌕𑍍𑌷𑍍𑌵 𑌮𑍁𑌦𑌿𑌤𑌾𑌮𑌾𑌤𑍍𑌯𑌃 𑌕𑍍𑌷𑌿𑌪𑍍𑌰𑌮𑍇𑌵𑌾𑌭𑌿𑌷𑍇𑌚𑌯 ॥ ॥
𑌉𑌦𑍀𑌚𑍍𑌯𑌾 𑌶𑍍𑌚 𑌪𑍍𑌰𑌤𑍀𑌚𑍍𑌯𑌾 𑌶𑍍𑌚 𑌦𑌾𑌕𑍍𑌷𑌿𑌣𑌾𑌤𑍍𑌯𑌾𑌶𑍍𑌚 𑌕𑍇𑌵𑌲𑌾𑌃 ।
𑌕𑍋𑌟𑍍𑌯𑌾𑌪𑌰𑌾𑌂𑌤𑌾𑌸𑍍𑌸𑌾𑌮𑍁𑌦𑍍𑌰𑌾𑌰𑌤𑍍𑌨𑌾𑌨𑍍𑌯𑌭𑌿𑌹𑌰𑌂𑌤𑍁𑌤𑍇 ॥ ॥
𑌤𑌚𑍍𑌛𑍍𑌰𑍁𑌤𑍍𑌵𑌾 𑌭𑌰𑌤𑍋 𑌵𑌾𑌕𑍍𑌯𑌂 𑌶𑍋𑌕𑍇𑌨𑌾𑌭𑌿𑌪𑌰𑌿𑌪𑍍𑌲𑍁𑌤𑌃 ।
𑌜𑌗𑌾𑌮 𑌮𑌨𑌸𑌾 𑌰𑌾𑌮𑌂 𑌧𑌰𑍍𑌮𑌜𑍍𑌞𑍋 𑌧𑌰𑍍𑌮𑌕𑌾𑌂𑌕𑍍𑌷𑌯𑌾 ॥ ॥
𑌸𑌬𑌾𑌷𑍍𑌪𑌕𑌲𑌯𑌾 𑌵𑌾𑌚𑌾 𑌕𑌲𑌹𑌂𑌸𑌸𑍍𑌵𑌰𑍋 𑌯𑍁𑌵𑌾 ।
𑌵𑌿𑌲𑌲𑌾𑌪 𑌸𑌭𑌾𑌮𑌧𑍍𑌯𑍇 𑌜𑌗𑌰𑍍𑌹𑍇 𑌚 𑌪𑍁𑌰𑍋𑌹𑌿𑌤𑌮𑍍 ॥ 10 ॥
𑌚𑌰𑌿𑌤𑌬𑍍𑌰𑌹𑍍𑌮𑌚𑌰𑍍𑌯𑌸𑍍𑌯 𑌵𑌿𑌦𑍍𑌯𑌾𑌸𑍍𑌨𑌾𑌤𑌸𑍍𑌯 𑌧𑍀𑌮𑌤𑌃 ।
𑌧𑌰𑍍𑌮𑍇 𑌪𑍍𑌰𑌯𑌤𑌮𑌾𑌨𑌸𑍍𑌯 𑌕𑍋 𑌰𑌾𑌜𑍍𑌯𑌂 𑌮𑌦𑍍𑌵𑌿𑌧𑍋 𑌹𑌰𑍇𑌤𑍍 ॥ 11 ॥
𑌕𑌥𑌂 𑌦𑌶𑌰𑌥𑌾𑌜𑍍𑌜𑌾𑌤𑍋 𑌭𑌵𑍇𑌦𑍍𑌰𑌾𑌜𑍍𑌯𑌾𑌪𑌹𑌾𑌰𑌕𑌃 ।
𑌰𑌾𑌜𑍍𑌯𑌂 𑌚𑌾𑌹𑌂 𑌚 𑌰𑌾𑌮𑌸𑍍𑌯 𑌧𑌰𑍍𑌮𑌂 𑌵𑌕𑍍𑌤𑍁𑌮𑌿𑌹𑌾𑌰𑍍𑌹𑌸𑌿 ॥ 12 ॥
𑌜𑍍𑌯𑍇𑌷𑍍𑌠 𑌶𑍍𑌶𑍍𑌰𑍇𑌷𑍍𑌠𑌶𑍍𑌚 𑌧𑌰𑍍𑌮𑌾𑌤𑍍𑌮𑌾 𑌦𑌿𑌲𑍀𑌪𑌨𑌹𑍁𑌷𑍋𑌪𑌮𑌃 ।
𑌲𑌬𑍍𑌧𑍁𑌮𑌰𑍍𑌹𑌤𑌿 𑌕𑌾𑌕𑍁𑌤𑍍𑌸𑍍𑌥𑍋 𑌰𑌾𑌜𑍍𑌯𑌂 𑌦𑌶𑌰𑌥𑍋 𑌯𑌥𑌾 ॥ 13 ॥
𑌅𑌨𑌾𑌰𑍍𑌯𑌜𑍁𑌷𑍍𑌟𑌮𑌸𑍍𑌵𑌰𑍍𑌗𑍍𑌯𑌂 𑌕𑍁𑌰𑍍𑌯𑌾𑌂 𑌪𑌾𑌪𑌮𑌹𑌂 𑌯𑌦𑌿 ।
𑌇𑌕𑍍𑌷𑍍𑌵𑌾𑌕𑍂𑌣𑌾𑌮𑌹𑌂 𑌲𑍋𑌕𑍇 𑌭𑌵𑍇𑌯𑌂 𑌕𑍁𑌲𑌪𑌾𑌂𑌸𑌨𑌃 ॥ 14 ॥
𑌯𑌦𑍍𑌧𑌿 𑌮𑌾𑌤𑍍𑌰𑌾 𑌕𑍃𑌤𑌂 𑌪𑌾𑌪𑌂 𑌨𑌾𑌹𑌂 𑌤𑌦𑌪𑌿 𑌰𑍋𑌚𑌯𑍇 ।
𑌇𑌹𑌸𑍍𑌥𑍋 𑌵𑌨𑌦𑍁𑌰𑍍𑌗𑌸𑍍𑌥𑌂 𑌨𑌮𑌸𑍍𑌯𑌾𑌮𑌿 𑌕𑍃𑌤𑌾𑌂𑌜𑌲𑌿𑌃 ॥ 15 ॥
𑌰𑌾𑌮𑌮𑍇𑌵𑌾𑌨𑍁𑌗𑌚𑍍𑌛𑌾𑌮𑌿 𑌰𑌾𑌜𑌾 𑌸 𑌦𑍍𑌵𑌿𑌪𑌦𑌾𑌂 𑌵𑌰𑌃 ।
𑌤𑍍𑌰𑌯𑌾𑌣𑌾𑌮𑌪𑌿 𑌲𑍋𑌕𑌾𑌨𑌾𑌂 𑌰𑌾𑌜𑍍𑌯𑌮𑌰𑍍𑌹𑌤𑌿 𑌰𑌾𑌘𑌵𑌃 ॥ 16 ॥
𑌤𑌦𑍍𑌵𑌾𑌕𑍍𑌯𑌂 𑌧𑌰𑍍𑌮𑌸𑌂𑌯𑍁𑌕𑍍𑌤𑌂 𑌶𑍍𑌰𑍁𑌤𑍍𑌵𑌾 𑌸𑌰𑍍𑌵𑍇 𑌸𑌭𑌾𑌸𑌦𑌃 ।
𑌹𑌰𑍍𑌷𑌾𑌨𑍍𑌮𑍁𑌮𑍁𑌚𑍁𑌰𑌶𑍍𑌰𑍂𑌣𑌿 𑌰𑌾𑌮𑍇 𑌨𑌿𑌹𑌿𑌤𑌚𑍇𑌤𑌸𑌃 ॥ 1 ॥
𑌯𑌦𑌿 𑌤𑍍𑌵𑌾𑌰𑍍𑌯𑌂 𑌨 𑌶𑌕𑍍𑌷𑍍𑌯𑌾𑌮𑌿 𑌵𑌿𑌨𑌿𑌵𑌰𑍍𑌤𑌯𑌿𑌤𑍁𑌂 𑌵𑌨𑌾𑌤𑍍 ।
𑌵𑌨𑍇 𑌤𑌤𑍍𑌰𑍈𑌵 𑌵𑌤𑍍𑌸𑍍𑌯𑌾𑌮𑌿 𑌯𑌥𑌾𑌽𑌰𑍍𑌯𑍋 𑌲𑌕𑍍𑌷𑍍𑌮𑌣𑌸𑍍𑌤𑌥𑌾 ॥ 1 ॥
𑌸𑌰𑍍𑌵𑍋𑌪𑌾𑌯𑌂 𑌤𑍁 𑌵𑌰𑍍𑌤𑌿𑌷𑍍𑌯𑍇 𑌵𑌿𑌨𑌿𑌵𑌰𑍍𑌤𑌯𑌿𑌤𑍁𑌂 𑌬𑌲𑌾𑌤𑍍 ।
𑌸𑌮𑌕𑍍𑌷𑌮𑌾𑌰𑍍𑌯𑌮𑌿𑌶𑍍𑌰𑌾𑌣𑌾𑌂 𑌸𑌾𑌧𑍂𑌨𑌾𑌂 𑌗𑍁𑌣𑌵𑌰𑍍𑌤𑌿𑌨𑌾𑌮𑍍 ॥ 1 ॥
𑌵𑌿𑌷𑍍𑌟𑌿𑌕𑌰𑍍𑌮𑌾𑌂𑌤𑌿𑌕𑌾 𑌸𑍍𑌸𑌰𑍍𑌵𑍇 𑌮𑌾𑌰𑍍𑌗𑌶𑍋𑌧𑌕𑌰𑌕𑍍𑌷𑌕𑌾𑌃 ।
𑌪𑍍𑌰𑌸𑍍𑌥𑌾𑌪𑌿𑌤𑌾 𑌮𑌯𑌾 𑌪𑍂𑌰𑍍𑌵𑌂 𑌯𑌤𑍍𑌰𑌾𑌪𑌿 𑌮𑌮 𑌰𑍋𑌚𑌤𑍇 ॥ 20 ॥
𑌏𑌵𑌮𑍁𑌕𑍍𑌤𑍍𑌵𑌾 𑌤𑍁 𑌧𑌰𑍍𑌮𑌾𑌤𑍍𑌮𑌾 𑌭𑌰𑌤𑍋 𑌭𑍍𑌰𑌾𑌤𑍃𑌵𑌤𑍍𑌸𑌲𑌃 ।
𑌸𑌮𑍀𑌪𑌸𑍍𑌥𑌮𑍁𑌵𑌾𑌚𑍇𑌦𑌂 𑌸𑍁𑌮𑌂𑌤𑍍𑌰𑌂 𑌮𑌂𑌤𑍍𑌰𑌕𑍋𑌵𑌿𑌦𑌮𑍍 ॥ 21 ॥
𑌤𑍂𑌰𑍍𑌣𑌮𑍁𑌤𑍍𑌥𑌾𑌯 𑌗𑌚𑍍𑌛 𑌤𑍍𑌵𑌂 𑌸𑍁𑌮𑌂𑌤𑍍𑌰 𑌮𑌮 𑌶𑌾𑌸𑌨𑌾𑌤𑍍 ।
𑌯𑌾𑌤𑍍𑌰𑌾𑌮𑌾𑌜𑍍𑌞𑌾𑌪𑌯 𑌕𑍍𑌷𑌿𑌪𑍍𑌰𑌂 𑌬𑌲𑌂 𑌚𑍈𑌵 𑌸𑌮𑌾𑌨𑌯 ॥ 22 ॥
𑌏𑌵𑌮𑍁𑌕𑍍𑌤 𑌸𑍍𑌸𑍁𑌮𑌂𑌤𑍍𑌰𑌸𑍍𑌤𑍁 𑌭𑌰𑌤𑍇𑌨 𑌮𑌹𑌾𑌤𑍍𑌮𑌨𑌾 ।
𑌹𑍃𑌷𑍍𑌟𑌸𑍍𑌤𑌦𑌾𑌽𑌦𑌿𑌶𑌤𑍍𑌸𑌰𑍍𑌵𑌂 𑌯𑌥𑌾𑌸𑌂𑌦𑌿𑌷𑍍𑌟𑌮𑌿𑌷𑍍𑌟𑌵𑌤𑍍 ॥ 23 ॥
𑌤𑌾𑌃 𑌪𑍍𑌰𑌹𑍃𑌷𑍍𑌟𑌾𑌃 𑌪𑍍𑌰𑌕𑍃𑌤𑌯𑍋 𑌬𑌲𑌾𑌧𑍍𑌯𑌕𑍍𑌷𑌾 𑌬𑌲𑌸𑍍𑌯 𑌚 ।
𑌶𑍍𑌰𑍁𑌤𑍍𑌵𑌾 𑌯𑌾𑌤𑍍𑌰𑌾𑌂 𑌸𑌮𑌾𑌜𑍍𑌞𑌪𑍍𑌤𑌾𑌂 𑌰𑌾𑌘𑌵𑌸𑍍𑌯 𑌨𑌿𑌵𑌰𑍍𑌤𑌨𑍇 ॥ 24 ॥
𑌤𑌤𑍋 𑌯𑍋𑌧𑌾𑌂𑌗𑌨𑌾 𑌸𑍍𑌸𑌰𑍍𑌵𑌾 𑌭𑌰𑍍𑌤𑍍𑌰𑍂𑌨𑍍𑌸𑌰𑍍𑌵𑌾𑌨𑍍𑌗𑍃𑌹𑍇𑌗𑍃𑌹𑍇 ।
𑌯𑌾𑌤𑍍𑌰𑌾𑌗𑌮𑌨𑌮𑌾𑌜𑍍𑌞𑌾𑌯 𑌤𑍍𑌵𑌰𑌯𑌂𑌤𑌿 𑌸𑍍𑌮 𑌹𑌰𑍍𑌷𑌿𑌤𑌾𑌃 ॥ 25 ॥
𑌤𑍇 𑌹𑌯𑍈𑌰𑍍𑌗𑍋𑌰𑌥𑍈𑌶𑍍𑌶𑍀𑌘𑍍𑌰𑍈𑌸𑍍𑌸𑍍𑌯𑌂𑌦𑌨𑍈𑌶𑍍𑌚 𑌮𑌹𑌾𑌜𑌵𑍈𑌃 𑌸𑌹 𑌯𑍋𑌧𑍈𑌰𑍍𑌬𑌲𑌾𑌧𑍍𑌯𑌕𑍍𑌷𑌾 𑌬𑌲𑌂 𑌸𑌰𑍍𑌵𑌮𑌚𑍋𑌦𑌯𑌨𑍍 ॥ 26 ॥
𑌸𑌜𑍍𑌜𑌂 𑌤𑍁 𑌤𑌦𑍍𑌬𑌲𑌂 𑌦𑍃𑌷𑍍𑌟𑍍𑌵𑌾 𑌭𑌰𑌤𑍋 𑌗𑍁𑌰𑍁𑌸𑌨𑍍𑌨𑌿𑌧𑍌 ।
𑌰𑌥𑌂 𑌮𑍇 𑌤𑍍𑌵𑌰𑌯𑌸𑍍𑌵𑍇𑌤𑌿 𑌸𑍁𑌮𑌂𑌤𑍍𑌰𑌂 𑌪𑌾𑌰𑍍𑌶𑍍𑌵𑌤𑍋𑌽𑌬𑍍𑌰𑌵𑍀𑌤𑍍 ॥ 2 ॥
𑌭𑌰𑌤𑌸𑍍𑌯 𑌤𑍁 𑌤𑌸𑍍𑌯𑌾𑌜𑍍𑌞𑌾𑌂 𑌪𑍍𑌰𑌤𑌿𑌗𑍃𑌹𑍍𑌯 𑌚 𑌹𑌰𑍍𑌷𑌿𑌤𑌃 ।
𑌰𑌥𑌂 𑌗𑍃𑌹𑍀𑌤𑍍𑌵𑌾 𑌪𑍍𑌰𑌯𑌯𑍌 𑌯𑍁𑌕𑍍𑌤𑌂 𑌪𑌰𑌮𑌵𑌾𑌜𑌿𑌭𑌿𑌃 ॥ 2 ॥
𑌸 𑌰𑌾𑌘𑌵 𑌸𑍍𑌸𑌤𑍍𑌯𑌧𑍃𑌤𑌿𑌃 𑌪𑍍𑌰𑌤𑌾𑌪𑌵𑌾𑌨𑍍 𑌬𑍍𑌰𑍁𑌵𑌨𑍍 𑌸𑍁𑌯𑍁𑌕𑍍𑌤𑌂 𑌦𑍃𑌢𑌸𑌤𑍍𑌯𑌵𑌿𑌕𑍍𑌰𑌮𑌃 ।
𑌗𑍁𑌰𑍁𑌂 𑌮𑌹𑌾𑌰𑌣𑍍𑌯𑌗𑌤𑌂 𑌯𑌶𑌸𑍍𑌵𑌿𑌨𑌂 𑌪𑍍𑌰𑌸𑌾𑌦𑌯𑌿𑌷𑍍𑌯𑌨𑍍𑌭𑌰𑌤𑍋𑌽𑌬𑍍𑌰𑌵𑍀𑌤𑍍𑌤𑌦𑌾 ॥ 2 ॥
𑌤𑍂𑌰𑍍𑌣𑌂 𑌸𑌮𑍁𑌤𑍍𑌥𑌾𑌯 𑌸𑍁𑌮𑌂𑌤𑍍𑌰 𑌗𑌚𑍍𑌛 𑌬𑌲𑌸𑍍𑌯 𑌯𑍋𑌗𑌾𑌯 𑌬𑌲𑌪𑍍𑌰𑌧𑌾𑌨𑌾𑌨𑍍 ।
𑌆𑌨𑍇𑌤𑍁𑌮𑌿𑌚𑍍𑌛𑌾𑌮𑌿 𑌹𑌿 𑌤𑌂 𑌵𑌨𑌸𑍍𑌥𑌂 𑌪𑍍𑌰𑌸𑌾𑌦𑍍𑌯 𑌰𑌾𑌮𑌂 𑌜𑌗𑌤𑍋 𑌹𑌿𑌤𑌾𑌯 ॥ 30 ॥
𑌸𑌸𑍂𑌤𑌪𑍁𑌤𑍍𑌰𑍋 𑌭𑌰𑌤𑍇𑌨 𑌸𑌮𑍍𑌯𑌗𑌾𑌜𑍍𑌞𑌾𑌪𑌿𑌤𑌸𑍍𑌸𑌂𑌪𑌰𑌿𑌪𑍂𑌰𑍍𑌣𑌕𑌾𑌮𑌃 ।
𑌶𑌶𑌾𑌸 𑌸𑌰𑍍𑌵𑌾𑌨𑍍𑌪𑍍𑌰𑌕𑍃𑌤𑌿𑌪𑍍𑌰𑌧𑌾𑌨𑌾𑌨𑍍𑌬𑌲𑌸𑍍𑌯 𑌮𑍁𑌖𑍍𑌯𑌾𑌂𑌶𑍍𑌚 𑌸𑍁𑌹𑍃𑌜𑍍𑌜𑌨𑌂 𑌚 ॥ 31 ॥
𑌤𑌤 𑌸𑍍𑌸𑌮𑍁𑌤𑍍𑌥𑌾𑌯 𑌕𑍁𑌲𑍇 𑌕𑍁𑌲𑍇 𑌤𑍇 𑌰𑌾𑌜𑌨𑍍𑌯𑌵𑍈𑌶𑍍𑌯𑌾 𑌵𑍃𑌷𑌲𑌾𑌶𑍍𑌚 𑌵𑌿𑌪𑍍𑌰𑌾𑌃 ।
𑌅𑌯𑍂𑌯𑍁𑌜𑌨𑍍𑌨𑍁𑌷𑍍𑌟𑍍𑌰𑌖𑌰𑌾𑌨𑍍𑌰𑌥𑌾𑌂𑌶𑍍𑌚 𑌨𑌾𑌗𑌾𑌨𑍍𑌹𑌯𑌾𑌂𑌶𑍍𑌚𑍈𑌵 𑌕𑍁𑌲𑌪𑍍𑌰𑌸𑍂𑌤𑌾𑌨𑍍 ॥ 32 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑍇 𑌦𑍍𑌵𑌾𑌶𑍀𑌤𑌿𑌤𑌮𑌸𑍍𑌸𑌰𑍍𑌗𑌃 ॥
