𑌓𑌂 𑌸॒𑌹 𑌨𑌾॑𑌵𑌵𑌤𑍁 । 𑌸॒𑌹 𑌨𑍌॑ 𑌭𑍁𑌨𑌕𑍍𑌤𑍁 । 𑌸॒𑌹 𑌵𑍀॒𑌰𑍍𑌯𑌂॑ 𑌕𑌰𑌵𑌾𑌵𑌹𑍈 ।
𑌤𑍇॒𑌜॒𑌸𑍍𑌵𑌿𑌨𑌾॒𑌵𑌧𑍀॑𑌤𑌮𑌸𑍍𑌤𑍁॒ 𑌮𑌾 𑌵𑌿॑𑌦𑍍𑌵𑌿𑌷𑌾॒𑌵𑌹𑍈᳚ ॥
𑌓𑌂 𑌶𑌾𑌂𑌤𑌿𑌃॒ 𑌶𑌾𑌂𑌤𑌿𑌃॒ 𑌶𑌾𑌂𑌤𑌿𑌃॑ ॥

𑌓𑌂 𑌅𑌥 𑌪𑍁𑌰𑍁𑌷𑍋 𑌹 𑌵𑍈 𑌨𑌾𑌰𑌾𑌯𑌣𑍋𑌽𑌕𑌾𑌮𑌯𑌤 𑌪𑍍𑌰𑌜𑌾𑌃 𑌸𑍃॑𑌜𑍇𑌯𑍇॒𑌤𑌿 ।
𑌨𑌾॒𑌰𑌾॒𑌯॒𑌣𑌾𑌤𑍍𑌪𑍍𑌰𑌾॑𑌣𑍋 𑌜𑌾॒𑌯𑌤𑍇 । 𑌮𑌨𑌃 𑌸𑌰𑍍𑌵𑍇𑌂𑌦𑍍𑌰𑌿॑𑌯𑌾𑌣𑌿॒ 𑌚 ।
𑌖𑌂-𑌵𑌾𑌁𑌯𑍁𑌰𑍍𑌜𑍍𑌯𑍋𑌤𑌿𑌰𑌾𑌪𑌃 𑌪𑍃𑌥𑌿𑌵𑍀 𑌵𑌿𑌶𑍍𑌵॑𑌸𑍍𑌯 𑌧𑌾॒𑌰𑌿𑌣𑍀 ।
𑌨𑌾॒𑌰𑌾॒𑌯॒𑌣𑌾𑌦𑍍𑌬𑍍𑌰॑𑌹𑍍𑌮𑌾 𑌜𑌾॒𑌯𑌤𑍇 ।
𑌨𑌾॒𑌰𑌾॒𑌯॒𑌣𑌾𑌦𑍍𑌰𑍁॑𑌦𑍍𑌰𑍋 𑌜𑌾॒𑌯𑌤𑍇 ।
𑌨𑌾॒𑌰𑌾॒𑌯॒𑌣𑌾𑌦𑌿𑌂॑𑌦𑍍𑌰𑍋 𑌜𑌾॒𑌯𑌤𑍇 ।
𑌨𑌾॒𑌰𑌾॒𑌯॒𑌣𑌾𑌤𑍍𑌪𑍍𑌰𑌜𑌾𑌪𑌤𑌯𑌃 𑌪𑍍𑌰॑𑌜𑌾𑌯𑌂॒𑌤𑍇 ।
𑌨𑌾॒𑌰𑌾॒𑌯॒𑌣𑌾𑌦𑍍𑌦𑍍𑌵𑌾𑌦𑌶𑌾𑌦𑌿𑌤𑍍𑌯𑌾 𑌰𑍁𑌦𑍍𑌰𑌾 𑌵𑌸𑌵𑌸𑍍𑌸𑌰𑍍𑌵𑌾𑌣𑌿 𑌚 𑌛𑌂॑𑌦𑌾𑌗𑍍​𑌮𑍍॒𑌸𑌿 ।
𑌨𑌾॒𑌰𑌾॒𑌯॒𑌣𑌾𑌦𑍇𑌵 𑌸𑌮𑍁॑𑌤𑍍𑌪𑌦𑍍𑌯𑌂॒𑌤𑍇 ।
𑌨𑌾॒𑌰𑌾॒𑌯॒𑌣𑍇 𑌪𑍍𑌰॑𑌵𑌰𑍍𑌤𑌂॒𑌤𑍇 ।
𑌨𑌾॒𑌰𑌾॒𑌯॒𑌣𑍇 𑌪𑍍𑌰॑𑌲𑍀𑌯𑌂॒𑌤𑍇 ॥

𑌓𑌮𑍍 । 𑌅𑌥 𑌨𑌿𑌤𑍍𑌯𑍋 𑌨𑌾॑𑌰𑌾𑌯॒𑌣𑌃 । 𑌬𑍍𑌰॒𑌹𑍍𑌮𑌾 𑌨𑌾॑𑌰𑌾𑌯॒𑌣𑌃 ।
𑌶𑌿॒𑌵𑌶𑍍𑌚॑ 𑌨𑌾𑌰𑌾𑌯॒𑌣𑌃 । 𑌶॒𑌕𑍍𑌰𑌶𑍍𑌚॑ 𑌨𑌾𑌰𑌾𑌯॒𑌣𑌃 ।
𑌦𑍍𑌯𑌾॒𑌵𑌾॒𑌪𑍃॒𑌥𑌿॒𑌵𑍍𑌯𑍌 𑌚॑ 𑌨𑌾𑌰𑌾𑌯॒𑌣𑌃 । 𑌕𑌾॒𑌲𑌶𑍍𑌚॑ 𑌨𑌾𑌰𑌾𑌯॒𑌣𑌃 ।
𑌦𑌿॒𑌶𑌶𑍍𑌚॑ 𑌨𑌾𑌰𑌾𑌯॒𑌣𑌃 । 𑌊॒𑌰𑍍𑌧𑍍𑌵𑌶𑍍𑌚॑ 𑌨𑌾𑌰𑌾𑌯॒𑌣𑌃 ।
𑌅॒𑌧𑌶𑍍𑌚॑ 𑌨𑌾𑌰𑌾𑌯॒𑌣𑌃 । 𑌅𑌂॒𑌤॒𑌰𑍍𑌬॒𑌹𑌿𑌶𑍍𑌚॑ 𑌨𑌾𑌰𑌾𑌯॒𑌣𑌃 ।
𑌨𑌾𑌰𑌾𑌯𑌣 𑌏𑌵𑍇॑𑌦𑌗𑍍​𑌮𑍍 𑌸॒𑌰𑍍𑌵𑌮𑍍 ।
𑌯𑌦𑍍𑌭𑍂॒𑌤𑌂-𑌯𑌁𑌚𑍍𑌚॒ 𑌭𑌵𑍍𑌯𑌮𑍍᳚ ।
𑌨𑌿𑌷𑍍𑌕𑌲𑍋 𑌨𑌿𑌰𑌂𑌜𑌨𑍋 𑌨𑌿𑌰𑍍𑌵𑌿𑌕𑌲𑍍𑌪𑍋 𑌨𑌿𑌰𑌾𑌖𑍍𑌯𑌾𑌤𑌃 𑌶𑍁𑌦𑍍𑌧𑍋 𑌦𑍇𑌵
𑌏𑌕𑍋॑ 𑌨𑌾𑌰𑌾𑌯॒𑌣𑌃 । 𑌨 𑌦𑍍𑌵𑌿॒𑌤𑍀𑌯𑍋᳚𑌸𑍍𑌤𑌿॒ 𑌕𑌶𑍍𑌚𑌿॑𑌤𑍍 ।
𑌯 𑌏॑𑌵𑌂-𑌵𑍇𑌁॒𑌦 ।
𑌸 𑌵𑌿𑌷𑍍𑌣𑍁𑌰𑍇𑌵 𑌭𑌵𑌤𑌿 𑌸 𑌵𑌿𑌷𑍍𑌣𑍁𑌰𑍇॑𑌵 𑌭॒𑌵𑌤𑌿 ॥

𑌓𑌮𑌿𑌤𑍍𑌯॑𑌗𑍍𑌰𑍇 𑌵𑍍𑌯𑌾॒𑌹𑌰𑍇𑌤𑍍 । 𑌨𑌮 𑌇॑𑌤𑌿 𑌪॒𑌶𑍍𑌚𑌾𑌤𑍍 ।
𑌨𑌾॒𑌰𑌾॒𑌯॒𑌣𑌾𑌯𑍇𑌤𑍍𑌯𑍁॑𑌪𑌰𑌿॒𑌷𑍍𑌟𑌾𑌤𑍍 ।
𑌓𑌮𑌿॑𑌤𑍍𑌯𑍇𑌕𑌾॒𑌕𑍍𑌷𑌰𑌮𑍍 । 𑌨𑌮 𑌇𑌤𑌿॑ 𑌦𑍍𑌵𑍇 𑌅॒𑌕𑍍𑌷𑌰𑍇 ।
𑌨𑌾॒𑌰𑌾॒𑌯॒𑌣𑌾𑌯𑍇𑌤𑌿 𑌪𑌂𑌚𑌾᳚𑌕𑍍𑌷𑌰𑌾॒𑌣𑌿 ।
𑌏𑌤𑌦𑍍𑌵𑍈 𑌨𑌾𑌰𑌾𑌯𑌣𑌸𑍍𑌯𑌾𑌷𑍍𑌟𑌾𑌕𑍍𑌷॑𑌰𑌂 𑌪॒𑌦𑌮𑍍 ।
𑌯𑍋 𑌹 𑌵𑍈 𑌨𑌾𑌰𑌾𑌯𑌣𑌸𑍍𑌯𑌾𑌷𑍍𑌟𑌾𑌕𑍍𑌷𑌰𑌂 𑌪𑌦॑𑌮𑌧𑍍𑌯𑍇॒𑌤𑌿 ।
𑌅𑌨𑌪𑌬𑍍𑌰𑌵𑌸𑍍𑌸𑌰𑍍𑌵𑌮𑌾॑𑌯𑍁𑌰𑍇॒𑌤𑌿 ।
𑌵𑌿𑌂𑌦𑌤𑍇 𑌪𑍍𑌰𑌾॑𑌜𑌾𑌪॒𑌤𑍍𑌯𑌗𑍍​𑌮𑍍 𑌰𑌾𑌯𑌸𑍍𑌪𑍋𑌷𑌂॑ 𑌗𑍌𑌪॒𑌤𑍍𑌯𑌮𑍍 ।
𑌤𑌤𑍋𑌽𑌮𑍃𑌤𑌤𑍍𑌵𑌮𑌶𑍍𑌨𑍁𑌤𑍇 𑌤𑌤𑍋𑌽𑌮𑍃𑌤𑌤𑍍𑌵𑌮𑌶𑍍𑌨𑍁॑𑌤 𑌇॒𑌤𑌿 ।
𑌯 𑌏॑𑌵𑌂-𑌵𑍇𑌁॒𑌦 ॥

𑌪𑍍𑌰𑌤𑍍𑌯𑌗𑌾𑌨𑌂𑌦𑌂 𑌬𑍍𑌰𑌹𑍍𑌮 𑌪𑍁𑌰𑍁𑌷𑌂 𑌪𑍍𑌰𑌣𑌵॑𑌸𑍍𑌵𑌰𑍂॒𑌪𑌮𑍍 ।
𑌅𑌕𑌾𑌰 𑌉𑌕𑌾𑌰 𑌮𑌕𑌾॑𑌰 𑌇॒𑌤𑌿 ।
𑌤𑌾𑌨𑍇𑌕𑌧𑌾 𑌸𑌮𑌭𑌰𑌤𑍍𑌤𑌦𑍇𑌤॑𑌦𑍋𑌮𑌿॒𑌤𑌿 ।
𑌯𑌮𑍁𑌕𑍍𑌤𑍍𑌵𑌾॑ 𑌮𑍁𑌚𑍍𑌯॑𑌤𑍇 𑌯𑍋॒𑌗𑍀॒ 𑌜॒𑌨𑍍𑌮॒𑌸𑌂𑌸𑌾॑𑌰𑌬𑌂॒𑌧𑌨𑌾𑌤𑍍 ।
𑌓𑌂 𑌨𑌮𑍋 𑌨𑌾𑌰𑌾𑌯𑌣𑌾𑌯𑍇𑌤𑌿 𑌮𑌂॑𑌤𑍍𑌰𑍋𑌪𑌾॒𑌸𑌕𑌃 ।
𑌵𑍈𑌕𑍁𑌂𑌠𑌭𑍁𑌵𑌨𑌲𑍋𑌕𑌂॑ 𑌗𑌮𑌿॒𑌷𑍍𑌯𑌤𑌿 ।
𑌤𑌦𑌿𑌦𑌂 𑌪𑌰𑌂 𑌪𑍁𑌂𑌡𑌰𑍀𑌕𑌂-𑌵𑌿𑌁॑𑌜𑍍𑌞𑌾𑌨॒𑌘𑌨𑌮𑍍 ।
𑌤𑌸𑍍𑌮𑌾𑌤𑍍𑌤𑌦𑌿𑌦𑌾॑𑌵𑌨𑍍𑌮𑌾॒𑌤𑍍𑌰𑌮𑍍 ।
𑌬𑍍𑌰𑌹𑍍𑌮𑌣𑍍𑌯𑍋 𑌦𑍇𑌵॑𑌕𑍀𑌪𑍁॒𑌤𑍍𑌰𑍋॒ 𑌬𑍍𑌰𑌹𑍍𑌮𑌣𑍍𑌯𑍋 𑌮॑𑌧𑍁𑌸𑍂॒𑌦𑌨𑍋𑌮𑍍 ।
𑌸𑌰𑍍𑌵𑌭𑍂𑌤𑌸𑍍𑌥𑌮𑍇𑌕𑌂॑ 𑌨𑌾𑌰𑌾॒𑌯𑌣𑌮𑍍 ।
𑌕𑌾𑌰𑌣𑌰𑍂𑌪𑌮𑌕𑌾𑌰 𑌪॑𑌰𑌬𑍍𑌰॒𑌹𑍍𑌮𑍋𑌮𑍍 ।
𑌏𑌤𑌦𑌥𑌰𑍍𑌵 𑌶𑌿𑌰𑍋॑𑌯𑍋𑌽𑌧𑍀॒𑌤𑍇 𑌪𑍍𑌰𑌾॒𑌤𑌰॑𑌧𑍀𑌯𑌾॒𑌨𑍋॒ 𑌰𑌾𑌤𑍍𑌰𑌿𑌕𑍃𑌤𑌂 𑌪𑌾𑌪𑌂॑ 𑌨𑌾𑌶॒𑌯𑌤𑌿 ।
𑌸𑌾॒𑌯𑌮॑𑌧𑍀𑌯𑌾॒𑌨𑍋॒ 𑌦𑌿𑌵𑌸𑌕𑍃𑌤𑌂 𑌪𑌾𑌪𑌂॑ 𑌨𑌾𑌶॒𑌯𑌤𑌿 ।
𑌮𑌾𑌧𑍍𑌯𑌂𑌦𑌿𑌨𑌮𑌾𑌦𑌿𑌤𑍍𑌯𑌾𑌭𑌿𑌮𑍁𑌖𑍋॑𑌽𑌧𑍀𑌯𑌾॒𑌨𑌃॒ 𑌪𑌂𑌚𑌪𑌾𑌤𑌕𑍋𑌪𑌪𑌾𑌤𑌕𑌾᳚𑌤𑍍𑌪𑍍𑌰𑌮𑍁॒𑌚𑍍𑌯𑌤𑍇 ।
𑌸𑌰𑍍𑌵 𑌵𑍇𑌦 𑌪𑌾𑌰𑌾𑌯𑌣 𑌪𑍁॑𑌣𑍍𑌯𑌂-𑌲𑌁॒𑌭𑌤𑍇 ।
𑌨𑌾𑌰𑌾𑌯𑌣𑌸𑌾𑌯𑍁𑌜𑍍𑌯𑌮॑𑌵𑌾𑌪𑍍𑌨𑍋॒𑌤𑌿॒ 𑌨𑌾𑌰𑌾𑌯𑌣 𑌸𑌾𑌯𑍁𑌜𑍍𑌯𑌮॑𑌵𑌾𑌪𑍍𑌨𑍋॒𑌤𑌿 ।
𑌯 𑌏॑𑌵𑌂-𑌵𑍇𑌁॒𑌦 । 𑌇𑌤𑍍𑌯𑍁॑𑌪॒𑌨𑌿𑌷॑𑌤𑍍 ॥

𑌓𑌂 𑌸॒𑌹 𑌨𑌾॑𑌵𑌵𑌤𑍁 । 𑌸॒𑌹 𑌨𑍌॑ 𑌭𑍁𑌨𑌕𑍍𑌤𑍁 । 𑌸॒𑌹 𑌵𑍀॒𑌰𑍍𑌯𑌂॑ 𑌕𑌰𑌵𑌾𑌵𑌹𑍈 ।
𑌤𑍇॒𑌜॒𑌸𑍍𑌵𑌿𑌨𑌾॒𑌵𑌧𑍀॑𑌤𑌮𑌸𑍍𑌤𑍁॒ 𑌮𑌾 𑌵𑌿॑𑌦𑍍𑌵𑌿𑌷𑌾॒𑌵𑌹𑍈᳚ ॥
𑌓𑌂 𑌶𑌾𑌂𑌤𑌿𑌃॒ 𑌶𑌾𑌂𑌤𑌿𑌃॒ 𑌶𑌾𑌂𑌤𑌿𑌃॑ ॥