Narayaniyam Dashaka 47 - Shuddha Telugu

Collection of Spiritual and Devotional Literature in Various Indian Languages

View this in:

This document is in శుద్ధ తెలుగు with the right anusvaras marked. View this in సరళ తెలుగు, with simplified anusvaras for easier reading.

నారాయణీయం దశక 47

ఏకదా దధివిమాథకారిణీం మాతరం సముపసేదివాన్ భవాన్ ।
స్తన్యలోలుపతయా నివారయన్నఙ్కమేత్య పపివాన్ పయోధరౌ ॥1॥

అర్ధపీతకుచకుడ్మలే త్వయి స్నిగ్ధహాసమధురాననామ్బుజే ।
దుగ్ధమీశ దహనే పరిస్రుతం ధర్తుమాశు జననీ జగామ తే ॥2॥

సామిపీతరసభఙ్గసఙ్గతక్రోధభారపరిభూతచేతసా।
మన్థదణ్డముపగృహ్య పాటితం హన్త దేవ దధిభాజనం త్వయా ॥3॥

ఉచ్చలద్ధ్వనితముచ్చకైస్తదా సన్నిశమ్య జననీ సమాద్రుతా ।
త్వద్యశోవిసరవద్దదర్శ సా సద్య ఏవ దధి విస్తృతం క్షితౌ ॥4॥

వేదమార్గపరిమార్గితం రుషా త్వమవీక్ష్య పరిమార్గయన్త్యసౌ ।
సన్దదర్శ సుకృతిన్యులూఖలే దీయమాననవనీతమోతవే ॥5॥

త్వాం ప్రగృహ్య బత భీతిభావనాభాసురాననసరోజమాశు సా ।
రోషరూషితముఖీ సఖీపురో బన్ధనాయ రశనాముపాదదే ॥6॥

బన్ధుమిచ్ఛతి యమేవ సజ్జనస్తం భవన్తమయి బన్ధుమిచ్ఛతీ ।
సా నియుజ్య రశనాగుణాన్ బహూన్ ద్వ్యఙ్గులోనమఖిలం కిలైక్షత ॥7॥

విస్మితోత్స్మితసఖీజనేక్షితాం స్విన్నసన్నవపుషం నిరీక్ష్య తామ్ ।
నిత్యముక్తవపురప్యహో హరే బన్ధమేవ కృపయాఽన్వమన్యథాః ॥8॥

స్థీయతాం చిరములూఖలే ఖలేత్యాగతా భవనమేవ సా యదా।
ప్రాగులూఖలబిలాన్తరే తదా సర్పిరర్పితమదన్నవాస్థిథాః ॥9॥

యద్యపాశసుగమో విభో భవాన్ సంయతః కిము సపాశయాఽనయా ।
ఏవమాది దివిజైరభిష్టుతో వాతనాథ పరిపాహి మాం గదాత్ ॥10॥

Browse Related Categories: