భవన్తమయముద్వహన్ యదుకులోద్వహో నిస్సరన్
దదర్శ గగనోచ్చలజ్జలభరాం కలిన్దాత్మజామ్ ।
అహో సలిలసఞ్చయః స పునరైన్ద్రజాలోదితో
జలౌఘ ఇవ తత్క్షణాత్ ప్రపదమేయతామాయయౌ ॥1॥
ప్రసుప్తపశుపాలికాం నిభృతమారుదద్బాలికా-
మపావృతకవాటికాం పశుపవాటికామావిశన్ ।
భవన్తమయమర్పయన్ ప్రసవతల్పకే తత్పదా-
ద్వహన్ కపటకన్యకాం స్వపురమాగతో వేగతః ॥2॥
తతస్త్వదనుజారవక్షపితనిద్రవేగద్రవద్-
భటోత్కరనివేదితప్రసవవార్తయైవార్తిమాన్ ।
విముక్తచికురోత్కరస్త్వరితమాపతన్ భోజరా-
డతుష్ట ఇవ దృష్టవాన్ భగినికాకరే కన్యకామ్ ॥3॥
ధ్రువం కపటశాలినో మధుహరస్య మాయా భవే-
దసావితి కిశోరికాం భగినికాకరాలిఙ్గితామ్ ।
ద్విపో నలినికాన్తరాదివ మృణాలికామాక్షిప-
న్నయం త్వదనుజామజాముపలపట్టకే పిష్టవాన్ ॥4॥
తతః భవదుపాసకో ఝటితి మృత్యుపాశాదివ
ప్రముచ్య తరసైవ సా సమధిరూఢరూపాన్తరా ।
అధస్తలమజగ్ముషీ వికసదష్టబాహుస్ఫుర-
న్మహాయుధమహో గతా కిల విహాయసా దిద్యుతే ॥5॥
నృశంసతర కంస తే కిము మయా వినిష్పిష్టయా
బభూవ భవదన్తకః క్వచన చిన్త్యతాం తే హితమ్ ।
ఇతి త్వదనుజా విభో ఖలముదీర్య తం జగ్ముషీ
మరుద్గణపణాయితా భువి చ మన్దిరాణ్యేయుషీ ॥6॥
ప్రగే పునరగాత్మజావచనమీరితా భూభుజా
ప్రలమ్బబకపూతనాప్రముఖదానవా మానినః ।
భవన్నిధనకామ్యయా జగతి బభ్రముర్నిర్భయాః
కుమారకవిమారకాః కిమివ దుష్కరం నిష్కృపైః ॥7॥
తతః పశుపమన్దిరే త్వయి ముకున్ద నన్దప్రియా-
ప్రసూతిశయనేశయే రుదతి కిఞ్చిదఞ్చత్పదే ।
విబుధ్య వనితాజనైస్తనయసమ్భవే ఘోషితే
ముదా కిము వదామ్యహో సకలమాకులం గోకులమ్ ॥8॥
అహో ఖలు యశోదయా నవకలాయచేతోహరం
భవన్తమలమన్తికే ప్రథమమాపిబన్త్యా దృశా ।
పునః స్తనభరం నిజం సపది పాయయన్త్యా ముదా
మనోహరతనుస్పృశా జగతి పుణ్యవన్తో జితాః ॥9॥
భవత్కుశలకామ్యయా స ఖలు నన్దగోపస్తదా
ప్రమోదభరసఙ్కులో ద్విజకులాయ కిన్నాదదాత్ ।
తథైవ పశుపాలకాః కిము న మఙ్గలం తేనిరే
జగత్త్రితయమఙ్గల త్వమిహ పాహి మామామయాత్ ॥10॥
