అగ్రే కురూణామథ పాణ్డవానాం
దుఃశాసనేనాహృతవస్త్రకేశా ।
కృష్ణా తదాక్రోశదనన్యనాథా
గోవిన్ద దామోదర మాధవేతి ॥ 1॥
శ్రీకృష్ణ విష్ణో మధుకైటభారే
భక్తానుకమ్పిన్ భగవన్ మురారే ।
త్రాయస్వ మాం కేశవ లోకనాథ
గోవిన్ద దామోదర మాధవేతి ॥ 2॥
విక్రేతుకామా కిల గోపకన్యా
మురారిపాదార్పితచిత్తవృత్తిః ।
దధ్యాదికం మోహవశాదవోచద్
గోవిన్ద దామోదర మాధవేతి ॥ 3॥
ఉలూఖలే సమ్భృతతణ్డులాంశ్చ
సఙ్ఘట్టయన్త్యో ముసలైః ప్రముగ్ధాః ।
గాయన్తి గోప్యో జనితానురాగా
గోవిన్ద దామోదర మాధవేతి ॥ 4॥
కాచిత్కరామ్భోజపుటే నిషణ్ణం
క్రీడాశుకం కింశుకరక్తతుణ్డమ్ ।
అధ్యాపయామాస సరోరుహాక్షీ
గోవిన్ద దామోదర మాధవేతి ॥ 5॥
గృహే గృహే గోపవధూసమూహః
ప్రతిక్షణం పిఞ్జరసారికాణామ్ ।
స్ఖలద్గిరాం వాచయితుం ప్రవృత్తో
గోవిన్ద దామోదర మాధవేతి ॥ 6॥
పర్య్యఙ్కికాభాజమలం కుమారం
ప్రస్వాపయన్త్యోఽఖిలగోపకన్యాః ।
జగుః ప్రబన్ధం స్వరతాలబన్ధం
గోవిన్ద దామోదర మాధవేతి ॥ 7॥
రామానుజం వీక్షణకేలిలోలం
గోపీ గృహీత్వా నవనీతగోలమ్ ।
ఆబాలకం బాలకమాజుహావ
గోవిన్ద దామోదర మాధవేతి ॥ 8॥
విచిత్రవర్ణాభరణాభిరామే-
ఽభిధేహి వక్త్రామ్బుజరాజహంసి ।
సదా మదీయే రసనేఽగ్రరఙ్గే
గోవిన్ద దామోదర మాధవేతి ॥ 9॥
అఙ్కాధిరూఢం శిశుగోపగూఢం
స్తనం ధయన్తం కమలైకకాన్తమ్ ।
సమ్బోధయామాస ముదా యశోదా
గోవిన్ద దామోదర మాధవేతి ॥ 10॥
క్రీడన్తమన్తర్వ్రజమాత్మజం స్వం
సమం వయస్యైః పశుపాలబాలైః ।
ప్రేమ్ణా యశోదా ప్రజుహావ కృష్ణం
గోవిన్ద దామోదర మాధవేతి ॥ 11॥
యశోదయా గాఢములూఖలేన
గోకణ్ఠపాశేన నిబధ్యమానః ।
రురోద మన్దం నవనీతభోజీ
గోవిన్ద దామోదర మాధవేతి ॥ 12॥
నిజాఙ్గణే కఙ్కణకేలిలోలం
గోపీ గృహీత్వా నవనీతగోలమ్ ।
ఆమర్దయత్పాణితలేన నేత్రే
గోవిన్ద దామోదర మాధవేతి ॥ 13॥
గృహే గృహే గోపవధూకదమ్బాః
సర్వే మిలిత్వా సమవాయయోగే ।
పుణ్యాని నామాని పఠన్తి నిత్యం
గోవిన్ద దామోదర మాధవేతి ॥ 14॥
మన్దారమూలే వదనాభిరామం
బిమ్బాధరే పూరితవేణునాదమ్ ।
గోగోపగోపీజనమధ్యసంస్థం
గోవిన్ద దామోదర మాధవేతి ॥ 15॥
ఉత్థాయ గోప్యోఽపరరాత్రభాగే
స్మృత్వా యశోదాసుతబాలకేలిమ్ ।
గాయన్తి ప్రోచ్చైర్దధి మన్థయన్త్యో
గోవిన్ద దామోదర మాధవేతి ॥ 16॥
జగ్ధోఽథ దత్తో నవనీతపిణ్డో
గృహే యశోదా విచికిత్సయన్తీ ।
ఉవాచ సత్యం వద హే మురారే
గోవిన్ద దామోదర మాధవేతి ॥ 17॥
అభ్యర్చ్య గేహం యువతిః ప్రవృద్ధ-
ప్రేమప్రవాహా దధి నిర్మమన్థ ।
గాయన్తి గోప్యోఽథ సఖీసమేతా
గోవిన్ద దామోదర మాధవేతి ॥ 18॥
క్వచిత్ ప్రభాతే దధిపూర్ణపాత్రే
నిక్షిప్య మన్థం యువతీ ముకున్దమ్ ।
ఆలోక్య గానం వివిధం కరోతి
గోవిన్ద దామోదర మాధవేతి ॥ 19॥
క్రీడాపరం భోజనమజ్జనార్థం
హితైషిణీ స్త్రీ తనుజం యశోదా ।
ఆజూహవత్ ప్రేమపరిప్లుతాక్షీ
గోవిన్ద దామోదర మాధవేతి ॥ 20॥
సుఖం శయానం నిలయే చ విష్ణుం
దేవర్షిముఖ్యా మునయః ప్రపన్నాః ।
తేనాచ్యుతే తన్మయతాం వ్రజన్తి
గోవిన్ద దామోదర మాధవేతి ॥ 21॥
విహాయ నిద్రామరుణోదయే చ
విధాయ కృత్యాని చ విప్రముఖ్యాః ।
వేదావసానే ప్రపఠన్తి నిత్యం
గోవిన్ద దామోదర మాధవేతి ॥ 22॥
వృన్దావనే గోపగణాశ్చ గోప్యో
విలోక్య గోవిన్దవియోగఖిన్నామ్ ।
రాధాం జగుః సాశ్రువిలోచనాభ్యాం
గోవిన్ద దామోదర మాధవేతి ॥ 23॥
ప్రభాతసఞ్చారగతా ను గావస్-
తద్రక్షణార్థం తనయం యశోదా ।
ప్రాబోధయత్ పాణితలేన మన్దం
గోవిన్ద దామోదర మాధవేతి ॥ 24॥
ప్రవాలశోభా ఇవ దీర్ఘకేశా
వాతామ్బుపర్ణాశనపూతదేహాః ।
మూలే తరూణాం మునయః పఠన్తి
గోవిన్ద దామోదర మాధవేతి ॥ 25॥
ఏవం బ్రువాణా విరహాతురా భృశం
వ్రజస్త్రియః కృష్ణవిషక్తమానసాః ।
విసృజ్య లజ్జాం రురుదుః స్మ సుస్వరం
గోవిన్ద దామోదర మాధవేతి ॥ 26॥
గోపీ కదాచిన్మణిపఞ్జరస్థం
శుకం వచో వాచయితుం ప్రవృత్తా ।
ఆనన్దకన్ద వ్రజచన్ద్ర కృష్ణ
గోవిన్ద దామోదర మాధవేతి ॥ 27॥
గోవత్సబాలైః శిశుకాకపక్షం
బధ్నన్తమమ్భోజదలాయతాక్షమ్ ।
ఉవాచ మాతా చిబుకం గృహీత్వా
గోవిన్ద దామోదర మాధవేతి ॥ 28॥
ప్రభాతకాలే వరవల్లవౌఘా
గోరక్షణార్థం ధృతవేత్రదణ్డాః ।
ఆకారయామాసురనన్తమాద్యం
గోవిన్ద దామోదర మాధవేతి ॥ 29॥
జలాశయే కాలియమర్దనాయ
యదా కదమ్బాదపతన్మురారిః ।
గోపాఙ్గనాశ్చుక్రుశురేత్య గోపా
గోవిన్ద దామోదర మాధవేతి ॥ 30॥
అక్రూరమాసాద్య యదా ముకున్దశ్-
చాపోత్సవార్థం మథురాం ప్రవిష్టః ।
తదా స పౌరైర్జయసీత్యభాషి
గోవిన్ద దామోదర మాధవేతి ॥ 31॥
కంసస్య దూతేన యదైవ నీతౌ
వృన్దావనాన్తాద్ వసుదేవసూనూ । (సూనౌ)
రురోద గోపీ భవనస్య మధ్యే
గోవిన్ద దామోదర మాధవేతి ॥ 32॥
సరోవరే కాలియనాగబద్ధం
శిశుం యశోదాతనయం నిశమ్య ।
చక్రుర్లుఠన్త్యః పథి గోపబాలా
గోవిన్ద దామోదర మాధవేతి ॥ 33॥
అక్రూరయానే యదువంశనాథం
సఙ్గచ్ఛమానం మథురాం నిరీక్ష్య ।
ఊచుర్వియోగత్ కిల గోపబాలా
గోవిన్ద దామోదర మాధవేతి ॥ 34॥
చక్రన్ద గోపీ నలినీవనాన్తే
కృష్ణేన హీనా కుసుమే శయానా ।
ప్రఫుల్లనీలోత్పలలోచనాభ్యాం
గోవిన్ద దామోదర మాధవేతి ॥ 35॥
మాతాపితృభ్యాం పరివార్యమాణా
గేహం ప్రవిష్టా విలలాప గోపీ ।
ఆగత్య మాం పాలయ విశ్వనాథ
గోవిన్ద దామోదర మాధవేతి ॥ 36॥
వృన్దావనస్థం హరిమాశు బుద్ధ్వా
గోపీ గతా కాపి వనం నిశాయామ్ ।
తత్రాప్యదృష్ట్వాఽతిభయాదవోచద్
గోవిన్ద దామోదర మాధవేతి ॥ 37॥
సుఖం శయానా నిలయే నిజేఽపి
నామాని విష్ణోః ప్రవదన్తి మర్త్యాః ।
తే నిశ్చితం తన్మయతాం వ్రజన్తి
గోవిన్ద దామోదర మాధవేతి ॥ 38॥
సా నీరజాక్షీమవలోక్య రాధాం
రురోద గోవిన్దవియోగఖిన్నామ్ ।
సఖీ ప్రఫుల్లోత్పలలోచనాభ్యాం
గోవిన్ద దామోదర మాధవేతి ॥ 39॥
జిహ్వే రసజ్ఞే మధురప్రియా త్వం
సత్యం హితం త్వాం పరమం వదామి ।
ఆవర్ణయేథా మధురాక్షరాణి
గోవిన్ద దామోదర మాధవేతి ॥ 40॥
ఆత్యన్తికవ్యాధిహరం జనానాం
చికిత్సకం వేదవిదో వదన్తి ।
సంసారతాపత్రయనాశబీజం
గోవిన్ద దామోదర మాధవేతి ॥ 41॥
తాతాజ్ఞయా గచ్ఛతి రామచన్ద్రే
సలక్ష్మణేఽరణ్యచయే ససీతే ।
చక్రన్ద రామస్య నిజా జనిత్రీ
గోవిన్ద దామోదర మాధవేతి ॥ 42॥
ఏకాకినీ దణ్డకకాననాన్తాత్
సా నీయమానా దశకన్ధరేణ ।
సీతా తదాక్రన్దదనన్యనాథా
గోవిన్ద దామోదర మాధవేతి ॥ 43॥
రామాద్వియుక్తా జనకాత్మజా సా
విచిన్తయన్తీ హృది రామరూపమ్ ।
రురోద సీతా రఘునాథ పాహి
గోవిన్ద దామోదర మాధవేతి ॥ 44॥
ప్రసీద విష్ణో రఘువంశనాథ
సురాసురాణాం సుఖదుఃఖహేతో ।
రురోద సీతా తు సముద్రమధ్యే
గోవిన్ద దామోదర మాధవేతి ॥ 45॥
అన్తర్జలే గ్రాహగృహీతపాదో
విసృష్టవిక్లిష్టసమస్తబన్ధుః ।
తదా గజేన్ద్రో నితరాం జగాద
గోవిన్ద దామోదర మాధవేతి ॥ 46॥
హంసధ్వజః శఙ్ఖయుతో దదర్శ
పుత్రం కటాహే ప్రతపన్తమేనమ్ ।
పుణ్యాని నామాని హరేర్జపన్తం
గోవిన్ద దామోదర మాధవేతి ॥ 47॥
దుర్వాససో వాక్యముపేత్య కృష్ణా
సా చాబ్రవీత్ కాననవాసినీశమ్ ।
అన్తః ప్రవిష్టం మనసా జుహావ
గోవిన్ద దామోదర మాధవేతి ॥ 48॥
ధ్యేయః సదా యోగిభిరప్రమేయః
చిన్తాహరశ్చిన్తితపారిజాతః ।
కస్తూరికాకల్పితనీలవర్ణో
గోవిన్ద దామోదర మాధవేతి ॥ 49॥
సంసారకూపే పతితోఽత్యగాధే
మోహాన్ధపూర్ణే విషయాభితప్తే ।
కరావలమ్బం మమ దేహి విష్ణో
గోవిన్ద దామోదర మాధవేతి ॥ 50॥
భజస్వ మన్త్రం భవబన్ధముక్త్యై
జిహ్వే రసజ్ఞే సులభం మనోజ్ఞమ్ ।
ద్వైపాయనాద్యైర్మునిభిః ప్రజప్తం
గోవిన్ద దామోదర మాధవేతి ॥ 51॥
త్వామేవ యాచే మమ దేహి జిహ్వే
సమాగతే దణ్డధరే కృతాన్తే ।
వక్తవ్యమేవం మధురం సుభక్త్యా
గోవిన్ద దామోదర మాధవేతి ॥ 52॥
గోపాల వంశీధర రూపసిన్ధో
లోకేశ నారాయణ దీనబన్ధో ।
ఉచ్చస్వరైస్త్వం వద సర్వదైవ
గోవిన్ద దామోదర మాధవేతి ॥ 53॥
జిహ్వే సదైవం భజ సున్దరాణి
నామాని కృష్ణస్య మనోహరాణి ।
సమస్తభక్తార్తివినాశనాని
గోవిన్ద దామోదర మాధవేతి ॥ 54॥
గోవిన్ద గోవిన్ద హరే మురారే
గోవిన్ద గోవిన్ద ముకున్ద కృష్ణ ।
గోవిన్ద గోవిన్ద రథాఙ్గపాణే
గోవిన్ద దామోదర మాధవేతి ॥ 55॥
సుఖావసానే త్విదమేవ సారం
దుఃఖావసానే త్విదమేవ గేయమ్ ।
దేహావసానే త్విదమేవ జాప్యం
గోవిన్ద దామోదర మాధవేతి ॥ 56॥
దుర్వారవాక్యం పరిగృహ్య కృష్ణా
మృగీవ భీతా తు కథం కథఞ్చిత్ ।
సభాం ప్రవిష్టా మనసా జుహావ
గోవిన్ద దామోదర మాధవేతి ॥ 57॥
శ్రీకృష్ణ రాధావర గోకులేశ
గోపాల గోవర్ధన నాథ విష్ణో ।
జిహ్వే పిబస్వామృతమేతదేవ
గోవిన్ద దామోదర మాధవేతి ॥ 58॥
శ్రీనాథ విశ్వేశ్వర విశ్వమూర్తే
శ్రీదేవకీనన్దన దైత్యశత్రో ।
జిహ్వే పిబస్వామృతమేతదేవ
గోవిన్ద దామోదర మాధవేతి ॥ 59॥
గోపీపతే కంసరిపో ముకున్ద
లక్ష్మీపతే కేశవ వాసుదేవ ।
జిహ్వే పిబస్వామృతమేతదేవ
గోవిన్ద దామోదర మాధవేతి ॥ 60॥
గోపీజనాహ్లాదకర వ్రజేశ
గోచారణారణ్యకృతప్రవేశ ।
జిహ్వే పిబస్వామృతమేతదేవ
గోవిన్ద దామోదర మాధవేతి ॥ 61॥
ప్రాణేశ విశ్వమ్భర కైటభారే
వైకుణ్ఠ నారాయణ చక్రపాణే ।
జిహ్వే పిబస్వామృతమేతదేవ
గోవిన్ద దామోదర మాధవేతి ॥ 62॥
హరే మురారే మధుసూదనాద్య
శ్రీరామ సీతావర రావణారే ।
జిహ్వే పిబస్వామృతమేతదేవ
గోవిన్ద దామోదర మాధవేతి ॥ 63॥
శ్రీయాదవేన్ద్రాద్రిధరామ్బుజాక్ష
గోగోపగోపీసుఖదానదక్ష ।
జిహ్వే పిబస్వామృతమేతదేవ
గోవిన్ద దామోదర మాధవేతి ॥ 64॥
ధరాభరోత్తారణగోపవేష
విహారలీలాకృతబన్ధుశేష ।
జిహ్వే పిబస్వామృతమేతదేవ
గోవిన్ద దామోదర మాధవేతి ॥ 65॥
బకీబకాఘాసురధేనుకారే
కేశీతృణావర్తవిఘాతదక్ష ।
జిహ్వే పిబస్వామృతమేతదేవ
గోవిన్ద దామోదర మాధవేతి ॥ 66॥
శ్రీజానకీజీవన రామచన్ద్ర
నిశాచరారే భరతాగ్రజేశ ।
జిహ్వే పిబస్వామృతమేతదేవ
గోవిన్ద దామోదర మాధవేతి ॥ 67॥
నారాయణానన్త హరే నృసింహ
ప్రహ్లాదబాధాహర హే కృపాలో ।
జిహ్వే పిబస్వామృతమేతదేవ
గోవిన్ద దామోదర మాధవేతి ॥ 68॥
లీలామనుష్యాకృతిరామరూప
ప్రతాపదాసీకృతసర్వభూప ।
జిహ్వే పిబస్వామృతమేతదేవ
గోవిన్ద దామోదర మాధవేతి ॥ 69॥
శ్రీకృష్ణ గోవిన్ద హరే మురారే
హే నాథ నారాయణ వాసుదేవ ।
జిహ్వే పిబస్వామృతమేతదేవ
గోవిన్ద దామోదర మాధవేతి ॥ 70॥
వక్తుం సమర్థోఽపి న వక్తి కశ్చిద్-
అహో జనానాం వ్యసనాభిముఖ్యమ్ ।
జిహ్వే పిబస్వామృతమేతదేవ
గోవిన్ద దామోదర మాధవేతి ॥ 71॥
ఇతి శ్రీబిల్వమఙ్గలాచార్యవిరచితం శ్రీగోవిన్దదామోదరస్తోత్రం సమ్పూర్ణమ్ ।
