రామసఖః క్వాపి దినే కామద భగవన్ గతో భవాన్ విపినమ్ ।
సూనుభిరపి గోపానాం ధేనుభిరభిసంవృతో లసద్వేషః ॥1॥
సన్దర్శయన్ బలాయ స్వైరం వృన్దావనశ్రియం విమలామ్ ।
కాణ్డీరైః సహ బాలైర్భాణ్డీరకమాగమో వటం క్రీడన్ ॥2॥
తావత్తావకనిధనస్పృహయాలుర్గోపమూర్తిరదయాలుః ।
దైత్యః ప్రలమ్బనామా ప్రలమ్బబాహుం భవన్తమాపేదే ॥3॥
జానన్నప్యవిజానన్నివ తేన సమం నిబద్ధసౌహార్దః ।
వటనికటే పటుపశుపవ్యాబద్ధం ద్వన్ద్వయుద్ధమారబ్ధాః ॥4॥
గోపాన్ విభజ్య తన్వన్ సఙ్ఘం బలభద్రకం భవత్కమపి ।
త్వద్బలభీరుం దైత్యం త్వద్బలగతమన్వమన్యథా భగవన్ ॥5॥
కల్పితవిజేతృవహనే సమరే పరయూథగం స్వదయితతరమ్ ।
శ్రీదామానమధత్థాః పరాజితో భక్తదాసతాం ప్రథయన్ ॥6॥
ఏవం బహుషు విభూమన్ బాలేషు వహత్సు వాహ్యమానేషు ।
రామవిజితః ప్రలమ్బో జహార తం దూరతో భవద్భీత్యా ॥7॥
త్వద్దూరం గమయన్తం తం దృష్ట్వా హలిని విహితగరిమభరే ।
దైత్యః స్వరూపమాగాద్యద్రూపాత్ స హి బలోఽపి చకితోఽభూత్ ॥8॥
ఉచ్చతయా దైత్యతనోస్త్వన్ముఖమాలోక్య దూరతో రామః ।
విగతభయో దృఢముష్ట్యా భృశదుష్టం సపది పిష్టవానేనమ్ ॥9॥
హత్వా దానవవీరం ప్రాప్తం బలమాలిలిఙ్గిథ ప్రేమ్ణా ।
తావన్మిలతోర్యువయోః శిరసి కృతా పుష్పవృష్టిరమరగణైః ॥10॥
ఆలమ్బో భువనానాం ప్రాలమ్బం నిధనమేవమారచయన్ ।
కాలం విహాయ సద్యో లోలమ్బరుచే హరే హరేః క్లేశాన్ ॥11॥
