ప్రాతః సన్త్రస్తభోజక్షితిపతివచసా ప్రస్తుతే మల్లతూర్యే
సఙ్ఘే రాజ్ఞాం చ మఞ్చానభియయుషి గతే నన్దగోపేఽపి హర్మ్యమ్ ।
కంసే సౌధాధిరూఢే త్వమపి సహబలః సానుగశ్చారువేషో
రఙ్గద్వారం గతోఽభూః కుపితకువలయాపీడనాగావలీఢమ్ ॥1॥
పాపిష్ఠాపేహి మార్గాద్ద్రుతమితి వచసా నిష్ఠురక్రుద్ధబుద్ధే-
రమ్బష్ఠస్య ప్రణోదాదధికజవజుషా హస్తినా గృహ్యమాణః ।
కేలీముక్తోఽథ గోపీకుచకలశచిరస్పర్ధినం కుమ్భమస్య
వ్యాహత్యాలీయథాస్త్వం చరణభువి పునర్నిర్గతో వల్గుహాసీ ॥2॥
హస్తప్రాప్యోఽప్యగమ్యో ఝటితి మునిజనస్యేవ ధావన్ గజేన్ద్రం
క్రీడన్నాపాత్య భూమౌ పునరభిపతతస్తస్య దన్తం సజీవమ్ ।
మూలాదున్మూల్య తన్మూలగమహితమహామౌక్తికాన్యాత్మమిత్రే
ప్రాదాస్త్వం హారమేభిర్లలితవిరచితం రాధికాయై దిశేతి ॥3॥
గృహ్ణానం దన్తమంసే యుతమథ హలినా రఙ్గమఙ్గావిశన్తం
త్వాం మఙ్గల్యాఙ్గభఙ్గీరభసహృతమనోలోచనా వీక్ష్య లోకాః ।
హంహో ధన్యో హి నన్దో నహి నహి పశుపాలాఙ్గనా నో యశోదా
నో నో ధన్యేక్షణాః స్మస్త్రిజగతి వయమేవేతి సర్వే శశంసుః ॥4॥
పూర్ణం బ్రహ్మైవ సాక్షాన్నిరవధి పరమానన్దసాన్ద్రప్రకాశం
గోపేశు త్వం వ్యలాసీర్న ఖలు బహుజనైస్తావదావేదితోఽభూః ।
దృష్ట్వాఽథ త్వాం తదేదమ్ప్రథమముపగతే పుణ్యకాలే జనౌఘాః
పూర్ణానన్దా విపాపాః సరసమభిజగుస్త్వత్కృతాని స్మృతాని ॥5॥
చాణూరో మల్లవీరస్తదను నృపగిరా ముష్టికో ముష్టిశాలీ
త్వాం రామం చాభిపేదే ఝటఝటితి మిథో ముష్టిపాతాతిరూక్షమ్ ।
ఉత్పాతాపాతనాకర్షణవివిధరణాన్యాసతాం తత్ర చిత్రం
మృత్యోః ప్రాగేవ మల్లప్రభురగమదయం భూరిశో బన్ధమోక్షాన్ ॥6॥
హా ధిక్ కష్టం కుమారౌ సులలితవపుషౌ మల్లవీరౌ కఠోరౌ
న ద్రక్ష్యామో వ్రజామస్త్వరితమితి జనే భాషమాణే తదానీమ్ ।
చాణూరం తం కరోద్భ్రామణవిగలదసుం పోథయామాసిథోర్వ్యాం
పిష్టోఽభూన్ముష్టికోఽపి ద్రుతమథ హలినా నష్టశిష్టైర్దధావే ॥7॥
కంస సంవార్య తూర్యం ఖలమతిరవిదన్ కార్యమార్యాన్ పితృంస్తా-
నాహన్తుం వ్యాప్తమూర్తేస్తవ చ సమశిషద్దూరముత్సారణాయ ।
రుష్టో దుష్టోక్తిభిస్త్వం గరుడ ఇవ గిరిం మఞ్చమఞ్చన్నుదఞ్చత్-
ఖడ్గవ్యావల్గదుస్సఙ్గ్రహమపి చ హఠాత్ ప్రాగ్రహీరౌగ్రసేనిమ్ ॥8॥
సద్యో నిష్పిష్టసన్ధిం భువి నరపతిమాపాత్య తస్యోపరిష్టా-
త్త్వయ్యాపాత్యే తదైవ త్వదుపరి పతితా నాకినాం పుష్పవృష్టిః ।
కిం కిం బ్రూమస్తదానీం సతతమపి భియా త్వద్గతాత్మా స భేజే
సాయుజ్యం త్వద్వధోత్థా పరమ పరమియం వాసనా కాలనేమేః ॥9॥
తద్భ్రాతృనష్ట పిష్ట్వా ద్రుతమథ పితరౌ సన్నమన్నుగ్రసేనం
కృత్వా రాజానముచ్చైర్యదుకులమఖిలం మోదయన్ కామదానైః ।
భక్తానాముత్తమం చోద్ధవమమరగురోరాప్తనీతిం సఖాయం
లబ్ధ్వా తుష్టో నగర్యాం పవనపురపతే రున్ధి మే సర్వరోగాన్ ॥10॥
