సమ్ప్రాప్తో మథురాం దినార్ధవిగమే తత్రాన్తరస్మిన్ వస-
న్నారామే విహితాశనః సఖిజనైర్యాతః పురీమీక్షితుమ్ ।
ప్రాపో రాజపథం చిరశ్రుతిధృతవ్యాలోకకౌతూహల-
స్త్రీపుంసోద్యదగణ్యపుణ్యనిగలైరాకృష్యమాణో ను కిమ్ ॥1॥
త్వత్పాదద్యుతివత్ సరాగసుభగాః త్వన్మూర్తివద్యోషితః
సమ్ప్రాప్తా విలసత్పయోధరరుచో లోలా భవత్ దృష్టివత్ ।
హారిణ్యస్త్వదురఃస్థలీవదయి తే మన్దస్మితప్రౌఢివ-
న్నైర్మల్యోల్లసితాః కచౌఘరుచివద్రాజత్కలాపాశ్రితాః ॥2॥
తాసామాకలయన్నపాఙ్గవలనైర్మోదం ప్రహర్షాద్భుత-
వ్యాలోలేషు జనేషు తత్ర రజకం కఞ్చిత్ పటీం ప్రార్థయన్ ।
కస్తే దాస్యతి రాజకీయవసనం యాహీతి తేనోదితః
సద్యస్తస్య కరేణ శీర్షమహృథాః సోఽప్యాప పుణ్యాం గతిమ్ ॥3॥
భూయో వాయకమేకమాయతమతిం తోషేణ వేషోచితం
దాశ్వాంసం స్వపదం నినేథ సుకృతం కో వేద జీవాత్మనామ్ ।
మాలాభిః స్తబకైః స్తవైరపి పునర్మాలాకృతా మానితో
భక్తిం తేన వృతాం దిదేశిథ పరాం లక్ష్మీం చ లక్ష్మీపతే ॥4॥
కుబ్జామబ్జవిలోచనాం పథిపునర్దృష్ట్వాఽఙ్గరాగే తయా
దత్తే సాధు కిలాఙ్గరాగమదదాస్తస్యా మహాన్తం హృది ।
చిత్తస్థామృజుతామథ ప్రథయితుం గాత్రేఽపి తస్యాః స్ఫుటం
గృహ్ణన్ మఞ్జు కరేణ తాముదనయస్తావజ్జగత్సున్దరీమ్ ॥5॥
తావన్నిశ్చితవైభవాస్తవ విభో నాత్యన్తపాపా జనా
యత్కిఞ్చిద్దదతే స్మ శక్త్యనుగుణం తామ్బూలమాల్యాదికమ్ ।
గృహ్ణానః కుసుమాది కిఞ్చన తదా మార్గే నిబద్ధాఞ్జలి-
ర్నాతిష్ఠం బత హా యతోఽద్య విపులామార్తిం వ్రజామి ప్రభో ॥6॥
ఏష్యామీతి విముక్తయాఽపి భగవన్నాలేపదాత్ర్యా తయా
దూరాత్ కాతరయా నిరీక్షితగతిస్త్వం ప్రావిశో గోపురమ్ ।
ఆఘోషానుమితత్వదాగమమహాహర్షోల్లలద్దేవకీ-
వక్షోజప్రగలత్పయోరసమిషాత్త్వత్కీర్తిరన్తర్గతా ॥7॥
ఆవిష్టో నగరీం మహోత్సవవతీం కోదణ్డశాలాం వ్రజన్
మాధుర్యేణ ను తేజసా ను పురుషైర్దూరేణ దత్తాన్తరః ।
స్రగ్భిర్భూషితమర్చితం వరధనుర్మా మేతి వాదాత్ పురః
ప్రాగృహ్ణాః సమరోపయః కిల సమాక్రాక్షీరభాఙ్క్షీరపి ॥8॥
శ్వః కంసక్షపణోత్సవస్య పురతః ప్రారమ్భతూర్యోపమ-
శ్చాపధ్వంసమహాధ్వనిస్తవ విభో దేవానరోమాఞ్చయత్ ।
కంసస్యాపి చ వేపథుస్తదుదితః కోదణ్డఖణ్డద్వయీ-
చణ్డాభ్యాహతరక్షిపూరుషరవైరుత్కూలితోఽభూత్ త్వయా ॥9॥
శిష్టైర్దుష్టజనైశ్చ దృష్టమహిమా ప్రీత్యా చ భీత్యా తతః
సమ్పశ్యన్ పురసమ్పదం ప్రవిచరన్ సాయం గతో వాటికామ్ ।
శ్రీదామ్నా సహ రాధికావిరహజం ఖేదం వదన్ ప్రస్వప-
న్నానన్దన్నవతారకార్యఘటనాద్వాతేశ సంరక్ష మామ్ ॥10॥
