పృథోస్తు నప్తా పృథుధర్మకర్మఠః
ప్రాచీనబర్హిర్యువతౌ శతద్రుతౌ ।
ప్రచేతసో నామ సుచేతసః సుతా-
నజీజనత్త్వత్కరుణాఙ్కురానివ ॥1॥
పితుః సిసృక్షానిరతస్య శాసనాద్-
భవత్తపస్యాభిరతా దశాపి తే
పయోనిధిం పశ్చిమమేత్య తత్తటే
సరోవరం సన్దదృశుర్మనోహరమ్ ॥2॥
తదా భవత్తీర్థమిదం సమాగతో
భవో భవత్సేవకదర్శనాదృతః ।
ప్రకాశమాసాద్య పురః ప్రచేతసా-
ముపాదిశత్ భక్తతమస్తవ స్తవమ్ ॥3॥
స్తవం జపన్తస్తమమీ జలాన్తరే
భవన్తమాసేవిషతాయుతం సమాః ।
భవత్సుఖాస్వాదరసాదమీష్వియాన్
బభూవ కాలో ధ్రువవన్న శీఘ్రతా ॥4॥
తపోభిరేషామతిమాత్రవర్ధిభిః
స యజ్ఞహింసానిరతోఽపి పావితః ।
పితాఽపి తేషాం గృహయాతనారద-
ప్రదర్శితాత్మా భవదాత్మతాం యయౌ ॥5॥
కృపాబలేనైవ పురః ప్రచేతసాం
ప్రకాశమాగాః పతగేన్ద్రవాహనః ।
విరాజి చక్రాదివరాయుధాంశుభి-
ర్భుజాభిరష్టాభిరుదఞ్చితద్యుతిః ॥6॥
ప్రచేతసాం తావదయాచతామపి
త్వమేవ కారుణ్యభరాద్వరానదాః ।
భవద్విచిన్తాఽపి శివాయ దేహినాం
భవత్వసౌ రుద్రనుతిశ్చ కామదా ॥7॥
అవాప్య కాన్తాం తనయాం మహీరుహాం
తయా రమధ్వం దశలక్షవత్సరీమ్ ।
సుతోఽస్తు దక్షో నను తత్క్షణాచ్చ మాం
ప్రయాస్యథేతి న్యగదో ముదైవ తాన్ ॥8॥
తతశ్చ తే భూతలరోధినస్తరూన్
క్రుధా దహన్తో ద్రుహిణేన వారితాః ।
ద్రుమైశ్చ దత్తాం తనయామవాప్య తాం
త్వదుక్తకాలం సుఖినోఽభిరేమిరే ॥9॥
అవాప్య దక్షం చ సుతం కృతాధ్వరాః
ప్రచేతసో నారదలబ్ధయా ధియా ।
అవాపురానన్దపదం తథావిధ-
స్త్వమీశ వాతాలయనాథ పాహి మామ్ ॥10॥
