asya śrīlalitā triśatīstōtra mahāmantrasya, bhagavān hayagrīva ṛṣiḥ, anuṣṭup Chandaḥ, śrīlalitāmahātripurasundarī dēvatā, aiṃ bījaṃ, sauḥ śaktiḥ, klīṃ kīlakaṃ, mama chaturvidhapuruṣārthaphalasiddhyarthē japē viniyōgaḥ ।
aimityādibhiraṅganyāsakaranyāsāḥ kāryāḥ ।
dhyānam ।
atimadhurachāpahastā-
-maparimitāmōdabāṇasaubhāgyām ।
aruṇāmatiśayakaruṇā-
-mabhinavakulasundarīṃ vandē ।
śrī hayagrīva uvācha ।
kakārarūpā kalyāṇī kalyāṇaguṇaśālinī ।
kalyāṇaśailanilayā kamanīyā kalāvatī ॥ 1 ॥
kamalākṣī kalmaṣaghnī karuṇāmṛtasāgarā ।
kadambakānanāvāsā kadambakusumapriyā ॥ 2 ॥
kandarpavidyā kandarpajanakāpāṅgavīkṣaṇā ।
karpūravīṭisaurabhyakallōlitakakuptaṭā ॥ 3 ॥
kalidōṣaharā kañjalōchanā kamravigrahā ।
karmādisākṣiṇī kārayitrī karmaphalapradā ॥ 4 ॥
ēkārarūpā chaikākṣaryēkānēkākṣarākṛtiḥ ।
ētattadityanirdēśyā chaikānandachidākṛtiḥ ॥ 5 ॥
ēvamityāgamābōdhyā chaikabhaktimadarchitā ।
ēkāgrachittanirdhyātā chaiṣaṇārahitādṛtā ॥ 6 ॥
ēlāsugandhichikurā chainaḥkūṭavināśinī ।
ēkabhōgā chaikarasā chaikaiśvaryapradāyinī ॥ 7 ॥
ēkātapatrasāmrājyapradā chaikāntapūjitā ।
ēdhamānaprabhā chaijadanēkajagadīśvarī ॥ 8 ॥
ēkavīrādisaṃsēvyā chaikaprābhavaśālinī ।
īkārarūpā chēśitrī chēpsitārthapradāyinī ॥ 9 ॥
īdṛgityavinirdēśyā chēśvaratvavidhāyinī ।
īśānādibrahmamayī chēśitvādyaṣṭasiddhidā ॥ 10 ॥
īkṣitrīkṣaṇasṛṣṭāṇḍakōṭirīśvaravallabhā ।
īḍitā chēśvarārdhāṅgaśarīrēśādhidēvatā ॥ 11 ॥
īśvaraprēraṇakarī chēśatāṇḍavasākṣiṇī ।
īśvarōtsaṅganilayā chētibādhāvināśinī ॥ 12 ॥
īhāvirahitā chēśaśaktirīṣatsmitānanā ।
lakārarūpā lalitā lakṣmīvāṇīniṣēvitā ॥ 13 ॥
lākinī lalanārūpā lasaddāḍimapāṭalā ।
lalantikālasatphālā lalāṭanayanārchitā ॥ 14 ॥
lakṣaṇōjjvaladivyāṅgī lakṣakōṭyaṇḍanāyikā ।
lakṣyārthā lakṣaṇāgamyā labdhakāmā latātanuḥ ॥ 15 ॥
lalāmarājadalikā lambimuktālatāñchitā ।
lambōdaraprasūrlabhyā lajjāḍhyā layavarjitā ॥ 16 ॥
hrīṃkārarūpā hrīṃkāranilayā hrīṃpadapriyā ।
hrīṃkārabījā hrīṃkāramantrā hrīṃkāralakṣaṇā ॥ 17 ॥
hrīṃkārajapasuprītā hrīṃmatī hrīṃvibhūṣaṇā ।
hrīṃśīlā hrīṃpadārādhyā hrīṃgarbhā hrīṃpadābhidhā ॥ 18 ॥
hrīṃkāravāchyā hrīṃkārapūjyā hrīṃkārapīṭhikā ।
hrīṃkāravēdyā hrīṃkārachintyā hrīṃ hrīṃśarīriṇī ॥ 19 ॥
hakārarūpā haladhṛkpūjitā hariṇēkṣaṇā ।
harapriyā harārādhyā haribrahmēndravanditā ॥ 20 ॥
hayārūḍhāsēvitāṅghrirhayamēdhasamarchitā ।
haryakṣavāhanā haṃsavāhanā hatadānavā ॥ 21 ॥
hatyādipāpaśamanī haridaśvādisēvitā ।
hastikumbhōttuṅgakuchā hastikṛttipriyāṅganā ॥ 22 ॥
haridrākuṅkumādigdhā haryaśvādyamarārchitā ।
harikēśasakhī hādividyā hālāmadālasā ॥ 23 ॥
sakārarūpā sarvajñā sarvēśī sarvamaṅgalā ।
sarvakartrī sarvabhartrī sarvahantrī sanātanā ॥ 24 ॥
sarvānavadyā sarvāṅgasundarī sarvasākṣiṇī ।
sarvātmikā sarvasaukhyadātrī sarvavimōhinī ॥ 25 ॥
sarvādhārā sarvagatā sarvāvaguṇavarjitā ।
sarvāruṇā sarvamātā sarvabhūṣaṇabhūṣitā ॥ 26 ॥
kakārārthā kālahantrī kāmēśī kāmitārthadā ।
kāmasañjīvanī kalyā kaṭhinastanamaṇḍalā ॥ 27 ॥
karabhōrūḥ kalānāthamukhī kachajitāmbudā ।
kaṭākṣasyandikaruṇā kapāliprāṇanāyikā ॥ 28 ॥
kāruṇyavigrahā kāntā kāntidhūtajapāvaliḥ ।
kalālāpā kambukaṇṭhī karanirjitapallavā ॥ 29 ॥
kalpavallīsamabhujā kastūrītilakāñchitā ।
hakārārthā haṃsagatirhāṭakābharaṇōjjvalā ॥ 30 ॥
hārahārikuchābhōgā hākinī halyavarjitā ।
haritpatisamārādhyā haṭhātkārahatāsurā ॥ 31 ॥
harṣapradā havirbhōktrī hārdasantamasāpahā ।
hallīsalāsyasantuṣṭā haṃsamantrārtharūpiṇī ॥ 32 ॥
hānōpādānanirmuktā harṣiṇī harisōdarī ।
hāhāhūhūmukhastutyā hānivṛddhivivarjitā ॥ 33 ॥
hayyaṅgavīnahṛdayā harigōpāruṇāṃśukā ।
lakārākhyā latāpūjyā layasthityudbhavēśvarī ॥ 34 ॥
lāsyadarśanasantuṣṭā lābhālābhavivarjitā ।
laṅghyētarājñā lāvaṇyaśālinī laghusiddhidā ॥ 35 ॥
lākṣārasasavarṇābhā lakṣmaṇāgrajapūjitā ।
labhyētarā labdhabhaktisulabhā lāṅgalāyudhā ॥ 36 ॥
lagnachāmarahastaśrīśāradāparivījitā ।
lajjāpadasamārādhyā lampaṭā lakulēśvarī ॥ 37 ॥
labdhamānā labdharasā labdhasampatsamunnatiḥ ।
hrīṃkāriṇī hrīṃkārādyā hrīṃmadhyā hrīṃśikhāmaṇiḥ ॥ 38 ॥
hrīṃkārakuṇḍāgniśikhā hrīṃkāraśaśichandrikā ।
hrīṃkārabhāskararuchirhrīṃkārāmbhōdachañchalā ॥ 39 ॥
hrīṃkārakandāṅkurikā hrīṃkāraikaparāyaṇā ।
hrīṃkāradīrghikāhaṃsī hrīṃkārōdyānakēkinī ॥ 40 ॥
hrīṃkārāraṇyahariṇī hrīṃkārāvālavallarī ।
hrīṃkārapañjaraśukī hrīṃkārāṅgaṇadīpikā ॥ 41 ॥
hrīṃkārakandarāsiṃhī hrīṃkārāmbhōjabhṛṅgikā ।
hrīṃkārasumanōmādhvī hrīṃkāratarumañjarī ॥ 42 ॥
sakārākhyā samarasā sakalāgamasaṃstutā ।
sarvavēdāntatātparyabhūmiḥ sadasadāśrayā ॥ 43 ॥
sakalā sachchidānandā sādhyā sadgatidāyinī ।
sanakādimunidhyēyā sadāśivakuṭumbinī ॥ 44 ॥
sakālādhiṣṭhānarūpā satyarūpā samākṛtiḥ ।
sarvaprapañchanirmātrī samanādhikavarjitā ॥ 45 ॥
sarvōttuṅgā saṅgahīnā saguṇā sakalēṣṭadā ।
kakāriṇī kāvyalōlā kāmēśvaramanōharā ॥ 46 ॥
kāmēśvaraprāṇanāḍī kāmēśōtsaṅgavāsinī ।
kāmēśvarāliṅgitāṅgī kāmēśvarasukhapradā ॥ 47 ॥
kāmēśvarapraṇayinī kāmēśvaravilāsinī ।
kāmēśvaratapaḥsiddhiḥ kāmēśvaramanaḥpriyā ॥ 48 ॥
kāmēśvaraprāṇanāthā kāmēśvaravimōhinī ।
kāmēśvarabrahmavidyā kāmēśvaragṛhēśvarī ॥ 49 ॥
kāmēśvarāhlādakarī kāmēśvaramahēśvarī ।
kāmēśvarī kāmakōṭinilayā kāṅkṣitārthadā ॥ 50 ॥
lakāriṇī labdharūpā labdhadhīrlabdhavāñChitā ।
labdhapāpamanōdūrā labdhāhaṅkāradurgamā ॥ 51 ॥
labdhaśaktirlabdhadēhā labdhaiśvaryasamunnatiḥ ।
labdhavṛddhirlabdhalīlā labdhayauvanaśālinī ॥ 52 ॥
labdhātiśayasarvāṅgasaundaryā labdhavibhramā ।
labdharāgā labdhapatirlabdhanānāgamasthitiḥ ॥ 53 ॥
labdhabhōgā labdhasukhā labdhaharṣābhipūritā ।
hrīṃkāramūrtirhrīṃkārasaudhaśṛṅgakapōtikā ॥ 54 ॥
hrīṃkāradugdhābdhisudhā hrīṃkārakamalēndirā ।
hrīṃkāramaṇidīpārchirhrīṃkārataruśārikā ॥ 55 ॥
hrīṃkārapēṭakamaṇirhrīṃkārādarśabimbitā ।
hrīṃkārakōśāsilatā hrīṃkārāsthānanartakī ॥ 56 ॥
hrīṃkāraśuktikāmuktāmaṇirhrīṃkārabōdhitā ।
hrīṃkāramayasauvarṇastambhavidrumaputrikā ॥ 57 ॥
hrīṃkāravēdōpaniṣad hrīṃkārādhvaradakṣiṇā ।
hrīṃkāranandanārāmanavakalpakavallarī ॥ 58 ॥
hrīṃkārahimavadgaṅgā hrīṃkārārṇavakaustubhā ।
hrīṃkāramantrasarvasvā hrīṃkāraparasaukhyadā ॥ 59 ॥
uttarapīṭhikā (phalaśṛtiḥ)
hayagrīva uvācha ।
ityēvaṃ tē mayākhyātaṃ dēvyā nāmaśatatrayam ।
rahasyātirahasyatvādgōpanīyaṃ tvayā munē ॥ 1 ॥
śivavarṇāni nāmāni śrīdēvyā kathitāni hi ।
śaktyakṣarāṇi nāmāni kāmēśakathitāni cha ॥ 2 ॥
ubhayākṣaranāmāni hyubhābhyāṃ kathitāni vai ।
tadanyairgrathitaṃ stōtramētasya sadṛśaṃ kimu ॥ 3 ॥
nānēna sadṛśaṃ stōtraṃ śrīdēvīprītidāyakam ।
lōkatrayē'pi kalyāṇaṃ sambhavēnnātra saṃśayaḥ ॥ 4 ॥
sūta uvācha ।
iti hayamukhagītaṃ stōtrarājaṃ niśamya
pragalitakaluṣō'bhūchchittaparyāptimētya ।
nijagurumatha natvā kumbhajanmā taduktaṃ
punaradhikarahasyaṃ jñātumēvaṃ jagāda ॥ 5 ॥
agastya uvācha ।
aśvānana mahābhāga rahasyamapi mē vada ।
śivavarṇāni kānyatra śaktivarṇāni kāni hi ॥ 6 ॥
ubhayōrapi varṇāni kāni vā vada dēśika ।
iti pṛṣṭaḥ kumbhajēna hayagrīvō'vadatpunaḥ ॥ 7 ॥
hayagrīva uvācha ।
tava gōpyaṃ kimastīha sākṣādambānuśāsanāt ।
idaṃ tvatirahasyaṃ tē vakṣyāmi śṛṇu kumbhaja ॥ 8 ॥
ētadvijñānamātrēṇa śrīvidyā siddhidā bhavēt ।
katrayaṃ hadvayaṃ chaiva śaivō bhāgaḥ prakīrtitaḥ ॥ 9 ॥
śaktyakṣarāṇi śēṣāṇi hrīṅkāra ubhayātmakaḥ ।
ēvaṃ vibhāgamajñātvā yē vidyājapaśālinaḥ ॥ 10 ॥
na tēṣāṃ siddhidā vidyā kalpakōṭiśatairapi ।
chaturbhiḥ śivachakraiścha śaktichakraiścha pañchabhiḥ ॥ 11 ॥
navachakraiścha saṃsiddhaṃ śrīchakraṃ śivayōrvapuḥ ।
trikōṇamaṣṭakōṇaṃ cha daśakōṇadvayaṃ tathā ॥ 12 ॥
chaturdaśāraṃ chaitāni śaktichakrāṇi pañcha cha ।
binduśchāṣṭadalaṃ padmaṃ padmaṃ ṣōḍaśapatrakam ॥ 13 ॥
chaturaśraṃ cha chatvāri śivachakrāṇyanukramāt ।
trikōṇē baindavaṃ śliṣṭaṃ aṣṭārē'ṣṭadalāmbujam ॥ 14 ॥
daśārayōḥ ṣōḍaśāraṃ bhūgṛhaṃ bhuvanāśrakē ।
śaivānāmapi śāktānāṃ chakrāṇāṃ cha parasparam ॥ 15 ॥
avinābhāvasambandhaṃ yō jānāti sa chakravit ।
trikōṇarūpiṇī śaktirbindurūpaparaḥ śivaḥ ॥ 16 ॥
avinābhāvasambandhaṃ tasmādbindutrikōṇayōḥ ।
ēvaṃ vibhāgamajñātvā śrīchakraṃ yaḥ samarchayēt ॥ 17 ॥
na tatphalamavāpnōti lalitāmbā na tuṣyati ।
yē cha jānanti lōkē'smin śrīvidyāchakravēdinaḥ ॥ 18 ॥
sāmanyavēdinaḥ sarvē viśēṣajñō'tidurlabhaḥ ।
svayaṃvidyāviśēṣajñō viśēṣajñaṃ samarchayēt ॥ 19 ॥
tasmai dēyaṃ tatō grāhyamaśaktastasya dāpayēt ।
andhaṃ tamaḥ praviśanti yē'vidyāṃ samupāsatē ॥ 20 ॥
iti śrutirapāhaitānavidyōpāsakānpunaḥ ।
vidyānyōpāsakānēva nindatyāruṇikī śrutiḥ ॥ 21 ॥
aśrutā saśrutāsaścha yajvānō yē'pyayajvanaḥ ।
svaryantō nāpēkṣantē indramagniṃ cha yē viduḥ ॥ 22 ॥
sikatā iva saṃyanti raśmibhiḥ samudīritāḥ ।
asmāllōkādamuṣmāchchētyāha chāraṇyakaśrutiḥ ॥ 23 ॥
yasya nō paśchimaṃ janma yadi vā śaṅkaraḥ svayam ।
tēnaiva labhyatē vidyā śrīmatpañchadaśākṣarī ॥ 24 ॥
iti mantrēṣu bahudhā vidyāyā mahimōchyatē ।
mōkṣaikahētuvidyā tu śrīvidyā nātra saṃśayaḥ ॥ 25 ॥
na śilpādijñānayuktē vidvachChabdhaḥ prayujyatē ।
mōkṣaikahētuvidyā sā śrīvidyaiva na saṃśayaḥ ॥ 26 ॥
tasmādvidyāvidēvātra vidvānvidvānitīryatē ।
svayaṃ vidyāvidē dadyātkhyāpayēttadguṇānsudhīḥ ॥ 27 ॥
svayaṃvidyārahasyajñō vidyāmāhātmyavēdyapi ।
vidyāvidaṃ nārchayēchchētkō vā taṃ pūjayējjanaḥ ॥ 28 ॥
prasaṅgādidamuktaṃ tē prakṛtaṃ śṛṇu kumbhaja ।
yaḥ kīrtayētsakṛdbhaktyā divyanāmaśatatrayam ॥ 29 ॥
tasya puṇyamahaṃ vakṣyē śṛṇu tvaṃ kumbhasambhava ।
rahasyanāmasāhasrapāṭhē yatphalamīritam ॥ 30 ॥
tatphalaṃ kōṭiguṇitamēkanāmajapādbhavēt ।
kāmēśvarīkāmēśābhyāṃ kṛtaṃ nāmaśatatrayam ॥ 31 ॥
nānyēna tulayēdētat stōtrēṇānyakṛtēna cha ।
śriyaḥ paramparā yasya bhāvi vā chōttarōttaram ॥ 32 ॥
tēnaiva labhyatē chaitatpaśchāchChrēyaḥ parīkṣayēt ।
asyā nāmnāṃ triśatyāstu mahimā kēna varṇyatē ॥ 33 ॥
yā svayaṃ śivayōrvaktrapadmābhyāṃ pariniḥsṛtā ।
nityaṃ ṣōḍaśasaṅkhyākānviprānādau tu bhōjayēt ॥ 34 ॥
abhyaktāṃstilatailēna snātānuṣṇēna vāriṇā ।
abhyarchya gandhapuṣpādyaiḥ kāmēśvaryādināmabhiḥ ॥ 35 ॥
sūpāpūpaiḥ śarkarādyaiḥ pāyasaiḥ phalasaṃyutaiḥ ।
vidyāvidō viśēṣēṇa bhōjayētṣōḍaśa dvijān ॥ 36 ॥
ēvaṃ nityārchanaṃ kuryādādau brāhmaṇabhōjanam ।
triśatīnāmabhiḥ paśchādbrāhmaṇānkramaśō'rchayēt ॥ 37 ॥
tailābhyaṅgādikaṃ datvā vibhavē sati bhaktitaḥ ।
śuklapratipadārabhya paurṇamāsyavadhi kramāt ॥ 38 ॥
divasē divasē viprā bhōjyā viṃśatisaṅkhyayā ।
daśabhiḥ pañchabhirvāpi tribhirēkēna vā dinaiḥ ॥ 39 ॥
triṃśatṣaṣṭiḥ śataṃ viprāḥ sambhōjyāstriśataṃ kramāt ।
ēvaṃ yaḥ kurutē bhaktyā janmamadhyē sakṛnnaraḥ ॥ 40 ॥
tasyaiva saphalaṃ janma muktistasya karē sthirā ।
rahasyanāmasāhasrabhōjanē'pyēvamēva hi ॥ 41 ॥
ādau nityabaliṃ kuryātpaśchādbrāhmaṇabhōjanam ।
rahasyanāmasāhasramahimā yō mayōditaḥ ॥ 42 ॥
sa śīkarāṇuratnaikanāmnō mahimavāridhēḥ ।
vāgdēvīrachitē nāmasāhasrē yadyadīritam ॥ 43 ॥
tatphalaṃ kōṭiguṇitaṃ nāmnō'pyēkasya kīrtanāt ।
ētadanyairjapaiḥ stōtrairarchanairyatphalaṃ bhavēt ॥ 44 ॥
tatphalaṃ kōṭiguṇitaṃ bhavēnnāmaśatatrayāt ।
vāgdēvīrachitē stōtrē tādṛśō mahimā yadi ॥ 45 ॥
sākṣātkāmēśakāmēśīkṛtē'smingṛhyatāmiti ।
sakṛtsaṅkīrtanādēva nāmnāmasmin śatatrayē ॥ 46 ॥
bhavēchchittasya paryāptirnyūnamanyānapēkṣiṇī ।
na jñātavyamitō'pyanyatra japtavyaṃ cha kumbhaja ॥ 47 ॥
yadyatsādhyatamaṃ kāryaṃ tattadarthamidaṃ japēt ।
tattatphalamavāpnōti paśchātkāryaṃ parīkṣayēt ॥ 48 ॥
yē yē prayōgāstantrēṣu taistairyatsādhyatē phalam ।
tatsarvaṃ sidhyati kṣipraṃ nāmatriśatakīrtanāt ॥ 49 ॥
āyuṣkaraṃ puṣṭikaraṃ putradaṃ vaśyakārakam ।
vidyāpradaṃ kīrtikaraṃ sukavitvapradāyakam ॥ 50 ॥
sarvasampatpradaṃ sarvabhōgadaṃ sarvasaukhyadam ।
sarvābhīṣṭapradaṃ chaiva dēvyā nāmaśatatrayam ॥ 51 ॥
ētajjapaparō bhūyānnānyadichChētkadāchana ।
ētatkīrtanasantuṣṭā śrīdēvī lalitāmbikā ॥ 52 ॥
bhaktasya yadyadiṣṭaṃ syāttattatpūrayatē dhruvam ।
tasmātkumbhōdbhava munē kīrtaya tvamidaṃ sadā ॥ 53 ॥
nāparaṃ kiñchidapi tē bōddhavyamavaśiṣyatē ।
iti tē kathitaṃ stōtraṃ lalitāprītidāyakam ॥ 54 ॥
nāvidyāvēdinē brūyānnābhaktāya kadāchana ।
na śaṭhāya na duṣṭāya nāviśvāsāya karhichit ॥ 56 ॥
yō brūyāttriśatīṃ nāmnāṃ tasyānarthō mahānbhavēt ।
ityājñā śāṅkarī prōktā tasmādgōpyamidaṃ tvayā ॥ 57 ॥
lalitāprēritēnaiva mayōktaṃ stōtramuttamam ।
rahasyanāmasāhasrādapi gōpyamidaṃ munē ॥ 58 ॥
sūta uvācha ।
ēvamuktvā hayagrīvaḥ kumbhajaṃ tāpasōttamam ।
stōtrēṇānēna lalitāṃ stutvā tripurasundarīm ।
ānandalaharīmagnamānasaḥ samavartata ॥ 59 ॥
iti brahmāṇḍapurāṇē uttarakhaṇḍē hayagrīvāgastyasaṃvādē lalitōpākhyānē stōtrakhaṇḍē śrīlalitātriśatīstōtraratnam ।
