Annamayya Keerthanas Tiruveedhula Merasi - Shuddha Telugu

రాగం: శ్రీ
ఆ: స రి2 మ1 ప ద1 ని2 స
అవ: స ని2 ప ద2 ని2 ప మ1 రి2 గ2 రి2 స
తాళం: ఆది

పల్లవి
తిరువీథుల మెఱసీ దేవదేవుడు
గరిమల మిఞ్చిన సిఙ్గారములతోడను ॥ (2.5)

చరణం 1
తిరుదణ్డేలపై నేగీ దేవుడిదె తొలునాడు
సిరుల రెణ్డవనాడు శేషునిమీద । (2)
మురిపేన మూడోనాడు ముత్యాల పన్దిరి క్రిన్ద (2)
పొరినాలుగోనాడు పువు గోవిలలోను ॥ (1)
తిరువీథుల మెఱసీ దేవదేవుడు... (1.5)

చరణం 2
గ్రక్కున నైదవనాడు గరుడునిమీద
యెక్కను ఆరవనాడు యేనుగుమీద ॥ (2)
చొక్కమై యేడవనాడు సూర్యప్రభలోనను (2)
యిక్కువ దేరును గుర్రమెనిమిదోనాడు ॥ (1)
తిరువీథుల మెఱసీ దేవదేవుడు... (1.5)

చరణం 3
కనకపుటన్దలము కదిపి తొమ్మిదోనాడు
పెనచి పదోనాడు పెణ్డ్లిపీట । (2)
యెనసి శ్రీ వేఙ్కటేశు డిన్తి యలమేల్మఙ్గతో (2)
వనితల నడుమను వాహనాలమీదను ॥ (1)

తిరువీథుల మెఱసీ దేవదేవుడు
గరిమల మిఞ్చిన సిఙ్గారములతోడను ॥ (2.5)

Browse Related Categories: