শক্রেণ সংযতি হতোঽপি বলির্মহাত্মা
শুক্রেণ জীবিততনুঃ ক্রতুবর্ধিতোষ্মা ।
বিক্রাংতিমান্ ভযনিলীনসুরাং ত্রিলোকীং
চক্রে বশে স তব চক্রমুখাদভীতঃ ॥1॥
পুত্রার্তিদর্শনবশাদদিতির্বিষণ্ণা
তং কাশ্যপং নিজপতিং শরণং প্রপন্না ।
ত্বত্পূজনং তদুদিতং হি পয়োব্রতাখ্য়ং
সা দ্বাদশাহমচরত্ত্বয়ি ভক্তিপূর্ণা ॥2॥
তস্য়াবধৌ ত্বয়ি নিলীনমতেরমুষ্য়াঃ
শ্য়ামশ্চতুর্ভুজবপুঃ স্বযমাবিরাসীঃ ।
নম্রাং চ তামিহ ভবত্তনয়ো ভবেয়ং
গোপ্য়ং মদীক্ষণমিতি প্রলপন্নয়াসীঃ ॥3॥
ত্বং কাশ্যপে তপসি সন্নিদধত্তদানীং
প্রাপ্তোঽসি গর্ভমদিতেঃ প্রণুতো বিধাত্রা ।
প্রাসূত চ প্রকটবৈষ্ণবদিব্যরূপং
সা দ্বাদশীশ্রবণপুণ্যদিনে ভবংতম্ ॥4॥
পুণ্য়াশ্রমং তমভিবর্ষতি পুষ্পবর্ষৈ-
র্হর্ষাকুলে সুরগণে কৃততূর্যঘোষে ।
বধ্বাঽংজলিং জয় জয়েতি নুতঃ পিতৃভ্য়াং
ত্বং তত্ক্ষণে পটুতমং বটুরূপমাধাঃ ॥5॥
তাবত্প্রজাপতিমুখৈরুপনীয় মৌংজী-
দংডাজিনাক্ষবলয়াদিভিরর্চ্যমানঃ ।
দেদীপ্যমানবপুরীশ কৃতাগ্নিকার্য়-
স্ত্বং প্রাস্থিথা বলিগৃহং প্রকৃতাশ্বমেধম্ ॥6॥
গাত্রেণ ভাবিমহিমোচিতগৌরবং প্রা-
গ্ব্য়াবৃণ্বতেব ধরণীং চলযন্নায়াসীঃ ।
ছত্রং পরোষ্মতিরণার্থমিবাদধানো
দংডং চ দানবজনেষ্বিব সন্নিধাতুম্ ॥7॥
তাং নর্মদোত্তরতটে হযমেধশালা-
মাসেদুষি ত্বয়ি রুচা তব রুদ্ধনেত্রৈঃ ।
ভাস্বান্ কিমেষ দহনো নু সনত্কুমারো
যোগী নু কোঽযমিতি শুক্রমুখৈশ্শশংকে ॥8॥
আনীতমাশু ভৃগুভির্মহসাঽভিভূতৈ-
স্ত্বাং রম্যরূপমসুরঃ পুলকাবৃতাংগঃ ।
ভক্ত্য়া সমেত্য় সুকৃতী পরিণিজ্য় পাদৌ
তত্তোযমন্বধৃত মূর্ধনি তীর্থতীর্থম্ ॥9॥
প্রহ্লাদবংশজতয়া ক্রতুভির্দ্বিজেষু
বিশ্বাসতো নু তদিদং দিতিজোঽপি লেভে ।
যত্তে পদাংবু গিরিশস্য় শিরোভিলাল্য়ং
স ত্বং বিভো গুরুপুরালয় পালয়েথাঃ ॥10॥
