দর্বাসাস্সুরবনিতাপ্তদিব্যমাল্য়ং
শক্রায় স্বযমুপদায় তত্র ভূয়ঃ ।
নাগেংদ্রপ্রতিমৃদিতে শশাপ শক্রং
কা ক্ষাংতিস্ত্বদিতরদেবতাংশজানাম্ ॥1॥
শাপেন প্রথিতজরেঽথ নির্জরেংদ্রে
দেবেষ্বপ্যসুরজিতেষু নিষ্প্রভেষু ।
শর্বাদ্য়াঃ কমলজমেত্য় সর্বদেবা
নির্বাণপ্রভব সমং ভবংতমাপুঃ ॥2॥
ব্রহ্মাদ্য়ৈঃ স্তুতমহিমা চিরং তদানীং
প্রাদুষ্ষন্ বরদ পুরঃ পরেণ ধাম্না ।
হে দেবা দিতিজকুলৈর্বিধায় সংধিং
পীয়ূষং পরিমথতেতি পর্যশাস্ত্বম্ ॥3॥
সংধানং কৃতবতি দানবৈঃ সুরৌঘে
মংথানং নযতি মদেন মংদরাদ্রিম্ ।
ভ্রষ্টেঽস্মিন্ বদরমিবোদ্বহন্ খগেংদ্রে
সদ্যস্ত্বং বিনিহিতবান্ পয়ঃপয়োধৌ ॥4॥
আধায় দ্রুতমথ বাসুকিং বরত্রাং
পাথোধৌ বিনিহিতসর্ববীজজালে ।
প্রারব্ধে মথনবিধৌ সুরাসুরৈস্তৈ-
র্ব্য়াজাত্ত্বং ভুজগমুখেঽকরোস্সুরারীন্ ॥5॥
ক্ষুব্ধাদ্রৌ ক্ষুভিতজলোদরে তদানীং
দুগ্ধাব্ধৌ গুরুতরভারতো নিমগ্নে ।
দেবেষু ব্যথিততমেষু তত্প্রিয়ৈষী
প্রাণৈষীঃ কমঠতনুং কঠোরপৃষ্ঠাম্ ॥6॥
বজ্রাতিস্থিরতরকর্পরেণ বিষ্ণো
বিস্তারাত্পরিগতলক্ষয়োজনেন ।
অংভোধেঃ কুহরগতেন বর্ষ্মণা ত্বং
নির্মগ্নং ক্ষিতিধরনাথমুন্নিনেথ ॥7॥
উন্মগ্নে ঝটিতি তদা ধরাধরেংদ্রে
নির্মেথুর্দৃঢমিহ সম্মদেন সর্বে ।
আবিশ্য় দ্বিতযগণেঽপি সর্পরাজে
বৈবশ্য়ং পরিশমযন্নবীবৃধস্তান্ ॥8॥
উদ্দামভ্রমণজবোন্নমদ্গিরীংদ্র-
ন্যস্তৈকস্থিরতরহস্তপংকজং ত্বাম্ ।
অভ্রাংতে বিধিগিরিশাদয়ঃ প্রমোদা-
দুদ্ভ্রাংতা নুনুবুরুপাত্তপুষ্পবর্ষাঃ ॥9॥
দৈত্য়ৌঘে ভুজগমুখানিলেন তপ্তে
তেনৈব ত্রিদশকুলেঽপি কিংচিদার্তে ।
কারুণ্য়াত্তব কিল দেব বারিবাহাঃ
প্রাবর্ষন্নমরগণান্ন দৈত্যসংঘান্ ॥10॥
উদ্ভ্রাম্যদ্বহুতিমিনক্রচক্রবালে
তত্রাব্ধৌ চিরমথিতেঽপি নির্বিকারে ।
একস্ত্বং করয়ুগকৃষ্টসর্পরাজঃ
সংরাজন্ পবনপুরেশ পাহি রোগাত্ ॥11॥
