ত্রিদিববর্ধকিবর্ধিতকৌশলং ত্রিদশদত্তসমস্তবিভূতিমত্ ।
জলধিমধ্যগতং ত্বমভূষয়ো নবপুরং বপুরংচিতরোচিষা ॥1॥
দদুষি রেবতভূভৃতি রেবতীং হলভৃতে তনয়াং বিধিশাসনাত্ ।
মহিতমুত্সবঘোষমপূপুষঃ সমুদিতৈর্মুদিতৈঃ সহ যাদবৈঃ ॥2॥
অথ বিদর্ভসুতাং খলু রুক্মিণীং প্রণয়িনীং ত্বয়ি দেব সহোদরঃ ।
স্বযমদিত্সত চেদিমহীভুজে স্বতমসা তমসাধুমুপাশ্রযন্ ॥3॥
চিরধৃতপ্রণয়া ত্বয়ি বালিকা সপদি কাংক্ষিতভংগসমাকুলা ।
তব নিবেদয়িতুং দ্বিজমাদিশত্ স্বকদনং কদনংগবিনির্মিতম্ ॥4॥
দ্বিজসুতোঽপি চ তূর্ণমুপাযয়ৌ তব পুরং হি দুরাশদুরাসদম্ ।
মুদমবাপ চ সাদরপূজিতঃ স ভবতা ভবতাপহৃতা স্বযম্ ॥5॥
স চ ভবংতমবোচত কুংডিনে নৃপসুতা খলু রাজতি রুক্মিণী ।
ত্বয়ি সমুত্সুকয়া নিজধীরতারহিতয়া হি তয়া প্রহিতোঽস্ম্যহম্ ॥6॥
তব হৃতাঽস্মি পুরৈব গুণৈরহং হরতি মাং কিল চেদিনৃপোঽধুনা ।
অয়ি কৃপালয় পালয় মামিতি প্রজগদে জগদেকপতে তয়া ॥7॥
অশরণাং যদি মাং ত্বমুপেক্ষসে সপদি জীবিতমেব জহাম্যহম্ ।
ইতি গিরা সুতনোরতনোত্ ভৃশং সুহৃদয়ং হৃদয়ং তব কাতরম্ ॥8॥
অকথযস্ত্বমথৈনময়ে সখে তদধিকা মম মন্মথবেদনা ।
নৃপসমক্ষমুপেত্য় হরাম্যহং তদয়ি তাং দয়িতামসিতেক্ষণাম্ ॥9॥
প্রমুদিতেন চ তেন সমং তদা রথগতো লঘু কুংডিনমেয়িবান্ ।
গুরুমরুত্পুরনাযক মে ভবান্ বিতনুতাং তনুতাং নিখিলাপদাম্ ॥10॥
