যস্মিন্নেতদ্বিভাতং যত ইদমভবদ্য়েন চেদং য এত-
দ্য়োঽস্মাদুত্তীর্ণরূপঃ খলু সকলমিদং ভাসিতং যস্য় ভাসা ।
যো বাচাং দূরদূরে পুনরপি মনসাং যস্য় দেবা মুনীংদ্রাঃ
নো বিদ্য়ুস্তত্ত্বরূপং কিমু পুনরপরে কৃষ্ণ তস্মৈ নমস্তে ॥1॥
জন্মাথো কর্ম নাম স্ফুটমিহ গুণদোষাদিকং বা ন যস্মিন্
লোকানামূতয়ে যঃ স্বযমনুভজতে তানি মায়ানুসারী ।
বিভ্রচ্ছক্তীররূপোঽপি চ বহুতররূপোঽবভাত্যদ্ভুতাত্মা
তস্মৈ কৈবল্যধাম্নে পররসপরিপূর্ণায় বিষ্ণো নমস্তে ॥2॥
নো তির্য়ংচন্ন মর্ত্য়ং ন চ সুরমসুরং ন স্ত্রিয়ং নো পুংমাংসং
ন দ্রব্য়ং কর্ম জাতিং গুণমপি সদসদ্বাপি তে রূপমাহুঃ ।
শিষ্টং যত্ স্য়ান্নিষেধে সতি নিগমশতৈর্লক্ষণাবৃত্তিতস্তত্
কৃচ্ছ্রেণাবেদ্যমানং পরমসুখময়ং ভাতি তস্মৈ নমস্তে ॥3॥
মায়ায়াং বিংবিতস্ত্বং সৃজসি মহদহংকারতন্মাত্রভেদৈ-
র্ভূতগ্রামেংদ্রিয়াদ্য়ৈরপি সকলজগত্স্বপ্নসংকল্পকল্পম্ ।
ভূয়ঃ সংহৃত্য় সর্বং কমঠ ইব পদান্য়াত্মনা কালশক্ত্য়া
গংভীরে জাযমানে তমসি বিতিমিরো ভাসি তস্মৈ নমস্তে ॥4॥
শব্দব্রহ্মেতি কর্মেত্যণুরিতি ভগবন্ কাল ইত্য়ালপংতি
ত্বামেকং বিশ্বহেতুং সকলমযতয়া সর্বথা কল্প্যমানম্ ।
বেদাংতৈর্যত্তু গীতং পুরুষপরচিদাত্মাভিধং তত্তু তত্ত্বং
প্রেক্ষামাত্রেণ মূলপ্রকৃতিবিকৃতিকৃত্ কৃষ্ণ তস্মৈ নমস্তে ॥5॥
সত্ত্বেনাসত্তয়া বা ন চ খলু সদসত্ত্বেন নির্বাচ্যরূপা
ধত্তে যাসাববিদ্য়া গুণফণিমতিবদ্বিশ্বদৃশ্য়াবভাসম্ ।
বিদ্য়াত্বং সৈব যাতা শ্রুতিবচনলবৈর্যত্কৃপাস্য়ংদলাভে
সংসারারণ্যসদ্যস্ত্রুটনপরশুতামেতি তস্মৈ নমস্তে ॥6॥
ভূষাসু স্বর্ণবদ্বা জগতি ঘটশরাবাদিকে মৃত্তিকাব-
ত্তত্ত্বে সংচিংত্যমানে স্ফুরতি তদধুনাপ্যদ্বিতীয়ং বপুস্তে ।
স্বপ্নদ্রষ্টুঃ প্রবোধে তিমিরলযবিধৌ জীর্ণরজ্জোশ্চ যদ্ব-
দ্বিদ্য়ালাভে তথৈব স্ফুটমপি বিকসেত্ কৃষ্ণ তস্মৈ নমস্তে ॥7॥
যদ্ভীত্য়োদেতি সূর্য়ো দহতি চ দহনো বাতি বায়ুস্তথান্য়ে
যদ্ভীতাঃ পদ্মজাদ্য়াঃ পুনরুচিতবলীনাহরংতেঽনুকালম্ ।
যেনৈবারোপিতাঃ প্রাঙ্নিজপদমপি তে চ্য়াবিতারশ্চ পশ্চাত্
তস্মৈ বিশ্বং নিয়ংত্রে বযমপি ভবতে কৃষ্ণ কুর্মঃ প্রণামম্ ॥8॥
ত্রৈলোক্য়ং ভাবয়ংতং ত্রিগুণমযমিদং ত্র্যক্ষরস্য়ৈকবাচ্য়ং
ত্রীশানামৈক্যরূপং ত্রিভিরপি নিগমৈর্গীযমানস্বরূপম্ ।
তিস্রোবস্থা বিদংতং ত্রিয়ুগজনিজুষং ত্রিক্রমাক্রাংতবিশ্বং
ত্রৈকাল্য়ে ভেদহীনং ত্রিভিরহমনিশং যোগভেদৈর্ভজে ত্বাম্ ॥9॥
সত্য়ং শুদ্ধং বিবুদ্ধং জযতি তব বপুর্নিত্যমুক্তং নিরীহং
নির্দ্বংদ্বং নির্বিকারং নিখিলগুণগণব্য়ংজনাধারভূতম্ ।
নির্মূলং নির্মলং তন্নিরবধিমহিমোল্লাসি নির্লীনমংত-
র্নিস্সংগানাং মুনীনাং নিরুপমপরমানংদসাংদ্রপ্রকাশম্ ॥10॥
দুর্বারং দ্বাদশারং ত্রিশতপরিমিলত্ষষ্টিপর্বাভিবীতং
সংভ্রাম্যত্ ক্রূরবেগং ক্ষণমনু জগদাচ্ছিদ্য় সংধাবমানম্ ।
চক্রং তে কালরূপং ব্যথযতু ন তু মাং ত্বত্পদৈকাবলংবং
বিষ্ণো কারুণ্যসিংধো পবনপুরপতে পাহি সর্বাময়ৌঘাত্ ॥11॥
