ত্বয়ি বিহরণলোলে বালজালৈঃ প্রলংব-
প্রমথনসবিলংবে ধেনবঃ স্বৈরচারাঃ ।
তৃণকুতুকনিবিষ্টা দূরদূরং চরংত্য়ঃ
কিমপি বিপিনমৈষীকাখ্যমীষাংবভূবুঃ ॥1॥
অনধিগতনিদাঘক্রৌর্যবৃংদাবনাংতাত্
বহিরিদমুপয়াতাঃ কাননং ধেনবস্তাঃ ।
তব বিরহবিষণ্ণা ঊষ্মলগ্রীষ্মতাপ-
প্রসরবিসরদংভস্য়াকুলাঃ স্তংভমাপুঃ ॥2॥
তদনু সহ সহায়ৈর্দূরমন্বিষ্য় শৌরে
গলিতসরণিমুংজারণ্যসংজাতখেদম্ ।
পশুকুলমভিবীক্ষ্য় ক্ষিপ্রমানেতুমারা-
ত্ত্বয়ি গতবতি হী হী সর্বতোঽগ্নির্জজৃংভে ॥3॥
সকলহরিতি দীপ্তে ঘোরভাংকারভীমে
শিখিনি বিহতমার্গা অর্ধদগ্ধা ইবার্তাঃ ।
অহহ ভুবনবংধো পাহি পাহীতি সর্বে
শরণমুপগতাস্ত্বাং তাপহর্তারমেকম্ ॥4॥
অলমলমতিভীত্য়া সর্বতো মীলযধ্বং
দৃশমিতি তব বাচা মীলিতাক্ষেষু তেষু ।
ক্ব নু দবদহনোঽসৌ কুত্র মুংজাটবী সা
সপদি ববৃতিরে তে হংত ভাংডীরদেশে ॥5॥
জয় জয় তব মায়া কেযমীশেতি তেষাং
নুতিভিরুদিতহাসো বদ্ধনানাবিলাসঃ ।
পুনরপি বিপিনাংতে প্রাচরঃ পাটলাদি-
প্রসবনিকরমাত্রগ্রাহ্যঘর্মানুভাবে ॥6॥
ত্বয়ি বিমুখমিবোচ্চৈস্তাপভারং বহংতং
তব ভজনবদংতঃ পংকমুচ্ছোষয়ংতম্ ।
তব ভুজবদুদংচদ্ভূরিতেজঃপ্রবাহং
তপসমযমনৈষীর্য়ামুনেষু স্থলেষু ॥7॥
তদনু জলদজালৈস্ত্বদ্বপুস্তুল্যভাভি-
র্বিকসদমলবিদ্য়ুত্পীতবাসোবিলাসৈঃ ।
সকলভুবনভাজাং হর্ষদাং বর্ষবেলাং
ক্ষিতিধরকুহরেষু স্বৈরবাসী ব্যনৈষীঃ ॥8॥
কুহরতলনিবিষ্টং ত্বাং গরিষ্ঠং গিরীংদ্রঃ
শিখিকুলনবকেকাকাকুভিঃ স্তোত্রকারী ।
স্ফুটকুটজকদংবস্তোমপুষ্পাংজলিং চ
প্রবিদধদনুভেজে দেব গোবর্ধনোঽসৌ ॥9॥
অথ শরদমুপেতাং তাং ভবদ্ভক্তচেতো-
বিমলসলিলপূরাং মানযন্ কাননেষু ।
তৃণমমলবনাংতে চারু সংচারযন্ গাঃ
পবনপুরপতে ত্বং দেহি মে দেহসৌখ্যম্ ॥10॥
