সংপ্রাপ্তো মথুরাং দিনার্ধবিগমে তত্রাংতরস্মিন্ বস-
ন্নারামে বিহিতাশনঃ সখিজনৈর্য়াতঃ পুরীমীক্ষিতুম্ ।
প্রাপো রাজপথং চিরশ্রুতিধৃতব্য়ালোককৌতূহল-
স্ত্রীপুংসোদ্যদগণ্যপুণ্যনিগলৈরাকৃষ্যমাণো নু কিম্ ॥1॥
ত্বত্পাদদ্য়ুতিবত্ সরাগসুভগাঃ ত্বন্মূর্তিবদ্য়োষিতঃ
সংপ্রাপ্তা বিলসত্পয়োধররুচো লোলা ভবত্ দৃষ্টিবত্ ।
হারিণ্যস্ত্বদুরঃস্থলীবদয়ি তে মংদস্মিতপ্রৌঢিব-
ন্নৈর্মল্য়োল্লসিতাঃ কচৌঘরুচিবদ্রাজত্কলাপাশ্রিতাঃ ॥2॥
তাসামাকলযন্নপাংগবলনৈর্মোদং প্রহর্ষাদ্ভুত-
ব্য়ালোলেষু জনেষু তত্র রজকং কংচিত্ পটীং প্রার্থযন্ ।
কস্তে দাস্যতি রাজকীযবসনং যাহীতি তেনোদিতঃ
সদ্যস্তস্য় করেণ শীর্ষমহৃথাঃ সোঽপ্য়াপ পুণ্য়াং গতিম্ ॥3॥
ভূয়ো বাযকমেকমাযতমতিং তোষেণ বেষোচিতং
দাশ্বাংসং স্বপদং নিনেথ সুকৃতং কো বেদ জীবাত্মনাম্ ।
মালাভিঃ স্তবকৈঃ স্তবৈরপি পুনর্মালাকৃতা মানিতো
ভক্তিং তেন বৃতাং দিদেশিথ পরাং লক্ষ্মীং চ লক্ষ্মীপতে ॥4॥
কুব্জামব্জবিলোচনাং পথিপুনর্দৃষ্ট্বাঽংগরাগে তয়া
দত্তে সাধু কিলাংগরাগমদদাস্তস্য়া মহাংতং হৃদি ।
চিত্তস্থামৃজুতামথ প্রথয়িতুং গাত্রেঽপি তস্য়াঃ স্ফুটং
গৃহ্ণন্ মংজু করেণ তামুদনযস্তাবজ্জগত্সুংদরীম্ ॥5॥
তাবন্নিশ্চিতবৈভবাস্তব বিভো নাত্য়ংতপাপা জনা
যত্কিংচিদ্দদতে স্ম শক্ত্যনুগুণং তাংবূলমাল্য়াদিকম্ ।
গৃহ্ণানঃ কুসুমাদি কিংচন তদা মার্গে নিবদ্ধাংজলি-
র্নাতিষ্ঠং বত হা যতোঽদ্য় বিপুলামার্তিং ব্রজামি প্রভো ॥6॥
এষ্য়ামীতি বিমুক্তয়াঽপি ভগবন্নালেপদাত্র্য়া তয়া
দূরাত্ কাতরয়া নিরীক্ষিতগতিস্ত্বং প্রাবিশো গোপুরম্ ।
আঘোষানুমিতত্বদাগমমহাহর্ষোল্ললদ্দেবকী-
বক্ষোজপ্রগলত্পয়োরসমিষাত্ত্বত্কীর্তিরংতর্গতা ॥7॥
আবিষ্টো নগরীং মহোত্সববতীং কোদংডশালাং ব্রজন্
মাধুর্য়েণ নু তেজসা নু পুরুষৈর্দূরেণ দত্তাংতরঃ ।
স্রগ্ভির্ভূষিতমর্চিতং বরধনুর্মা মেতি বাদাত্ পুরঃ
প্রাগৃহ্ণাঃ সমরোপয়ঃ কিল সমাক্রাক্ষীরভাংক্ষীরপি ॥8॥
শ্বঃ কংসক্ষপণোত্সবস্য় পুরতঃ প্রারংভতূর্য়োপম-
শ্চাপধ্বংসমহাধ্বনিস্তব বিভো দেবানরোমাংচযত্ ।
কংসস্য়াপি চ বেপথুস্তদুদিতঃ কোদংডখংডদ্বয়ী-
চংডাভ্য়াহতরক্ষিপূরুষরবৈরুত্কূলিতোঽভূত্ ত্বয়া ॥9॥
শিষ্টৈর্দুষ্টজনৈশ্চ দৃষ্টমহিমা প্রীত্য়া চ ভীত্য়া ততঃ
সংপশ্যন্ পুরসংপদং প্রবিচরন্ সায়ং গতো বাটিকাম্ ।
শ্রীদাম্না সহ রাধিকাবিরহজং খেদং বদন্ প্রস্বপ-
ন্নানংদন্নবতারকার্যঘটনাদ্বাতেশ সংরক্ষ মাম্ ॥10॥
