কদাপি জন্মর্ক্ষদিনে তব প্রভো নিমংত্রিতজ্ঞাতিবধূমহীসুরা ।
মহানসস্ত্বাং সবিধে নিধায় সা মহানসাদৌ ববৃতে ব্রজেশ্বরী ॥1॥
ততো ভবত্ত্রাণনিয়ুক্তবালকপ্রভীতিসংক্রংদনসংকুলারবৈঃ ।
বিমিশ্রমশ্রাবি ভবত্সমীপতঃ পরিস্ফুটদ্দারুচটচ্চটারবঃ ॥2॥
ততস্তদাকর্ণনসংভ্রমশ্রমপ্রকংপিবক্ষোজভরা ব্রজাংগনাঃ ।
ভবংতমংতর্দদৃশুস্সমংততো বিনিষ্পতদ্দারুণদারুমধ্যগম্ ॥3॥
শিশোরহো কিং কিমভূদিতি দ্রুতং প্রধাব্য় নংদঃ পশুপাশ্চ ভূসুরাঃ ।
ভবংতমালোক্য় যশোদয়া ধৃতং সমাশ্বসন্নশ্রুজলার্দ্রলোচনাঃ ॥4॥
কস্কো নু কৌতস্কুত এষ বিস্ময়ো বিশংকটং যচ্ছকটং বিপাটিতম্ ।
ন কারণং কিংচিদিহেতি তে স্থিতাঃ স্বনাসিকাদত্তকরাস্ত্বদীক্ষকাঃ ॥5॥
কুমারকস্য়াস্য় পয়োধরার্থিনঃ প্ররোদনে লোলপদাংবুজাহতম্ ।
ময়া ময়া দৃষ্টমনো বিপর্যগাদিতীশ তে পালকবালকা জগুঃ ॥6॥
ভিয়া তদা কিংচিদজানতামিদং কুমারকাণামতিদুর্ঘটং বচঃ ।
ভবত্প্রভাবাবিদুরৈরিতীরিতং মনাগিবাশংক্যত দৃষ্টপূতনৈঃ ॥7॥
প্রবালতাম্রং কিমিদং পদং ক্ষতং সরোজরম্য়ৌ নু করৌ বিরোজিতৌ।
ইতি প্রসর্পত্করুণাতরংগিতাস্ত্বদংগমাপস্পৃশুরংগনাজনাঃ ॥8॥
অয়ে সুতং দেহি জগত্পতেঃ কৃপাতরংগপাতাত্পরিপাতমদ্য় মে ।
ইতি স্ম সংগৃহ্য় পিতা ত্বদংগকং মুহুর্মুহুঃ শ্লিষ্যতি জাতকংটকঃ ॥9॥
অনোনিলীনঃ কিল হংতুমাগতঃ সুরারিরেবং ভবতা বিহিংসিতঃ ।
রজোঽপি নো দৃষ্টমমুষ্য় তত্কথং স শুদ্ধসত্ত্বে ত্বয়ি লীনবান্ ধ্রুবম্ ॥10॥
প্রপূজিতৈস্তত্র ততো দ্বিজাতিভির্বিশেষতো লংভিতমংগলাশিষঃ ।
ব্রজং নিজৈর্বাল্যরসৈর্বিমোহযন্ মরুত্পুরাধীশ রুজাং জহীহি মে ॥11॥
