অন্য়াবতারনিকরেষ্বনিরীক্ষিতং তে
ভূমাতিরেকমভিবীক্ষ্য় তদাঘমোক্ষে ।
ব্রহ্মা পরীক্ষিতুমনাঃ স পরোক্ষভাবং
নিন্য়েঽথ বত্সকগণান্ প্রবিতত্য় মায়াম্ ॥1॥
বত্সানবীক্ষ্য় বিবশে পশুপোত্করে তা-
নানেতুকাম ইব ধাতৃমতানুবর্তী ।
ত্বং সামিভুক্তকবলো গতবাংস্তদানীং
ভুক্তাংস্তিরোঽধিত সরোজভবঃ কুমারান্ ॥2॥
বত্সায়িতস্তদনু গোপগণায়িতস্ত্বং
শিক্য়াদিভাংডমুরলীগবলাদিরূপঃ ।
প্রাগ্বদ্বিহৃত্য় বিপিনেষু চিরায় সায়ং
ত্বং মাযয়াঽথ বহুধা ব্রজমাযয়াথ ॥3॥
ত্বামেব শিক্যগবলাদিময়ং দধানো
ভূযস্ত্বমেব পশুবত্সকবালরূপঃ ।
গোরূপিণীভিরপি গোপবধূময়ীভি-
রাসাদিতোঽসি জননীভিরতিপ্রহর্ষাত্ ॥4॥
জীবং হি কংচিদভিমানবশাত্স্বকীয়ং
মত্বা তনূজ ইতি রাগভরং বহংত্য়ঃ ।
আত্মানমেব তু ভবংতমবাপ্য় সূনুং
প্রীতিং যয়ুর্ন কিযতীং বনিতাশ্চ গাবঃ ॥5॥
এবং প্রতিক্ষণবিজৃংভিতহর্ষভার-
নিশ্শেষগোপগণলালিতভূরিমূর্তিম্ ।
ত্বামগ্রজোঽপি বুবুধে কিল বত্সরাংতে
ব্রহ্মাত্মনোরপি মহান্ যুবয়োর্বিশেষঃ ॥6॥
বর্ষাবধৌ নবপুরাতনবত্সপালান্
দৃষ্ট্বা বিবেকমসৃণে দ্রুহিণে বিমূঢে ।
প্রাদীদৃশঃ প্রতিনবান্ মকুটাংগদাদি
ভূষাংশ্চতুর্ভুজয়ুজঃ সজলাংবুদাভান্ ॥7॥
প্রত্য়েকমেব কমলাপরিলালিতাংগান্
ভোগীংদ্রভোগশযনান্ নযনাভিরামান্ ।
লীলানিমীলিতদৃশঃ সনকাদিয়োগি-
ব্য়াসেবিতান্ কমলভূর্ভবতো দদর্শ ॥8॥
নারাযণাকৃতিমসংখ্যতমাং নিরীক্ষ্য়
সর্বত্র সেবকমপি স্বমবেক্ষ্য় ধাতা ।
মায়ানিমগ্নহৃদয়ো বিমুমোহ যাব-
দেকো বভূবিথ তদা কবলার্ধপাণিঃ ॥9॥
নশ্যন্মদে তদনু বিশ্বপতিং মুহুস্ত্বাং
নত্বা চ নূতবতি ধাতরি ধাম যাতে ।
পোতৈঃ সমং প্রমুদিতৈঃ প্রবিশন্ নিকেতং
বাতালয়াধিপ বিভো পরিপাহি রোগাত্ ॥10॥
