সাংদ্রানংদাববোধাত্মকমনুপমিতং কালদেশাবধিভ্য়াং
নির্মুক্তং নিত্যমুক্তং নিগমশতসহস্রেণ নির্ভাস্যমানম্ ।
অস্পষ্টং দৃষ্টমাত্রে পুনরুরুপুরুষার্থাত্মকং ব্রহ্ম তত্বং
তত্তাবদ্ভাতি সাক্ষাদ্ গুরুপবনপুরে হংত ভাগ্য়ং জনানাম্ ॥ 1 ॥
এবংদুর্লভ্যবস্তুন্যপি সুলভতয়া হস্তলব্ধে যদন্যত্
তন্বা বাচা ধিয়া বা ভজতি বত জনঃ ক্ষুদ্রতৈব স্ফুটেযম্ ।
এতে তাবদ্বয়ং তু স্থিরতরমনসা বিশ্বপীডাপহত্য়ৈ
নিশ্শেষাত্মানমেনং গুরুপবনপুরাধীশমেবাশ্রয়ামঃ ॥ 2 ॥
সত্ত্বং যত্তত্ পরাভ্য়ামপরিকলনতো নির্মলং তেন তাবত্
ভূতৈর্ভূতেংদ্রিয়ৈস্তে বপুরিতি বহুশঃ শ্রূযতে ব্য়াসবাক্যম্।
তত্ স্বচ্ছ্ত্বাদ্যদাচ্ছাদিতপরসুখচিদ্গর্ভনির্ভাসরূপং
তস্মিন্ ধন্য়া রমংতে শ্রুতিমতিমধুরে সুগ্রহে বিগ্রহে তে ॥ 3 ॥
নিষ্কংপে নিত্যপূর্ণে নিরবধিপরমানংদপীয়ূষরূপে
নির্লীনানেকমুক্তাবলিসুভগতমে নির্মলব্রহ্মসিংধৌ ।
কল্লোলোল্লাসতুল্য়ং খলু বিমলতরং সত্ত্বমাহুস্তদাত্মা
কস্মান্নো নিষ্কলস্ত্বং সকল ইতি বচস্ত্বত্কলাস্বেব ভূমন্ ॥ 4 ॥
নির্ব্য়াপারোঽপি নিষ্কারণমজ ভজসে যত্ক্রিয়ামীক্ষণাখ্য়াং
তেনৈবোদেতি লীনা প্রকৃতিরসতিকল্পাঽপি কল্পাদিকালে।
তস্য়াঃ সংশুদ্ধমংশং কমপি তমতিরোধাযকং সত্ত্বরূপং
স ত্বং ধৃত্বা দধাসি স্বমহিমবিভবাকুংঠ বৈকুংঠ রূপং॥5॥
তত্তে প্রত্যগ্রধারাধরললিতকলায়াবলীকেলিকারং
লাবণ্যস্য়ৈকসারং সুকৃতিজনদৃশাং পূর্ণপুণ্য়াবতারম্।
লক্ষ্মীনিশ্শংকলীলানিলযনমমৃতস্য়ংদসংদোহমংতঃ
সিংচত্ সংচিংতকানাং বপুরনুকলয়ে মারুতাগারনাথ ॥6॥
কষ্টা তে সৃষ্টিচেষ্টা বহুতরভবখেদাবহা জীবভাজা-
মিত্য়েবং পূর্বমালোচিতমজিত ময়া নৈবমদ্য়াভিজানে।
নোচেজ্জীবাঃ কথং বা মধুরতরমিদং ত্বদ্বপুশ্চিদ্রসার্দ্রং
নেত্রৈঃ শ্রোত্রৈশ্চ পীত্বা পরমরসসুধাংভোধিপূরে রমেরন্॥7॥
নম্রাণাং সন্নিধত্তে সততমপি পুরস্তৈরনভ্যর্থিতান -
প্যর্থান্ কামানজস্রং বিতরতি পরমানংদসাংদ্রাং গতিং চ।
ইত্থং নিশ্শেষলভ্য়ো নিরবধিকফলঃ পারিজাতো হরে ত্বং
ক্ষুদ্রং তং শক্রবাটীদ্রুমমভিলষতি ব্যর্থমর্থিব্রজোঽযম্॥8॥
কারুণ্য়াত্কামমন্য়ং দদতি খলু পরে স্বাত্মদস্ত্বং বিশেষা-
দৈশ্বর্য়াদীশতেঽন্য়ে জগতি পরজনে স্বাত্মনোঽপীশ্বরস্ত্বম্।
ত্বয়্য়ুচ্চৈরারমংতি প্রতিপদমধুরে চেতনাঃ স্ফীতভাগ্য়া-
স্ত্বং চাত্মারাম এবেত্যতুলগুণগণাধার শৌরে নমস্তে॥9॥
ঐশ্বর্য়ং শংকরাদীশ্বরবিনিযমনং বিশ্বতেজোহরাণাং
তেজস্সংহারি বীর্য়ং বিমলমপি যশো নিস্পৃহৈশ্চোপগীতম্।
অংগাসংগা সদা শ্রীরখিলবিদসি ন ক্বাপি তে সংগবার্তা
তদ্বাতাগারবাসিন্ মুরহর ভগবচ্ছব্দমুখ্য়াশ্রয়োঽসি॥10॥
