স্বায়ংভুবো মনুরথো জনসর্গশীলো
দৃষ্ট্বা মহীমসময়ে সলিলে নিমগ্নাম্ ।
স্রষ্টারমাপ শরণং ভবদংঘ্রিসেবা-
তুষ্টাশয়ং মুনিজনৈঃ সহ সত্যলোকে ॥1॥
কষ্টং প্রজাঃ সৃজতি ময়্যবনির্নিমগ্না
স্থানং সরোজভব কল্পয় তত্ প্রজানাম্ ।
ইত্য়েবমেষ কথিতো মনুনা স্বয়ংভূঃ -
রংভোরুহাক্ষ তব পাদয়ুগং ব্যচিংতীত্ ॥ 2 ॥
হা হা বিভো জলমহং ন্যপিবং পুরস্তা-
দদ্য়াপি মজ্জতি মহী কিমহং করোমি ।
ইত্থং ত্বদংঘ্রিয়ুগলং শরণং যতোঽস্য়
নাসাপুটাত্ সমভবঃ শিশুকোলরূপী ।3॥
অংগুষ্ঠমাত্রবপুরুত্পতিতঃ পুরস্তাত্
ভোয়োঽথ কুংভিসদৃশঃ সমজৃংভথাস্ত্বম্ ।
অভ্রে তথাবিধমুদীক্ষ্য় ভবংতমুচ্চৈ -
র্বিস্মেরতাং বিধিরগাত্ সহ সূনুভিঃ স্বৈঃ ॥4॥
কোঽসাবচিংত্যমহিমা কিটিরুত্থিতো মে
নাসাপুটাত্ কিমু ভবেদজিতস্য় মায়া ।
ইত্থং বিচিংতযতি ধাতরি শৈলমাত্রঃ
সদ্য়ো ভবন্ কিল জগর্জিথ ঘোরঘোরম্ ॥5॥
তং তে নিনাদমুপকর্ণ্য় জনস্তপঃস্থাঃ
সত্যস্থিতাশ্চ মুনয়ো নুনুবুর্ভবংতম্ ।
তত্স্তোত্রহর্ষুলমনাঃ পরিণদ্য় ভূয়-
স্তোয়াশয়ং বিপুলমূর্তিরবাতরস্ত্বম্ ॥6॥
ঊর্ধ্বপ্রসারিপরিধূম্রবিধূতরোমা
প্রোত্ক্ষিপ্তবালধিরবাঙ্মুখঘোরঘোণঃ ।
তূর্ণপ্রদীর্ণজলদঃ পরিঘূর্ণদক্ষ্ণা
স্তোতৃন্ মুনীন্ শিশিরযন্নবতেরিথ ত্বম্ ॥7॥
অংতর্জলং তদনুসংকুলনক্রচক্রং
ভ্রাম্যত্তিমিংগিলকুলং কলুষোর্মিমালম্ ।
আবিশ্য় ভীষণরবেণ রসাতলস্থা -
নাকংপযন্ বসুমতীমগবেষযস্ত্বম্ ॥8॥
দৃষ্ট্বাঽথ দৈত্যহতকেন রসাতলাংতে
সংবেশিতাং ঝটিতি কূটকিটির্বিভো ত্বম্ ।
আপাতুকানবিগণয়্য় সুরারিখেটান্
দংষ্ট্রাংকুরেণ বসুধামদধাঃ সলীলম্ ॥9॥
অভ্য়ুদ্ধরন্নথ ধরাং দশনাগ্রলগ্ন
মুস্তাংকুরাংকিত ইবাধিকপীবরাত্মা ।
উদ্ধূতঘোরসলিলাজ্জলধেরুদংচন্
ক্রীডাবরাহবপুরীশ্বর পাহি রোগাত্ ॥10॥
