নিশময়্য় তবাথ যানবার্তাং ভৃশমার্তাঃ পশুপালবালিকাস্তাঃ ।
কিমিদং কিমিদং কথং ন্বিতীমাঃ সমবেতাঃ পরিদেবিতান্যকুর্বন্ ॥1॥
করুণানিধিরেষ নংদসূনুঃ কথমস্মান্ বিসৃজেদনন্যনাথাঃ ।
বত নঃ কিমু দৈবমেবমাসীদিতি তাস্ত্বদ্গতমানসা বিলেপুঃ ॥2॥
চরমপ্রহরে প্রতিষ্ঠমানঃ সহ পিত্রা নিজমিত্রমংডলৈশ্চ ।
পরিতাপভরং নিতংবিনীনাং শময়িষ্যন্ ব্যমুচঃ সখাযমেকম্ ॥3॥
অচিরাদুপয়ামি সন্নিধিং বো ভবিতা সাধু ময়ৈব সংগমশ্রীঃ ।
অমৃতাংবুনিধৌ নিমজ্জয়িষ্য়ে দ্রুতমিত্য়াশ্বসিতা বধূরকার্ষীঃ ॥4॥
সবিষাদভরং সয়াচ্ঞমুচ্চৈঃ অতিদূরং বনিতাভিরীক্ষ্যমাণঃ ।
মৃদু তদ্দিশি পাতযন্নপাংগান্ সবলোঽক্রূররথেন নির্গতোঽভূঃ ॥5॥
অনসা বহুলেন বল্লবানাং মনসা চানুগতোঽথ বল্লভানাম্ ।
বনমার্তমৃগং বিষণ্ণবৃক্ষং সমতীতো যমুনাতটীময়াসীঃ ॥6॥
নিযমায় নিমজ্য় বারিণি ত্বামভিবীক্ষ্য়াথ রথেঽপি গাংদিনেয়ঃ ।
বিবশোঽজনি কিং ন্বিদং বিভোস্তে ননু চিত্রং ত্ববলোকনং সমংতাত্ ॥7॥
পুনরেষ নিমজ্য় পুণ্যশালী পুরুষং ত্বাং পরমং ভুজংগভোগে ।
অরিকংবুগদাংবুজৈঃ স্ফুরংতং সুরসিদ্ধৌঘপরীতমালুলোকে ॥8॥
স তদা পরমাত্মসৌখ্যসিংধৌ বিনিমগ্নঃ প্রণুবন্ প্রকারভেদৈঃ ।
অবিলোক্য় পুনশ্চ হর্ষসিংধোরনুবৃত্ত্য়া পুলকাবৃতো যয়ৌ ত্বাম্ ॥9॥
কিমু শীতলিমা মহান্ জলে যত্ পুলকোঽসাবিতি চোদিতেন তেন ।
অতিহর্ষনিরুত্তরেণ সার্ধং রথবাসী পবনেশ পাহি মাং ত্বম্ ॥10॥
