কদাচন ব্রজশিশুভিঃ সমং ভবান্
বনাশনে বিহিতমতিঃ প্রগেতরাম্ ।
সমাবৃতো বহুতরবত্সমংডলৈঃ
সতেমনৈর্নিরগমদীশ জেমনৈঃ ॥1॥
বিনির্যতস্তব চরণাংবুজদ্বয়া-
দুদংচিতং ত্রিভুবনপাবনং রজঃ ।
মহর্ষয়ঃ পুলকধরৈঃ কলেবরৈ-
রুদূহিরে ধৃতভবদীক্ষণোত্সবাঃ ॥2॥
প্রচারযত্যবিরলশাদ্বলে তলে
পশূন্ বিভো ভবতি সমং কুমারকৈঃ ।
অঘাসুরো ন্যরুণদঘায় বর্তনী
ভয়ানকঃ সপদি শয়ানকাকৃতিঃ ॥3॥
মহাচলপ্রতিমতনোর্গুহানিভ-
প্রসারিতপ্রথিতমুখস্য় কাননে ।
মুখোদরং বিহরণকৌতুকাদ্গতাঃ
কুমারকাঃ কিমপি বিদূরগে ত্বয়ি ॥4॥
প্রমাদতঃ প্রবিশতি পন্নগোদরং
ক্বথত্তনৌ পশুপকুলে সবাত্সকে ।
বিদন্নিদং ত্বমপি বিবেশিথ প্রভো
সুহৃজ্জনং বিশরণমাশু রক্ষিতুম্ ॥5॥
গলোদরে বিপুলিতবর্ষ্মণা ত্বয়া
মহোরগে লুঠতি নিরুদ্ধমারুতে ।
দ্রুতং ভবান্ বিদলিতকংঠমংডলো
বিমোচযন্ পশুপপশূন্ বিনির্যয়ৌ ॥6॥
ক্ষণং দিবি ত্বদুপগমার্থমাস্থিতং
মহাসুরপ্রভবমহো মহো মহত্ ।
বিনির্গতে ত্বয়ি তু নিলীনমংজসা
নভঃস্থলে ননৃতুরথো জগুঃ সুরাঃ ॥7॥
সবিস্ময়ৈঃ কমলভবাদিভিঃ সুরৈ-
রনুদ্রুতস্তদনু গতঃ কুমারকৈঃ ।
দিনে পুনস্তরুণদশামুপেয়ুষি
স্বকৈর্ভবানতনুত ভোজনোত্সবম্ ॥8॥
বিষাণিকামপি মুরলীং নিতংবকে
নিবেশযন্ কবলধরঃ করাংবুজে ।
প্রহাসযন্ কলবচনৈঃ কুমারকান্
বুভোজিথ ত্রিদশগণৈর্মুদা নুতঃ ॥9॥
সুখাশনং ত্বিহ তব গোপমংডলে
মখাশনাত্ প্রিযমিব দেবমংডলে ।
ইতি স্তুতস্ত্রিদশবরৈর্জগত্পতে
মরুত্পুরীনিলয় গদাত্ প্রপাহি মাম্ ॥10॥
