পৃথোস্তু নপ্তা পৃথুধর্মকর্মঠঃ
প্রাচীনবর্হির্য়ুবতৌ শতদ্রুতৌ ।
প্রচেতসো নাম সুচেতসঃ সুতা-
নজীজনত্ত্বত্করুণাংকুরানিব ॥1॥
পিতুঃ সিসৃক্ষানিরতস্য় শাসনাদ্-
ভবত্তপস্য়াভিরতা দশাপি তে
পয়োনিধিং পশ্চিমমেত্য় তত্তটে
সরোবরং সংদদৃশুর্মনোহরম্ ॥2॥
তদা ভবত্তীর্থমিদং সমাগতো
ভবো ভবত্সেবকদর্শনাদৃতঃ ।
প্রকাশমাসাদ্য় পুরঃ প্রচেতসা-
মুপাদিশত্ ভক্ততমস্তব স্তবম্ ॥3॥
স্তবং জপংতস্তমমী জলাংতরে
ভবংতমাসেবিষতায়ুতং সমাঃ ।
ভবত্সুখাস্বাদরসাদমীষ্বিয়ান্
বভূব কালো ধ্রুববন্ন শীঘ্রতা ॥4॥
তপোভিরেষামতিমাত্রবর্ধিভিঃ
স যজ্ঞহিংসানিরতোঽপি পাবিতঃ ।
পিতাঽপি তেষাং গৃহয়াতনারদ-
প্রদর্শিতাত্মা ভবদাত্মতাং যয়ৌ ॥5॥
কৃপাবলেনৈব পুরঃ প্রচেতসাং
প্রকাশমাগাঃ পতগেংদ্রবাহনঃ ।
বিরাজি চক্রাদিবরায়ুধাংশুভি-
র্ভুজাভিরষ্টাভিরুদংচিতদ্য়ুতিঃ ॥6॥
প্রচেতসাং তাবদয়াচতামপি
ত্বমেব কারুণ্যভরাদ্বরানদাঃ ।
ভবদ্বিচিংতাঽপি শিবায় দেহিনাং
ভবত্বসৌ রুদ্রনুতিশ্চ কামদা ॥7॥
অবাপ্য় কাংতাং তনয়াং মহীরুহাং
তয়া রমধ্বং দশলক্ষবত্সরীম্ ।
সুতোঽস্তু দক্ষো ননু তত্ক্ষণাচ্চ মাং
প্রয়াস্যথেতি ন্যগদো মুদৈব তান্ ॥8॥
ততশ্চ তে ভূতলরোধিনস্তরূন্
ক্রুধা দহংতো দ্রুহিণেন বারিতাঃ ।
দ্রুমৈশ্চ দত্তাং তনয়ামবাপ্য় তাং
ত্বদুক্তকালং সুখিনোঽভিরেমিরে ॥9॥
অবাপ্য় দক্ষং চ সুতং কৃতাধ্বরাঃ
প্রচেতসো নারদলব্ধয়া ধিয়া ।
অবাপুরানংদপদং তথাবিধ-
স্ত্বমীশ বাতালযনাথ পাহি মাম্ ॥10॥
