মদনাতুরচেতসোঽন্বহং ভবদংঘ্রিদ্বযদাস্যকাম্যয়া ।
যমুনাতটসীম্নি সৈকতীং তরলাক্ষ্য়ো গিরিজাং সমার্চিচন্ ॥1॥
তব নামকথারতাঃ সমং সুদৃশঃ প্রাতরুপাগতা নদীম্ ।
উপহারশতৈরপূজযন্ দয়িতো নংদসুতো ভবেদিতি ॥2॥
ইতি মাসমুপাহিতব্রতাস্তরলাক্ষীরভিবীক্ষ্য় তা ভবান্ ।
করুণামৃদুলো নদীতটং সময়াসীত্তদনুগ্রহেচ্ছয়া ॥3॥
নিযমাবসিতৌ নিজাংবরং তটসীমন্যবমুচ্য় তাস্তদা ।
যমুনাজলখেলনাকুলাঃ পুরতস্ত্বামবলোক্য় লজ্জিতাঃ ॥4॥
ত্রপয়া নমিতাননাস্বথো বনিতাস্বংবরজালমংতিকে ।
নিহিতং পরিগৃহ্য় ভূরুহো বিটপং ত্বং তরসাঽধিরূঢবান্ ॥5॥
ইহ তাবদুপেত্য় নীযতাং বসনং বঃ সুদৃশো যথাযথম্ ।
ইতি নর্মমৃদুস্মিতে ত্বয়ি ব্রুবতি ব্য়ামুমুহে বধূজনৈঃ ॥6॥
অয়ি জীব চিরং কিশোর নস্তব দাসীরবশীকরোষি কিম্ ।
প্রদিশাংবরমংবুজেক্ষণেত্য়ুদিতস্ত্বং স্মিতমেব দত্তবান্ ॥7॥
অধিরুহ্য় তটং কৃতাংজলীঃ পরিশুদ্ধাঃ স্বগতীর্নিরীক্ষ্য় তাঃ ।
বসনান্যখিলান্যনুগ্রহং পুনরেবং গিরমপ্যদা মুদা ॥8॥
বিদিতং ননু বো মনীষিতং বদিতারস্ত্বিহ যোগ্যমুত্তরম্ ।
যমুনাপুলিনে সচংদ্রিকাঃ ক্ষণদা ইত্যবলাস্ত্বমূচিবান্ ॥9॥
উপকর্ণ্য় ভবন্মুখচ্য়ুতং মধুনিষ্য়ংদি বচো মৃগীদৃশঃ ।
প্রণয়াদয়ি বীক্ষ্য় বীক্ষ্য় তে বদনাব্জং শনকৈর্গৃহং গতাঃ ॥10॥
ইতি নন্বনুগৃহ্য় বল্লবীর্বিপিনাংতেষু পুরেব সংচরন্ ।
করুণাশিশিরো হরে হর ত্বরয়া মে সকলাময়াবলিম্ ॥11॥
