বৃকভৃগুমুনিমোহিন্য়ংবরীষাদিবৃত্তে-
ষ্বয়ি তব হি মহত্ত্বং সর্বশর্বাদিজৈত্রম্ ।
স্থিতমিহ পরমাত্মন্ নিষ্কলার্বাগভিন্নং
কিমপি যদবভাতং তদ্ধি রূপং তবৈব ॥1॥
মূর্তিত্রয়েশ্বরসদাশিবপংচকং যত্
প্রাহুঃ পরাত্মবপুরেব সদাশিবোঽস্মিন্ ।
তত্রেশ্বরস্তু স বিকুংঠপদস্ত্বমেব
ত্রিত্বং পুনর্ভজসি সত্যপদে ত্রিভাগে ॥2॥
তত্রাপি সাত্ত্বিকতনুং তব বিষ্ণুমাহু-
র্ধাতা তু সত্ত্ববিরলো রজসৈব পূর্ণঃ ।
সত্ত্বোত্কটত্বমপি চাস্তি তমোবিকার-
চেষ্টাদিকংচ তব শংকরনাম্নি মূর্তৌ ॥3॥
তং চ ত্রিমূর্ত্যতিগতং পরপূরুষং ত্বাং
শর্বাত্মনাপি খলু সর্বমযত্বহেতোঃ ।
শংসংত্য়ুপাসনবিধৌ তদপি স্বতস্তু
ত্বদ্রূপমিত্যতিদৃঢং বহু নঃ প্রমাণম্ ॥4॥
শ্রীশংকরোঽপি ভগবান্ সকলেষু তাব-
ত্ত্বামেব মানযতি যো ন হি পক্ষপাতী ।
ত্বন্নিষ্ঠমেব স হি নামসহস্রকাদি
ব্য়াখ্য়াত্ ভবত্স্তুতিপরশ্চ গতিং গতোঽংতে ॥5॥
মূর্তিত্রয়াতিগমুবাচ চ মংত্রশাস্ত্র-
স্য়াদৌ কলাযসুষমং সকলেশ্বরং ত্বাম্ ।
ধ্য়ানং চ নিষ্কলমসৌ প্রণবে খলূক্ত্বা
ত্বামেব তত্র সকলং নিজগাদ নান্যম্ ॥6॥
সমস্তসারে চ পুরাণসংগ্রহে
বিসংশয়ং ত্বন্মহিমৈব বর্ণ্যতে ।
ত্রিমূর্তিয়ুক্সত্যপদত্রিভাগতঃ
পরং পদং তে কথিতং ন শূলিনঃ ॥7॥
যত্ ব্রাহ্মকল্প ইহ ভাগবতদ্বিতীয়-
স্কংধোদিতং বপুরনাবৃতমীশ ধাত্রে ।
তস্য়ৈব নাম হরিশর্বমুখং জগাদ
শ্রীমাধবঃ শিবপরোঽপি পুরাণসারে ॥8॥
যে স্বপ্রকৃত্যনুগুণা গিরিশং ভজংতে
তেষাং ফলং হি দৃঢয়ৈব তদীযভক্ত্য়া।
ব্য়াসো হি তেন কৃতবানধিকারিহেতোঃ
স্কংদাদিকেষু তব হানিবচোঽর্থবাদৈঃ ॥9॥
ভূতার্থকীর্তিরনুবাদবিরুদ্ধবাদৌ
ত্রেধার্থবাদগতয়ঃ খলু রোচনার্থাঃ ।
স্কাংদাদিকেষু বহবোঽত্র বিরুদ্ধবাদা-
স্ত্বত্তামসত্বপরিভূত্য়ুপশিক্ষণাদ্য়াঃ ॥10॥
যত্ কিংচিদপ্যবিদুষাঽপি বিভো ময়োক্তং
তন্মংত্রশাস্ত্রবচনাদ্যভিদৃষ্টমেব ।
ব্য়াসোক্তিসারমযভাগবতোপগীত
ক্লেশান্ বিধূয় কুরু ভক্তিভরং পরাত্মন্ ॥11॥
