অথ বারিণি ঘোরতরং ফণিনং
প্রতিবারয়িতুং কৃতধীর্ভগবন্ ।
দ্রুতমারিথ তীরগনীপতরুং
বিষমারুতশোষিতপর্ণচযম্ ॥1॥
অধিরুহ্য় পদাংবুরুহেণ চ তং
নবপল্লবতুল্যমনোজ্ঞরুচা ।
হ্রদবারিণি দূরতরং ন্যপতঃ
পরিঘূর্ণিতঘোরতরংগ্গণে ॥2॥
ভুবনত্রযভারভৃতো ভবতো
গুরুভারবিকংপিবিজৃংভিজলা ।
পরিমজ্জযতি স্ম ধনুশ্শতকং
তটিনী ঝটিতি স্ফুটঘোষবতী ॥3॥
অথ দিক্ষু বিদিক্ষু পরিক্ষুভিত-
ভ্রমিতোদরবারিনিনাদভরৈঃ ।
উদকাদুদগাদুরগাধিপতি-
স্ত্বদুপাংতমশাংতরুষাঽংধমনাঃ ॥4॥
ফণশৃংগসহস্রবিনিস্সৃমর-
জ্বলদগ্নিকণোগ্রবিষাংবুধরম্ ।
পুরতঃ ফণিনং সমলোকযথা
বহুশৃংগিণমংজনশৈলমিব ॥5॥
জ্বলদক্ষি পরিক্ষরদুগ্রবিষ-
শ্বসনোষ্মভরঃ স মহাভুজগঃ ।
পরিদশ্য় ভবংতমনংতবলং
সমবেষ্টযদস্ফুটচেষ্টমহো ॥6॥
অবিলোক্য় ভবংতমথাকুলিতে
তটগামিনি বালকধেনুগণে ।
ব্রজগেহতলেঽপ্যনিমিত্তশতং
সমুদীক্ষ্য় গতা যমুনাং পশুপাঃ ॥7॥
অখিলেষু বিভো ভবদীয় দশা-
মবলোক্য় জিহাসুষু জীবভরম্ ।
ফণিবংধনমাশু বিমুচ্য় জবা-
দুদগম্যত হাসজুষা ভবতা ॥8॥
অধিরুহ্য় ততঃ ফণিরাজফণান্
ননৃতে ভবতা মৃদুপাদরুচা ।
কলশিংজিতনূপুরমংজুমিল-
ত্করকংকণসংকুলসংক্বণিতম্ ॥9॥
জহৃষুঃ পশুপাস্তুতুষুর্মুনয়ো
ববৃষুঃ কুসুমানি সুরেংদ্রগণাঃ ।
ত্বয়ি নৃত্যতি মারুতগেহপতে
পরিপাহি স মাং ত্বমদাংতগদাত্ ॥10॥
