Narayaniyam Dashaka 74 - Grantha

𑌸𑌂𑌪𑍍𑌰𑌾𑌪𑍍𑌤𑍋 𑌮𑌥𑍁𑌰𑌾𑌂 𑌦𑌿𑌨𑌾𑌰𑍍𑌧𑌵𑌿𑌗𑌮𑍇 𑌤𑌤𑍍𑌰𑌾𑌂𑌤𑌰𑌸𑍍𑌮𑌿𑌨𑍍 𑌵𑌸-
𑌨𑍍𑌨𑌾𑌰𑌾𑌮𑍇 𑌵𑌿𑌹𑌿𑌤𑌾𑌶𑌨𑌃 𑌸𑌖𑌿𑌜𑌨𑍈𑌰𑍍𑌯𑌾𑌤𑌃 𑌪𑍁𑌰𑍀𑌮𑍀𑌕𑍍𑌷𑌿𑌤𑍁𑌮𑍍 ।
𑌪𑍍𑌰𑌾𑌪𑍋 𑌰𑌾𑌜𑌪𑌥𑌂 𑌚𑌿𑌰𑌶𑍍𑌰𑍁𑌤𑌿𑌧𑍃𑌤𑌵𑍍𑌯𑌾𑌲𑍋𑌕𑌕𑍌𑌤𑍂𑌹𑌲-
𑌸𑍍𑌤𑍍𑌰𑍀𑌪𑍁𑌂𑌸𑍋𑌦𑍍𑌯𑌦𑌗𑌣𑍍𑌯𑌪𑍁𑌣𑍍𑌯𑌨𑌿𑌗𑌲𑍈𑌰𑌾𑌕𑍃𑌷𑍍𑌯𑌮𑌾𑌣𑍋 𑌨𑍁 𑌕𑌿𑌮𑍍 ॥1॥

𑌤𑍍𑌵𑌤𑍍𑌪𑌾𑌦𑌦𑍍𑌯𑍁𑌤𑌿𑌵𑌤𑍍 𑌸𑌰𑌾𑌗𑌸𑍁𑌭𑌗𑌾𑌃 𑌤𑍍𑌵𑌨𑍍𑌮𑍂𑌰𑍍𑌤𑌿𑌵𑌦𑍍𑌯𑍋𑌷𑌿𑌤𑌃
𑌸𑌂𑌪𑍍𑌰𑌾𑌪𑍍𑌤𑌾 𑌵𑌿𑌲𑌸𑌤𑍍𑌪𑌯𑍋𑌧𑌰𑌰𑍁𑌚𑍋 𑌲𑍋𑌲𑌾 𑌭𑌵𑌤𑍍 𑌦𑍃𑌷𑍍𑌟𑌿𑌵𑌤𑍍 ।
𑌹𑌾𑌰𑌿𑌣𑍍𑌯𑌸𑍍𑌤𑍍𑌵𑌦𑍁𑌰𑌃𑌸𑍍𑌥𑌲𑍀𑌵𑌦𑌯𑌿 𑌤𑍇 𑌮𑌂𑌦𑌸𑍍𑌮𑌿𑌤𑌪𑍍𑌰𑍌𑌢𑌿𑌵-
𑌨𑍍𑌨𑍈𑌰𑍍𑌮𑌲𑍍𑌯𑍋𑌲𑍍𑌲𑌸𑌿𑌤𑌾𑌃 𑌕𑌚𑍌𑌘𑌰𑍁𑌚𑌿𑌵𑌦𑍍𑌰𑌾𑌜𑌤𑍍𑌕𑌲𑌾𑌪𑌾𑌶𑍍𑌰𑌿𑌤𑌾𑌃 ॥2॥

𑌤𑌾𑌸𑌾𑌮𑌾𑌕𑌲𑌯𑌨𑍍𑌨𑌪𑌾𑌂𑌗𑌵𑌲𑌨𑍈𑌰𑍍𑌮𑍋𑌦𑌂 𑌪𑍍𑌰𑌹𑌰𑍍𑌷𑌾𑌦𑍍𑌭𑍁𑌤-
𑌵𑍍𑌯𑌾𑌲𑍋𑌲𑍇𑌷𑍁 𑌜𑌨𑍇𑌷𑍁 𑌤𑌤𑍍𑌰 𑌰𑌜𑌕𑌂 𑌕𑌂𑌚𑌿𑌤𑍍 𑌪𑌟𑍀𑌂 𑌪𑍍𑌰𑌾𑌰𑍍𑌥𑌯𑌨𑍍 ।
𑌕𑌸𑍍𑌤𑍇 𑌦𑌾𑌸𑍍𑌯𑌤𑌿 𑌰𑌾𑌜𑌕𑍀𑌯𑌵𑌸𑌨𑌂 𑌯𑌾𑌹𑍀𑌤𑌿 𑌤𑍇𑌨𑍋𑌦𑌿𑌤𑌃
𑌸𑌦𑍍𑌯𑌸𑍍𑌤𑌸𑍍𑌯 𑌕𑌰𑍇𑌣 𑌶𑍀𑌰𑍍𑌷𑌮𑌹𑍃𑌥𑌾𑌃 𑌸𑍋𑌽𑌪𑍍𑌯𑌾𑌪 𑌪𑍁𑌣𑍍𑌯𑌾𑌂 𑌗𑌤𑌿𑌮𑍍 ॥3॥

𑌭𑍂𑌯𑍋 𑌵𑌾𑌯𑌕𑌮𑍇𑌕𑌮𑌾𑌯𑌤𑌮𑌤𑌿𑌂 𑌤𑍋𑌷𑍇𑌣 𑌵𑍇𑌷𑍋𑌚𑌿𑌤𑌂
𑌦𑌾𑌶𑍍𑌵𑌾𑌂𑌸𑌂 𑌸𑍍𑌵𑌪𑌦𑌂 𑌨𑌿𑌨𑍇𑌥 𑌸𑍁𑌕𑍃𑌤𑌂 𑌕𑍋 𑌵𑍇𑌦 𑌜𑍀𑌵𑌾𑌤𑍍𑌮𑌨𑌾𑌮𑍍 ।
𑌮𑌾𑌲𑌾𑌭𑌿𑌃 𑌸𑍍𑌤𑌬𑌕𑍈𑌃 𑌸𑍍𑌤𑌵𑍈𑌰𑌪𑌿 𑌪𑍁𑌨𑌰𑍍𑌮𑌾𑌲𑌾𑌕𑍃𑌤𑌾 𑌮𑌾𑌨𑌿𑌤𑍋
𑌭𑌕𑍍𑌤𑌿𑌂 𑌤𑍇𑌨 𑌵𑍃𑌤𑌾𑌂 𑌦𑌿𑌦𑍇𑌶𑌿𑌥 𑌪𑌰𑌾𑌂 𑌲𑌕𑍍𑌷𑍍𑌮𑍀𑌂 𑌚 𑌲𑌕𑍍𑌷𑍍𑌮𑍀𑌪𑌤𑍇 ॥4॥

𑌕𑍁𑌬𑍍𑌜𑌾𑌮𑌬𑍍𑌜𑌵𑌿𑌲𑍋𑌚𑌨𑌾𑌂 𑌪𑌥𑌿𑌪𑍁𑌨𑌰𑍍𑌦𑍃𑌷𑍍𑌟𑍍𑌵𑌾𑌽𑌂𑌗𑌰𑌾𑌗𑍇 𑌤𑌯𑌾
𑌦𑌤𑍍𑌤𑍇 𑌸𑌾𑌧𑍁 𑌕𑌿𑌲𑌾𑌂𑌗𑌰𑌾𑌗𑌮𑌦𑌦𑌾𑌸𑍍𑌤𑌸𑍍𑌯𑌾 𑌮𑌹𑌾𑌂𑌤𑌂 𑌹𑍃𑌦𑌿 ।
𑌚𑌿𑌤𑍍𑌤𑌸𑍍𑌥𑌾𑌮𑍃𑌜𑍁𑌤𑌾𑌮𑌥 𑌪𑍍𑌰𑌥𑌯𑌿𑌤𑍁𑌂 𑌗𑌾𑌤𑍍𑌰𑍇𑌽𑌪𑌿 𑌤𑌸𑍍𑌯𑌾𑌃 𑌸𑍍𑌫𑍁𑌟𑌂
𑌗𑍃𑌹𑍍𑌣𑌨𑍍 𑌮𑌂𑌜𑍁 𑌕𑌰𑍇𑌣 𑌤𑌾𑌮𑍁𑌦𑌨𑌯𑌸𑍍𑌤𑌾𑌵𑌜𑍍𑌜𑌗𑌤𑍍𑌸𑍁𑌂𑌦𑌰𑍀𑌮𑍍 ॥5॥

𑌤𑌾𑌵𑌨𑍍𑌨𑌿𑌶𑍍𑌚𑌿𑌤𑌵𑍈𑌭𑌵𑌾𑌸𑍍𑌤𑌵 𑌵𑌿𑌭𑍋 𑌨𑌾𑌤𑍍𑌯𑌂𑌤𑌪𑌾𑌪𑌾 𑌜𑌨𑌾
𑌯𑌤𑍍𑌕𑌿𑌂𑌚𑌿𑌦𑍍𑌦𑌦𑌤𑍇 𑌸𑍍𑌮 𑌶𑌕𑍍𑌤𑍍𑌯𑌨𑍁𑌗𑍁𑌣𑌂 𑌤𑌾𑌂𑌬𑍂𑌲𑌮𑌾𑌲𑍍𑌯𑌾𑌦𑌿𑌕𑌮𑍍 ।
𑌗𑍃𑌹𑍍𑌣𑌾𑌨𑌃 𑌕𑍁𑌸𑍁𑌮𑌾𑌦𑌿 𑌕𑌿𑌂𑌚𑌨 𑌤𑌦𑌾 𑌮𑌾𑌰𑍍𑌗𑍇 𑌨𑌿𑌬𑌦𑍍𑌧𑌾𑌂𑌜𑌲𑌿-
𑌰𑍍𑌨𑌾𑌤𑌿𑌷𑍍𑌠𑌂 𑌬𑌤 𑌹𑌾 𑌯𑌤𑍋𑌽𑌦𑍍𑌯 𑌵𑌿𑌪𑍁𑌲𑌾𑌮𑌾𑌰𑍍𑌤𑌿𑌂 𑌵𑍍𑌰𑌜𑌾𑌮𑌿 𑌪𑍍𑌰𑌭𑍋 ॥6॥

𑌏𑌷𑍍𑌯𑌾𑌮𑍀𑌤𑌿 𑌵𑌿𑌮𑍁𑌕𑍍𑌤𑌯𑌾𑌽𑌪𑌿 𑌭𑌗𑌵𑌨𑍍𑌨𑌾𑌲𑍇𑌪𑌦𑌾𑌤𑍍𑌰𑍍𑌯𑌾 𑌤𑌯𑌾
𑌦𑍂𑌰𑌾𑌤𑍍 𑌕𑌾𑌤𑌰𑌯𑌾 𑌨𑌿𑌰𑍀𑌕𑍍𑌷𑌿𑌤𑌗𑌤𑌿𑌸𑍍𑌤𑍍𑌵𑌂 𑌪𑍍𑌰𑌾𑌵𑌿𑌶𑍋 𑌗𑍋𑌪𑍁𑌰𑌮𑍍 ।
𑌆𑌘𑍋𑌷𑌾𑌨𑍁𑌮𑌿𑌤𑌤𑍍𑌵𑌦𑌾𑌗𑌮𑌮𑌹𑌾𑌹𑌰𑍍𑌷𑍋𑌲𑍍𑌲𑌲𑌦𑍍𑌦𑍇𑌵𑌕𑍀-
𑌵𑌕𑍍𑌷𑍋𑌜𑌪𑍍𑌰𑌗𑌲𑌤𑍍𑌪𑌯𑍋𑌰𑌸𑌮𑌿𑌷𑌾𑌤𑍍𑌤𑍍𑌵𑌤𑍍𑌕𑍀𑌰𑍍𑌤𑌿𑌰𑌂𑌤𑌰𑍍𑌗𑌤𑌾 ॥𑍭॥

𑌆𑌵𑌿𑌷𑍍𑌟𑍋 𑌨𑌗𑌰𑍀𑌂 𑌮𑌹𑍋𑌤𑍍𑌸𑌵𑌵𑌤𑍀𑌂 𑌕𑍋𑌦𑌂𑌡𑌶𑌾𑌲𑌾𑌂 𑌵𑍍𑌰𑌜𑌨𑍍
𑌮𑌾𑌧𑍁𑌰𑍍𑌯𑍇𑌣 𑌨𑍁 𑌤𑍇𑌜𑌸𑌾 𑌨𑍁 𑌪𑍁𑌰𑍁𑌷𑍈𑌰𑍍𑌦𑍂𑌰𑍇𑌣 𑌦𑌤𑍍𑌤𑌾𑌂𑌤𑌰𑌃 ।
𑌸𑍍𑌰𑌗𑍍𑌭𑌿𑌰𑍍𑌭𑍂𑌷𑌿𑌤𑌮𑌰𑍍𑌚𑌿𑌤𑌂 𑌵𑌰𑌧𑌨𑍁𑌰𑍍𑌮𑌾 𑌮𑍇𑌤𑌿 𑌵𑌾𑌦𑌾𑌤𑍍 𑌪𑍁𑌰𑌃
𑌪𑍍𑌰𑌾𑌗𑍃𑌹𑍍𑌣𑌾𑌃 𑌸𑌮𑌰𑍋𑌪𑌯𑌃 𑌕𑌿𑌲 𑌸𑌮𑌾𑌕𑍍𑌰𑌾𑌕𑍍𑌷𑍀𑌰𑌭𑌾𑌂𑌕𑍍𑌷𑍀𑌰𑌪𑌿 ॥𑍮॥

𑌶𑍍𑌵𑌃 𑌕𑌂𑌸𑌕𑍍𑌷𑌪𑌣𑍋𑌤𑍍𑌸𑌵𑌸𑍍𑌯 𑌪𑍁𑌰𑌤𑌃 𑌪𑍍𑌰𑌾𑌰𑌂𑌭𑌤𑍂𑌰𑍍𑌯𑍋𑌪𑌮-
𑌶𑍍𑌚𑌾𑌪𑌧𑍍𑌵𑌂𑌸𑌮𑌹𑌾𑌧𑍍𑌵𑌨𑌿𑌸𑍍𑌤𑌵 𑌵𑌿𑌭𑍋 𑌦𑍇𑌵𑌾𑌨𑌰𑍋𑌮𑌾𑌂𑌚𑌯𑌤𑍍 ।
𑌕𑌂𑌸𑌸𑍍𑌯𑌾𑌪𑌿 𑌚 𑌵𑍇𑌪𑌥𑍁𑌸𑍍𑌤𑌦𑍁𑌦𑌿𑌤𑌃 𑌕𑍋𑌦𑌂𑌡𑌖𑌂𑌡𑌦𑍍𑌵𑌯𑍀-
𑌚𑌂𑌡𑌾𑌭𑍍𑌯𑌾𑌹𑌤𑌰𑌕𑍍𑌷𑌿𑌪𑍂𑌰𑍁𑌷𑌰𑌵𑍈𑌰𑍁𑌤𑍍𑌕𑍂𑌲𑌿𑌤𑍋𑌽𑌭𑍂𑌤𑍍 𑌤𑍍𑌵𑌯𑌾 ॥𑍯॥

𑌶𑌿𑌷𑍍𑌟𑍈𑌰𑍍𑌦𑍁𑌷𑍍𑌟𑌜𑌨𑍈𑌶𑍍𑌚 𑌦𑍃𑌷𑍍𑌟𑌮𑌹𑌿𑌮𑌾 𑌪𑍍𑌰𑍀𑌤𑍍𑌯𑌾 𑌚 𑌭𑍀𑌤𑍍𑌯𑌾 𑌤𑌤𑌃
𑌸𑌂𑌪𑌶𑍍𑌯𑌨𑍍 𑌪𑍁𑌰𑌸𑌂𑌪𑌦𑌂 𑌪𑍍𑌰𑌵𑌿𑌚𑌰𑌨𑍍 𑌸𑌾𑌯𑌂 𑌗𑌤𑍋 𑌵𑌾𑌟𑌿𑌕𑌾𑌮𑍍 ।
𑌶𑍍𑌰𑍀𑌦𑌾𑌮𑍍𑌨𑌾 𑌸𑌹 𑌰𑌾𑌧𑌿𑌕𑌾𑌵𑌿𑌰𑌹𑌜𑌂 𑌖𑍇𑌦𑌂 𑌵𑌦𑌨𑍍 𑌪𑍍𑌰𑌸𑍍𑌵𑌪-
𑌨𑍍𑌨𑌾𑌨𑌂𑌦𑌨𑍍𑌨𑌵𑌤𑌾𑌰𑌕𑌾𑌰𑍍𑌯𑌘𑌟𑌨𑌾𑌦𑍍𑌵𑌾𑌤𑍇𑌶 𑌸𑌂𑌰𑌕𑍍𑌷 𑌮𑌾𑌮𑍍 ॥10॥

Browse Related Categories: