॥ ద్వాదశ స్తోత్రాణి॥
అథ ప్రథమస్తోత్రమ్
వన్దే వన్ద్యం సదానన్దం వాసుదేవం నిరఞ్జనమ్ ।
ఇన్దిరాపతిమాద్యాది వరదేశ వరప్రదమ్ ॥ 1॥
నమామి నిఖిలాధీశ కిరీటాఘృష్టపీఠవత్ ।
హృత్తమః శమనేఽర్కాభం శ్రీపతేః పాదపఙ్కజమ్ ॥ 2॥
జామ్బూనదామ్బరాధారం నితమ్బం చిన్త్యమీశితుః ।
స్వర్ణమఞ్జీరసంవీతం ఆరూఢం జగదమ్బయా ॥ 3॥
ఉదరం చిన్త్యం ఈశస్య తనుత్వేఽపి అఖిలమ్భరమ్ ।
వలిత్రయాఙ్కితం నిత్యం ఆరూఢం శ్రియైకయా ॥ 4॥
స్మరణీయమురో విష్ణోః ఇన్దిరావాసముత్తమైః । వర్
ఇన్దిరావాసమీశితుః ఇన్దిరావాసముత్తమమ్
అనన్తం అన్తవదివ భుజయోరన్తరఙ్గతమ్ ॥ 5॥
శఙ్ఖచక్రగదాపద్మధరాశ్చిన్త్యా హరేర్భుజాః ।
పీనవృత్తా జగద్రక్షా కేవలోద్యోగినోఽనిశమ్ ॥ 6॥
సన్తతం చిన్తయేత్కణ్ఠం భాస్వత్కౌస్తుభభాసకమ్ ।
వైకుణ్ఠస్యాఖిలా వేదా ఉద్గీర్యన్తేఽనిశం యతః ॥ 7॥
స్మరేత యామినీనాథ సహస్రామితకాన్తిమత్ ।
భవతాపాపనోదీడ్యం శ్రీపతేః ముఖపఙ్కజమ్ ॥ 8॥
పూర్ణానన్యసుఖోద్భాసిం అన్దస్మితమధీశితుః ।
గోవిన్దస్య సదా చిన్త్యం నిత్యానన్దపదప్రదమ్ ॥ 9॥
స్మరామి భవసన్తాప హానిదామృతసాగరమ్ ।
పూర్ణానన్దస్య రామస్య సానురాగావలోకనమ్ ॥ 10॥
ధ్యాయేదజస్రమీశస్య పద్మజాదిప్రతీక్షితమ్ ।
భ్రూభఙ్గం పారమేష్ఠ్యాది పదదాయి విముక్తిదమ్ ॥ 11॥
సన్తతం చిన్తయేఽనన్తం అన్తకాలే । (అన్త్యకాలే విశేషతః)
నైవోదాపుః గృణన్తోఽన్తం యద్గుణానాం అజాదయః ॥ 12॥
ఇతి శ్రీమదానన్దతీర్థభగవత్పాదాచార్య విరచితం
ద్వాదశస్తోత్రేషు ప్రథమస్తోత్రం సమ్పూర్ణమ్
